المرجع لمحلات قطع غيار وأماكن موثوقة لصيانة أوبل خارج التوكيل

[mostafaomran]

أنا بصراحة على وشك اكون اوبلاوى جديد ، ولقيت ان قسم اوبل جامد جدا بس مش ناقصه غير مكان واحد يتجمع فيه معلومات عن اى حاجة الواحد محتاجها للصيانة خارج التوكيل، كلنا عارفين اد ايه التوكيل غالى ومبالغ فى اسعار حاجات كتير، وفى نفس الوقت العربية مش بتاعة عك وقطع غيار مضروبة او اى حد يمد ايده ويعك فيها، علشان كده باقترح يبقى ده مرجع لأى حد عايز يعمل صيانة لعربيته فى مكان محترم وموثوق خارج التوكيل.

يا ريت الناس تكتب مداخلاتها على الشكل الاتى:

نوع الخدمة: محل قطع غيار (جديد ولا استيراد) - كهربائى - ميكانيكى - عفشة - سمكرة و دوكو - الخ
الاسم: اسم الشخص او المحل
العنوان: مفصل قدر الامكان
رقم التليفون:
ملاحظات: اى توصيات او ملاحظات عن المكان
ا

[Ahmad Allawy]

نوع الخدمة: كهربائي - ميكانيكي - عفشة - تكييف - بعض قطع الغيار استيراد
الاسم: احمد عبد الراضي
رقم التليفون: أحمد عبد الراضي 0121181610
محمد عبد الراضي (أخوه) 0103486261
العنوان: تاخد طريق الاوتوستراد اتجاه المعادي.. و اول ما تلاقي الطريق الدائري فوق بالعرض كده.. تاخد يمين.. بعده بشوية صغيرة جدا هتلاقي طريق خدمات.. ادخل فيه.. و اول فتحة يمين تدخل فيها.. و امشي شوية صغيرة كده و هتلاقي اسطول عربيات اوبل واقفة هناك.. ده احمد عبد الراضي..
ملاحظات: ماعرفش ظروف مصاريفه ولا مصنعياته ايه.. عشان انا ماتعاملتش معاه. بس في اخوة هنا كتير اتعاملوا معاه و بيقولوا انه ممتاز..

[Ahmad Allawy]

نوع الخدمة: ميكانيكا و عفشة
الاسم: فادي
التليفون: المحل: 27033702
الموبايل: 0181861139
العنوان:تاخد طريق الاوتوستراد اتجاه المعادي.. و اول ما تلاقي الطريق الدائري فوق بالعرض كده.. تاخد يمين.. بعده بشوية صغيرة جدا هتلاقي طريق خدمات.. ادخل فيه تفضل ماشي لحد موقف اوتوبيس صقر قريش.. و تدخل من هناك يمين.. و تفضل ماشي ف الشارع ده لحد الاخر..هتلاقي محل كشري ف الوش.. و الشارع بيميل كده شمال سنة.. تكمل برضه.. لخد الاخر.. هتلاقي شارع بالعرض..ادخل فيه يمين.. خطوتين هتلاقي مطب صغير و بعده علي طول شارع شمال.. تدخل فيه.. نازل كده.. تمشي فيه لخد ما تلاقي مستشفي الهيئة العربية للتصنيع.. في شارع علي ناصيتها اتجاهين كده و فيه جزيرة ف النص.. سيبه و ادخل اليمين اللي بعديه علي طول.. هتلاقي الورشة في وشك كده فوق الرصيف.. و جنبها صيدلية..

هو معندوش كهربائي.. بس ميكانيها وبس.. وفي حد بيتعامل معاه بتاع تكييف بس بيجيبه بالطلب.. مش موجود عنده دايما يعني.. انا عارف شغله و مجربه و زي الفل..
هو مؤخرا جاب الجهاز.. الاسكانر. لو حد عنده مشكلة ف الكومبيوتر.. و لمبات الاعطال.. و مش اوبل وبس.. يبشتغل علي ماركات تانية.
و هو بالمناسبة شغال برضه في اوبل و فولكس و سيات.. و اودي.. لأنه حاليا شغال في ارتوك توكيل سكودا و كله دبليو في تكنولوجي

[Ahmad Allawy]

نوع الخدمة: قطع غيار جديدة
الاسم: امريكان ستار
التليفون: 25791402 - 25791403 - 25777408
العنوان: 39 و 46 شارع شمبليون
تعرفوا طلعت حرب مول؟ تدخل ف الشاره اللي هو علي ناصيته.. اللي فيه سينما اوديون
و تمشي فيه لحد ما تلاقي شارع بالعرض.. اسمه شارع شمبليون
تدخل شمال.. و مسافة حوالي 30 متر.. هتلاقيه علي شمالك..

ملاحظات: يعتبر الافضل في قطع الغيار الجديدة.. وهو بيورد لمقار بعض قطع الغيار علي فكرة..
و اسعاره مش مبالغ فيها.. بس ممكن تفاصلوا معاه عادي.. باتعامل معاهم من اول ما جيبت العربية..
و مرتاح معاهم بصراحة

[Ahmad Allawy]

نوع الخدمة: قطع غيار جديدة
الاسم: سرور
التليفون:25758011
العنوان: في الشارع اللي فيه سينما اوديون اللي علي ناصيته طلعت حرب مول.. تمشي فيه لحد ما تلاقي شارع شمبليون بالعرض.. هو علي الناصية تقريبا.. هتلاقيه علي يمينك..

ملاحظات: سعره غالي شوية.. و اوقات بيحصل غلط في قطع الغيار عنده..
بمعني انه بيديلك حاجة علي انها الماني و هي مش كده..ممكن تكون اتحاد اوروبي او دنماركي
وده حصل مع اخ لينا ف المنتدي هنا.. و بطل يتعامل معاهم.. بس ادينا بنقول المعلومات الكاملة..

[Ahmad Allawy]

نوع الخدمة: قطع غيار جديدة
الاسم: الغنيمي
التليفون: مش عارف ارقام بصراحة
العنوان:تاخد طريق الاوتوستراد اتجاه المعادي.. و اول ما تلاقي الطريق الدائري فوق بالعرض كده.. تاخد يمين.. بعده بشوية صغيرة جدا هتلاقي طريق خدمات.. ادخل فيه تفضل ماشي لحد موقف اوتوبيس صقر قريش.. و تدخل من هناك يمين.. و تفضل ماشي ف الشارع ده لحد الاخر..هتلاقي محل كشري ف الوش.. و الشارع بيميل كده شمال سنة.. تكمل برضه.. لخد الاخر.. هتلاقي شارع بالعرض..خد اليو ترن.. و ارجع تاني في نفس الشارع اللي انت فيه.. هو في اول او تاني شارع يمينك علي بعد حوالي 20 متر عن الشارع الرئيسي اللي انت داخل منه علي شمالك..

ملاحظات: اسعاره غالية شوية.. بس ماركات نضيفة.. و معظم الحاجات موجوده

[ahmedmaklad]

الحرفيين

جربت تنزل الحرفيين هي فيها بجد حاجات كتير اوي جرب تنزل الحرفيين في كتيييييييير هناك و ممكن اقولك على ناس منهم
1 - العايدي و ده في اول شارع الحرفيين شاب كويس و محترم و هتلاقي عنده حاجات كتيير
2- الشيخ احمد مكاوي ده راجل محترم اوي عنده ورشة بس مش قد كده و ده في الشارع اللي ادام الجامع و لو مش عنده ممكن يجيبهالك من بره
3- مركز الشاطر و ده برده في الشارع اللي ادام الجامع هتلاقي يافطة كبيرة عالية على عماره كده بس خليه اخر اختيار
4- في ناس تانية اسمهم النواصره و هما في شارع الحرفيين نفسه اللي بيطلعك على الجامع على اليمين و كويسين برده
انا جربت الناس ده كلها بس احسنهم العايدي و احمد مكي
و ممكن تسال العايدي على واحد هناك اسمه محمود اوبل ده كهربائي بس واد جدع قوي و فاهم كان بيشتغل في التوكيل و ممكن تلاقي عنده حاجة او يدلك او يركبهالك بس قوله انك من طرف م/احمد بتاع اكتوبر العربية الكحلي

[ahmedmaklad]

في ميكانيكي اسمه م/ محمد في اخر الشارع بتاع الشيخ احمد مكاوي هو كويس قوي و عنده صنايعية كويسين و عندة السكانر بتاع العربية هو كان شغال في التوكيل و في الشيخ هيثم برده نفس الموضوع

[Ahmad Allawy]

ايه رأيكم يا جماعه كل اللي يعرف مكان يقول جميع تفاصيله.ز عشان انا عن نفسي في اوقات.. باكون مسافر برة القاهرة.. و بابقي عايز اكون عارف اماكن مراكز صيانة ف المكان اللي انا رايحه.. عشان احتياطي.. و اكون مطمن..

يا ريت بجد.. اللي يعرف حاجة يقولنا..

[abouzahra]

لقد سبق تحذيركم العديد من المرات بعدم وضع إعلان إلا بعد الرجوع للإدارة لكن حضرتك لم تقم بالتنسيق مع الإدارة

هذه الموضوع خاص بتجارب الأعضاء و ليس للإعلانات

سضطر أسفين لوقف عضويتك

إ.م.3

[Ahmad Allawy]

جميل.. يا ريت يا جماعه اللي عنده صنايعيه في اليكس.. يفيدونا.. عشان معندناش اي معلومات عن حد هناك..

[Mustafa_Farouk]

السلام عليكم

أنا فعلاً معجب جداً ب الموضوع دة وإن شاء الله نستفيد به كلنا.

[Ahmad Allawy]

والله كل اللي ناقص فعلا.. شوية مراكز برة القاهرة..

[Ahmad Allawy]

نوع الخدمة:ميكانيكى - كهربائي
الاسم: مركز الوليد
العنوان: 12 أو 13 ش السلام قصاد كلية التربية الرياضية فيصل
رقم التليفون: غير متوفر
ملاحظات: معندوش سكانر.. لكن بيتصرف.. ممكن يروح معاك لحد عنده و يشوفها..

المكان ده اللي قال عليه الاخ الفاضل 241mph في موضوع قديم شوية من كام شهر..

[Ahmad Allawy]

نوع الخدمة:قطع غيار جديد
الاسم: أسامة اوبل
العنوان: اخر فيصل تحت برج الأطباء قبل طلعة الكوبري يمين
رقم التليفون: غير متوفر
ملاحظات: الراجل اللي بيشتغل هناك اسمراني كده وقصير شوية و اسمه وائل
المكان ده اللي قال عليه الاخ الفاضل 241mph في موضوع قديم شوية من كام شهر..