بخصوص مرور السلام والاميرية ممكن حد يفيدنى؟

[failasouf]

انا فى البطاقة عنوانى المرج القاهرة
لما حبيت اطلع رخصة قيادة وروحت مرور السلام قالولى روح الاميرية وبصراحة كنت مبسوط اوى انى هاترحم من السلام وفاكر ان فى موظفة قالتلى ان الملاكى اتنقل للاميرية

دلوقتى انا هارخص عربية جديدة اروح الاميرية ولا السلام
يعنى فعلا الملاكى اتنقل للاميرية ؟
وهل ممكن اعمل الرخصة فى الاميرية ولما اجى ارخص العربية يقولولى انت تابع للسلام؟

[swimmer25]

مادام القيادة من الأميرية يبقى الترخيص من هناك كمان
وعلى فكرة الفرق مش كبير بين الأميرية والسلام..الإتنين زبالة وزحمة
لو العربية جديدة روح إركن هناك وهات ورق ترخيص جديد وفحص من المرور بعدد سنين الترخيص وإطلع خد عربيتك عشان الفحص
الفحص جنب المستشفى اللي هناك أول ما تدخل شارع المرور بعد المستشفى يمين
خلص الفحص وإدخل المرور هات تأمين إجباري بشهادة البيانات وإختم ورقة الطفاية
بعدها إطلع إعمل إستعلام على شهادة البيانات في الدور الأول وفوق هيقولك ألف مبروك يا باشا
بعدها إنزل قدم ورقك في الشباك ومتنساش تملا نموذج الترخيص ببياناتك وبيانات العربية ومتنساش تاخد معاك قلم طبعا
هيبعتك تاخد رقم لوحات جديد في شباك اللوحات وترجعله
تخلص الشباك فحص ورق ويكتبلك الضريبة وتروح الخزينة تدفع الضريبة وترجع الشباك وبعدها تستنى الرخصة برا

بالتوفيق