السلام عليكم و رحمة الله و بركاته
عندي قصه مش قصيره عايز أشاركها معاكم ....
أنا حجزت ال FRV من البافاريه شرم الشيخ من يوم 28/10 و قعدت مستني لغايه يوم 25/11 و كل شويه كانوا بيأجلوا الميعاد كام يوم أو أسبوع لغايه ما خلاص جبت أخري منهم خصوصا ان أنا محتاج فعلا عربيه لان المواصلات في شرم غاليه جدا فأضريت أني أأجر عربيه دايو علشان أقضي بيها مشاوير شغلي ومع تأخير الميعاد عدا شهر و أضريت تاني أأجر عربيه و المره دي كانت فيرنا ....
لغايه ما في يوم عرفت عن طريق عضو عزيز أسمه Mesmesh ان اللي عايز يشتري كاش ممكن يجيب فوري من أي معرض و لأني أول مره أشتري عربيه في حياتي مكنتش أعرف كده.وبحب أشكره جدا على المعلومه دي
فقررت أسحب فلوسي من البافاريه شرم علشان أقدر أجيبها من اي حته تانيه حتى لو بأكثر شويه مش مشكله لاني فعلا محتاج عربيه بسرعه و مقتنع جدا بال FRV >>بس العلوج بتوع البافاريه مع انهم قالوللي قبل كده علشان التأخير ده و أنا حاجز من فتره كبيره أني هأخد فلوسي كلها لو عايز أكانسل , كانوا عايزين يخصموا مني قال 10% من توتال المدفوع (40000) بس طبعا كان رد فعلي في العش ولا طار ...عملت معاهم مشاكل كتيير استمرت لمدة 3 أيام لغايه ما أخدت فلوسي كلها والحمد لله.لأن حتة ال 10% مش موجوده في الوصل اللي معايا أساسا.
فبدأت أدور على العربيه دي في المعارض اللي في شرم وللأسف ملقتهاش فسألت صديق ليه فاهم شويه في قصص العربيات دي ...فقاللي سيبني أشيك لك عليها في الاسماعيليه - لأنه من هناك و يعرف ناس هناك - و فعلا الحمد لله لقتها في معرض أسمه راما موتورز و رحت خلصت فيها و لأني أنا من السويس و كنت أخذت أجازه قصيره جدا - 3 أيام - فأستلمتها - والحمد لله على ما فات و على ما سيأتي - في أخر الاجازه- أنا جبتها سيلفر low line و اشتريتها ب 78000 توتال - و طلعت جري ع الشرم ولأني هأرخص - لازم - من جنوب سيناء أخدت من المعرض نمره تجاري لان الأجازات بتاعة الأسبوع اللي فات كانت و ما زالت معطله ورق الجمارك اللي المفروض أرخص بيه العربيه...
المهم مسكت الطريق من الاسماعيليه في اتجاهي للشرم و دي كانت أول مره فعلا أسوقها العربيه و كنت قلقان جدا خصوصا أني لسه مأمنتش عليها - بس ناوي ان شاء الله على شركه اسمها وثاق ب 2150 في السنه - للي ما يعرفش طريق شرم الشيخ سييء جدا و مشهور بالحوادث خصوصا بليل ....بس الحمد لله تقييمي للعربيه كالتالي : صوت الموتور هادي وكويس جدا مع ان البعض قال ان في أول 2000 لغايه تغيير أول زيت بيكون صوتها عالي , بس أنا شايف أن صوتها ممتاز ...الثبات بتاع العربيه فعلا كويس جدا جدا جدا و لأن ما ينفعش أزود ال RBM عن 3 فكانت سرعتي ما بتعديش 110 بس كان في دورانات مفاجئه لاني كنت أول مره أسوق بنفسي على الطريق ده فكان في مفاجئات كتيير بس العربيه فعلا ساعدتني جدا أني أوصل بالسلامه - طبعا بعد ستر ربنا - ربنا يستر طريقكم و طريقي دايما يا رب.
الفرامل بتاعتها فوق الممتازه و بتخلي التحكم الاجمالي في العربيه كويس جدا. الساوند سيتسم رائع لدرجه أني كنت ناوي أحط - في التوكيل طبعا - سماعتين ورا بس بعد ما جربته بنفسي غيرت رأيي.كان في شوية عربيات - زي ما سمعت من الناس اللي جابوها في المنتدى - فيها المساحات مش مضبوطه واللمبه اللي على النمره من ورا بيقولوا أنها بتسيح البلاستيك اللي حواليها - بس الحمد لله أنا معنديش المشكلتين دول. المرايات و الا ضاءه عموما كويسه جدا.
أنا أسف لو طولت عليكم بس حبيت أشاركم وأطمن اللي مستني يستلم وشكرا لسعة صدركم و السلام عليكم ورحمة الله و بركاته.
المفضلات