حرارة العربية رفعت والميه راحت ع القربة

[mhopa2440]

السلام عليكم

عربيتي كيا سبكترا 2002 وانا ماشي لقيت عداد الحرارة رفع من تحت النص بشرطة لفوق النص بشرطة واتنين وترفع وتنزل

قلت اشوف الميه والدنيا فيها ليه

اولا مفيش اي تسريب نهائي نهائي فتحت غطاء الردياتير بالراحة لقيت ضغط كبير جدا جوه

سبت العربية تهدة ثواني وبدات اشغلها وازود ميه العربية اخدت تقريبا 1.5 لتر مياه دا طبعا كتير جدا

المفاجأة اني لما فتحت القربة عشان ابص عليها لقيتها مليانه ميه عى الأخر مع انها ف الاساس بتكون النص بس

تحليل سريع الميه مشيت من الردياتير راحت القربة ودا سبب ارتفاع الحرارة الميكانيكي قالي غير غطاء الرديتاير (((صح كدا ولا حاجة تانية))

بس بعد ما مشيت بالعربية رفعت حرارة تاني ومازال المشكلة موجودة

شكرا للجميع،ـ،،

[tasaka]

خلى بالك الكيا القديم حساس جدا جدا للحراره .. يعنى لا تمشى عليها كده و الا ممكن جدا تجيب معاك وش سلندر

و المفروض برضه على حد فهمى انك كنت سيبت العربيه تبرد شويه ربع ساعه مثلا قبل ما تفتح الغطاء و تزود

- غير الغطاء الاول بواحد اصلى .. و جرب بس ما تخليش العربيه تسخن منك

- لو كنت بتستعمل ميه عاديه .. نظف الدوره .. و استعمل ميه رادياتير .. و جرب بس ما تخليش العربيه تسخن منك

- لو لسه المشكله موجوده .. شيل ثرموستات الكوع و جرب من غيره .. و شوف ان كانت المشكله راحت .. يبقى جيب ثرموستات جديد ( يعنى ما تلغيش الثرموستات مهم جدا )

- او روح لبتاع رادياتير و اتأكد انه سالك قبل ما تشيل الثرموستات

السخونه على السرعه البطيئه و بتبرد على سرعه عاليه .. يبقى راجع على المراوح

السخونه على سرعه عاليه .. يبقى راجع على الرادياتير و الغطاء