فكرة لتعديل أعلى فئة من صني لتتفوق على لوجان لكن هل تنفع؟ أرجو الرد بسرعة قررت اشتري

[m-sabry]

ينفع اجيب صني زيرو واركبلها مثبت ومحدد سرعة وكاست USB وجهاز gps ؟ أصل دي نقط تفوق اللوجان عليها

ياجماعة انا محتار بين النيسان صني أعلى فئة والرينو لوجان أعلى فئة بالنافيجيتور وبعد مقارنات كتيرة لقيت الفرق كالآتي:

النيسان صني تتفوق في:
مرايات يمكن طيها كهربائياً
زرار تشغيل /ايقاف المحرك (مفتاح زكي)
واسعة جداً من الداخل خصوصا الكبنة الخلفية ويوجد فتحة تكييف للكنبة الخلفية وبسرعتين مروحة
يمكن طي الكرسي الأوسط بالكنبة الخلفية ليتحول لمسند يد به 2 حامل اكواب
شكل السيارة من الخارج فخم جداً بالذات من الامام ويعطي إحساس بالرفاهية (لكن شكلها من الخلف مش حلو اوي بصراحة)
الزجاج الخلفي فاميه (اما الامامي فهو عادي)
بيقولوا ان قطع غيارها متوفرة جداً خارج التوكيل وبسعر رخيص (بس انا بصراحة معنديش خبرة في الموضوع ده أما قطع غيار الرينو فبيقولوا انها مش متوفرة بسهولة خارج التوكيل ولو لقيتها هتلاقي سعرها مش رخيص بسبب ندرتها)


أما اللوجان فتتفوق في الآتي:
بها مثبت ومحدد سرعة speed limiter / cruise control
كاسيت يوجد به USB وشاشة 7 بوصة + نظام ملاحة بخرائط ال GPS (ويمكن تحديثها بالخرائط الجديدة وملف للنطق بالعربي والانجليزي للتوجيه أثناء القيادة)
مساحة السيارة من الداخل واسعة أيضاً والفرق بينها وبين الصني معقول (مش اصغر كتير يعني)
مساحة الشنطة 510 لتر (اما مساحة شنطة النيسان فهي 490 يعني الفرق بسيط اوي)

وبصراحة انا يهمني جداً توافر قطع الغيار وبسعر معقول علشان كده بفكر أجيب النيسان صني وعاوز أعرف منكم هل ممكن أركبلها الحاجات اللي موجودة في اللوجان ومش موجودة فيها ؟؟ يعني هل ممكن أركبلها كاسيت فيه USB وبشاشة وفيه جهاز GPS ؟؟ وياترى الحاجات دي موجودة أساساً وينفع أركبها من غير ما الضمان يروح ؟ (حتى لو هركبها في التوكيل او موزع معتمد مفيش مشكلة)
وهل يمكن تركيب مثبت ومحدد سرعة للصني أيضاً ؟؟؟

لو ده نفع هبقى جبت عربية قطع غيارها متوفرة ورخيصة وتغلبت على نقاط تفوق اللوجان اللي انا اساسا كان نفسي اجيبها بس خايف من توافر قطع غيارها.. وكمان ابقى استفدت من نقاط تفوق الصني (الزجاج الفاميه والمرايات اللي بتقفل كهربا والوسع والفخامة والمفتاح الذكي ...

أفيدوني أفادكم الله انا خلاص على وشك الشراء ان شاء الله .. وادعولي بالتوفيق للي فيه الخير ان شاء الله

[Mohamed Desoky]

السلام عليكم ورحمة الله وبركاته حضرتك بتقارن النيسان صنى اليابانيه والرينو لوجان اى رينو خصاره فيها الفلوس نصيحه لكل الناس ابعد عن الرينو ؟؟؟

[m-sabry]

شكرا على النصيحة انا فعلاً على وشك اختيار النيسان.. بس لا خاب من استخار ولا ندم من استشار..

[tamertolba]

مع احترامي لكلام حضرتك انت كده مش بتقارن عربيتين ببعض انت بتقارن الاوبشنز اللي في العربتين وسايب جوهر الموضوع ولو حضرتك عايز رأي بصراحه العربيتين دول ملهومش اي تلاته لازمه

اما بالنسبة لموضوع الرينو اللي خساره فيها الفلوس ده كلام كان مظبوط لكن دلوقت معتقدش

[ms6118]

بدايه انا مش معايا صني ولا لوجان

بس انا مندهش من كلام الاستاذ اللي بيقول صني ياباني ولوجان ولا ليها لازمه


صني مكونتها صيني وبتتجمع في مصر

لوجان مكونتها تركي وبتتجمع في المغرب