لية التوكيل بيسلم في شهور لما التجار بيسلموا في يومين

[hero]

دة نص اعلان علي النت :

"تويوتا كورولا 2017 زيرو وكيل الشكل الجديد الفئة الثانية
اللون اسود او سلفر حسب الاتاحه في التوكيل
بجواب المرور استلام خلال اياام ان شاء الله رجاء الاتصال للجادين "


يعني التاجر اصلا ما يعرفش اية ايلي موجود..و هايسحب من التوكيل...
يبقي لية التوكيل ما بيسلمش في اسبوع او حتي شهر...لية 4 شهور....

[egyptiandiver]

Corruption... they divide the profit together

[hom1969]

الموضوع بسيط
هو التاجر حاجز من 4 شهور و حاطط 2 اوبشنز للون

[hero]

حاجز من اربع شهور ازاي اذا كان الحجز مقفول من يجي سنة...
ولا هو مفتوح للتاجر و مقفول للمستهلك ؟؟
الحجز ما تفتحش الا لما التجار استلموا ...و عارضين باوفر برايس 45 الف جنية...

[MADMIDO]

عشان المفروض التوكيل بيستورد لك العربيه مخصوص او يصنعها لكن التاجر العربيه متلقحه عنده يبيعها لاغلي سعر

[Tamer Elkateb]

يعنى صراحة انا مش فاهم . الكورولا مرمية فى كل المعارض باوفر 30 الى 50 الف جنيه والوكيل المحترم بيقول الاستلام بعد 6 شهور. يعنى هو الوكيل مش عارف التجار. لا ده عارفهم كويس جدا واللى بيحصل ده فساد. عموما انا عارف ان محدش يقدر يكلم الوكيل ده لانه تبع الكفيل الاماراتى. الحل الواحد يدور على ماركة تانية والسلام!!

[mr_green]

الكلام من ناس فى المبيعات بتاعت التوكيل نفسه :

سياسة التوكيل تعطيش السوق
فتفضل العربية ماسكة سعر عالى و مكسبه يزيد
و حسبى الله و نعم الوكيل

[MADMIDO]

هههههههههههههههه واضح انهم بيقسمو الاوفر برايس بالنص و غير كده الوكيل بينصب ع الشركه الام الطبيعي ده غير العربيه تبقي حاجز العربيه بتمن 3 قروش ساعه الاستلام السعر يرفع 5 قروش هو بيخلي القرسين لنفسه

[tamer_ali2666]

نفس المشكلة تعرضتلها في صنى 2017 وبتحليل الى بيحصل مفيش الا احتمال واحد مالوش تانى ان دول شوية عصابات مجرمة بيلعبو بالمستهلكين كيفما شائوا لسان حالهم ننفع المعارض ونستنفع سواءا مقابل رشاوى من المعارض او مقابل ان بيقلل المعروض من خلال بيع كل منتجاته للمعارض وركن الزبون ع الرف 5 شهور بدون تحديد سعر ثابت فيظطر المسكين انه يشترى بأعلى من السعر الرسمى 30 الف من اي معرض الى هم اصلا موحدين سعر النصباية بين بعضيهم فتلاقى كل المعارض حاطة اوفر برايس 30 الف مهما لفيت واذا حد نزل هينزل الف ج فقط والى حصل كالاتى في شهر 8 - 2016 تم السؤال عن صنى 2017 اول فئة في جميع المعارض تقريبا وكان سعر النصباية الموحد لجميع المعارض 157 توجهنا للتوكيل بعد واسطة من واحد يعرف مدير المبيعات فقالنا السعر الرسمي 127 الف والاستلام خلال 5 شهور علما بان المصنع بيطلع عربيات يوميا متسقعه محدش بيشتريها غير المعارض مقابل تزويد السعر في عربية 50% منها مكون مصري وافقنا على الحجز وعرفت ان دورى حوالين ال 30 يعنى قول حوالى 50 واحد فقط هم الى طالبين العربية من الوكيل يعنى لو حب يوفر ال 50 عربية في 3 ايام وهو الوكيل الرسمى هيعرف بدون ادنى جهد وقلت في بالى حتى لو زادت خلال ال 5 شهور هتزيد 5 الاف نتيجة مسخرة الدولار ومسخرة الى مسخر الدولار ومسخر البلد كلها وافاجئ انها بعد العيد باسبوع رغما استقرار وهمى للدولار عند 12.5 الوكيل يرفع السعر من 127 الى 150 الف والمعارض ترفع من 157 الى 177 ومتوقع انها ترفع خلال 5 شهور الانتظار كمان 20 يبقى رفع عليك السعر حوالى 40 الف عن وقت الحجز طبعا لا اعيب فقط على وكيل نصاب ومعارض جشعه واجهزة رقابية لاتتحرك الا لحماية عسكر الدولة ومن عسكرها انما المشكلة الكبيرة فينا ياسادة ان احنا بنجيب هذه البضاعه العفنه اولا بقيمة اعلى بحوالى 40% بسبب الجمارك ثم بسعر اعلى 30 % عن سعر الوكيل ونجرى ورا سراب فنشجع مافيا ان تتحكم فينا بالظبط بالظبط زى الى بيجرى يشترى البوم لمغنى ساقط فيشجعو انه يطلع اتنين وتلاته ولو قاطعه الناس لاماتو باطله وطبعا النهاية انى صرفت نظر وهجيب حاجة مستعملة .

[sas5]

دة نص اعلان علي النت :

"تويوتا كورولا 2017 زيرو وكيل الشكل الجديد الفئة الثانية
اللون اسود او سلفر حسب الاتاحه في التوكيل
بجواب المرور استلام خلال اياام ان شاء الله رجاء الاتصال للجادين "


يعني التاجر اصلا ما يعرفش اية ايلي موجود..و هايسحب من التوكيل...
يبقي لية التوكيل ما بيسلمش في اسبوع او حتي شهر...لية 4 شهور....

صباح الفل
انا قرايت هذا الاعلان مثلما حضرتك قرائته هذا واحد حاجز من شهر ابريل الماضى ولم يكمل باقى قيمه السياره وفيه ناس استلمت وكانت حاجزه بعده وفاكر ان التوكيل مجرد ان ينزل السيارات سوف يعطيه الاولوليه فى التسليم .
الاوليه فى التسليمات من واقع خبرتى للى دافع اجمالى المبلغ ثم ينظر بعد ذلك لتاريخ الحجز بس لازم على الاقل يكون عدى شهرين او ثلاثه وانت حاجز
مبدئيا مفيش الفئه الثانيه تسليمات على الاقل لمده شهر او شهر ونصف يعنى طلع نقبه على شونه المتاح خلال الفتره الحاليه هو الفئه الاولى وسمعت ان بتوع التوكيل مرحبين باى شخص يريد عمل داون جريد من الفئه الثانيه الى الفئه الاولى بشرط ان يكون له اولويه حجز.
توضيح بسيط شحنه التجار غير شحنه الوكيل فدائما يوجد سيارات فى المنطقه الحرخ والتاجر بيشترى حصه مثلا 10 سيارات بالدولار ويقوم بالاستلام فى المنطقه الحره ويقوم هو شخصيا بالتخليص على الجمارك وهذا هو سبب وجود فارق بين سعر التاجر وسعر الوكيل .
حبيت اكتب هذا التوضيح من خلال ترددى على شركه تيوتا عرفت هذه المعلومات ولكن المشكله انهم مبيعطوش معلومات صحيحه من اول مره يفضل يلاوع ولازم استخلص المعلومه من اشخاص مختلفين وتبدا تربط المعلومات مع بعضها