الى خبراء الكنترول لكيا شوما 2001

[ahmedwk2music]

عندى عربية كيا شوما 2001 .. فى يوم مدارتش وجبت كهربائى قالى الكنترول فيه مشكلة ... ازاى عرف ؟ مهو جاب معاه كنترول وركبه العربية دارت ... قالى روح الحرفيين عند ( فلان ) روحت لفلان وقلتله عالمشكلة قالى هعملهولك وقام اختفى شوية ورجع قالى اتفضل شغلتهولك وطبعا اديته المعلوم ورجعت فرحان عالعربية ودورت الحمد لله العربية دارت بس مروحة الريادتير كمان دارت باستمرار دون توقف مش بس كده كمان الايمو منور فى التابلوه ... مش بس كده كمان العربية كتير مبتدورش الا بالعافية روحت كشفت عليها بجهاز كشف الاعطال .. الفنى قالى عندك مشكلتين مشكلة المروحة ومشكلة الرشاشات بتطلع بنزين كتير على البوجيهات ومبتخليهاش تعمل اشتعال ... والحل ؟ قالى ارجع للى صلح الكنترول لان العيب فى الكنترول يا اما خد برمجة عربية غير الكيا يا اما هو غير مقاومة او حاجة مش نفس الرقم ... العربية مبرجلة وكتير مبتسحبش ومطلعة عينى فى الدوارة فى عز الصيف اومال فى الشتا هتعمل اية ؟. ومحدش يقول بطارية المهم روحت لفلان اللى عمل الكنترول وافتكس افتكاسته وادى بيا للوقف اللى انا فيه ... واحد قالى هات كنترول نفس الرقم وركبه العربية هتدور جبت كنترول نفس الرقم مدارتش خدت الكنرول وروجت لفلان وبعدين قالى لازم نفك الشفرة قلتله فكها والغى الايمو مش عايز ايمو بس العربية ترجع زى زمان ... المهم قالى ممكن متدورش برضة قلتله يعنى اية ؟
قالى هاتلك طقم دوارة ( مفتاحين طبعا وخلافه ) او تروح للاسطى فلان ده هيشوفلك حل روحت للاسطى فلان الكهربائى اللى فى الحرفيين متخصص الكيا قالى حل العربية اننا نجيب ضفيرة بكنترولها ونقلب حساس الاير ماس لمااب والعربية تبقى فلة طب انا احترت ... لو اتفكت ضفيرة العربية ؟ هل شكلها من جوه بعد الفك والتركيب هيبقى خلطبيطة ؟ هل ادائها هيبقى زى الاول ؟ معقول مفيش برمجة للكنترول الكيا شوما ؟ لو حصل ان الكنترول انفجر من غير الحلول اللى انا شايفها عقيمة دى مفيش حل ان الكنترول يجى غيره ويتبرمج عالعربية ؟ بالمناسبة كلمت التوكيل وقالولى مفيش كنترول ليها فى الشركة :( اية الحل ابوس العربية واركنها جنب الحيط واستعوض ربنا فيها ولا اعمل اية ارجوكم ساعدونى

[tasaka]

بص انا اتعرضت لمشكله كنترول فى شوما 2000 زمان اوى .. كانت سخنت و جابت جوان

و بعد ما خلصت .. كان فيه مشكله دواره العربيه بتدور مبرجله و على ما افتكر بتبطل ( بس موش متأكد و موش فاكر ) .. قالوا كنترول و بلوك و الخ .. جربت بكنترول تانى و نفس المشكله

و قالوا لى ضفيره كامله بكنترول .. و نفس الاشتغالات دى

انا كان معى عربيتين فمكنتش مهتم و سايبها عندهم ( يمكن شهرين ) .. و فى مره رحت لهم و انا بغلى من الغضب و طلبت تركيب كل حاجه و ان العربيه تطلع تتجرب .. برجلت اثناء المشى .. و اصريت انى استلمها و تكون سليمه

المهم العربيه كان فيها توصيلات غلط منهم .. و اتظبطت شويه بحيث تقدر تمشى من عندهم ..

و اخذتها عند كذا كهربائى ( نسيت اتصلحت ازاى ) .. و فى الاخر اتظبطت 100% و مشيت بيها سنتين بعدها

لا غيرت ضفيره و لا كنترول و لا بلوك .. كانوا الصنايعيه الزباله بيشتغلونى .. اكيد انا كنت باروح من هنا و هما يستعملوها .. او كانوا عايزين يعملوا على بيزنس

موش معنى اللى باقوله ان نفس العيب هو اللى عندك .. لكن كلامك فكرنى باللى حصل معى .. فحبيت اوضح يمكن ده ينفعك

بالتوفيق فى حل المشكله

[م/أحمد عبد الفتاح]

لازم فى الأول نعرف الكونترول بتاع العربية باظ ليه ؟ علشان يبوظ بيبقى لسبب من السببين دول :
- العوامل الطبيعية زى شوية ميه دخلوا عليه أو رطوبة وجنزرة فى التوصيلات بتاعة الكمبيوتر أو نتيجة الرجة والعربية ماشية فبتحصل شروخ فى كارتة الكمبيوتر (لو كان فيه كده كان الراجل اللى صلح الكارتة اكتشف الشروخ وقالك ماتتصلحش ) .
- وجود فولت عالى جاى للكمبيوتر من أحد الأسلاك أو السينسورات وده بيتسبب فى حرق جزء كهربى فى كارتة الكمبيوتر - ولو كانت الزيادة فى الفولت مش كبيرة الكمبيوتر بياخد وقت شوية على مايبوظ مش بيبوظ اول ماتركبه.
وفى الغالب السبب التانى هو السائد إن فيه حاجه تانية بايظة فى السينسورات والدوائر الكهربية بتاعة العربية غير الكمبيوتر - ولازم العطل اللى سبب تلف كارتة الكمبيوتر يتصلح علشان الكارتة الاصلية او اى كارتة تانية تتشتغل معاك .
يبقى لازم نفكر كويس ونعمل تسلسل لخطوات الحل علشان ماتقعدش تغير فى حاجات كتيرة ممكن توصل لانك تغير كل السينسورات وكل الضفيرة وكل السويتشات وطقم الدوارة لان الصنايعية حايخلوك تغير كل حاجه ماعدا جسم الموتور ويمكن كمان المرحلة الجاية يقولولك غير الموتور والفتيس بالمرة !!!!!
انا حاحاول ارتبلك الخطوات اللى تعملها علشان مايتوهوكش ولك مطلق الحرية فى التنفيذ من عدمه أنا بس باحاول اساعدك وحاطط نفسى مطرحك :
- أول حاجه ماتشغلش نفسك بموضوع لمبة الايموبليزر دلوقتى - طالما العربية بتدور بمفتاحها ومش بتبطل بعد ٣ ثوانى يبقى المشكلة دى مش وقتها دلوقتى .
- هل اللى صلح الكمبيوتر اشتغل هارد وير ولا سوفت وير كمان ؟ بمعنى هل غير مثلاً مقاومة أو جزء كهربى فى الكارتة وخلاص ولا نزل عليها سوفت وير ؟؟؟ دى نقطة مهمة جداً لأنه لو لعب فى الهارد وير بس يبقى الراجل شغله مظبوط والمشكلة فى الغالب فى حته تانية غير الكارتة ولسه ماتحلتش - لو كان نزل سوفت وير تانى يبقى كده الموضوع تاه شوية - فلازم تأكد النقطة دى معاه .
- تكلم التوكيل تانى وتشوف هل البرنامج بتاع كمبيوتر العربية دى موجود عندهم ولو كان موجود يبقى تروح تنزل البرنامج على الكارتة بتاعتك (فى حالة ان اللى صلح الكمبيوتر لعب فى السوفت وير)
- تشوف كهربائى عادى (سرسيون يعنى بتاع قفلات وكشف على الاسلاك ) وتخليه اول حاجه يقيس خرج الدينامو كويس ولا قليل - بيبقى مايقلش عن ١٣,٧ فولت - وبعدين يشوف هل العربية فيها ارضى فى حته ولا مافيهاش وده عن طريق انه يقيس الارضى بافوميتر بيقرا لغاية ١٠ او ٢٠ امبير والمفروض الارضى فى العربية السليمة مايزدش عن ٥٠ ملى امبير وممكن يقيس بلمبة تست مثلاً حسب مابيعرف ( التوصيلة بتكون بانك تشيل كابل السالب للبطارية وتوصل بين الصباع السالب للبطارية وسلك الارضى الاسود) - الارضى بتقاس والعربية كل ابوابها مقفولة ومافيش حاجه شغاله فيها خالص حتى خلى المفتاح فى جيبك - ولو لقيت ارضى يبقى تشيل فيوز فيوز لغاية ماتلاقى الارضى راح يبقى الفيوز اللى اتشال الدايرة بتاعته فيها مشكلة فى سلك او فى اى جزء ويفحص الدايرة دى لغاية مايلاقى الارضى - ودايماً لو لقيت ارضى بيبقى السبب الغالب حاجه ركبتها فى العربية زى زينون أو انذار او مكن رفع زجاج.
- لو لقيت مشكلة فى الدينامو أو أرضى يبقى تصلح المشكلة وتشوف ايه الاخبار لأن احتمال كبير تكون المشكلة سببها دينامو أو أرضى.
- اكشف على البكر بتاع السيور اللى على الموتور (بكر الشدادات ) لو فيه بكرة خشنة غيرها وبالمرة غير سير التقسيمة وتراجع عليها.
ده مبدئياً شوية خطوات حتساعدك على حل المشكلة إن شاء الله وابقى تابع معانا التطورات .

[م/أحمد عبد الفتاح]

نسيت أقولك تغير سينسور درجة حرارة الميه اللى عالموتور ودى أول خطوة .

[quote=م/أحمد عبد الفتاح;3876104651]نسيت أقولك تغير سينسور درجة حرارة الميه اللى عالموتور ودى أول خطوة .[/qغيرته يا باشمهندس والمروحة دايرة برضة ... هجرب اللى حضرتك قلت عليه بس هل البكر اللى عالشداد له علاقة بالمشكلة ؟
وتانى سؤال واسف لوقت حضرتك ممكن الدينامو يكون سبب المشكلة وان المروحة دايرة باستمرار ؟
وهل لو مشيت بالعربية وقت طويل غلط على العربيه ككل ؟ متنساش حضرتك انى لازم اوريها للصنايعى

معقول مفيش برمجة للكنترول الكيا شوما ؟ لو حصل ان الكنترول انفجر من غير الحلول اللى انا شايفها عقيمة دى مفيش حل ان الكنترول يجى غيره ويتبرمج عالعربية ؟ بالمناسبة كلمت التوكيل وقالولى مفيش كنترول ليها فى الشركة

وقتها رحت التوكيل فى القاهره علشان الكنترول .. و معملوش حاجه ( مكنش عندهم حل ) .. بس الكلام ده من 13 او 14 سنه ممكن دلوقتى تلاقى عند اى حد بره ( احتمال )

وحت لفلان وقلتله عالمشكلة قالى هعملهولك وقام اختفى شوية ورجع قالى اتفضل شغلتهولك وطبعا اديته المعلوم ورجعت فرحان عالعربية ودورت الحمد لله العربية دارت بس مروحة الريادتير كمان دارت باستمرار دون توقف مش بس كده كمان الايمو منور فى التابلوه ... مش بس كده كمان العربية كتير مبتدورش الا بالعافية

- بص الجمله بتاعتك دى هى ممكن تكون اساس معرفه اللى حصل .. و لازم ترجع للراجل ده و تضغط عليه علشان تعرف بالظبط هو عمل ايه ( متطلبش منه تصليح او فلوس ) .. بس اصر على معرفه اللى عمله بالظبط

- و ممكن جدا ( احتمال كبير ) ان كشف جهاز الاعطال ادى عطل مروحه للسبب ده ولانها كانت شغاله كويس قبل كده .. و نفس الامر لعطل الرشاشات

يعنى موش حتقدر تحكم هل الاعطال دى كانت موجوده قبل كده .. ام انها حدثت متيجه لشغل الراجل ده فى الكنترول

[م/أحمد عبد الفتاح]

أولا الدينامو أو القفلة أو الأرضى أو البكر ممكن يكونوا السبب فى تلف جزء من كارتة الكمبيوتر ولازم السبب يتصلح قبل ماتعلم اى شغل فى الكارتة - اللى انا قصدته من تغيير سينسور مية التبريد إنى باحاول اشوف الحاجات البسيطة والسهلة اولا .
سؤال : هل المروحة بتشتغل أول ماتدور العربية وهى باردة ولا بتشتغل لما العربية تسخن - وهل لما بتقفل الكونتاكت بتفصل ولا بتقعد شوية وتفصل ولا مش بتفصل خالص وبتشيل فيوزها؟
سؤال تانى : هل العربية بتسخن منك عن الطبيعى وانت ماشى ؟؟؟؟؟

المروحة بتشتغل بعد ثانيتين من دوران السيارة والحرارة مبتطلعش للنص الطبيعى يعنى ... وبعد ما اقفل الكونتاك واابطل دوارة بتطفى المروحة بعد ثانيتين تقريبا برضة او خمس ثوانى
الغريب انى لو حطيت المفتاح وشيلته من غيراى دوارة للعربية المروحة بتدور

[ahmedwk2music]

وقتها رحت التوكيل فى القاهره علشان الكنترول .. و معملوش حاجه ( مكنش عندهم حل ) .. بس الكلام ده من 13 او 14 سنه ممكن دلوقتى تلاقى عند اى حد بره ( احتمال )



- بص الجمله بتاعتك دى هى ممكن تكون اساس معرفه اللى حصل .. و لازم ترجع للراجل ده و تضغط عليه علشان تعرف بالظبط هو عمل ايه ( متطلبش منه تصليح او فلوس ) .. بس اصر على معرفه اللى عمله بالظبط

- و ممكن جدا ( احتمال كبير ) ان كشف جهاز الاعطال ادى عطل مروحه للسبب ده ولانها كانت شغاله كويس قبل كده .. و نفس الامر لعطل الرشاشات

يعنى موش حتقدر تحكم هل الاعطال دى كانت موجوده قبل كده .. ام انها حدثت متيجه لشغل الراجل ده فى الكنترول

لا حضرتك لما الاعطال دى ظهرت حطيتها على جهاز كشف الاعطال مش بعد ما اتحطت عالجهاز ظهرت الاعطال شكرا لاهتمامكم جميعا

[م/أحمد عبد الفتاح]

لو عندك مفتاح تانى جرب بيه كده لأن إحتمال تكون الشريحة الالكترونية اللى فى المفتاح مهيسة وده واضح من موضوع دوران المروحة أول ماتحط المفتاح فى الكونتاكت لأن الشريحة بتتواصل مع الكمبيوتر علشان يفتح كهربا لبعض أجزاء السيارة - فممكن يكون الشريحة بتاعة المفتاح فيها مشكلة أو الكمبيوتر فيه مشكلة - أنا برضه باحاول أحصر معاك المشكلة هل الكمبيوتر ولا حاجه تانية لغاية ماتتطمن على الكهربا اللى قلتلك عليها - وطالما العربية بتمشى ومش بتسخن والموتور مابيعملش اصوات ممكن تروح بيها للورشة للكشف بس فى وقت الدنيا تكون مش زحمة - لو لقيت الكهربا والدينامو والبكر تمام - ولو جربت بالمقتاح التانى ان وجد ونفس المشكلة قائمة - والراجل بتاع كارتة الكمبيوتر نزل عليها سوفت وير يبقى كده تخليه يكشف على الكارتة تانى وينزل البرنامج من جديد والعربية تكون معاك وتفك الكارتة وتركبها هناك عنده.