تجربه اداء سيارات - مقابلة المنتدى ديسمبر 2009

[Nour_Peugeot]

السلام عليكم جميعا

اولا انا سعيد جدا اني جربت السيارات الهكتب انوعها و موديلاتها و اسماء اصحبها


و لقد قمت بتجربه هذه السيارات في يوم 26/12/2008 في مقابله شهر ديسمبر

و السيارات علي الترتيب

اوبل استر 2007 و السياره 1600 سي سي ( خاصه ب مطصفي فاروق )
اوبل كورسا اعتقد انها 1996 و السياراه 1200 سي سي ( خاصه ب احمد علوي)
رينو ميجان 2006 السياراه 1600 سي سي ( خاصه ب ايمن مومو)
بيجو 205 1990 و السياراه 1400 سي سي ( خاصه ب محمود بيي)




اوبل استرا

بدون مبالغه اتمتع جدا جدا بسواقتها و هي ايزي ترونيك و عجبتني حواؤ الاحساس بالنقله دي اكنك سايق مانيوال يعني مش سياراه لعبه و انا جيبت بالعربيه 110 كم و كانت ثابته جدا و فعلا متحسش ان العربيه 100 حصان ابدا و التجكم في العربيه حلو جدا و كل توماتيكي توماتيكي هههههههههههههه
تقيمي للعربيه ممتازه

شكرا يا مصطفي علي السماح لي بتجربه السياره


اوبل كورسا

اولا تدويره العربيه عجبتني جدا متحسش ان في موتور 1200 انا مقدرتش اجري بالعربيه سوقتها علي سرعه 40 تقريبا او اكتر حلجه بسيطه و العربيه هدئة جدا و سحبها معقول بس غظتني حاجه في صوت غريب كده كان ظاهر و العربيه واقفه
بس احمد قالي عادي و انا شايف انه عادي بسبب قدم موديل السياره
تقيمي للعربيه جيده

شكرا يا احمد باشا علي التجربه الجميله


رينو ميجان

عجبني جدا جدا التابلوه و الصالون و تنظيم الايرباج و العربيه ايمن باشا معدلها شويه انا سوقت العربيه حتي سرعه 70 و سحبها انا شايف ان الاوبل اقوي منه بدون تعديل بس الباور بتاعها عجبني جدا جدا بس في حاجه وكلا دماغي مش عجباني لماذا تم عس اماكن عداد السرعه و الار بي ام في موديل 2008 و 2009 بس عمتا العربيه تقييمي ليها جيد جدا

شكرا يا ايمن باشا و عقبال متجيب البي ام


بيجو 205

سياره احلامي بدون مبالغه
عجبتني جدا طلعت العربيه و متصدقش انها 1400 سي سي و الصالون يعتبر كبير في الامام ضيق في الخلف بس مش هتفرق اووي للشباب و طبعا معدتش ال 40 برده بس عجبتني العربيه رغم انها موديل قديم صوتها هادي جا و ادعولي اجيب بيجو 205 جي تي اي
تقيمي العام جيد جدا

شكرا يا محمود باشا علي الفرصه الجميله دي



كده خلصنا تجلربه القياده بتاعت اليوم ده و ده ميعتبرش تقييم اووووي


و يا جماعه ده راي بدون مبالغه بس اعتقد ان بلغت شويه في ال205 لحبي ليها بس انا الشيفه كتبته


و ان شاء الله نتقابل مقابله تانيه قريبه


شكرا يا رجالتنا

[Samir Elshahawy]

شكرا ليك يا نور علي أستجابتك السريعة لمطالب جماهير المنتدي العريضة بتعديل التوقيع و ياريت الناس كلها زيك كده

[Nour_Peugeot]

يا باشا انا تحت امركم كلكم هو احنا لينا غيركم

[muhmado_furp]

شكرا ليك يأستاذ نور
علي التقييم الهادي والبسيط

التقييم حاسس انه بسيط زيك بالظبط
واضح من صورتك برضك انك هادي وبسيط جدا
بالتوفيق

[Nour_Peugeot]

شكرا يا باشا علي زوقك العالي

[M.Mokhtar]

يا بختك يا نوووووووووووور

ياريتنى كنت معاهم يارتنى كنت معاهم :(

[Nour_Peugeot]

ان شاء الله تتعوض المره الجيه يا باشا ان شاء الله

[chato_eg]

تجارب السيارات فى مقابلة 26 ديسمبر 2008

أنا حبيت أفتح موضوع لتبادل وجهات النظر بعد التجارب اللى تمت يوم الجمعة 26 ديسمبر 2008 بعيدا عن الموضوع الأصلى الخاص بتغطية اليوم و أحداثه
أولى التجارب
"أبو عبد الله " جرب عربيتى و دى كانت أولى تجاربه الشخصية مع الميجان و هو قال
"يا اخواني انا سعيد بلقائكم كلكم والله

والميجان عربية كويسه
بس ان انا اشتري الميجان او رينو او فرنساوي
ده اخر حاجه ممكن تفكروا فيها

الموديلات الاولويه عندي كتير ودي اخرها

عالعموم احب ابشركم انا السيريون طلعت من الميجان من الثبات لحد 120 وبعد 120 فضلت ماشيه وراها لحد 140 بس بعد كده الطريق قفل

بس بصراحه انا تعجبت من اداء الميجان لأن كنت اتوقع من الكلام عليها انه اعلى من كده بكثير
ولما جربتها ولقيت الاداء كده قولت لازم اجرب الشد مع عربيتي
لأن سبق وشديت مع كورولا 2006 , 1600 سي سي اتوماتيك طلع مني بعد 60 كم بس

فشدينا ومرتين علشان الناس متشككشي في حاجه السيريون طلعت مرتين من الثبات لفوق 100 كم كمان
مع اني كنت اتوقع ان بعد 100 تعدي ولكن السيريون كملت لحد 120 وبعديها مشت خلف الميجان
وتحيه للميجان وتحيه كبيره للسيريون يا جدعان "


يا باشا
أى نعم إنت طلعت فى أول محاولة طلعة كويسة أوى..بس المرة التانية و التالتة الفرق ما كنش جامد و خصوصا التالتة ..لو فى فرق ما كنش كبير......ثم إنك سيد العارفين إن الشد مش كل حاجة فى العربية....و كمان انت كنت مجرب الميجان قبل الشدة الحلوة و عرفت إن العربية دى بتاعت راحة و الtorque هو اللى هيخليها تحافظ على ال acceleration على السرعة العالية وعلشان النعومة فى الأداء..إنما الأسيويين عموما بيخلوا العربيات سريعة أوى فى انطلاقتها من الثبات لحد ال 100 تقريبا ...و بعد كده بيقل معدل التسارع كتير أوى عن الأول...بعكس الأوروبيين اللى انطلاقات عربياتهم مش سريعة زى الآسيوى و إنما السلاسة و العزل و النعومة و الراحة و ثبات معدل التسارع تقريبا على مختلف السرعات هى السمة العامة ليهم....

و على فكرة انت اتأخرت أوى عن محمد مصطفى فى الآخر لدرجة لما هو خد الغرزة على 140 و انت وراه.... تقريبا انت نزلت ل100 و أنا كانت عبنى على محمد و لما انت اتأخرت أوى فى الغرزة أنا كنت هالبس فى اللى قدامى و بعدين تانى فى الاوتوبيس اللى كان سادد مدخل الملف ولولا ستر ربنا و الEBD كانت العربية لفت بالعرض على الدائرى ... و ده يدل على قدرة رائعة على المناورة على سرعات عالية... المرة بتاعت مدخل الملف دى فعلا أنا عملت حرف L علشان أعرف أدخل وراكم....

بس إيه رأيك فى النعومة و الطراوة والثبات لحد ما وصلت ال 130 لما كنا سوا ؟؟؟
الخامات اللى مصنوع منها الصالون.....عزل الصالون عن الخارج....تنكر إنك كنت بتبص على عداد دورات الموتور و السرعات علشان تعرف موقفك من الأداء و ده لإن العزل كويس لدرجة ما تحسسكش بالضجيج الخارجى و حتى لو كنت قارص على الموتور

سيبك انت من ده كله..انت نظرتك ليها إيه بعد امبارح ؟؟؟...
تستاهل المدفوع فيها ؟؟
و بغض النظر عن السيريون لإن بصراحة هما لا يوجد وجه للمقارنة بينهم
لا نفس السعر و لا الحجم و لا الغرض و لا بلد المنشأ و لا سعة الموتور

و انت ما تشتريهاش....علشان هى مش على ذوقك و لا هى سيئة ؟؟
أنا عارف إنك جاوبت امبارح على السؤال ده بس علشان الناس اللى ما كانوش موجودين يفهموا وجهة نظرك.....فاهتعبك مرة تانية معلش توضح ليهم كمان انك مش بتحب التوكيلات علشان البعض منهم يتحكم فى السلعة و خدمتها و يلوى دراع الزبون...لكن الحمد لله دى كانت حقبة من الزمن ولت و إن كان بعض التوكيلات للأسف ما اتغيرش كتير....لكن الحمد لله EIM كويسين معانا و انت تفهمت وجهة نظرنا بشأن الذهاب للتوكيل...
أبو عبد الله باشا...أهم حاجة إننا شفناك.....و المرو الجاية نكررها بس انت فى ميجان وحد مننا فى السيريون

و ده لينك للفيديو بس زى ما قولت للأسف من الصعب التصوير مع القيادة و خصوصا على السرعة دى و الطريق ده

http://rapidshare.com/files/177233366/Nile_Motors.rar

التجربة الثانية
فكانت الأسترا و عربيتى...انا و مصطفى فاروق جربنا عربيات بعض......بجد يا مصطفى إنت خسرت الميجان.....و الأسترا ما كنتش تلزمك....مصطفى يا جماعة سواقته هادية جدا و راجل سميع لأغانى الثمانينات و لا له فى الجرى و لا بتاع.....و الأسترا عربية ذات طابع رياضى أقوى بكتير من الميجان التى تحمل صبغة الرزانة و الراحة.....و بشهادة "مصطفى" نفسه اللى حس من أول ما حط رجله فيها إنها ناعمة و طرية ....
طبعا الأسترا زى الفل و كل حاجة لكن هى أذواق...فى واحد بيحب آيس كريم فانيليا و فى واحد بيحبه بالشيكولاته...و الاثنين حلوين
لكن من ركوبتى للأسترا قولت "لو الزمن رجع بيا للوراء برضه كنت هاجيب الميجان"....التفاصيل الصغيرة هى اللى بتشكل الشخصية الجاذبة للزبون صاحب الميول دى أو الشخصية اللى "بتطفش" الزبون الغير مهتم بتلك الأمور
أنا مثلا إيدى كانت عمالة تخبط فى الزراير اللى على الدريكسيون و اللى ملمسه نفسه خشن (مقارنة بالميجان)...العربية كلها تحس بخشونة و صوت الموتور العالى و إن كان وصوله لدورات عالية لا يشكل عبئا عليه ...يعنى هو صوته عالى على دورات منخفضة و برضه عالى على ال 5000 RPM ....
حكاية ال key-less Entry دى ما ابهرتنيش أوى يعنى لإنها موجودة فى الميجان بس مش الموديلات اللى بتنزل مصر....
حقيقى التكنولوجيا الكتيرة أثرت على أداء العربية...أنا عارف الكورسا السيدان زى اللى كانت معاك يا مصطفى كويس....و فعلا كانت عربية ذات أداء رياضى و خفيفة الحركة و توجيهها sharp مقارنة بالأسترا اللى كنت حاسس إنها عاملة زى واحد آكل أكلة تقيلة و كابسة عليه فمش قادر يجرى.....
هتقولى الوضع بتاع ال Sport Mode ....أنا ما جربتوش صراخة ...لكن هو هيعمل إيه ؟؟؟؟ هيطول النقلات شوية....هتنقل امتى يعنى على 5000 RPM بدل ال 3500 ؟؟؟....طيب ما أنا طلعت عين عربية مصطفى لكن ما فيش فايدة....هى مش أسرع و لا أكثر رياضية فى الأداء بالشكل ده مقارنة مع عربيتى....
نقطة تحسب ليها...فراملها أنعم كتييير من الميجان...نفس القوة ..لكن إحساسك بالفرامل فى رجلك و هى على الدواسة و الفرامل بتقوم بعملها أحسن من نظيره فى الميجان ....
الفتيس ال easy Tronic .....يا شباب ده فتيس زى ال step Tronic بتاع الميجان....مش زى ال MMT أو ال DSG و لا أنا غلطان ؟؟؟.....هو فعلا لو عاملته زى الأوتوماتيك العادى هتقعد تلق و تتمرجح مع كل نقلة و عايز معامالة خاصة لحد ما تتعود عليه....لكن أسلوب عمله هو اللى خنقنى....
العصاية واقفة على قاعدة معدنية و بيتحرك بدون الضغط على أزرار....
فيه رسمة توضح لك طريقة عمله....بس لولا شرح مصطفى ما كنت عرفت أعمل حاجة قبل 15 دقيقة على الأقل على ما أفهم.....
ليه التعقيد فى طريقة العمل لما الدنيا كلها عاملة شكل معين للطراز ده من الفتيسات....أى منظر و خلاص علشان يهىء للزبون إنه راكب حاجة جديدة ولا إيه ؟؟
وضعية القيادة اللى يمكن خليتنى أركب الميجان دونا عن باقى العربيات بنسبة 50%.....لا تزال هى أكثر حاجة أنا باتشدق بيها..مع إن شباب أوبل قعدوا يقنعونى بإن دى الوضعية ال Sportive و الكرسى ممكن يطلع لفوق.....لكن يا جدعان أنا طلعت عين ال salesmen فى 100 حتة قبل ما اشترى دى...و إذا أنا ما قمتش بالواجب فأختى و والدتى قاموا بيه و زيادة و خصوصا بالنسبة لل driving position ....يا راجل و الله ده كنا هانشترى تيريوس مخصوص علشان ال driving position .....الموضوع مش حكاية كرسى بيعلى و يوطى...هى الميجان اللى صالونها أعلى من العربيات التانية و حتى ال307 و ال C4 ......
كل ده لا بينتقص من الأسترا أى شىء...هى بس معمولة بطريقة تناسب احتياجات ناس تانية (زى القل لاحسن حد يفهمنى غلط ) و لكنها لا تبهرنى لإنها لا تلبى احتياجاتى زى الميجان....
و ربنا يحببنا فى ركوباتنا كلنا.
لو حد حابب يشارك بتجربة على عربية قام بيها اليوم ده معانا فليتفضل مشكورا....

[Sharky]

تجـــربة تويوتا كرولا MMT Profissional

لقد قمت بتجربة سيارة زميلنا ماندو

أولا المقصورة :
المقصورة شكلها حلو وخامتها جودتها جيدة جدا و الدرسكسيون و زيراير تبديل النقلات فكرة حلوة لكن فى الاول بتبقى متلخبط لحد ما تتعود عيها و الكونسول شكله انيق , أما العدادات لونها مريح للعين واضحة جدا بالنسبة لللجلوس فى الكرسى الامامى مريح لكن حسيت إنه أوطى من الميجان و أقل راحة

ثانيا العزل:
عزل السيارة كويس و أحسن كثيرا من عزل الكرولا القديمة لكنه أقل من الميجان و يعيبها صوت الموتور العالى عند عدد لفات عاليه

ثالثا الثبات و العفشة :
تحسن كثيرا ثبات الكرولا الحاليه عن ثبات الكرولا القديمة و ثباتها أصبح جيد جدا لحد 140 كم و دا أخر سرعة جبتها فى التجربة
بالنسبة للعفشة هى أخشن من الكرولا القديمة لكن مش معنى كده إنها سيئة لكن بالمقارنة مثلا بالميجان فالميجان أنعم منها

رابعا التسارع:
بالنسبة لتسارعها من الثبات فى وضه E كان غير مرضى و بطى جدا بالنسبة لى و التسارع على وضه ES كان أفضل

خامسا الفتيس MMT:
بعد تجربة له تأكدت فعلا إنه قريب جدا من الإيزى ترونيك فى الأسترا
الفتيس فى وضع E :
تسارع السيارة بطى جدا و عدد النقلات يتم بسرعة على عدد لفات قليل و إحساس واضح جدا بالتقصرة فى كل النقلات و دا يعتبر الوضع الـ Standard للفتيس و إلللى بيماثل تقريبا وضع الـ D فى الاتوماتيك العادى و التيب ترونيك
من الاخر وضع بطئ السحب و النقل و مزعج جدا بالنسبة لى و لا يوجد به أى ميزة غير توفير البنزين كما يقال.
الفتيس فى وضه ES:
هوالوضعية الرياضية لوضع E مع نفس الإحساس بالنتشات و التقصيرة لكن بدرجة أقل و سحب أفضل لكن على حساب توفير البنزين و هو أقرب الأوضاع إلى وضعية الـ D فى فتيس التيب ترونيك
بالنسبة لى وضع أفضل قليلا من وضعية E لكنه ليس أفضل بالنسبة لى لوضع الـ D فى الستيب ترونيك
لكن هل عادى أن يتم إعتبار هذ الوضع هو الوضع الـ Standard فى السيارة و السير به دائما بدون اى تأثير على الفتيس ؟
الفتيس فى وضع M:
أحسن الأوضاع فى الفتيس الـ MMT و هو مماثل تماما لوضعية الـ M فى فتيس التيب ترونيك و يزيد عنه فى زراير نقل النقلات الموجودة خلف الدريكسيون

رأى الشخصى فى الفتيس إه عايز واحد مش بتاع جرى و عايز يسوق بهدوء و مايفرقش معاه النتشات و التقصيرة فى النقلات و إلا سيضطر لإستخدام نظام الـ M لتلافى الإحساس دا

[أبو عبدالله]

ياريت يا هاني تراجع اللنك بتاع الرابيد شير لأنه مش شغال

ولو ممكن ترفعه على 4shared افضل

معلشي بقه انت اللي صورت

[momo10000]

علي فكرة يا هاني .... ومع كل احترامي وتقديري للاسترا .... ولكن...

انا شديت كتير جدا مع الاسترا بحكم انها مع واحد صاحبي ... وهوا من الناس اللي بتعرف تجري كويس... بس عالطول الميجان بتطلع منها في كل السرعات... وانا قلت الكلام دا من زمان يعني من سنة تقريبا..يعني قبل ما اعمل اي تعديل في عربيتي...

[M.Moustafa]

احلى تعليق عجبني من هاني بعد ما شديت مع ابو عبد الله انه اول مرة في حياته من ساعة ما اشترى الميجان يشوف ال Rpm على 5، عموما ابو عبد الله انسان فعلا محترم بكل ما تعنيه الكلمة راجل رزين وقدرت افهم وجهة نظره اللي هيا مش غلط الراجل من النوع اللي بيحب يركب العربية يدور ويمشي بغض النظر عن مميزات العربية او ايه الاوبشن اللي فيها انا حتى لما سالته ايه العربية اللي عمرها ما تفتح بقها قالي الكرولا وكلامه صح بالنسبة للقديم لكن اولا انا مالقتش ايه عربية تانية ما فتحتش بقها وثانيا زي ما قولتله العربيات الجديدة كلها بتلاقيها بقت غير اعتمادية كل ما الموديل بيجدد وده هيشوفه في الكرولا الموديل الجديد وعلى فكرة ده مش عيب في العربية. بالنسبة للشد بقى العربية طبعا السيريون وزنها اخف وعليها موتور 1300 سي سي فبالتالي لازم الطلعة تكون اسرع بس معلش حضرتك ما وصلتش معايا ل 120 حضرتك وصلت لل 100 وكنت ماشي ورايا لاني انا اللي هديت ولما لقيتك جاي بتكمل بدات اقرص تاني بس في العموم العربية ممتازة واهم حاجة كسبتها من الموضوع ده ان انا اتعرفت على شخص ابو عبد الله وربنا يديم المعرفة ما بينا جميعا

[chato_eg]

فعلا الأسترا ما حستش إنها بتوصل الأداء الرياضى المتوقع منها و اللى يبرر الstiffness فى كل حاجة....فعلا لو عايز عربية أوبل تحس فسها بالانطلاقة الرياضية اللى تستاهل التضحية بالراحة...يبقى الكورسا السيدان أحسن بكتييير......الأسترا تحس إنها أكلت أكلة تقيلة و بقت متختخة و مش قادرة تمد...الظريف إن مسألة النشوفية دى واضحة كالشمس من أول ما قعدت فيها ....و أنا بادور العربية....كنت متوقع إنى لازم أحط رجلى على الفرامل زى الميجان...و فعلا حطيت...ما درتش...مصطفى قاللى....دوس على الفرامل يا هانى.....قولتله و الله دايس يا مصطفى....قاللى دوس كمان.....فقمت فاعص الدواسة علشان العربية تدور.......علشان كده أنا قولت الأسترا ما تلزمكش يا مصطفى.....إجمالا هى العربية محترمة طبعا و سعرها مش مبالغ فيها مقارنة بأسعار المنافسات و السوق...لكن هى دماغ تانية و أسلوب تفكير و ذوق مغاير للفرنساوى عموما.....

حكاية ال 5000 على ال RPM دى فعلا حقيقة يا محمد باشا...أنا عمرى ما ضغطت عليها للدرجة دى....مع إنى عموما هادىء لكن فى أوقات مش قليلة بأستحثها على إعطاء المزيد....و هى دايما فى جعبتها المزيد..مش بتطلع كل حاجة مرة واحدة....حتى فى قوة الفرامل...مش دايما أقصى قوة توصلها فى أى دوسة...لأ...على حسب الموقف و السرعة و الحركة...تحس إنها بتفكر معاك كما لو إن فى طيار حربى ذو خبرة و أعصاب من حديد و هادىء التفكير فى اللحظات العصيبة بيوجهك و يصحح أخطائك...و دى حاجة أنا بحبها فيها....

يكفى إن دونا عن كل العربيات اللى نختلف أو نتفق فى سرعتها أو سحبتها أو اعتماديتها ولا أى وجه....الميجان حتى الآن هى سيدة القيادة الهادئة الآمنةو المعزولة عن الأشياء المزعجة التى تحدث بالخارج....دى حاجة ما تقدرش أى عربية تانية مهما عدلت فيها تقدمها.....و فى مدينة الأعصاب المشحونة و الشخصيات الغير عادلة و الناس اللى شايفة نفسها دائما على حق...يبقى أحسن ثلاجة لأعصابك هى الثلاجة الفرنسية ( ده بالنسبة لى على الأقل)

و بالنسبة لوضعية القيادة...لسه "sharky" كمان مأكد عليها بعد تجربته للكورولا الجديدة

أبو عبد الله....يا باشا اللينك شغال زى الفل و أنا عملت download كامل من جهاز تانى فى حتة تانية له...و على كل انت تأمر....آدى لينك تانى على الموقع اللى قولت عليه

http://www.4shared.com/file/77889714/248ad019/Nile_Motors.html

[M.Mokhtar]

التجربة الثانية
فكانت الأسترا و عربيتى...انا و مصطفى فاروق جربنا عربيات بعض.....

الفتيس ال easy Tronic .....يا شباب ده فتيس زى ال step Tronic بتاع الميجان....مش زى ال MMT أو ال DSG و لا أنا غلطان ؟؟؟.....هو فعلا لو عاملته زى الأوتوماتيك العادى هتقعد تلق و تتمرجح مع كل نقلة و عايز معامالة خاصة لحد ما تتعود عليه....لكن أسلوب عمله هو اللى خنقنى....
العصاية واقفة على قاعدة معدنية و بيتحرك بدون الضغط على أزرار....
فيه رسمة توضح لك طريقة عمله....بس لولا شرح مصطفى ما كنت عرفت أعمل حاجة قبل 15 دقيقة على الأقل على ما أفهم.....
ليه التعقيد فى طريقة العمل لما الدنيا كلها عاملة شكل معين للطراز ده من الفتيسات....أى منظر و خلاص علشان يهىء للزبون إنه راكب حاجة جديدة ولا إيه ؟؟

الفتيس الايزيترونك مش شبه الاستبترونك هو شبه ال MMT والا ماكنتش حسيت بالنتشات دى عشان مبنى على فتيس مانيوال وفيه ديربياج كهربا

بالنسبة للشكل
هتعمل ايه بقى لو ركبت عربيه ملهاش فتيس اصلا
عباره عن بكره بتلف زى البكره بتاعت ال idrive اللى فى بى ام دبليو وبتحدد بيها المود اللى عايز تمشى عليه؟؟؟؟؟؟

الموضوع مش موضوع شكل وبس
شوفت انت عشان تمشى بالعربيه عملت ايه؟
يادوب بس لمست الفتيس سنه شمال
يعنى مش لازم تبص على الفتيس او الشاشه اللى فى التابلوه
غير الاستبترونك اللى فى الميجان مثلا محتاج تحس انت حاليا موقف العصاية بتاعت الفتيس على انهى مود

يعنى الايزيترونك اسهل بكتير عشان انت ديما بتلاقى العصاية فى مكانها لا بتورح يمين ولا شمال

افكار جديده الشركات بتعملها عشان الفتيس كانت فكرته جديده اصلا

[Sharky]

الموضوع مش موضوع شكل وبس
شوفت انت عشان تمشى بالعربيه عملت ايه؟
يادوب بس لمست الفتيس سنه شمال
يعنى مش لازم تبص على الفتيس او الشاشه اللى فى التابلوه
غير الاستبترونك اللى فى الميجان مثلا محتاج تحس انت حاليا موقف العصاية بتاعت الفتيس على انهى مود

يعنى الايزيترونك اسهل بكتير عشان انت ديما بتلاقى العصاية فى مكانها لا بتورح يمين ولا شمال

معلش يا محمد إللى أنا فهمه و شوفته هو العكس
إنك مابتبقاش عارف لو بصيت على الفتيس فى الإيزى ترونيك هو فى أنهى نظام و لازم تشوف الشاشة إللى فى التابلوه علشان تعرف عكس الستيب تروتنيك لو بصيت على الفتيس بيبان هو فى أنهى نظام + طبعا الوضع الموجود فى شاشة التابلوه