هل انت راضى عن سيارتك البيتلز

[ابوهاشم]

بسم الله الرحمن الرحيم
اخوانى الاعضاء ملاك البيتلز
حبيت اعمل استفتاء لملاك البيتلز فى منتدانا
علشان نعرف مدى اعجاب اصحاب البييتلز بها او رفضهم او اضطرارهم لها
انا عن نفسى من اشد المعجبين لهذه السياره الجباره
والدليل على كده انى كان معايا بيتلز موديل 52 وكانت ماشاء الله عليها وربنا يبارك للى اشتراها منى بيشكرلى فيها جدا لحد دلوقتى وطبعا حبيت اغير دورت ولفيت على عربيات كتير والله كنت هشترى شاهين ورجعت فى كلامى
لانى بصراحه مالقتش اى سياره فى كفاءة البيتلز وربنا اكرمنى وجبت بيتلز تانى موديل 65 وراضى عنها كل الرضا وربنا يباركلى فيها
انا كلل مابشوف حد من اصحابى عربيته بتسخن منه وكل شويه يروح يزود مياه للردياتير وكل يوم والتانى عند العفشجى والميكانيكى بقول الحمد لله الف حمد والف شكر ليك يارب على البيتلز ده غير مزايا كتير جدا لا تعد فيها
وان شاء الله مستنى ردود الاعضاء

[أحمد سالم]

السلام عليكم ورحمة الله
اخى الكريم هاشم
طرحك للموضوع جميل جدا
بالنسبه ليا انا معايا بيتلز موديل 1983
الحمد لله العربيه انا راضى عنها بنسبة 100/100 اولا يكفينى انى الصبح فى البرد بنزل ادور من اول لفه الماتور بيدور طبعا بشوف ناس جيرانى معاهم انواع تانيه بيدوخو الصبح لغاية ماالعربيه تدور
ثانيا استهلاك البنزين قليل جدا مقارنه بأقل عربيات استهلاكا للبنزين
غير طبعا انى لما بسافر بالبيتلز للاسكندريه بتبقى متزنه جدا على السرعات العاليه
انا وصلت بيها لسرعة 140 والله كنت بجرى مع البيجو
طبعا الناس بتقول ان البيتلز ضيقه
انا احيانا كنت بركب 3 على الكرسى الخلفىغير ان الحمد لله العفشه قويه وبتتحمل
يعنى من الاخر هى عربيه عمليه جدا
ويكفى ان فى الماكسيك لغاية دلوقتى البيتلز معموله تاكسى

[ahit]

السلام عليكم و رحمة الله و بركاته

أنا قبل ما أشترى عربيتى البتل كان هدفى الأساسى عربة تسافر و تستحمل شغلى و جربت عربيات تانية زى فيات 128 و بولونيز و ريتمو و ريجاتا و 132 و دول مشاكلهم كتير جداً فى السخونة و العفشة و الشاسية و الكرونة و المقصات و خلافه , و كنت بحب شكل البيتل بس ما سبقليش إنى ركبتها إلا مرة واحدة مع زميلى فى العمل فرع الإسماعيلية و كانت عربيتو 1302 و زوهلت و إندهشت من سحبها و قوة تحملها فى عز الحر و فى الأماكن الوعرة و المطبات.
و على طول و لم أتردد فى شراء سيارتى الحالية لما شوفتها لأول مرة و حسيت فعلاً إنها نظيفة جداً و شدا حيلها زى ما بيقولو و بالرغم من أن سعرها غالى وقت الشراء و لكنى فعلاً لقيت حالات يورثا لها و تعبانة و بفرق بسيط بينهم و بين عربيتى و قررت أشترى دماغى من تعب الصنايعية و الحمد لله إشتريتها.

و مش هاقدر أقولكم إنى سافرت بيها الإسماعيلية خلال 10 شهور بس 112 مرة تقريباً إن ما كنش أزيد و الأسكندرية 7 مرات و ثلاث مرات منهم ذهاب و شغل و عودة فى خلال 7 ساعات فقط و بورسعيد 3 مرات مباشر و بخلاف المشاوير الداخلية
و بسم الله ما شاء الله و الله أكبر و ربنا يحفظها
بس المهم هو الصيانة الدورية و إصلاح الأعطال فور ظهورها عند صنايعى محترف و أمين و كمان بتشيل فيها ناس و حمولة زى ما انت عاوز و ما بتقولش لأ.
و عشان كدا أنا معتز بيها جداً و بخاف عليها دلوقتى جداً و صاينها و مش ببخل عليها و الحمد لله.

و المشاكل اللى واجهتنى فيها هى مش أى كهربائى بيعرف يشتغل فيها و عشان كدا بيعمل حاجة و يضعف حاجة تانية للأسف , و كمان بردو مش أى ميكانيكى ممكن تعتمد عليه , غالبية الزيوت بقت مضروبة و الكويس سعره غلى جداً , عشان أوف بستخدم بنزين 80 و وساخته و قرف الطوابير دا لو لقيته , علبة الشكمان عندى إتخبطت كذا مرة و للأسف المصفه الداخلية مش بتتصلح و بالتالى لابد من تغييرها و لكنها رغم ذلك شغالة كويس بص صوتها أعلى من الأول طبعاً , كمان الماتور بقى خشن شوية بس الحمد لله مقضى الغرد.:k4:

و ربنا يباركلى و يباركلوكو فى عربياتكو البيتل الروعة و الإعتمادية و الموفرة و القوية :k32:

[drjadoire]

انا كمان لسه شاري واحده من 3 شهور وفعلا يا جماعه مروحتش لماكانيكي الحمد لله غير اول مجيبتها تقريبا لما كنت بغير طقم الكهربا
عربيتي موديل 78 برازيلي وماشاء الله نظيفه من بره
وزي الفل
بس كان عندي مشكله حكايه ان لما بتسخن بلاقي دخات ابيض بيطلع من الشكمان
مع انها مش بتجيب زيت ول حاجه وصاحبها كان عاملها عمره
بس بيني وبينكم كنت بغير زيت وعمري مغيرت فلتر من ساعت مشتريتها من 3 شهور
بس حطيت زيت شمبير مره مع غيار الزيت الدخان قل هو مش بيظهر الا كل فين وفين
تفتكوا يا جماعه الدخان ده ممكن يكون عشان مغيرتش فلتر الزيت من تات شهور
يا ريت تفيدوني
اما عامتا العربيه زي الفل وكان معايا 128 بقالي عشر سنين مفيش اي مقارنه البيتلز اشد في كل حاجه وخصوصا موضوع السخونه والسرعه والتبات

[drjadoire]

ودي صوره عربتي البيتلز ايه رايكم

[ahit]

انا كمان لسه شاري واحده من 3 شهور وفعلا يا جماعه مروحتش لماكانيكي الحمد لله غير اول مجيبتها تقريبا لما كنت بغير طقم الكهربا
عربيتي موديل 78 برازيلي وماشاء الله نظيفه من بره
وزي الفل
بس كان عندي مشكله حكايه ان لما بتسخن بلاقي دخات ابيض بيطلع من الشكمان
مع انها مش بتجيب زيت ول حاجه وصاحبها كان عاملها عمره
بس بيني وبينكم كنت بغير زيت وعمري مغيرت فلتر من ساعت مشتريتها من 3 شهور
بس حطيت زيت شمبير مره مع غيار الزيت الدخان قل هو مش بيظهر الا كل فين وفين
تفتكوا يا جماعه الدخان ده ممكن يكون عشان مغيرتش فلتر الزيت من تات شهور
يا ريت تفيدوني
اما عامتا العربيه زي الفل وكان معايا 128 بقالي عشر سنين مفيش اي مقارنه البيتلز اشد في كل حاجه وخصوصا موضوع السخونه والسرعه والتبات

السلام عليكم و رحمة الله و بركاته

الدخان الأبيض بيكون شمبر , بس هل الزيت بينقص عندك و لا عادى ؟ و مش شرط إن الزيت لما ينقص يكون الماتور بينقط زيت و لكن ممكن يكون الماتور بياكل زيت , و من الأفضل مراجعة ميكانيكى و ماتقلقش لو ميكانيكى أمين ممكن ما يخدش فلوس فى الكشف بس المهم يكون خبرة و أمين عشان مايعملش شغل .
و البيتلز مالهاش فلتر زيت زى العربيات التانية و لكن فيه مصفاه زيت بتتفك و تتغسل و تتركب تانى و دا بيكون بعد 5 أو 6 مرات تغيير زيت و سهله جداً.
و طبعاً فيه فرق كبير بين البيتل و 128 فى كل حاجة ما عدا إن الناس إدت شعبية جامدة للـ 128 و كمان 128 أوسع شوية من ورا و أربع أبواب أما فى جميع نقاط المقارنة البيتلز تكسب و تكتسح.
عربيتك جميلة و لونها جميل جداً ربنا يباركلك فيها
بس ليه مصورها من ورا بس و مش من قدام كمان
شكراً

[drjadoire]

يعني تفتكر يا باشا لو غيرت مصفه الزيت دي الدخان يقل ومظهرش ولا ايه الحل
انا مش حمل طقم شمبر
ولوشمبر يبقي متعرفش حيتكلف كام تقريبا
وادي الصوره من قدام كمام يا باشا
ومتشكر لاهتمامك معايا
واكيد حنكون اصدقاء طالما بقينا بيتلزاويه

[drjadoire]

ودي صوره تانيه ليها يا باشا بس يا ريت تقولي لو فعلا غيرت المصفه دي ممكن الدخان يتمنع علما باني مغيرتاهاش من ساعت ماشتريتها
تخيل جيت اغير زيت عادي الراجل بتاع الزيت قاي اغيرلك الفلتر ازاي مفيش فلتر في البيتلز

[ahit]

الأخ الكريم drjadoire
مصفة الزيت ليس لها علاقة بالدخان خالص و لكن هى بيكون فيها رواسب الزيت فقط , و زى ما قولت لحضرتك مسبقاً البيتلز مالهاش فلتر زيت.
أما بخصوص إذا كان طقم شمبر ولا لأ فأنا مش هاقدر أحدد الموضوع دا , ممكن تروح للحاج / محمد على الميكانيكى و هو يشوف و يقولك الوضع إيه بالظبط و كمان التكلفة و لو حبيت نتقابل و نروحلو سوا أنا ما عنديش أى مانع بإذن الله.
و على فكرة الطاسات دى شكلها حلو على لون عربيتك أوى , ممكن تقولنا جايبهم منين و بكام ؟
و إن شاء الله إحنا إخوات و أصدقاء طبعاً فى المنتدى و خارج المنتدى و فى البيتل .

[أحمد سالم]

انا كمان لسه شاري واحده من 3 شهور وفعلا يا جماعه مروحتش لماكانيكي الحمد لله غير اول مجيبتها تقريبا لما كنت بغير طقم الكهربا
عربيتي موديل 78 برازيلي وماشاء الله نظيفه من بره
وزي الفل
بس كان عندي مشكله حكايه ان لما بتسخن بلاقي دخات ابيض بيطلع من الشكمان
مع انها مش بتجيب زيت ول حاجه وصاحبها كان عاملها عمره
بس بيني وبينكم كنت بغير زيت وعمري مغيرت فلتر من ساعت مشتريتها من 3 شهور
بس حطيت زيت شمبير مره مع غيار الزيت الدخان قل هو مش بيظهر الا كل فين وفين
تفتكوا يا جماعه الدخان ده ممكن يكون عشان مغيرتش فلتر الزيت من تات شهور
يا ريت تفيدوني
اما عامتا العربيه زي الفل وكان معايا 128 بقالي عشر سنين مفيش اي مقارنه البيتلز اشد في كل حاجه وخصوصا موضوع السخونه والسرعه والتبات

الاخ الفاضل حبيت الفت انتباهك لشيء
وهو ان البيتل مافيهاش فلتر زيت علشان يتغير
هى فيها صفاية زيت داخليه جوه الماتور
ودى بيتم تنظيفها فقط كل فتره طويله
انا عربيتى بقالها معايا سنتين تقريبا نظفت فيها الصفاية مره واحده خلال السنتين

[ابوهاشم]

وانا كمان باكدلك نفس كلام الاعضاء البيتل مالهاش فلتر زيت
هى الصفايه بتتنضف كل فترة طويله ودى من مميزات البيتلز
اما عن طقم الشنبر انا فاكر انى اشتريته من سنه لعربيتى القديمه
وكان سعره تقريبا 110 جنيه
بس طبعا احنا لسه ماحكمناش على عربيتك انها محتاجه طقم شنبر ولالا
روح للحاج محمد على هو اللى هيقولك الصح ايه وان شاء الله خير
وعربيتك ماشاء الله جميله ربنا يباركلك فيها

[ihab]

الحمد لله انا راضى تماما عن عربيتى و مبسوط بادائها جدا
ربنا يبارك لنا فى عربياتنا و يديلنا خيرها و يكفينا شرها
و اللى معاه بيتلز ما بيغيرهاش بس ممكن يجيب معاها عربية ثانية و ده اللى حصل معايا و مع ناس كثير

[El.Hossieny]

الحمد لله ...ان ربنا وقعني في عربيتي البيتلز ( أصيلة ) ... و راضي عنها تماما .. كفاية ان الصبح ببقي الوحيد اللي في المنطقة اللي عربيته بتدور في نفس اليووم طبعا لان كل الناس في الشتاء دلوقتي بيلاقوا معاناة في تدوير العربية الصبح .. انما البيتلز ربنا يحفظهالي و يخليها من اول مرة ....
و كمان موضوع المياه في الصيف .... احنا مالكي البيتلز مرحومين من الموضوع ده .. لكن باقي العربات تركن علي جنب و تفتح الكبوت و تهوي الريداتير
الحمد لله .... ان ربنا جعلني من مالكي الاسطورة

[drjadoire]

متشكرين يا جماع
بتلانسبه للطاسات جايبهم من التوفيقيه تقريبا الطقم ب60 جنيه النيكل
وفعلا بيغنوا عن الجنوط واكنك مركب جنوط

[ahit]

متشكرين يا جماع
بتلانسبه للطاسات جايبهم من التوفيقيه تقريبا الطقم ب60 جنيه النيكل
وفعلا بيغنوا عن الجنوط واكنك مركب جنوط

شكراً على الرد
بس هى 15" صح؟