البيكانتو و صيانة 5000 كم

[Mina W]

انا رحت عملت صيانة الـ 5000 كم يوم الاحد و هاحكى اللى حصل

انا اتصلت قبلها قالوا مفيش حجز :D تعالى فى اى وقت احنا بنبتدى من الساعة 8 الصبح ، وصلت هناك على 8:20 و لقيت 4 عربيات قدامى :( .
على فكرة التوكيل بيعمل صيانة الدايو و الرينو و الكيا كمان فكانت هناك عربية لانوس و 2 ميجان و 1 كليو و بعدها البيكانتو بتاعتى
بعد حوالى 15 دقيقة واقف مش لاقى حد، اكتشفت ان الموظفين لسة وصلين و مفيش حد يستلم العربية :shock: اصلا و اخير ابتدوا يستلموا العربيات و وصل لعربيتى و تقريبا ماكنش فى اى ملاحظة فى العربية غير انى شبه خلعت اكورة و مرجعتش زى ماكانت قلت يظبطها.
اخد العربية و قالى باذن الله دى صيانة مجانية و هاستلم بعد ساعة و نص :arrow:

قعدت فى الاستراحة و لقيتهم حطين كمبيوتر واصل على الانترنيت فدخلت على المنتدى هنا و قعد اقرا و فقت على اسمى فى الاذاعة و تقريبا بعد ساعة و نص بالضبط حوالى 11

اقدر اقول انهم نظفوا فلتر التكييف لانه بقى اقوى و ضبط الاكورة لكن منظفش الموتور هما قالوا انهم مكنش فى حاجة العربية محتاجها غير انهم ربطوا العفشة و بس.

سؤالى هل الموتور بيتغسل كل صيانة و لا لازم اطلب و هل فى حاجات حد ينصحنى اراجع عليها او اطلبها فى الصيانة مش هيعملوها الا لما انا اطلبها بنفسى :?:

[mbluethunder]

مينا باشا

أنا أولا بعتذر جدا جدا أني مكتبتش أي حاجه عن الصيانه وأنا فاكر أنك طلبت مني الموضوع ده من فتره بس ظروفي مش سمحالي أن أكتب موضوع بأستفاضه هنا في المنتدى. أنا لو كتبت أكتب جمله بالعافيه

المهم أولا موضوع الكمبيوتر اللي داخل على الأنترنت جديده وللأسف مش موجوده هنا في القاهره

كمان موضوع غسيل موتور العربيه لازم تقول عليه أول متروح التوكيل كمان لو شوفت أنهم مغسلوش الموتور وأنت بتستلم صمم أنهم يغسلوهالك ( ده حقك ) لأنك أنت هاتغسل الموتور في كل صيانه

غير كده موضوع الصيانه بيعدي على الواحد وكأنه نزهه

أنا رحت عملت صيانة ال 10000 وهي هي ال 5000 مافيش أختلاف

على العموم أتمنى أنك تكون مبسوط من العربيه

[Mina W]

م/ محمد شكرا جزيلا على ردك و ذوقك، انا علشان اول مرة مكنتش عارف ايه اللى مفروض يحصل، لكن كده المرة الجاية انا هصمم يتغسل خاصة انهم اكدوا على لما استلمت العربية انى مغسلهاش بره التوكيل و الا.
انا مبسوط من العربية جدا و الحمد الله بعد موضوع كابل الارضى متصلح و كلحاجة تمام، و حضرتك ايه اخبار العربية معاك؟

[mbluethunder]

أيه موضوع كابل الأرضي ده يا باشا

والله العربيه معايا أكتر من ممتازه ومريحاني جدا جدا وأن مبسوط بها للغايه

[Mina W]

انا كنت كتبت ان العربية كانت بتجى ساعات متدورش ، و فالاول افتكرت انها البطارية فضيت بس لمبة او اى حاجة تانية ، و لكن لكا سافرت بيها لحد شرم و رجعت تانى يوم دارتش بقى مخى بيروح و يجى و رحت على التوكيل على طول و قالوا انهم لقو كابل الارضى مش مربوط كويس بعد قال يمكن الانذار او السنتر هما السبب (لانى ركبتهم برة التوكيل) بس انا كنت متأكد لان المشكلة حصلت معايا قبل ماركب اى حاجة، اول مرة كانت بعد ماستلمت العربية باسبوع او اقل.

على العموم شكرا انك طمنتى على العربية، بس ليه سؤال عن استهلاك البنزين، هلى حضرتك حبت استهلاك البنزين انا تقريبا ما بين 12 - 14 كم لكل لتر مع بنزين 92 و بتفرق حسب تشغيل التكييف و اذا كان جو البلد و لا على طريق سريع، فهل ده استهلاكها و لا انا رجلى تقيل على العربية؟

[mbluethunder]

بص ياباشا

موضوع البنزين ده حكايه كبيره

أولا: أنا من ساعة ما جيبت العربيه وأنا بمون من شيل ومن محطه معينه في شارع مصطفى النحاس وفي الزنقات (يعني لو أنا مزنوق ومعريفتيش أروح المحطه ده لأما بمون من أي محطه شيل تانيه أو محطة موبيل ) غير كده عمري مأ أفكر أمون من أي حتى تانيا

الملاحظات :

1: أنا علطول بمون لما اللميه بتاعة البنزين بتنور يعني بيكون في التانك حوالي 6 أو 5 لتر
2: لما بقول للراجل مون على الأخر بيمون وبدفع حوالي 40 إلأى 43 جنيه يعني كده بعمل حوالي 28 إلى 30 لتر
3: لما بمون من المحطه بتاعت شيل المعينه اللي بقولك عليها اللمبه بتنور على 390 إلى 400كم لما بمون من موبيل اللمبه بتنور على 360 إلى 370 كم مره وحده بس مونت من أسو اللمبه نورت عند 340 كم
4: لما العربيه حضرتك بتعدي ال 3000 RPM بتكل بنزين ومش عايز ٌقولك أنك لو ماشي على 4000 أو 4500 RPM يبقى أنسى تنك البنزين هتلاقي البنزين كأنه بيشر من العربيه
5: التكيف لما بيكون شغال اللمبه بتنور عند 350 إلى 360كم
6: مهم جدا جدا أنك ماتسيبشي العربيه تفضى بنزين خالص
7: أفضل وأوفر إستهلاك ممكنتخده من العربيه ده هو عند 2500 إلى 3000 RPM وطبعا لو أنت مشيت على 2000 بس أنسى بقى ممكن تمون كل أسبوعين :)

بس أداء العربيه ممتاز جدا وأنا راضي عنها جدا جدا

[Mina W]

انا شاكر لردك، انا فعلا لاحظت ان لما كنت بامشى و الـ RPM تحت 3000 و بدون تكييف كان اللمبة بتنور على حوالى 410-420 كم و لما بقيت بشغل التكييف و باجرى شوية بقيت على 380-395 كم و انا المرة اللى حسيت ان فى حاجة غلط نورت على 360 كم ودى كنت مونت من مصر للبترول علشان دى هى اللى كانت قدامى وقتها و مفكرتش.
انا دايما بامون اول ما المبة تنور و بفول كل مرة، بس لسة معرفتش اى محطة افضل و تقريبا بجرب كل مرة محطة.

انا مش عارف هل استهلاك عربية حضرتك اعلى شوية ود علشان الطرق فى القاهرة، انا كنت فاكر ان الاستهلاك مفروض افضل من كده علشان هما قالوا انها ممكن توصل لـ 500 كم و مرة قريت ـ 600 كم (بس ده كان بنزين 95 او 98)
بس من كلامك يبقى كله تمام و انسى الكلام ده و استهلاك العربية يبقى فى المتوسط

انا فعلا راضى عن العربية و لو رجع الزمن ماظنيش انى كنت هاختار اى عربية تانية و خاصة بعد ما ركبتها.

سؤال اخير بايو كان قال انه ماشتراش بيكانتو علشان فى مشكلة فى قطع الغيار ، هل عندك اى معلومة بخصوص الحاكية دى؟؟ و شكرا مقدما على ردك

[mbluethunder]

مافيش مشاكل على موضوع قطع الغيار ده

للأسف الشديد الإشاعات ممكن تعمل أكتر من كده

انا اما كنت بعمل صيانة ال 10000 سألت على موضوع قطع الغيار والتوكيل قالي أن كل قطع الغيار موجوده بس هيا غاليه شويه بسبب موضوع القضيه بس واحد هناك قالي أن موضوع القضيه أتقفل وهم مستنين أن القاضي يخلص موضوع القضيه ده تماما وده هايحصل في شهر 9

وخالي بالك أن ما مجرد ما الموضوع هايتقفل قطع الغيار كلها سعرها هايقل وغير كده هتبقى متاحه في أي وقت

ف موضوع قطع الغيار ده مايقلقكشي علشان كده كده لو انت أستعمالك للعربيه كويس عمرك مهتحتاج قطع غيار

[Mina W]

شكرا م/ محمد ، و ربنا يسهل لو نازل اسكندرية فى اى يوم تقولى و نتقابل

[mbluethunder]

شكرا م/ محمد ، و ربنا يسهل لو نازل اسكندرية فى اى يوم تقولى و نتقابل

أكيد يا باشا

[germansheepard]

سؤال يا جماعة, هل تغيير الزيت و الفلتر برة التوكيل فيه مشكلة؟

[monmonmon]

سؤال يا جماعة, هل تغيير الزيت و الفلتر برة التوكيل فيه مشكلة؟

مفبش اى مشاكل خالص بس الافضل تجيب الفلتر الاصلى و ممكن تجيب الزيت من التوكيل اضمن لك.. و ساعات بيكون ارخص