نصيحة من واحدة مجربة توكيل دايهاتسو

[nona_never_lost]

انا كنت هشترى السيرون و ربنا موفقنيش بسبب التوكيل وقف الموضوع لانهم مش بيتعملوا مع اى معرض علشان التقسيط لازم يكون على 4 سنين عن طريق التوكيل لكن مش بيبعوا لمعرض وانت عميل تروح تقسط للمعرض فمعرفتش اشتريها بس من حبى فيها اشتريت عربية اسمها YRV بردة من دايهاتسو عربية روعوة من برة ومن جوة موديل 2002 اتوماتيك جبتها 44 الف جنية وطبعا دة سعر لقطة بس بعد اسبوعين من الشراء عملت عمرة وفتحت المتور وروحت لتوكيل وقالى الحاجات الى عايزه تتغيرطقم بوجيهات 1300 جنية ووش السلندر ب 950 جنية وكمان هستنا لما تيجى من اليابان لحد ما تيجى والموضوع دة قعد شهر ونصف من الاخر صرفت عليها 10 الف جنية تصليح وبعتها اول ما وقفت على رجلها بعد سنة ومركبتهاش فى الفترة دة 10 مرات على بعض كل ما اصلح حاجة تتطلعلى بلوة جديدة بسعر خرافى يفوق قطع الغيار ال BM و المرسيديس و طبعا طلعت عينى علشات تتباع و انا عن نفسى من تجربتى دة كرهت توكيل دايهاتسو رغم ان عربياتها القاعدة فيها تجنن بس عمر العربية قليل قوى تخيلوا عربية موديل 2002 وتتعملها عمرة مرتين حرام يعنى وسوق بيعها فى مصر قليل قوى الاحسن فى بلدنا دة ومع ظروفنا المادية نجيب عربية تستحمل وقطع غيارها متوفرة بسعر كويس اليابانى كلة غالى وميقدرش علية غير الناس الى مرتبها ميقلش عن 10 الف جنية

[SuMo]

mesh lel dragady

[أبو عبدالله]

حضرتك مينفعشي تتكلم عن مودديل او اي ماركه سواء كانت دايهاتسو او مرسيدس في عربيه انته شريها مستعمله يعني متعرفشي اللي كان راكبها قبلك عمل فيها ايه

فمينفعشي نقييم على هذا الأساس

اللي نقدر نقييمه العربيه اللي حضرتك اشتريتها زيروا وقعدتت معاك كام سنة وساعتها نقدر نقييم

[Migo123]

مع احترامي الكامل لتجربتك بس بصراحه انا شايف ان حضرتك عملتي كذا غلطه ... وده طبيعي لانك واضح ان خبرتك قليله في موضوع التعامل مع العربيات المستعمله....
1- قبل شراء العربيه كان لازم حضرتك تكشفي عليها كويس قوي وخصوصا موضوع الموتور ده من أسهل الحاجات الل ممكن تبان بالتجربه لو اللي بيجرب عنده خبره متوسطه أو على الاقل بالكشف على كبس الموتور في أي بنزينه.... بس واضح انه لم يتم الكشف على السياره ..
2- لما عربيه زي دي تفتح بقها كده يبقى انسي الوكيل ........ وخصوصا مع ظروف التوكيل الحالي لانه لسه نازل السوق جديد وبيعتبر نفسه غير مسئول عن الموديلات السابقه .....
3- سعر بيع الدايهاتسو لغايه دلوقتي قليل قوي دي صح .... بس دي بتفرق مع اللي بيركبها زيرو بس .... بعد كده بتبقى زي اي عربيه مستعمله ممكن تركبها وتبيعها بنفس السعر أو تكسب و تخسر حسب ظروف السوق ساعتها وحسب حرفنتك في بيع العربيه.

عموما مع الوقت أعتقد ان عبد اللطيف الجميل ها يغير الوضوع ده وخصوصا مع ان سمعته واضح انها بقت ممتازه في التعامل مع الموديلات الحديثه من دايهاتسو وكمان الشركه الام نفسها فيها ثوره كبيره في التصميمات و التكنلوجيا الجديده اللي بدأت تستخدمها لأول مره وخصوصا بعد الشراكه مع تويوتا...

بس ازاي طقم بوجهيات ب 1300 جنيه دا لو عربيه بوجاتي مش هيتحطلها بوجيهات ب 1300 جنيه :lol: اكيد دي غلطه مطبعيه

[Karim_Monir]

بالفعل والعربيه دي حلوة فعلا بس تلاقيك ايام ما كان التوكيل مع رجب فورد بتاع دايهاتسو
ده كان بيدبح العميل فعلا ومموت دايهاتسو في مصر
المهم اكيد عشان عربية 2002 يتعملها عمرة وهيا من موتور تويوتا اكيد كان في اساءة استخدام
في واحد جاري معاه العربية
بيشكر فيها جدا وبيقول دي العربيات الياباني ولا بلاش
معلش قرفتك ماكنتش حلوة في دي
بس معروف عن العربيات الياباني انها عربيات اقتصادية التشغيل
امال الالماني والامريكي تبقي ايه
وانا لو بقي مرتبي 10 الاف جنية مش هاركب تويوتا
ياركب ليكزس يا بي ام
مش عربية اقتصادية التشغيل

انا كنت هاجيب فوكاس من ضمن اختياراتي او النترا وفضلت كرولا عشان حاجتها منتشرة ومعمرة

[nona_never_lost]

انا شوفت ان كل الى جاب عريية يابانى زى متسوبشى لانسر او تيويوتا طالع عينة فى اسعار قطع الغيار رغم انها متوفرة فى مصر مابلكم بعربية مش موجود منها كتير فى مصر زى ال YRV دة عقدتنى من اليابانى كلة كل قطع غيارها فى اليابان ولازم استنا لما التوكيل يستوردهالى من هناك انا عملت كبس متور قبل ما اشترى العربية وكان نسبتة 85% ودة نسبة حلوة جدا على عربية مستعملة وكانت عملة 50الف كيلوا يعنى مش مستهاكة قوى ورغم كدة كل ما كنت بغير حاجة فيها بتبوز واللة ان طقم البوجيهات دة غيرتة مرتين فى شهر واحد بالزمة دة توكيل محترم والسيرون الى بتقولوا عليها حلوة انا اخويا كان رايح جاى على التوكيل بيصلح عربيتى وشافها اكتر من مرة مجرورة علشان علبة الفتيس مكسورة وموديل 2007 والمفروض ان اليابانى لا يعلى علية

[معاذ الشرباصى]

حضرتك فى فرق بين عربية زى الدايهاتسو دى و عربيات زى الالنسر و الكورولا

عربية حضرتك قطع غيارها مش موجودة خالص, و ده مش مشكلة الوكيل ده, ده مشكلة اللى قبله اللى كان منيم الماركة و مضيعها

اكيد الوكيل الحالى معندوش بيانات كاملة عن العربيات الموجوة فى السوق علشان يوفر قطع غيارها

اما السيارات اليابانى الاخرى, فدى قطع غيارها موجودة و بكثرة فى السوق, بعيدا عن التوكيل, و بأسعار ارخص طبعا من التوكيل بكتير, و كل واحد له حرية الاختيار سواء بالتعامل مع الوكيل او خارجه

لكن قطع الغيار الاصلية متوفرة, و ده للاسف مش موجود فى حالة عربية حضرتك

[Karim_Monir]

انا شوفت ان كل الى جاب عريية يابانى زى متسوبشى لانسر او تيويوتا طالع عينة فى اسعار قطع الغيار رغم انها متوفرة فى مصر مابلكم بعربية مش موجود منها كتير فى مصر زى ال YRV دة عقدتنى من اليابانى كلة كل قطع غيارها فى اليابان ولازم استنا لما التوكيل يستوردهالى من هناك انا عملت كبس متور قبل ما اشترى العربية وكان نسبتة 85% ودة نسبة حلوة جدا على عربية مستعملة وكانت عملة 50الف كيلوا يعنى مش مستهاكة قوى ورغم كدة كل ما كنت بغير حاجة فيها بتبوز واللة ان طقم البوجيهات دة غيرتة مرتين فى شهر واحد بالزمة دة توكيل محترم والسيرون الى بتقولوا عليها حلوة انا اخويا كان رايح جاى على التوكيل بيصلح عربيتى وشافها اكتر من مرة مجرورة علشان علبة الفتيس مكسورة وموديل 2007 والمفروض ان اليابانى لا يعلى علية

طقم البوجيهات مش محتاج توكيل ده عند اي حد ب 50 جنية بالكتر وكل البوجيهات بتمش علي اي ماركة
كبس 85 % وتبوظ بسرعة كدة حاجة من اتنين
يا خدتي عين
يا خدتي عين

ربنا يعوض عليكي

[معاذ الشرباصى]

او العربية متعملهاش صيانة صح, يعنى متغيرش طقم سيور فى ميعاده و قعد كتير (على سبيل المثال)

[nona_never_lost]

حضرتك عارف ان المصرية لحد دلوقتى بتنزل اعلانات للعربية YRV بس دة طبعا موديل 2002 يعنى العربية بتتباع و بيتعلن عنها كل اسبوع فى الجرايد على انعا تبع توكيل دايهاتسوا ولو مش مصدقنى هات سوق السيارات بتاع يوم السبت وروح شوفها بس اول مرة اسمع ان التوكيل لما بيتغير بيتيرا من العربيات الى نزلت اقبلة و مفروض ان مدام عربيتى عليها لوجو دايهاتسوا تكون قطع غيارها متوفرة وخصوصا ان عربيتى كانت مش من سنة 60 دة موديل 2002 يعنى مش قديمة علشان يلحقوا ينسوا ان فى عربية نزلت من شركتهم بالاسم دة

[nona_never_lost]

انا فعلا عملت كدة وبقيت بدور على قطع غيار من عربيات يابانى تانية علشان اوقفها على رجلها علشان اعرف ابيعا وموصلنيش لكدة غير ان كان فى حاجات فى المتور مش موجودة اساسا فى التوكيل ودة حاجة تجنن اكتر انهم مش بس غليين وكمان معندهمش قطع غيار الحاجة الى هما مصنعنها بس الحمد اللة انى خلصت منها

[أبو عبدالله]

حضرتك انا مش هقولك العربيه السيريون معايا عامله ازاي والحمد لله ولكن هذه شهادة للحق فقط ان شاء الله

انا هقولك اسأل اللي ركبوها وجربوها من هنا من المنتدى الاخوة اللي جربوها من المنتدى ممكن يقولولك العربيه عاملة ازاي والفتيس الاوتوماتيك بتاعها عامل ازاي ومتهيألي كلهم قرصوا عليه وشافوا استجابته عامله ازاي ...............والحمد لله

[محمد المشد]

لن ازيد بعد كل ما قيل واقول كان الله فى عونك عما يحدث فى السوق المصرى من تسيب واهمال ولا مبالاة من الوكلاء السابقين والحاليين !!!!!!!!!!!!!!

[أبو عبدالله]

واقول كان الله فى عونك عما يحدث فى السوق المصرى من تسيب واهمال ولا مبالاة من الوكلاء السابقين والحاليين !!!!!!!!!!!!!!

هي المشكلة فعلا في توكيل رجب القديم ودي كانت مشكلة ولازالت مع الموديلات القديمة اللي مش منتشرة خلاف الشاريد لأن الشاريد القديم منتشر وغالب قطع غياره موجوده

بالذات ان التوكيل الجديد عبداللطيف الجميل عمل مبيعات عدت مبيعات توكيل رجب في خلال سنة واحده فقط

وده بشهادة حق ليس مشكلة توكيل عبداللطيف لأنه جدير بالأحترام والتقدير

[Sharky]

والسيرون الى بتقولوا عليها حلوة انا اخويا كان رايح جاى على التوكيل بيصلح عربيتى وشافها اكتر من مرة مجرورة علشان علبة الفتيس مكسورة وموديل 2007 والمفروض ان اليابانى لا يعلى علية

حضرتك متأكدى من المعلومة دى لإن معلوماتى عن السريون إنها عربية كويسة