صوصوة في الدبرياج..!

**r0xer** · 17-01-2009 12:41 PM

السلام عليكم

امبارح وانا راجع من اكتوبر في وسط الهدوء الشديد ركنت على جمب عشان ارتاح شوية من السواقة....واذا بي كل مادوس دبرياج اسمع صوت صوصوة كدا..كأن في حاجة محشورة او حاجة عايزة تتزيت او تتشحم. و النهاردة الصبح الصوت زاد شوية صغيرين و كأنه حاجة "بتزيّق" كدا..؟

طبعا قلقت جداً..لان العربية دي معملتش لسة 12 الف كيلو! فمستحيل يكون دا العمر الافتراضي بتاع الدبرياج وملحقاته!!.

تفتكروا يكون من أيه؟ انا هحجز ان شاء الله صيانة يوم الجمعة الجاية ولكن عايز اعرف ايه توقعاتكم للمشكلة دي؟

السيارة هيونداي فيرنا 1600. عاملة 12 الف كيلو.

طبعا مبفركش بيها كتير ولاحاجة..

وشكراً مقدماً.

**SAMER_ENGINES** · 17-01-2009 01:22 PM

مفتكرش تكون حاجة في طقم الدبرياج نفسه و لا حاجة و الغالب هتكون العربية لسه بشحم الفابريقة اللي العربية جاية بيه و بيكون نشف و بتحتاج تتشحم تاني و أعتقد أني طالما العربية ماشية معاك كويس مفيش مشكلة هي بس الدواسة اللي بتعمل كدة و أنتظر بقية الأراء و أنشاء الله خير.

**samirayad** · 17-01-2009 02:52 PM

أى حاجة وارد فيها الخطا......وممكن تكون محتاج مراجعة على الدبرياج ووصلاتة.....وهنا بقة المفروض يجىء دور التوكيل.....ولاهما مجرد أسماء

**r0xer** · 17-01-2009 04:35 PM

متشكر لردودكم يارجالة....اي اراء اخرى؟

ابو السباع و محمد ممدوح والبقية فييييين؟

**samirayad** · 17-01-2009 05:07 PM

شوف حضرتك.....طالما الصوصوة دى بتيجى مع الضغط على الدبرياش...يبفى دى مشكلة فى البلية(دى مجرد توقعات)....وأرجو أن تسير الأمور عكس ذلك

**r0xer** · 18-01-2009 01:15 PM

ايوة بس اللي اعرفه ان البلية ليها اعراض تانية. صح ولا أيه؟

اييييه ياجدعان محدش عارف اي حاجة عن الموضوع دا ولا مر بيه؟

**momo44** · 18-01-2009 09:34 PM

انا عندى الصوصوة دى موجودة واول لما ادوس على الدبرياج حاجة بسيطة جدااااااااااااااااااااااا
الصوت ده بيروح
وفى ناس قالتلى بلية

**umoussa** · 18-01-2009 09:41 PM

دا كلام صحيح

لو دوسة خفيفة أوي على دواسة الدبرياج بتنهي الصوت يبقى دي بلية دبرياج على طول بدون أي تفكير. على العموم السبب الرئيسي وراء الحكاية دي هي ان جزء من السائقين بيلمسوا رجلهم على دواسة الدبرياج وهما سايقين معتقدين إن دا ملوش تأثير هو فعلاً ملوش تأثير على تعشيق النقلة بس بيعمل بوش في البلية

استنى لحد ما طقم الدبرياج يخلص وغيرها معاه علشان الطقم كله يبقى عمر واحد

**samirayad** · 18-01-2009 10:35 PM

المشاركة الأصلية كتبت بواسطة umoussa

دا كلام صحيح

لو دوسة خفيفة أوي على دواسة الدبرياج بتنهي الصوت يبقى دي بلية دبرياج على طول بدون أي تفكير. على العموم السبب الرئيسي وراء الحكاية دي هي ان جزء من السائقين بيلمسوا رجلهم على دواسة الدبرياج وهما سايقين معتقدين إن دا ملوش تأثير هو فعلاً ملوش تأثير على تعشيق النقلة بس بيعمل بوش في البلية

استنى لحد ما طقم الدبرياج يخلص وغيرها معاه علشان الطقم كله يبقى عمر واحد

الله ينور بالاضافة الى أن التحميل الخفيف على الدبرياش مع التقادم بيؤدى الى عدم تواجد تعشيق كامل وبيؤدى الى حدوث انزلاق فى الدبرياش....وبعد كدة بتكون كفاءة نقل القدرة من الماكينة للفتيس من خلال الدبرياش مش بالجودة المطلوبه........

**r0xer** · 19-01-2009 09:58 AM

الظاهر ان الكل فهم غلط :(

ياجماعة الصوت دا بيحصل لما ادوس دبرياج....مش وانا ماشي.

يعني لما ادوس دبرياج بسمع صوصوة وهو بينزل..وبيختفي بمجرد ماينزل لتحت. يعني كأنها حاجة محشورة او "مزمزقة" :d

يارب تكونوا فهمتوا قصدي المرة دي :(