اتحاد مالكي الفيات اونو

[semsem_uno]

بسم الله قبل كل شيء

ناس كتيييييييييييير معاها فيات اونو و غير كده العربية دية مش مكلفة و مش وحشة خاااااالص بجد يا جماعة عربية ممكن تعتمدو عليها و في نفس الوقت تنفع للجنسين و للشباب كمان

وعايز اقول ان العربية ديه واسعة و سريعة و مش بتعوم في السفر خالص و صيانتها سهلة جدا جدا جدا و مش معقدة وقطع غيارها في كل حتة و العربية يا جماعة مش ضعيفة اوي زي ما الناس فاكرين

و طول ما انتو محافظين عليها عمرهااااا ما هتستندل معاكم و الكلام ده عن تجربة

و بصراحة كده تكريما للعربية الأصيلة ديه حبيت اعمل الموضوع ده و ياريت لو نشارك فيه كلنا و نقول رأينا في العربية ديه و ياريت ايضا الناس اللي عملت صيانة لحاجات فيها تكتب برده

و شكرااااااا

[ahmed_aly007]

انا معايا اونو موديل 2000 باستخدمها شهرين بس فى السنة العربية دى تعتبر افضل عربية مناسبة من الناحية الاقتصادية قطع الغيار والبنزين تصدقو لو قلت ان سعر الكشاف الامامى 85 جنية من ساعة ما اشتريتها ماغيرتش فيها غير سير التكايات والمساعدين الخلفى بس
العربية مركب لها جنوط مش جتصدقو لو قلت ان فى المنحنيات باخد العربية على سرعة 90 وهى ثابتة على الطريق
لو قارنا انواع العربيات اللى فى نفس فئتها 100 سى سى اعتقد ان الاونو تحتل المرتبة الاولى بجدارة
العيب الوحيد فيها ان مافيش مؤشر للحرارة فيها الموجود مكانة لمبة حرارة لكن الحمد للة حتى الان العربية ماسخنتش منى والا مرة
احسن لون فيها هو الازرق الكحلى

[DAHB115]

انا معي اونو 2000 بس مش عارفه فين موشر الحرارة دا واعرف منين ان العربية سخنت مني

[bmw323]

أنا معايا اونو 97 ماشاء الله والله عربية ممتازة وسريعة والعدادات ياجماعة ألى فيها مؤشر الحرارة دى فى بورسعيد فقط وفيها rpm كمان

[eheshame]

انا معايا اونو 93
بصراحة عربية حلوة باسافر بيها مسافات وهى عربية زى الفل مش بتعوم
وسريعة وموفرة بس فيها مشكلة غريبة جدا
موتورها لما بيتظبط بيكون انعم من العربيات الكورى الجديدة بس للاسف الظبطة دى مش بتعيش اكتر من يومين وتخلف تانى وترجع صوتها فيات القديم تانى
مش عارف ايه الحل ؟ مع العلم ان المشكلة دى صوت بس مش بياثر فى السحب ولا السرعة ولا بتعطل

[semsem_uno]

ايه ده ايه ده
اغيب يوم الاقي الموضوع اتملا كده :)
كويس جدا و نرجو عدد اكبر و اللي عايز يسأل علي حاجة يقول
و ارجو من الخبير الكبير Nader بارك الله فيه بجد انسان زوق جدا و مش بيتأخر علينا و اطلب منه الأنضمام الينا في الموضوع ده

و شكرا لكل من انضم الينا

[semsem_uno]

و ديه معلوملت انا كنت كاتبها عن العربية في مشاركات ليا قبل كده و حبيت انقلها هنا لكي تستفيدو منها:

-1 العيب بتاع الأونو ان علبة الشكمان مقوسة لتحت علشان بتعدي من تحت القنطرة و هي ديه اللي بتحك في المطبات
يعني من الأخر ماتركبش اكتر من تلاتة بيك و لو لقيت مطب عالي خده علي اربع عجلات
غير كدة الأونو ديه عربية ممتازة

-2 اول حاجة نعملها للناس اللي لسا شارين العربية نروح تغير فلتر الهواء و سير الكاتينة و الدينامو و اكشف علي الشحن بتاع الدينامو احتياطي و اكشف علي سير التكيف و لو لقيت ان التكيف توصيلاته خراطيم يبقي متركب و لو مواسير يبقي بتاع بلدها و بدام عندك لمبة في التبلوه للحرارة يبقي ديه تقريبا مش اللي بتنزل بتكيف
اما غير كده فأنا مليش في مواضيع التكيف ديه اوي
و في ناس كتيرة جدا في شارع دمشق عندهم قطع الغيار الأصلية بملاليم و نصيحتي ان يتجاب اي حاجة ايطالي حتي السيور و بلاااااش الصيني
و في حاجة اسمها مشط الكهربة و ده لو بايظ بتحس كأنك سبت بنزين و حطيط رجلك تاني فجأة و ده لو جيت تجيبه جيبة ايطالي و هتلاقي محفور عليه ماجنيت ماريلي بالأنجليزي
و بالنسبة للبوجيهات جيب Denso او Ngk او Bosch و مانزودش عن شمعتين في العربية ديه عشان ماتورها صغير
و بالنسبة للحرارة لو حاسين انها بتسخن يبقي اكشف علي دورة التبريد و المروحة و طلمبة المياه و حط مياه خضراء مش مياه حنفية علشان متبهدلش الريداتير و الطلمبة و الكلام ده بالصداء و في عدادات حرارة خارجية بتتباع و بتركب علي التابلوه و بيبقي شكلها حلو
و لما نيجي نغير الزيت نجيب زيت خفيف مش تقيل و كمان ماننساش تغيير الفلتر بتاع الزيت و نكشف علي زيت الفتيس
عفشتها مش وحشة خالص و انا كنت معايا ستة عندهم 16 لي 18 سنة و رحنا كبري المطار صد رد
و العربية ديه بتنزل من 83 لي 89 الشكل القديم اللي شبه الريجاتا من قدام و من 89 لي 2003 تقريبا شكل اللي احنا بنشوفه
و بالنسبة لعداد الحرارة ده عشان معظم الأونو عندنا اونو باسيك او اونو 45
و ممكن تركب عداد حرارة خارجي عالتبلوه في حدود 100 و شكله جامد
و الرابط ده عليه قصتها بالكامل

http://en.wikipedia.org/wiki/Fiat_Uno

[semsem_uno]

و يا ريت اللي غير حاجة قريب يقول علي اسعار علشان يبقي عندنا فكرة

[semsem_uno]

بالنسبة للسخونية يا جماع في لمبة حرارة في التابلوه علي شكل عربية و ديه بتنور لما السخونة تعدي السخونة المسموحة و ده علشان معظم الأونو عندنا اونو باسيك او اونو 45 اللي هي العادية خالص انما فيه بعد كده بعداد حرارة و ار بي ام كمان :)
بس اسمعوا خطواطي و ان شاء الله مايبقاش فية سخونة اصلا و بلاااااااااش مياه حنفية

[Nader]

انا معايا اونو 93 اخر موديل ايطالي نزل...

بالنسبة لعداد الاونو اللي فية rbm بيتباع في الحرفيين في حدود 200 جنية،

اما بالنسبة للعدادات العادية فموجود ناحية اليمين صورة عربية بتنور فيها لمبة حمراء اللون لو كانت درجة الحرارة عالية...لو نورت لقدر الله اركن وبطل العربية على طول.


اسعار بعض قطع الغيار التي تم تغيرها قريباً:

سير كاتينة: 40 جنية.

سلك شداد قفل الكابوت: 30 جنية بالتركيب.

تيل فرامل امامي: 35 جنية.

وش فانوس خلفي: 50 جنية للاصلي، و15 جنية من شركة الاهرام للبلاستك.

فانوس امامي استيراد باللمض: 50 جنية.

فردة جنوط حديد: 50 جنية "وممكن يركب عليها جنوط الـ128".

[m2010]

اللى عايز اى حاجة للاونو استيراد استعمال خارجhttp://godaspairpart.yoo7.com/ لبتوع الاسكندرية نقلت المنتدى الافادة ومستنى ردودكم

[AshTurbo]

أولاً شكراً لمجهود حضرتك وفكرة حلوة أن يكون في أتحاد ملاك للفيات أونو وبصراحة عربية جميلة وأقتصادية وبتستحمل البهدلة لأبعد الحدود عربية ناجحة بكل المقاييس أنا كان معايا أونو موديل 93 وهقولكم شوية مميزات للعربية والعيوب بردوا مع أن عيوبها بسيطة وسهل تتعالج .

المميزات :

1- خفيفة جداً وسهلة أوي في سواقتها يعني مش زي عربيات تانية زي اللانوس مثلاً الدركسيون بتاعها صعب وبالعفاية تتحكم فيه لكن الأونو مع أن مفيهاش باور إلا أنها أسهل وتحكم زي ما يكون فيها باور وبداللاتها خفاااااااف أوي أوي ريشة يعني بنزين خفيف فرامل خفيفة دبرايج خفيف حاجة مريحة على الآخر بالنسبة للقيادة وعجلة التحكم أنا أديها 8\10 .

2- بالنسبة للتجميع والسحب ممتاز وممكن بحاجات بسيطة وغير مكلفة تزود بيها عملية السحب بشكل كبير وتحس بالفرق بالنسبة للتجميع بعد أضافة الحاجات اللي قولت عليها في مشاركات قبل كدة أديها 8\10 .

3- التحكم ممتاز وعمرها ما خيشت مرة ولا زحفت بصراحة ولا فيها أيه بي أس ولا أي حاجة ومع ذلك تحكم ممتاز أديها في التحكم 8\10 .

4- البنزين أنا مش هقدر أحكم عليه لأن أنا كنت بجري وبشد وبحرق كتير وبمشي بيها كتير أوي وكمان عشان البوجيهات اللي كنت مركبها كانت مع الشد بتحرق أكتر فا أديها في أستهلاك البنزين 7\10 والشباب اللي مش مركبين حاجة في مواتيرهم ممكن كلامهم يكون مختلف وتكون العربية أقتصادية في البنزين .

5- من حيث الحجم والأتساع من الخارج والداخل من برة العربية كنزة وتفوت في أي حاجة وممكن تركن في أماكن صغيرة ومن جوة العربية كويسة الي حد ما وممكن تاخد خمسة أفراد بس مش هيقعدوا فيها براحتهم طبعاً بس كرسي السائق واللي جنبة مرتاحين على الآخر وحجم الشنطة معقول بس مش كبير هو متوسط الحجم بالنسبة لحجم المقصورة والشنطة أديها 7\10 .

6- من حيث قطع الغيار متوافرة وفي كل مكان لو نزلت البحر هتلاقي قطع غيار الأونو وفي كذا أختيار قدامك أيطالي وفي فرنساوي وفي صيني وكله بحسابة وأي ميكانيكي يقدر يظبطلك العربية تماااام وبسهولة ومش محتاجة فهلوة وبأقل سعر بالنسبة لقطع الغيار أديها 9\10

7- من حيث الشكل العربية دي بصراحة لما بتتظبط بيبقى شكلها تححححححفة يعني جنط لذيذ وفاميه على الزجاج الخلفي مع سبويلر خلفي معاه وفوجات قدام وتبقى شكلها جميل جداً جداً ولو في أي حد عاوز يعرف تعديلات تانية في الشكل تخلي العربية أحلى ممكن يقرا مشاركتي في مواضيع عن الأونو أو يبعتلى على الخاص من حيث شكل العربية بعد الأضافات أديها 8,5\10 .

العيوب :

مفيش عيوب كتير يمكن بس العافشة ناشفة شوية تقريباً عيوبها بس لما بتفتح بقها يبقى عليه العوض ومنه العوض في فلوسك كل يوم هتطلعلك حاجة لحد ما تفلس عملت معاياي كدة بعد 140 ألف كيلو سواقة شاقة وحادثة عنيفة وأعتقد دة معدل كويس جداً جداً ومننساش أن العربية بعد أي حادثة جامدة عمرها ما بترجع زي الأول .

حاجة أخيرة العربية دي أصيلة بمنتهى الأمانة وعمرها ما خذلتني ولا كسفتني ولا بهدلتني الا لما فتحت بقها خربت بيتي ورحت بايعها وكمان عشان كنت محتاج فلوسها غير كدة ما كنتش بيعتها حتى لو كنتهأجيب حاجة أكبر وأحدث منها لأن عربية بصراحة أصيلة .

شكراً أستاذ سمسم على دعوتك ليا للموضوع وأنشاء الله الجروب يكبر ولو أي حد محتاج أستفسار ومساعدة أنشاء الله نرد عليه وشكراً للجميع .

[semsem_uno]

اشكرك جدااااااا للمشاركة اخي الفاضل ashturbo
و اشكر ايضا العضو الفاضل نادر لمشاركته معنا

مشكورين يا جماعة ربنا يكتر خيركم

[amrbakly]

يالا ننطلق في اتحاد الملاك و أقترح نسميها رابطة أونو
:k32:

[bmw323]

وعاوزين يا جماعة نرفع من القدرة الحصانية للعربية الأونو بلأخص طبعاا وياريت كل واحد عندى فكرة يقولها علشان كلنا نستفيد
وأنا أول واحد هقول تعديل بسيط أوى
(سلوك وبوجيهات أسبلت فاير) وهجرب أجيب فلتر هواء K&N وهبقى أقولكم أية الفرق بعد التركيب أنشاء الله
ها مين يزود