الحقوني ... العربية بتبطل لوحدها

**roky** · 27-01-2009 09:17 AM

فيات 127 زرقاء

دارت الصبح عادي جدا
بعد 200 متر مشي بقت تبطل أول مارفع رجلي من علي البنزين
وقفت و سبتها تسخن شوية تاني ... برضه بتبطل أول مارفع رجلي من ع البنزين ...
صوت الموتور متغير و زي مايكون "بيقطع " . رجعت ركنتها تاني تحت البيت بالعافية ... و جيت الشغل بالمواصلات

شوروا عليا يا أهل الخير تكسبوا فيا ثواب

**ehabbasha30** · 27-01-2009 11:01 AM

ممكن تكون فى وساخة فى البنزين سدت الكابيراتير
واكشف برضو على البوجيهات

**roky** · 27-01-2009 11:12 AM

عظيم جدا يا أيهاب باشا

طب عندك فكرة أزاي ممكن أشكف انا عن الموضوع بنفسي ؟

لانها قيادتها هاتكون شبه مستحيلة لحد الميكانيكي ، ده غير ان انا لسه جديد و ماعرفش اقرب ميكانيكي فين

**ehabbasha30** · 27-01-2009 11:37 AM

لو الكاربيراتير اتسد من اى شوائب فى البنزين .... سهلة ان شاء الله
حاول وهى دايرة تزود بنزين كتير لغاية ما الكربيراتير يسلك ... كل شوية زود زود وبعدين سيب شوف العربية سلكت ولا لسة ... وهكذا لغاية لما تسلك
او لو تقدر تمشى مشوار وتزود السرعة على قد ما تقدر بس لو الشوائب كتير هتاخد منك وقت كبير لغاية لما تنضف
وفى حل تانى اسرع.. انك تغير مكان سلكين من سلوك البوجية ..دة مكان دة والعكس طبعا والعربية مبطلة.. وبعدين تدور وتزود بنزين ( ماتقلقش هتسمع اصوات فرقعة من الشكمان دى اسمها امبليهات عشان تنطر اى شوائب فى الكربيراتير )لمدة نصف دقيقة مثلا وبعدين بطل العربية ورجع السلوك مكانها وان شاء الله هترجع كويسة

(( حاول متخليش التانك يفضى علشان الموضوع دة هو اللى بيعمل كدة - حاول تخلى نصة على الاقل مليان على طول))

لو العيب من البوجيهات يبقى لازم تروح لحد ميكانيكى يغيرهملك وحاول تسايسها وانت ماشى

**aYaBooY** · 27-01-2009 11:41 AM

متقلقش نفسك انتا عندك الشفاط شغال ولا لا
لو شغال عليه هتلاقي الموتور شغال على طول بس
انتا المشكلة عندك ان فيه حاجة في الكربراتير اسمها بك السلانسيه اتسدت شوية بس و ده عبارة عن مسمار و فيه مجرى صغير علشان مرور البنزين و ده اتسد فكل المطلوب انك تروح تتمشى و تعرف اقرب ميكانيكي لبيتك فين و تروح تدور العربية و تسايسها لحد ما توصل عنده و عموما غير فلتر البنزين بالمرة حتى لو قالك ده كويس غيره برده علشان متعملش العربية معاك تاني لمدة شهرين على الاقل

و اخيرا مرحبا بك سائقا مصريا جديد

**roky** · 27-01-2009 03:19 PM

يا جماعة متشكرين جدا علي النصايح الغالية دي
مش عارف جالي منين الشوائب ده ... دي العربية فيها أكتر من نص التانك تقريبا

طب حد يقدر يقولي أزاي اعرف ان العيب من البوجيهات ولا لأ

و شكــــــــرأ

**aYaBooY** · 27-01-2009 03:59 PM

لو العيب بوجيهات كانت العربية تمشي تقطع مش تبطل لما تشيل رجلك و عموما بوجيهات ال127 بحوالي 20 جنيه

**roky** · 29-01-2009 03:43 PM

شكر لكم يا شباب علي النصايح الغالية

وأن تسمحولي أحكي لكم علي حصلي و أنا بَسّلك بيك الكاربراتير بنفسي. واللي جري لا ينقال و لا يتقرا.

بعد نصايح الأخوة الخبراء ... و الأطلاع علي كتاب المرفوع بواسطة الأخ h_hezzah
http://www.nilemotors.net/Nile/showthread.php?t=20938&highlight=dummies
تبين لي أن البيك ده يكون أما علي هيئة مسمار فيه مدفون في الكاربراتير ... ولما افكه الاقي فيه خرم صغير .

وكان المشكلة العويصة ان أعرف البك ده انهي مسار و طلع تحت العمة فيل (أقصد عمة الكاربراتير) تحتيها عدد لا حصر له من المسامير ... و مش عارف انهي واحد فيهم يكون البك ده ..! وكل مافك مسمار يطلع أنه مربوط علي سوستة و يفط في وشي ... و قالولي بعد كده ان المسامير دي عشان تظبيط الهوا مع البنزين ...

بعد عناء لقيت المسمار المنشود اللي فيه خرم صغير، و بعد النفخ فيه قليلا (من بعيد طبعا - ماقدرتش أحطه في بقي) صبحت العربية زي الحلاوة و الحكاية سترت و مفيش حاجة باظت بسبب المسامير أم سوست

نصيحتي للأخوة اللي مش عارفين مسمار البيك ده فين و عاوزين يسلكوه. عشان تتأكد أن المسمار اللي انت بتفكه ده مش مسمار بسوسته (مسمار تظبيط كمية الهوا أو البنزين) أنك تفك المسمار بشويش ، لو لقيته مش متقرط عليه و بيفك بسهوله بيقي ده من أبو سوسته ، حاول ترجعه زي ماكان بالظبط و شوفلك مسمار غيره

و يجعله عامر