عمره للبيتلز عند عزب

[ابوهاشم]

السلام عليكم ورحمة الله وبركاته
بصراحه الموضوع ده هو يخص زميل لى هو غير مشترك معانا فى المنتدى
هو راح عمل عمره عند عزب الميكانيكى اللى فى جسر السويس عند حديقة بدر وطبعا انا متابع معاه اول باول وهو استلم عربيته من اسبوع ودلوقتى هو فى مرحلة التليين والتهارده كان وصل ل450ك وقولت
افيدكم بتجربته للعلم
عزب الميكانيكى مش بيشترى حاجه بنفسه اى حاجه بيطلبها منك وانت تروح تشتريها بنفسك وهو عليه يركبها وياخد مصنعيته حتى التعامل مع الخراط للعمره انت اللى بتروح بنفسك بالموتور للخراط يخرطهولك
وترجعه لعزب يركبه ويحدد معاك المصنعيه قبل العمره
والشكوى اللى كانت عند زميلى الاستاذ خالد ان عربيته ماكنتش بتسحب كويس معاه لدرجة انه كان على الرابع
والعربيه مابتزودش سرعه اكنر من 60ك/س
ولما راح اعزب قالو ده عامود الكامه عاوز يتغير مع سبيكة الكامه وطبعا فى حاجات هتتخرط عند الخراط
وبالفعل تم فك الموتور وعزب قال لخالد زميلى هتاخد البلوكه بتاعت الموتور وعمود الكامه الجديد اللى اشتراه من عند محمود عويس بتاع قطع الغيار
وتروح عند واحد اسمه فاروق الجندى الخراط فى شارع بورسعيد بجوار جراج الترام اللى هناك هو ده اللى بيتعامل معاه وعنده خبره كبيره فى مواتير البيتلز
واديله الموتور ده وقوله الحاج عزب بيقولك اعمل الللازم وبالفعل اخد الموتور فى تاكسى وراح على هناك
وخدو منه الموتور وعمله الللازم فيه وتم الخرط وتجليخ عامود الكامه الجديد وبعد كده رجع بيه لعزب وطبعا تم التركيب مع تجديد بعد الحاجات هذكرهلكم طبعا وانا النهارده اخدت منه فاتورة الشراء لكل حاجه جابها من عند محمود عويس بتاع قطع الغيار علشان انقلهالكم هنا لتعم الفايده وهى كالتالى
طقم جوانات 85
اولسيه موتور 20
طقم شنبر 120
طلمبة زيت 120
انبوبة سيلكون 8
زجاجة جمالاكه 5
طقم سبيكة كامه 50
عامود كامه 200
طقم سبيكة كرنك 375 المانى
4بنوز 65
4 جلبه بى ال 40
4 افيز 12
مسامير جديده 20
4 ورد 20
ملئ اربع فرد تيل فرامل 100
مصنعية عزب 300 للعمره و50لتركيب تيل الفرامل
مصنعية الخراط 200 جنيه
وطبعا فى حاجات مش خاصه بالعمره بس ذكرتها
زى طلمبة الزيت وتيل الفرامل
ارجو انى اكون نقلتلكم الصوره كامله للافاده

[ihab]

جزاك الله خيرا يا استاذ هاشم
ياترى الاستاذ خالد حاسس بفرق بعد العمرة و لا علشان لسه فى مرحلة التليين مش حيبان دلوقتى لغاية ما يخلص اول 1000 كم على الاقل

[hasanadel88]

عزب خد منى 350 جنية فى نص عمرة و خلانى اروح اجيب اودى الاوشاش عند الخراط اتعملها دلايل نحاس و تجليخ و خد 150 جنية
و اية المعاملة دى كل دة علشان ما اتفئتش معاة على السعر من الاول
و خلانى اروح اجيب كل قطع الغيار

[ابوهاشم]

ازيك ياايهاب باشا حضرتك عامل ايه واحشنا والله
هو طبعا دلوقتى حاسس بفرق من صوت الموتور بس لسه طبعا بكره هيروح يظبط تاكيهات وبعد كده يكمل الالف ان شاء الله وبعدها يبتدى يحكم على حالة العربيه وربتا يباركله فيها
استاذ حسن عادل ازي حضرتك ياريت تطمنا عليك وعلى عربيتك اخبارها ايه والله كان نفسنا نشوفك المقابله اللى فاتت لكن عرفنا بظروف الحادث اللى حصلك وقدر الله وماشاء فعل
بالنسبه لعزب وانا ماتعاملتش معاه لكن اللى عرفته عنه انه بيخليك انت اللى تشترى حاجتك كلها بنفسك وتتعامل بنفسك مع الخراط وده لعدم الظن
انه بيعمل عليك شغل هى حاجه رخمه انا معاك ومتعبه اكيد لكن بصراحه انت اكيد بتكون مطمئن ان كل حاجه اتعملت صح وعلى ايديك وشايفه بنفسك وفى الاخر انت ليك الحكم والاختيار ووجهة نظره
احنا اتعاملنا مع صنايعيه كتير وللاسف ماعندهمش ضميربيقولك غيرلك كذا وكذا وممكن يكون ماغيرش حاجه ولا اشتراها
واحنا والله هدفنا فى الاخر وانا اولكم اننا نوصل لميكانيكى كويس وامين فى شغله

[ahit]

جزاك الله خيراً يا هاشم باشا على التوضيح و الشرح الجميل
و ربنا يبارك لصحبك فى العمرة و فى عربيته و يتم التليين على خير.

بس صدقنى الميكانيكى لو عاوز يضحك على الزبون هايضحك عليه بأى طريقة و الزبون مش هايعرف خالص.
و طبعاً كل ميكانيكى له أسلوبه و طريقته فى الشغل و العمل.
و صدقنى 80 % من العمره خراط خراط خراط و الباقى ميكانيكى , يعنى لو الخراط مش فاهم ممكن يبوظ الماتور و الميكانيكى الكويس هو بس اللى يقدر يعرف ده عند التركيب و لو ميكانيكى نص لبه يبقى هايقفل و بس و كل سنه و انت طيب.
و فى رأيى العمرة قرف و نصيب ههههههههههه و ربنا يسترها معانا جميعاً.

يعنى صاحبك إتكلف فى الموضوع ده حوالى 1850 جنية و كمان 100 مواصلات يعنى ممكن يكون قفل 2000 جنية.
و يا ريت يا هاشم باشا تتابعنا بأخبار العمره مع صاحبك أول باول عشان كلنا نستفيد.
ربنا يباركله فى العمره و العربية

[ابوهاشم]

السلام عليكم
امبارح صديقى الاستاذ خالد كان كمل اول 500ك وراح لعزب وظبطله التاكيهات وغير الزيت وعلى فكره هو بيستعمل زيت موبيل دلفاك1340
لان عزب نصحه انه يستعمله وقاله لو عاوز تحافظ على موتورك ماتستعملش غير الزيت ده وهو عباره عن جركل 5لتر يعنى ممكن يكفى مرتين تغيير وسعره 61.5جنيه وطبعا قاله انه يكمل 500ك تانى على سرعه لا تتجاوز 80ك/س ويعدها يرجعله تانى يظبط تاكيهات وبعد كده يبقى خلاص يمش زى مايحب ومن نصايحه ليه انه بعد كده افضل مايذودش عن 100ك وذلك لاطالة عمر الموتور

[El.Hossieny]

ربنا يباركلك يا هاشم باشا علي نقل الصورة كاملة لاعضاء المنتدي ....و يا ريت تتابع معانا اول ب اول حالة الماتور بتاع صاحب حضرتك ... و تطمنا عليه بعدما يخلص التليين ... و يا رب يطلع عزب ده كويس و نبقي كسبنا ميكانيكي كويس

[volkeswagin]

ياباشا انا اجيب العربيه واعمل فيها ده كله عشان مش ازود عن 100
طب قلنا فى التلين ماشى انما ايه مش يزود على 100 بعد كده ده؟

ليه هو راكب ماتور بسكلته؟
الماتور ده عايش من العشرينات

وبعدين انا كنت بجيب بالماتور بتاعى 140 و 150 بتصارع ممتاز بالنسبه للبيتيلز (مهواش جولف اكيد :))

بس بجد انا لو ميكانيكى قالى كده انا هغيره فى ساعتها

[ابوهاشم]

ياباشا انا اجيب العربيه واعمل فيها ده كله عشان مش ازود عن 100
طب قلنا فى التلين ماشى انما ايه مش يزود على 100 بعد كده ده؟

ليه هو راكب ماتور بسكلته؟
الماتور ده عايش من العشرينات

وبعدين انا كنت بجيب بالماتور بتاعى 140 و 150 بتصارع ممتاز بالنسبه للبيتيلز (مهواش جولف اكيد :))

بس بجد انا لو ميكانيكى قالى كده انا هغيره فى ساعتها

استاذ محمد صبرى
ازى حضرتك وعامل ايه
انا اللى اقصده ونقلا عن كلام الميكانيكى انه مايذودش
عن 100ك/س ده لاطالة عمر الموتور
مش لانه مش هيجيب السرعه دى الموتور والحمد لله كويس وزى الفل وبعد العمره يعتبر جديد
وممكن جدا تعدى ال140 زى مابتقول لكن ثق تماما ان التسارع ده بيقلل من عمر الموتور
واحب اضيف للعلم ان اسباب نقص عمر المواتير وتفويتها هو الاتى
الحموله الذائده
التسارع الذائد عن العادى
عدم الصيانه الدوريه والمتابعه
الاستهتار بانواع الزيوت والبنزين
السواقه الرياضيه والامريكانى
بتفرق كتير جدا واكيد بتلاقى بين شخص والتانى فى محافظه على السياره عموما والاهتمام بيها يطول عمرها معاه

[ابوهاشم]

السلام عليكم ورحمة الله وبركاته
اخوانى الاعزاء ملاك البيتلز
وحشتونى كلكم والله
وانا ملاحظ من فتره انكم مش موجودين فى المنتدى ومافيش جديد
لعل المانع خير
الحمد لله صديقى الاستاذ خالد كمل ال1000 دلوقتى وصوت الموتور ماشاء الله عليه وكمان التسارع كويس جدا
لكن بالطبع برضه مش هنحكم على العمره غير بعد فتره كبيره
لكن مبدئيا هو الشغل كويس
وعلى فكره انا امبارح روحت غيرت الزيت وجبت زيت موبيل دلفاك 13040 اللى قال عليه عزب وفعلا صوت الموتور والسحب كويس جدا والحمد لله هو الجركن 5ك يعنى يكفى مرتين وسعره 62جنيه
وطبعا لان درجة لزوجته 40 مش بيحتاج تسخين كتير زى ال 50 اللى كنت بستعمله

[hasanadel88]

ازيك ياايهاب باشا حضرتك عامل ايه واحشنا والله
هو طبعا دلوقتى حاسس بفرق من صوت الموتور بس لسه طبعا بكره هيروح يظبط تاكيهات وبعد كده يكمل الالف ان شاء الله وبعدها يبتدى يحكم على حالة العربيه وربتا يباركله فيها
استاذ حسن عادل ازي حضرتك ياريت تطمنا عليك وعلى عربيتك اخبارها ايه والله كان نفسنا نشوفك المقابله اللى فاتت لكن عرفنا بظروف الحادث اللى حصلك وقدر الله وماشاء فعل
بالنسبه لعزب وانا ماتعاملتش معاه لكن اللى عرفته عنه انه بيخليك انت اللى تشترى حاجتك كلها بنفسك وتتعامل بنفسك مع الخراط وده لعدم الظن
انه بيعمل عليك شغل هى حاجه رخمه انا معاك ومتعبه اكيد لكن بصراحه انت اكيد بتكون مطمئن ان كل حاجه اتعملت صح وعلى ايديك وشايفه بنفسك وفى الاخر انت ليك الحكم والاختيار ووجهة نظره
احنا اتعاملنا مع صنايعيه كتير وللاسف ماعندهمش ضميربيقولك غيرلك كذا وكذا وممكن يكون ماغيرش حاجه ولا اشتراها
واحنا والله هدفنا فى الاخر وانا اولكم اننا نوصل لميكانيكى كويس وامين فى شغله

انا تمام الحمد لله و الكل تمام بس البيتلز فى المستشفى
اول ما تخلص ان شاء الله هكون معاكوا
هو عزب حلو اة بس الصناعية اللى عندوا مفهمش حد حلو غير خميس عيب عزب الزحمة و التناكة شوية و غالى بس انت بتكون ضامن الشغل عارف انت جبت اية و اية اللى اتعمل عند الخراط و بتاع الاوشاش
انا مهندس ميكانيكا بور فا لما شفت الشغل عجبنى.
بس الاسطى سالم اللى هناك دة ملوش غير فى الترزيع و التخبيط
لما لاقيتة هو اللى بيربط جوايط الموتور اتخنقت اوى انى عملت النص عمرة دى و هو خميس مش موجود و كمان اية اعد يربط بنغير مفتاح عزم و اديلو ادى(انا مجربتش خميس بنفسى بس الناس هناك كانت بتشكر فية)

[ابوهاشم]

ان شاء الله تطلع بالسلامه ياباشمهندس حسن
وترجع احسن من الاول
وانت طمنا اول باول واحكيلنا عملت ايه بالتفصيل والتكاليف

[mabar]

والله انا مش عارف احط زيت اية

[ابوهاشم]

بالنسبه للزيوت المناسبه للبيتلز
عندك شلx100معظم الاعضاء بيشكرو فيه
وانا عن نفسى متمسك بالتعاون وهو ممتاز للبيتلز
التعاون الاحمر (سوبر ستان) 33 جنيه بالغيار
بس تغيره على 700ك فى الصيف 1000 فى الشتاء
التعاون البرتقالى (سوبر يكس) 37 جنيه بالغيار
ممكن 1000 الى 1200 فى الصيف
التعاون الاسود (كوب فاكت) 52 جنيه 5ك عبوه جديده
1500 فى الصيف 2000فى الشتاء
الافضل هو البرتقالى علشان التغيير على فترات قريبه
يكون افضل للموتور

[ahit]

والله انا مش عارف احط زيت اية

راجع الرابط ده و إن شاء الله تلاقى الحل

http://www.nilemotors.net/Nile/20458-a.html