موضوع فعلا أصبح ظاهر.....هل ترضى بهذا المنظر ..طيب تعمل أيه لو شفته بعينك ...؟؟

[alyyassin]

السلام عليكم ...

أولا : لابد من الاعتراف بالمشكلة ..علشان تتحل ... و معرفة أطراف المشكلة ..... دي مقدمه فقط

الموضوع بقى .... و طبعا الموضوع مش بعيد عن مجال السيارات علشان بس الادارة ما تعترضش على الموضوع

الظاهرة الى انا بتكلم عليها و أكيد كل الناس هنا على الأقل شافها مرة على الأقل ......و هى :

تلاقى شاب سايق العربية و على الكنبة الي ورا ولد و بنت شغاليين ( بوس و كدة و الازى منه ) و الموضوع ده انا شفته أكتر من مرة .....طيب يا جماعة و بعدين .....طبعا انا لو اتكلمت من منطلق الدين الناس هتنفر ... و طبعا مش عارف ليه لما الناس تسمع حلال و حرام يبعد فورا ....!!!! الله و أعلم ليه ...؟؟؟

المهم ....هتكلم من منطلق الرجولة ..... و طبعا الكلمة الشهيرة في مصر ( ترضى الكلام دا لأختك أو حد من أهلك ) ....و عايز الناس ترد على السؤال ده الأول قبل ما نخوض في الرد ......و الله لو كان الرد نعم .....فأنت خارج نطاق الحوار أصلا .....لأسباب - يأتى ذكرها حين الاحتياج ليها -

و لو كانت الأجابة لأ طبعا مرضاش بالكلام ده لحد من أهلى ....طيب ليه ممكن تعمل كده أو تعرف ان حد من أصحابك بيعمل كده و ماتنصحوش ...بالعكس أنا ممكن اقطع علاقتى بيه نهائيا و الكلام ده فعلا يكون جدى منك جدا مش مجرد تهديد .......لعلة ينتبه لخطأه ( ودا علاج جامد جدا ..)

انا بفكر الناس ان لابد الاعتراف بالخطا ............علشان يأتى العلاج ...زي المريض لازم يقتنع بالمرض الأول علشان يبقل العلاج ...صح و لا أيه ؟؟

طيب دلوقتى لو انت بتعمل كدة أو تعرف حد بيعمل كده ممكن تقلنا أيه المبرر القوى ألي يخليه يعمل حاجة زي كده ......

و برضو ياريت الناس تأكد معايا المعلومة دى ..الناس الى بيعملوا كده في عربياتهم و الله ربنا ديما بيبتليهم بالحوادث و الكوارث في عربياتهم ( و طبعا الكلام ده مش قاعدة ....علشان ممكن بعض الناس تقول... يا عم أنا أعرف ناس بتعمل عمايل ..كذا و كذا ... و عربياتهم زي الفل ) ..يعنى من وجهة نظري على الأقل .....

المهم علشان الموضوع فعلا كبير جدا ..و انا فعلا حزين جدا لما بشوف كده ..و والله العظيم لما بشوف منظر زي كده أكد أبكى من الحزن ......:K14:

أخيرا بقى .....لو شفت موقف زي كده هتعمل أيه .....

و تجربتى الشخصية مع موقف زي كدة .....

أنا ساكن في الهرم ...و انا راجع من مشوار لقيت شاب بعربية شاهين حمرا و قاعد ورا في الكنبة ولد و بنت و شغاليين بوس ....و أنا خدت بالى تقريبا من نصف شارع الهرم ...ومقدرتش اكمل كل شوية الاقى العربية جنبى ......و طبعا ماقدرتش اكتم غيظى منهم رحت جاي جنب العربية و قلتلهم يا جماعة عيب كده ماينفعش الكلام ده .....راح الشاب الي سايق ( الى احنا بنسميه معذرة يعنى أريال ... انا اسف جدا بس هو ده التعريف الدارج عند المصريين ) راح شتمنى ...شتمنى أنا الى بقوله عيب كده ....و حسسنى انى انا الى غلطان .....و البنت الي ورا طبعا حسيت انها انتبهت جدا و اتفاجئت من كلامى .... و طبعا الشباب الى حواليا عمالين يبصولى كأنى مجنون ....... دا الموقف بتاعى .......

و طبعا زي ما قلتلكم الموضوع كبير فا ياريت الناس تتكلم بصراحة علشان نحل الموضوع ده ....... و خلى بالك دى من الحاجات الي بتترد فيك في الدنيا عاجلا أم اجلا ....زي العقوق بالظبط ..و أكيد الناس فاهمة الكلام ده كويس ........

و تحياتى .....

[bemocarlo]

انت راجل في زمن عز فيه الرجال.انا لو مكانك والولد شتمني ها قفل عليه وانزله وادور فيه الطحن هو اللي معاه .
bemo,ire

[dr.amr]

هههههههههههههههه
ربنا يهدي
البلد دي طول ماانت محترم ماينفعش تعيش فيها
الذنوب بتكتر والوحش بيجر معاه المحترم
حاجه تحزن والله

[mohamed farouk abo ala]

حسبى الله ونعم والوكيل
أنا حصلى تقريبا نفس الموقف كنت بعدى من شارع الهرم عند محطة الاريزونا وأفاجأ بعربية Bmwكانت هاتخبطنى تخيل حضرتك الى سايق كان معه وحدة قعدة بجانبة وكانوا بيبوس بعض والبية صاحب العربية كان سايب السواقة وطريق مركز معها بصراحة أنا مكنتش مصدق الى أنا بشوفة لولا ستر ربنا لحقت نفس على أخر لحظة

[RED_OCTOBER_IV]

حسبى الله ونعم الوكيل ... مش عارف العيب منين .. بس مبقاش فى حد بيخاف من حاجه .. ولا بيعمل أعتبار لحد ..وكل واحد يقولك هو انا الى هصلح الكون .. و شباب ماشى بأفلام خليعه على موبايله .. و المخدرات عادى أصل انا متعاطى مش مدمن (ربنا يحميك لماما ) .. المعاكسه دى روشنه .. الخناقات وسب دينى ربنا ليل ونهار دى مرجله .. و و و
هنقول ايه ولا ايه ...... يلا خليها تولع .

ربنا يطلعنا منها على خيـــــــر

[Terrible_DaRsH]

ما هما مرمين فى كل مكان ...
هتلاحق على العربيات ولا المقطم ولا السينمات ولا ولا ولا ولا !!
حسبي الله ونعم الوكيل ..

[bmw323]

زى أنا مرة ماشى فى شارع جمب بيتى وماشى قدامى بنت فا بعدين مفيش شوية ولاقيتها قابلت حبيب القلبو ويقوم بايسها فى الشارع قدام الناس كدة عادى جدا وبوسة بكل حرارة (إنا لله وإنا إليه راجعون)
والله يا جماعة الواحد بيحزن جداا لما يشوف موقف زى دا
الناس عندها نقص اصلا والبعد عن الدين هو الى مخلى الناس كدة
لاكن لو كلنا نقرب من ربنا سبحانة وتعالى حالنا كله هينصلح

[M.Osman]

لا تعليق غير ... "كدا اللي انا بشوفه فى الشارع من التفاهات دي يعتبر لا شئ"

[ابو فرح]

لو انا مكانك هيحصلى زى ما حصلك لان دلوقتى مفيش حاجه اسمها خشا بقا فى فجور بين الشباب
وربنا يحفظنا ويحفظ اولادنا

[MohaMed_Refaat]

والله العيب مش علي حد غير بهوات المرور اللى سايببن العالم الواطية دول يعملوا كدة فى العربيات ومركزين مع واحد مركب زينون او غيرة من تفاهات المرور
المشكلة فى البلد دية هية الروتين والتنفيض
الروتين / ان رجل المرور اوالشرطة بينفذ تعليمات اتملت علية وبينفذها بحذفيرها ولو مثلا شاف حاجة زى كدة فى عربية ممكن ميعملش حاجة لانة نازل علشان يلم فلوس وينفذ اوامر روتينية صادرة من واحد قعد فى مكتب بعيد كل البعد عن الشارع واحداثة :::::

[wesam_salom]

خلينا ساكتين

انا لو كتبت رأيى بصراحه

اكيد مش هقدر اكتب تانى

كل اللى نقوله حسبنا الله ونعم الوكيل فى المتسببين فى هذا

[amrico]

اللهم انتقم منهم
دا حتى المفروض إذا بليتم فاستتروا
وربنا بيستر علي العاصي والفاسق ومبيفضحهمش لكن البعض بيجاهر بالذنب والله أعلم دول هايكون حسابهم إزاي وإنا لله وإنا إليه راجعون

[pharonicking]

السعودية اللى مش عاجبانا عندها هيئة الامر بالمعروف والناس عارفة كدة ومبتعملش اى عمل غير اخلاقى فى الشوارع والا حيكون مصيرها صعب "
تخيل لو الهيئة دى موجودة فى مصر مش حتلاحق """
حيطيروها تانى يوم ويقولك الحرية الشخصية والكلام الفاضى اللى جابنا ورا""

[khpopo]

حاليا مالين الشوارع مش العربيات بس انا برضة مبعرفش اسكت والغريب فى الزمن دة ربنا يرحمنا ان لما احتك بيهم بحكم سكنى بجانب الكورنيش مكان الاحبة عشان يلوثوة ويخربوه علينا بلاقى البنت ولا همامها كلام من الى بيحصل وعادى جداا بتبصلك بكل تحدى
ربنا يهدى الجميع

[yooyaa]

مش فاهم حاجة.. السلام عليكم

**************************
برجاء مراعاه شعور الاخرين
مشرف فرعي 1