حوار هادئ عن ماركة بروتون

[tutankhamoun]

السلام عليكم .
من فترة لأخرى يخرج علينا بعض الأخوة الأعضاء و الزملاء في المنتدى ليُبدي رأيه الكريم عن ماركة بروتون .
و طبعا بنسمع كلام زي
الماركة وحشة و العربية كلها مشاكل و عيوب و ما تستهالش ثمنها
و ساعات بعض الناس بيحبوا يضيفوا بعض الأتهامات بأني أو بعض الأخوة بتتكلم بصوت الشركة أو أنهم ممثلين لها أو ممثلين للوكيل المحلي عز العرب لمجرد الدفاع عن الأتهامات من الناس ( اللي مش معاها العربية )

و نلاقي بعض الناس تدخل تعلق تعليقات مش ظريفة من باب التقطيم
طيب ليه أشتريت ..... الماركة المعفنة الغير معروفة دي ؟؟؟
ما عندك الياباني و الكلام اللي أحنا كلنا عارفينه ده .


**************

بإذن الله نفتح الموضوع و نتكلم عن تجربة
و ياريت عن تجربة علشان يبقى الكلام واقعي .

دلوقتي فيه ناس معاها العربية و بتشتكي إن فيه بعض العيوب .
زي :
1 - مُشكلة أساسية و موجودة و هي صوت تزييق بيظهر بسبب
أن القطعتين المعدن اللي بيمسكوا الكنبة الخلفية في مُثبت الشنطة في المطبات بيخبطوا في بعض و ساعات بيطلع صوت و قلنا الحل أن ممكن نلف أي حاجة بلاستيك أو شيكرتون و التزييق هايختفي .

2 - صوت تزييق بيظهر في المطبات من التابلوه عند بعض السيارات و ليس كل السيارات .
و ده بسبب المطبات الكثيرة و الصوت ده موجود في عربيات كثيرة خصوصا اللي التابلوه بتاعها بلاستيك زي الفيات البونتو ( اللي أنا أمتلكت منها عربيتين قبل كدا )
و زي ماركات تانية .

فيه بقى حاجات ثانوية و غير ظاهرة أو منتشرة في السيارة عموما و بعض الأعضاء أشتكوا منها
و نبص نلاقي واحد مسك مُشكلة أو مُشكلتين .... و قعد يتغنى بيهم و كأنه مستنى يسمع حاجة زي كدا علشان يشمت في المُلاك .

و أنا الحمد لله العربية معايا من سنة و نصف و عامل بيها دلوقتي 17 ألف كم و مفيش عندي مشكلة و مبسوط جدا منها و بناءا عليه أقوم بترشيح السيارة حسب رغبة و حسب أسئلة بعض الأخوة عند المقارنة بين سيارتين و أحاول قدر الأمكان عدم التحدث عن السيارة الأخرى موضع المقارنة مع اظهار امكانيات الجين 2 أو البيرسونا أو الواجا كسيارة من بروتون .

فيه نقطة تانية مهمة عايز أوضحها للأعضاء الجداد .
أنا مش ممثل بروتون و لا بأقبض منهم و لا بأخد منهم فلوس
و أنا مستهلك عادي زيي زي أي واحد هنا مبسوط من سلعة أشتراها و بأعدد مميزاتها للأعضاء اللي بتسأل
و الحمد لله مش بحاول أغش حد أو أكدب على حد في حاجة زي دي .


ياريت مُلاك جين 2 أو بيرسونا أو اجا أو ويرا
يدخلوا يقولوا أنطباعتهم عن الماركة عموما و هل هي تستاهل ثمنها أو لاءة .

و كمان نحب نسمع آراء غير الملاك على أن يكون رأي مُكون من معلومات مؤكدة و غير ترديد لأشاعات أو ترديد لمشكلة سمعها من شخص ما .
على أساس أن كل السيارات يظهر بها مشاكل و حتى الزيرو .

علشان أنا بصراحة زهقت من النقد الغير بناء و خصوصا لما بييجي من ناس مش مجربين و لا يعرفوا حاجة عن العربية و يدلخوا يقولوا كلام يفقع المرارة....... سنة و نصف على هذا الحال .
أشمعنى بروتون اللي الناس ماسكلها مشاكلها ؟؟؟؟؟؟

[M.Osman]

انا هقول لحضرتك على حاجة طريفة جداً...

اي حد اعرفه "يمتلك" جين 2 او .... بيشكر فيها جداً
اي كلام غير منطقي بسمعه عن عربيات بروتون بيكون من ناس سمعت من ناس جربتها لمد 65 ثانية او حاجة زي كدا ... يعني مش مقياس اصلاً.

عربيات بروتون عربيات محترمة و في رأيي value for money..

:) شكراً لطرح الموضوع

( على فكرة انا مش من توكيل بروتون )

[oamr]

حدث فعلا مع الجين 2 موديل 2007

وديه تجربة فعليه لواحد زميل مش قصه وهمية وعلى فكرة انا مش من توكيل بروتن
والزميل ده اسمه الحاج على فراج يعمل فى شركة العامرية لتكرير البترول فى الاسكندرية
الحــــــــــا دث
هو كان راجع من شغله فى العامرية على الطريق الدولى وطبعا فاتح على الرابع
يعنى ماشى على سرعة عاليه المهم وهو فى الطريق وده كان باليل ما شفش صخرة
كانت بجانب الطريق فدخل فيها بالعجله اليمن الاماميه فـ دمرت الكاوتش وطبقت
الجانت لكن العربية ما اتقلبتش واتحكم فيها وركن وذهب بها بعد ذلك للتوكيل واصلحوها وبقت تمام التمام الحمد لله مفيش شكاوى كمان هو بيقول ان مفيش حاجة اسمها عيوب تقفيل فيها وده عن تجربة منه منذ الاستلام حتى الان يعنى التكيف ماية ماية والماتور مفيش اى شكوه منه والفرامل abs شديدة وماشيه تمام العربيه
والابواب ممتازة ولا فيها تزيق ولا حاجة يعنى عربية زى الفل ايه رايكم فى الكلام
والعربيه بقلها معاه سنتين وماشاء الله .
ونرجو التواصل

[momenhamdy]

طبعاً يا استاذ توت موضوع مهم جداً جداً
الي حد كبير جداً يا استاذ توت الناس هنا في مصر معندهاش اي نوع من انواع التضحيه بمعني ان مفيش اي شخص ممكن يضحي انه يدفع مبلغ 90 الف جنيه و العربية مش منتشره مثلاً ...
و امثله علي كلام دا
حضرتك تعالي بتكلم علي عربيات تعبانه فعلاً و لا ثبات و لا عوامل امان و ضعيفه و بتلاقيها نجحا جداًجداً
يعني الناس بتدور علي الي منتشر و معني انوا منتشر من وجه نظر المصري ان العربية 10/10 و محبوبه الملاين
و الامثله واضحه جداً جداً في الشارع المصري
فا انا مش عايز حضرتك تكون متأثر بالهجوم علي العربية لن دا شئ طبيعي جداً
و برده في الاخر الاختلاف في الرأي لا يفسد للود قضيه
و ان الكمال لله وحده

نرجع بأ للموضوع الخاص بالاطباع عن البروتون
انا انطباعي عن العربية انها بسم الله ما شاء الله زي الفل و انا كنت لسه في ابورواش امبارح الثلاثاء 17/2 و كان بناء علي دعوه من المهندس امر و دا كان علشان يشوف لي حل بسبب موضوع دواره العربية الي اتكلمت مع حضرتك فيه و كان السبب ان في مياه جت علي حساس النقلات في عصايا الفتيس ( العربية اتوماتيك )
بس الاهم من كدا ان المياه دي جت منين.... في التوكيل هنا في اسكندرية بعد ما العربية خلصت شغل السمكره و الكلام دا العربية طبعاً كان كلها تراب اتعملها Car Care طبعاً الراجل علشان يروق العربية طبعاً في مياه دخلت العربية و طبعاً انا مشفتهاش لاني استلمتها و كل حاجة من بره سليمه و لا مياه و لا الهوا و طبعاً الصالون جوا و لا في اي شئ يدل ان فيه مياه بس الفكره ان التراب اتمسح و كله تمام ....
فجئت ان العربية بعد ما طلعت بيها من التوكيل فجئت بالتعلقيه في الدواره دي .. يعني الي انا عاوز اوصله ان لازم الناس في التوكيل تفتح عنيها كويس علشان ساعات بيحصل مشاكل ملهاش اي لزمه و بتكون مقلقه في بعض الاحيان اوي ( ودي يمكن الشكوي الوحيده من التوكيل لحد دلوقتي ) و انا بصراحة شايف انها مشكله مش بسيطه لانها فعلاً طلعت عيني و كانت منرفزاني اوي اوي .....

بس في سؤال مهم يا استاذ توت و يعتبر سؤال فني الي حد ما و عايز حضرتك تشاركني بخبرتك
تفتكر لو العيب دا ظهر تاني في العربية (لاقدر الله ) اطالب الضمان بتغير الحساس الخاص بالنقلات دا و لا ايه الموضوع ...؟؟
مع العلم ان المهندس امر و المهندس كريم ناس متعونه جداًجداً
و كان في اهتمام شديد اللهجه من المهندس امر للاهتمام بالمشكله

[Ayman_52]

مش عارف اقول لحضرتك ايه يا استاذ/تــوت

بس ماتفهمش الناس اللى داخله عامله تتكلم على عيوب العربيه ..وهما اصلا مش من ملاكها..هما يمكن عشان ركبوها 55 ثانيه...اصبحوا بيفهموا...وبقى ليهم تجارب مع السياره...وحضرتك عارف بقى الانسان المصرى..وحبه فى تحبيك القصص واضافه الشطه واللمون !!!!!!

لا واللى يقولك

( لا ياباشا انا عشت فى الخليج وبفهم فى العربيات..وجربت البيرسونا وماعجبتنيش)

طب ياعم واحنا مالنا....ولا عشان الباشا مش عاجبه عاوز الناس كمان ماتعجبهمش ويمشوا على مزاجه

بجد والله يااستاذ/توت انا زعلان عشان حضرتك جدا....عشان حضرتك بتحاول باقصى مجهود ليك انك تساعد الناس.... دون اى مقابل ودون اى علاقه لك بالتوكيل...

وفى المقابل فى ناس تطلع وتتكلم باسلوب غير راقى بالمره(شكلهم عشان كانوا عايشين فى الخليج بقى)


بس والله يااستاذ/توت...الناس عارفه الشخص دا مين ..ومين الاخرين؟؟؟

وصدقنى الاسلوب يا استاذ/توت.. بيبن مين الشخص المحترم ومين الاخرين


انا اسف يا استاذ/توت على زعل حضرتك

وياريت بلاش نسمع اراء من اللى ماعندهمش العربيه...كفايه يقولوا رايهم فى عربيتهم للمحتاج يسمعها


تحيــاتى لحضرتك يا استاذ/توت....ومعلش ماتزعلش نفسك


وفى حكمه قديمه بتتقال

لو كل كلب عوي ألقمته حجرا ** لصار الصخر مثقال بدينار

[eng_mh1980]

طبعا كلنا لاحظنا الهجوم الجامد في الفترة الاخيرة على بروتون انا وجهة نظري
ان ملقوش في الورد حاجة قالوا ياحمر الخدين
يعني الناس من كتر ما سمعت ان بروتن فيها مشاكل تقفيل بقت عندها تلكيك على اي حاجة فلو ظهر معاه مشكلة صغيرة بيجيلو احباط ويفكر ان العربية وحشة رغم ان اي عربية ممكن يطلع منها مشاكل
انا واحد صاحبي اسمة رامي اشترى من سنة عربية رينو ميجان ب 130000 جنية وفي سنة واحده غير كومبروسور التكييف و كتاوتوالمساعدين الخلفيين باظو و كذا حاجة تانية .
بس فعلا العربية ممتازة وإن ظهر اي مشاكل بسيطة ده يا جماعة عادي و موجود في كل الماركات.
ومننساش ان معظم اللي بيكتب في المنتدي بيكتب علشان عنده مشكلة و عاوز رأي الاخوه وفي ناس كتييييييييييييييير معندهاش اي مشاكل فمحدش حاسس بيهم

[kloda]

و لا يهمك يا استاذ توت و خلاص انت بتنصح الناس و الي عايز يسمع النصيحة براحتو
يعني من الاخر كل واحد ذنبو علي جنبو
انا شخصيا مش عارف اشكرك اذاي علي افادتك ليا في موضوع شراء العربية
و انا اقتنعت بكلام حضرتك المنطقي جدا و صليت استخارة و توكلت علي الله و اشتريت العربية
و بجد مش ندمان ابدا علي الاختيار دة الي فعلا ماكنش فية احسن منو
و في الاخر عايز اقول لحضرتك جزاك الله كل خير علي افادة الناس

[hos012]

السلام عليكم

انا معايا بروتون برسونا العربية بسم الله ما شاء الله المشكلة الرئيسية مش فى العربية المشكلة فى توكيل عز العرب اللى بيدخل عربيات بالكوم ومابيعملش الحاجة مضبوطة .

[MohabSaeed]

اخى الفاضل استاذ توت .
حضرتك من الناس الى بتحب تخدم غيرك لوجه الله . يعنى تواصلك مع التوكيل ده مش لمصلحه شخصيه و كل الناس الى فى القسم هنا عارفينك و عارفين مجهوداتك . حتى و لو مش عارفينك بشكل شخصى , بس مجهودك واضح جدا . ربنا حيجازيك خير عليه .
اى حد يهاجمك او يلمحلك انك شغال فى التوكيل او بتقبض منه او او او او من الكلام الفارغ ده .. يبقى مش عارفك . او عارفك و عارف انك انسان محترم و متضايق ان لسه فى ناس بتخدم بعضعها و داخل لمجرد " العبث و التشويه " ف متحطوش فى دماغك .
الى يهمك احنا , " الاعضاء المتواجده فعلا فى المنتدى " الى كلهم عارفينك كويس .



بالنسبه لبروتون و الواجا ....................................
بجد انا اتكلمت بما فيه الكفايه و اتكلمت فى العيوب قبل المميزات و قولت كل حاجه لاحظتها فى العربيه بامانه .
بالنسبالى رأيى لسه زى ما هو
" بروتون = صفقه رابحه " و الحمد لله مبسوط من عربيتى .
و عن تجربه فتره طويله مع الويرا كمان , الويرا من العربيات المحترمه جدا و بتديك اداء و اعتماديه و عمليه " مش موجوده فى اى عربيه فى فئتها " .

مره تانيه ماتزعلش " كبر دماغك " العمليه مش مستاهله صدقنى .
تحياتى ليك .
:-)

[tutankhamoun]

يا جماعة ألف شُكر لكل اللي رد .
بارك الله فيكم ..... الحمد لله أني مش لوحدي اللي فاكر ان عربيات بروتون عربيات كويسة
و دي شهادتكم ( أغلبكم معاه العربية ) ..... و دي كفاية لأنك المجربين العربية و مجربين التوكيل كمان .

و شكرا على افادتكم عن العربية و عن الماركة
و ربنا يهدينا جميعا .... و يرشدنا لطريق الصواب ......

بس في سؤال مهم يا استاذ توت و يعتبر سؤال فني الي حد ما و عايز حضرتك تشاركني بخبرتك
تفتكر لو العيب دا ظهر تاني في العربية (لاقدر الله ) اطالب الضمان بتغير الحساس الخاص بالنقلات دا و لا ايه الموضوع ...؟؟
مع العلم ان المهندس امر و المهندس كريم ناس متعونه جداًجداً
و كان في اهتمام شديد اللهجه من المهندس امر للاهتمام بالمشكله

و الله يا باشا .... لو العيب ظهر تاني ..... بسبب حساس النقلات اللي أتأثر بسبب الغسيل الخاطئ للسيارة في التوكيل
يبقى العيب عندهم .... و لو المُشكلة ظهرت تاني يبقى تكلم المهندس آمر و أكيد أنت أتعاملت معاه و شوفت هو أد أيه خدوم و محترم و بيحب يريح العملاء و يديهم حقهم ...... و إن شاء الله نتمنى أن المشكلة دي ما تظهرش تاني و كله يبقى تمام

و ربنا يباركلكم يا جماعة في عربياتكم أياً كانت .... بروتون أو غيرها و لكم جزيل الشكر على المشاركة و توضيح رأيكم الكريم .

و أنا عايز أقول ملحوظة قلتها يمكن مليون مرة
الناس اللي فاكرنا بنقول مميزات بس أو بنحاول نحلى العربية للي الناس اللي عايزة تشتري
ياريت يفكر قبل ما يتهم حد و يقرأ المداخلات كويس و يشوف القسم كويس و يشوف أن أحنا عاملين اتصالات بالوكيل لحل أي مشكلة تظهر . و مش بنحاول نخفي العيوب أو ندفنها في الرمال.

و هي دي فائدة خدمة العملاء في أي شركة في العالم .... و أي شركة في العالم بتعطيك ضمان تحسبا لظهور عيب تصنيع .
أعتقد أن كل شركات العالم بتدي ضمان و عندهم خدمة عملاء ... و لا أيه ؟؟

ربنا يهدينا جميعا

[jisso82]

أستاذ توت حضرتك و أستاذ أيمن و مزاجنجى من أهم أسباب اقتناعى بالعربية و انتظروا إن شاء الله باقة ورد كبيرة ممزوجة بشكر عميق لناس بتساعد ناس ماتعرفهاش بدون أى مصلحة و أجمل كلمة سمعتها عليك من عضوة بالمنتدى كانت زميلتى فى الكلية "فى واحد اسمه توت عنخ أمون بيدافع عن العربية باستمرار كأنه هو اللى عاملها بس للأمانة مش دفاع أعمى كلامه دايما منطقى و بيدعموا بفهم و وعى عالى قوى ما يتهيأليش إن مهندسين التوكيل نفسهم و لا بتوع المبيعات يقدروا يتكلموا بيه" و كنت حضرتك برده من أهم أسباب اقتناعها بالعربية و عموما أنا اتفقت معاها فى كل كلمة قالتها و ده رأيى فى حضرتك برده مع إنى متأكد إنك مش محتاج تسمعه لأنه رأى أغلب الأعضاء أنا مازودتش عليهم حاجة

[ussamalh]

الجين 2

استاذ توت انا اسامة متهيالى انا من الناس الى خدت رايك من الاول فى العربية بس انا هقولك عن تجربتى بعد سنه مع الجين 2 و 25000 كيلو بين سفر و داخل المدينة .
العربية ماشاء الله زى الفل رغم انى بشتكى من مشكلة التكييف الى محدش عارف يحلها بس لو تكلمنى عن الطريق لاما شاء الله
و عاوز اقول للناس جميعا انا عندى اصدقاء معاهم ميجان و معاهم النترا
و الله فى اول سنه كلهم غيروا حجات ما بين علبة دريكسون و ما بين حاجات تانيه.
بس المهم ان كل الماركات فيها مشاكل بس عشان احنا مركزين مع ماركة جديدة بنفكر فى كل العيوب الى فيها مع ان اننا نسنا الماركات الكبيرة .
و برضه يا جماعه بعد اذنكوا حد يقولى اشترى ماتريكس 100.000 الف
مفيهاش اى حجاه فى الدنيا من السيفتى و لا الثبات على الطريق وده عن تجربة سفر مش كلام ولا اجيب جين 2 .
بس ياريت التوكيل يهتم بينا زى ماحنا مهتمين بالعربية
و يا استاذ توت اعمل الى عليك و توكل على الله فى خدمه الناس لان الاجر عند الله مش عند التوكيل ولا ااعضاء .

[fadynabil]

موضوع جميل جداً .. وشكر خاص لأستاذ توت

بس سا جماعة إنتوا مش واخدين بالكو من حاجة مهمة جداً ... إنتوا بتتكلموا مع مين ( the Consumer ) معظمهم وإن ماكانوش كلهم من الشباب واللي أكتر حاجة بيهتموا بيها العربيات

بمعني إنهم كلامهم كتير وإنتقادات كتير عليها عشان الفئة دي من المستهلكين بتهتم أوي بأدق تفاصيل السلعة المعروضة مع الإستخدام الرياضي القاسي

لكن لو جينا شفنا عربيات تانيه زي ال لانسر مثلا هتلاقي الناس بتشكر فيها وطالعين بيها السما .... بس تعالوا نشوف مين اللي راكب ال لانسر معظمهم أو نسبة كبيرة منهم فئه عمرية مختلفة تماما مطلبهم من العربية إنها تمشي وخلاص وتكون ناعمة و مش فارقة معاه حاجات تانيه

بالإضافة إنه مش هتسمعوا صوتهم لأن نطاق الفئة دي مختلف عن الشباب ... والتواصل من خلال الحديث عن السيارات والمنتديات

علي سبيل المثال منتدي نايل موتورز أعتقد إن هنا هنلاقي الفئة العمريه
الموجوده علي المنتدي معظمها شباب

من الأخر ملخص الكلام ده ( إن الشباب بتتكلم كتيييير ) مش زي واحد عنده ٤٠ أو ٥٥ سنة ( عنده إهتمامات مختلفة ) مش هيقضي حياته في الكلام عن العربيات

وزنا في الأخر في رأيي إن العربية مناسبة لثمنها إلي حد كبير جداً بالمقارنة بالسوق


وربنا يبارك لكل واحد في عربيتة ... وشكراً لأستاذ توت علي الموضوع الجميل ده

[وائل عطية]

استاذ توت انا اسامة متهيالى انا من الناس الى خدت رايك من الاول فى العربية بس انا هقولك عن تجربتى بعد سنه مع الجين 2 و 25000 كيلو بين سفر و داخل المدينة .
العربية ماشاء الله زى الفل رغم انى بشتكى من مشكلة التكييف الى محدش عارف يحلها بس لو تكلمنى عن الطريق لاما شاء الله
و عاوز اقول للناس جميعا انا عندى اصدقاء معاهم ميجان و معاهم النترا
و الله فى اول سنه كلهم غيروا حجات ما بين علبة دريكسون و ما بين حاجات تانيه.
بس المهم ان كل الماركات فيها مشاكل بس عشان احنا مركزين مع ماركة جديدة بنفكر فى كل العيوب الى فيها مع ان اننا نسنا الماركات الكبيرة .
و برضه يا جماعه بعد اذنكوا حد يقولى اشترى ماتريكس 100.000 الف
مفيهاش اى حجاه فى الدنيا من السيفتى و لا الثبات على الطريق وده عن تجربة سفر مش كلام ولا اجيب جين 2 .
بس ياريت التوكيل يهتم بينا زى ماحنا مهتمين بالعربية
و يا استاذ توت اعمل الى عليك و توكل على الله فى خدمه الناس لان الاجر عند الله مش عند التوكيل ولا ااعضاء .

شكراًُ على المعلومات
المشكلة إن التوكيل ممكن يكره الواحد في العربية فعلاً ويخللي سلبياتها تطغى على عيوبها

[mohamed_sabry]

والله يا توت انا باحمد ربنا دايما على توفيقى لشراء هذه السيارة دون غيرها , فعلا العربية دى تستاهل اكتر من تمنها , عربية رائعة بكل المقاييس , قوة موتور و اداء رفيع , شياكة و عصرية بالداخل و الخارج , و انا قبل ما اجيبها كنت باقارن ما بينها هى و النيو اكسنت و الاوبترا و السيراتو , بس بعد ما اشتريتها ايقنت انها تتفوق على كل هذه السارات بمراحل , ده كفاية يا راجل الثبات الرهيب للعربية , حاجة مش معقولة فعلا , اقسم بالله كنت راجع من الاسكندرية بوم الاحد الماضى صباحا , و عاوز اوصل الشغل فى الميعاد المضبوط و الوقت كان بدرى لسة مفيش رادار قمت فاتح على 150 او 160 , بعد شوية فوجئت بوالدتى بتقولى " محمد انت بتسبق العربيات التانية , تبقى اكيد عديت المائة كيلو فى الساعة " , يعنى حتى اللى راكبين معايا مش حاسين بقلق و لا حاسين ان العربية بتجرى جامد , ربنا يبارك لنا كلنا فى عربياتنا و يقينا شر الطرق .
و بعدين انا استعجبت من انى كنت بقارن بالجين2 بالنيو اكسنت , ده لا وجه للمقارنة مطلقا , الجين 2 فين و الاكسنت فين , الحاجة الوحيدة اللى تتفوق فيها النيو اكسنت هو صوت الموتور , و حتى النقطة دى صوت الجين2 جميل و يديك احساس بالقوة المفرطة و انك راكب عربية سباق .
و انا باحسدك على اهتمامك بعربيتك و على مواضيعك المميزة جدا اللى بتخلى الواحد ميفكرش يعمل اى موضوع علشان مش هيقدر يخش المنافسة .