طلب (كيفية تقييم البيتلز)

[smsmxxxxxx]

السلام عليكم
اولا احب ان اشكر اصحاب المنتدى والقائمين علي تشغيله لانه بجد منتدى جميل فى كل شئ
وطبعا اجمل حاجة فى المنتدى هو اعضائه الكرماء اللي مبيبخلوش في اى معلومة

ثانيا قرأت اغلب المواضيع عن السيارة البيتلز هنا وانا اصلا بحبها من قبل ما اعرف قيمتها منكم

فطلبي هو المساعدة بمعلومات عن كيفية تقييم البيتلز وتحديد سعرها لرغبتي الشديدة فى شراء واحدة
مع العلم انى متزوج وعندى طفلين بس مش هسافر بيها هى للمشاوير العادية فقط

وميزانيتى اقصي حاجة 15000 جنيه وياريت تكون اقل

خصوصا ان اى حد اكلمه يقوللي هات 128 احسن ومفيش حد من اللى اعرفهم يعرف يساعدنى

فاتمني منكم المساعدة بأى معلومة ولو صغيرة لكيفية تقييم هذه السيارة الجميلة

وايه هي العيوب اللي ممكن انزل في سعرها وعلاجها سهل او يمكن تأجيل علاجها

ارجوا من الأخوة الأعضاء الأهتمام

واشكركم مقدما

اخوكم
محمد سالم

[timonet2020]

انا كمان بدور على فولكس تكون موديل 75 - 79 تكون المانى و ما تحتاجش اى مصاريف
بس انا ما بفهمش فيهم و يا ريت لو حد يساعدنا و يقوللنا نقيمها و نفحصها ازاى ؟؟؟

[mynameh]

أولا سعر البيتل بيبدأ من 8000 و إنت طالع ممكن لحد 20000 أعرف واحد عايز يبيعها ب 20000 بس كابورلية
لو إتكلمنا عن الي ب8000 هتبقي محتاجة عمرة و تغيير عفشة أو دنجل و كمان ممكن تغير العجل و .... إلخ
بس أهم حاجة تاخدها لميكانيكي فاهم فيها و هو يقولك و كمان غير الزيت الي حاطة الي هتشتريها منة لأنو ممكن يكون حاطت زيت مانع للدخنة أما عن موديل من 75 ل 79 ممكن تعمل في حدود 14 ل 17 حسب الحالة و أخيرا البيتل أحسن من 128
و الله أعلم

[ابوهاشم]

السلام عليكم ورحمة الله وبركاته
هو فعلا السيارة البيتلز حاليا بتبدأ من 8000 لحد 24000 كمان
وعلى فكره البيتلز لاتقيم بالموديل قبل الحاله
يعنى ممكن تلاقى بيتلز موديل خمسينات اغلى من التمانينات
وطبعا بحكم حالتها واهتمام صاحبها بيها
فى بقى حاجه مهمه تحكم السعر ان لو العربيه دى موديل قبل السبعينات
لابد ان تكون معدله سبعينات فى الشكل والدنجل والعجل
يعنى قبل السبعينات العجل بيكون 5 خرم لكن بعد السبعينات بيكون 4 خرم والموضوع ده مهم جدا علشان تضمن تلاقى قطع غيار بسهوله
كمان الزجاج الخلفى قبل السبعينات صغير وبعد كده المعدل كبير
كمان مقاس الكاوتش ولو سبور يكون افضل ولو عريض برضه افضل علشان الثبات والموتور كام سىسى لان فى 1200 و1300 و1500 و1600 وكل مايكون سىسى اعلى يكون افضل حتى لو مش علشان السرعه يبقى علشان التحميل وحالة الموتور وحالة الشاسيه والبودى كله
موديلات البيتلز هى 1300 و1302 و1303 وافضلهم واغلاهم 1303 موديل 73 و74 ودى عفشه كامله مش دنجل وبيقولو عليها عفشة مرسيدس فى الكفائه والرفاهيه والسعر كمان زى المرسيدس
واكررلك انك لو قررت تركب بيتلز مش هتندم ابدا وهى لاتقارن ب128
ابدا بل ممكن تقارن ب131 قطع غيارها غاليه نسبيا بس معمره جدا
وطبعا اللى اهم من كل الكلام ده انك لازم تروح لميكانيكى متخصص بيتلز هو اللى يفحصها وكمان سمكرى
اوعى تروح لاى ميكانيكى لانهم بيفتو كتير وللاسف صعب تلاقى واحد يقولك انه مابيفهمشس فيهم
واكيد لو راجعت مواضيعنا عن البيتلز هتعرف اسماء وعناوين الصنايعيه
اللى بنتعامل معاهم وارقام تليفوناتهم
كمان ممكن تتابع موضوع مقابلة اصحاب البيتلز وتتاقبل معانا فى اول لقاء وكلنا ان شاء الله تحت امركم فى اى استفسار

[smsmxxxxxx]

اشكر الاخوة mynameh و hashem1999 على تعاونهم معى وعلى المعلومات المفيدة جدااا
واللى خلتنى اقدر احدد الموديل المفضل والسعر كمان
متشكر جدااا جدااا
والي لقاء اخر بأذن الله بعد ما اشتري البيتلز وانضم ليكم فى نادى البيتلز
اخوكم محمد سالم

[ahit]

السلام عليكم و رحمة الله و بركاته

كلام كل الاعضاء سليم جداً
و ممكن تراجع الرابط ده عشان تعرف موديلات البيتلز

http://www.nilemotors.net/Nile/showthread.php?t=53902

و ده لينك للسوبر بيتلز 1302 و 1303
http://www.nilemotors.net/Nile/showthread.php?t=49715

و بالنسبة للتقييم فالموضوع بيكون على أساس الموديل و الحالة طبعاً
المهم تكون حالة الرقبة و الموتور و العفشة و السقف سليمة و الأسعار طبعاً حسب العرض و الطلب ، لكن عامة الحالات الكويسة السليمة لا تقل عن 18000 جنية بالرغم من كساد سوق البيع و الشراء و ده بالنسبة للموديل 1302 و 1303 و كمان ممكن تلاقى بيتلز بتوصل ل 26000 جنية لأن فيها كماليات كتير جدا.
و نصيحتى هات عربية حالتها كويسة من الأول و بالنسبة لميزانية حضرتك ممكن تجيب بيتلز موديل 1300 حالة كويسة جداً إن شاء الله.

و ربنا يوفقك لما فيه الخير

[smsmxxxxxx]

متشكر جدااا للأخ ahit على مشاركته
بس كان ليا استفسار
حضرتك قلت ان اهم حاجة الواحد يتأكد من
الرقبة و الموتور و العفشة و السقف

طب الموتور وانا عارف من مواضيعكم هنا ان عمرة كاملة ممكن تتكلف 2000 جنيه يعنى ليه علاج

والعفشة ممكن تتغير بس يا ترى موديل 1300 موجودة عفشته

والرقبة والسقف هل ليهم علاج وممكن يتكلف كام

وهل فى اماكن لو فيها بارومة مخدش العربية خالص

[ahit]

متشكر جدااا للأخ ahit على مشاركته
بس كان ليا استفسار
حضرتك قلت ان اهم حاجة الواحد يتأكد من
الرقبة و الموتور و العفشة و السقف

طب الموتور وانا عارف من مواضيعكم هنا ان عمرة كاملة ممكن تتكلف 2000 جنيه يعنى ليه علاج

والعفشة ممكن تتغير بس يا ترى موديل 1300 موجودة عفشته

والرقبة والسقف هل ليهم علاج وممكن يتكلف كام

وهل فى اماكن لو فيها بارومة مخدش العربية خالص

العفو إحنا إخوات فى منتدى واحد
العمرة الكاملة من 3000 جنية إلى 4000 جنية تقريباً و دى بتغير كل شىء فى الماتور ماعدا البلوك طبعاً بس المشكلة إنه من الصعب تلاقى جوده عالية و معمرة لبعض الأجزاء و لو ربنا قدرك و قدر الميكانيكى الكويس الفاهم إنه يجيب أفضل القطع يبقى معاك موتور ممتاز فعلاً.
أما بالنسبة للموديل 1300 فهو على دنجل مش عفشة يعنى مش سوست و مساعدين زى موديل 1302 و 1303 , و الدنجل لو حبيت تغيره بيكون فى حدود 1300 جنية و إنت طالع للحالة النظيفة طبعاً. ( و طبعاً الأسعار قابلة للزيادة و النقص حسب السوق ).
و بالنسبة للرقبة و السقف لو فيهم مشاكل يبقى ثمن العربية بيقل للنص تقريباً لأنهم من الأساسيات , و كل شىء فى البيتل الحمد لله ممكن علاجه بس المهم يكون عند الصنايعى الفنان اللى بيفهم و عنده خبره فى البيتلز و التكلفة بتكون حسب الحالة المحتاجة تظبيط أو تغيير و حسب الصنايعى و السوق.
طبعاً فيه أماكن مهمة لازم مايكونش فيها بارومة زى الأماكن اللى فيها عصب العربية و الربع اللى قدام و السقف طبعاً و القوايم.

و أى إستفسار آخر أنا فى الخدمة
شكراً

[أحمد سالم]

السلام عليكم
معلش يااستاذ محمد سالم انا دخلت متأخر شويه
لاكن ماشاء الله الاستاذ احمد حسن قال كل شيء
ان شاء الله ربنا يوفقك فى عربية بيتلز كويسه
وهى فعلا افضل اختيار دلوقتى بالنسبة للعربيات اللى فى سعرها واللى اغلى منها شويه كمان

[smsmxxxxxx]

معلوماتكم قيمة جدا
خلتنى فعلا اقدر أأقدر قيمة العربية مبدأيا قبل حتى ما اروح للميكانيكي
ودا يخليني ميضحكش عليا بسهولة
وكمان مبخسش ثمن العربية لصاحبها لان دا استغلال وانا بخاف منه جدااا
فعلا منتدى جميل واعضاء محترمين