إطارات البولو ؟

[obado55]

السلام عليكم ورحمة الله وبركاته
ممكن حد يدلني
1- أنسب مقاس و نفس الوقت أحلى شكل لجنوط البولو ؟ ( مقاسات يعني )
2- عند شراء الجنط ماهي الخطوات المتبعه للإطمئنان على صحته ؟ مستعمل يعني
3- أنسب مقاس للكاوتشات ؟ وازاي أعرف انه كويس
أنا من بورسعيد
مواصفاتها ( ربنا يحفظها )

بولو موديل 99
1400 سي سي ، مكيفة

من الآخر
الموضوع هيتكلف كام

[umoussa]

أهلاً يا عزيزي ومرحباً بك أخ عزيز علينا من بورسعيد الباسلة وأرض الرجال والكفاح + كاستن والبرج

- العربية دي منطقة حرة ولا عن طريق الوكيل؟
- مقاس الجنط الي راكب حالياً إيه؟


طالما إنت من بورسعيد الموضوع سهل ولطيف

خد بعضك وروح عمارات بنك الإسكان
عمارة رقم 78 حتلاقي محل مجدي البيومي (كبير الفولكساوية) في المنطقة

قابل الحج محمد البيومي هناك وقول له أنا من طرف المهندس أسامه موسى وهو حيعمل معاك الواجب

حتلاقي واحد شغال في المحل هناك (اسمه شعبان) قول له محل الترصيص الي هنا فين؟ هو جنب المحل

بص أنا مش من بورسعيد/ أنت حتعمل إيه علشان توصل؟
وصفة سهلة، حتحط محل مجدي البيومي على شمالك وكمل في الشارع لحد الآخر حتلاقي الجامع الكبير، خد يمين وكمل في الشارع على طول، أظن فيه شارع قاطع بالعرض، المهم عدي الشارع وكمل على طول حتلاقي محل ترصيص على اليمين

خد الجنوط واكشف عليها عنده قبل التركيب واطمن إن مفيش جنط فيه رفه أو واخد خبطة في العصب

لما الأمور تمشي فبريكة إن شاء الله توكل على الله وركب

أفضل كاوتش بكل المقاييس وعن تجربة شخصية بعد تجربة الأنواع التالي:

بريلي
فولدا
كونتينتال
رودستون

الأفضل هو بريدجستون الياباني مش الماليزي وحيكون غالي على فكرة يعني على حسب مقاس الجنط

عندي مثلاً الفردة الـ 15 بتعمل 650 جنيه بس فردة كاوتش تنساها وأداء فوق الوهمي.

مقاسات الجنوط والكاوتش حتلاقيها موجودة على باب التانك بتاع البنزين

وكمان ضغط الهواء داخل كل إطار على حسب تحميل العربية

من فضلك رد على السؤالين الي في الأول قبل متروح تجيب أي حاجة علشان أعرف أفيدك

وشكراً ليك

[original]

طبعا الجنط تجيبه الأصلى زى مالمهندس أسامة بيقول وماتفكرش فى الجنوط الإسبور اللى مش بتاعتها..

[obado55]

العربية منطقة حرة
الجنوط الحالية أصلية ( بتاعة بره لأنها استعمال خارج ) أعتقد انها 13

بس هل ممكن أبيع الجنوط القديمة ؟ و لا أحتفظ بيها أحسن
مع العلم ان حالتها ممتازة
وشكرا على اهتمامكم

[umoussa]

طالما منطقة حرة يبقى 90% الجنوط دي 14

العربية دي بابين بس ولونها زيتي غامق؟

نصيحة احتفظ بالجنوط دي كما هي ومتغيرش الجنط أصلاً

[M.Mostafa80]

طب قولى عرفت أزاى أنها زيتى غامق بقى بابين ماشى يمكن أغلب 1400 نزلت باببين لكن عرفت اللون أزاى

[umoussa]

أصلي شوفتها وحالتها كانت محترمة

بس الراجل لسه مردش

[obado55]

هيه آه لونها metalic green
بس 4 أبواب
ده هيغير حاجه ف كلامك ؟
و محدش شافها مني قبل كده