استشارة لخبراء البيتلز

[smsmxxxxxx]

السلام عليكم
استشارة صغيرة لخبراء البيتلز

انا امامي عربية بيتلز موديل 1971
1300 cc
كل حاجة فيها تمام ماعادا
خبطتين خفاف فى الرفرفين اللى قدام
والدهان الخارجي سيئ للغاية

فأرجوا منكم تقدير التكلفة المبدئية للدهان الجديد والسمكرة

وهل لو الدهان الحالي محبب يبقي في مشكلة فى صاج العربية ولا هذا سوء دهان من الصنايعي

علي فكرة العربية على 10000 جنيه دا اول كلام لسة مفصلتش

فرأيكم اخدها بكام
وشكرااا

محمد سالم

[ابوهاشم]

استاذ محمد سالم
اهلا بحضرتك فى وسط اخوانك عشاق البيتلز
واحب اهنيك لاختيارك للسياره دى اللى ان شاء الله هتعجبك جدا
ومش هتندم عليها ابدا بالعكس هتعشقها زينا
حضرتك بتقول ان العربيه كل حاجه فيها تمام يعنى اكيد كشفت عليها عند مبكانيكى متخصص وحمك عليها انها كويسه
ارجو انك لو ماكنتش عملت كده انك تاخدها لميكانيكى بيتلز ويشوفها
مبدئيا السعر ممتاز بالنسبه للى ذكرته عنها
بالنسبه لشغل السمكره والدوكو تكاليفهم تتفاوت من 800 حتى 1300 جنيه تقريبا
حسب الصنايعى اللى هتتعامل معاه ونوع الشغل
وربنا يوفقك ومبروك مقدما

[smsmxxxxxx]

ربنا يخليك يا استاذ هاشم
وشكرا على سرعة ردك
اخوك محمد سالم

[ahit]

الأستاذ محمد سالم
مبروك و ربنا يباركلك فيها و يكفيك شرها
السعر حسب الحالة و لو حالتها كعفشة و ماتور و سقف و رقبة سليمة يبقى السعر ممتاز جداً
و طبعاً كلام أخويا و حبيبى هاشم ... سليم 100% بالنسبة للسمكرة و الدوكو
و حاول تنزل معاه ألف جنية لو قدرت
و أخبار الصالون و الفرش إيه ؟ لأنه ممكن يكلفك حوالى من 1000 إلى 1200 جنية !!!

[ihab]

الاساسيات المهمة عندك الشاسيه من تحت و الرقبة
و هى العربية بعد كده بيبقى فيها 3 حاجات
الموتور و الفتيس و الدنجل و دول اتقل حاجات فى العربية و لو فيهم مشكلة حاتغلبك او على الاقل حاتصرف عليهم
و الصاج الخارجى امره سهل لو انت اتأكدت من اللى فات كله
اهم حاجة طبعا ان يكون فى حد متخصص بيتلز يبص عليها و ليكن ميكانيكى بيتلز و ليس اى ميكانيكى
و بعد كده تصلى صلاة استخارة و تتوكل على الله

[smsmxxxxxx]

الف شكر للاخ احمد والاخ ايهاب

بالنسبة لحالة الفرش جيدة
وكبس الموتور 75 %
والرقبة والدنجل تمام
وإن شاء الله هنزل معاه 1000 جنيه

اشكركم جميعا على نصائحكم الغالية

[ابوهاشم]

ربنا يوفقك ويباركلك فيها
وتنضم لاسرة عشاق البيتلز

[ihab]

يا ترى اخبارك ايه و عملت ايه فى العربية اشتريتها و لا لسه

[ابوهاشم]

[smsmxxxxxx]

السلام عليكم

ارجوا ان تكونوا بخير جميعا

واسف علي تأخير ردي

بالنسبة للعربية اللى قلتلكم عليها
استفدت جدا من معلوماتكم
وفعلا العربية كويسة

وخلاص اتفقنا على كل حاجة انا وصاحب العربية
وطلبت منه شهادة مخالفات علشان نسجل واديله الفلوس

اتحجج بماءة حجة علشان يسجل الاول وياخد الفلوس
بحجة ان العربية معلهاش مخالفات وانه راجل غني ولو طلع عليها بعد كدة هيبقي يديني الفلوس

وكنت خلاص هستسلم
لولا واحد صاحبي عنده معرفة كشف على رقم العربية لقي عليها اكتر من 2000 جنيه مخالفات

رحت خالع منه علي طول

اما بالنسبة لشراء بيتلز فللاسف حظي معاها وحش اوى
كل ما اشوف عربية الاقيها كل الكهرباء بايظة
والعدادات
وخصوصا عداد البنزين مش عارف ليه

دا غير ان الفرمل معتبرنها من الكماليات زى التكييف
يعنى فى فرامل يد يبقي مفيش فرامل عادية او العكس
ولو الاتنين موجودين بتبقي ضعيفة
والناس تقوللي عادى دى امرها سهل

دا غير اللي يقوللي العربية ممتازة بس الغيارات لحد التالت بس والرابع بايظ
واللي يقوللي ايه يعنى الدريكسيون فيه بوش
دا غير تقوس العجل الخلفي بالنسبة ليهم حاجة عادية

للاسف انا شفت 9 بيتلز من النت والمعارف
وكنت باخد معايا مهندس صاحبي بيشتغل فى شركة تأمين في معاينة العربيات
لحد ما الراجل زهق مني وبقي يكنسل عليا لما اكلمه

والحمد لله اني مخدتش ميكانيكي بيتلز معايا كان زماني صرفت ثمن العربية عليه
لان كل واحد بيبيع عربية يقولك ممتازة ومفيهاش اى حاجة ولما اروح بلاقي بلاوى وكنت هدفع للميكانيكي على الفاضي

وخفت انزل السوق من النصب اللي باسمع عنه وورق العربيات المضروب

فقلت أأجل شوية

معلش طولت عليكم
____________
محمد سالم

[ابوهاشم]

معلش يااستاذ محمد اصبر شويا
وان شاء الله هتلاقى اللى بتدور عليه
طبعا الراجل اللى اتحجج بموضوع المخالفات ده بيهرج
والحمد لله انك كشفته وخلعت منه كان هيشيلك 2000جنيه
اكيد طبعا راجل ماعندهوش ضمير ولا احساس
والمفروض مننا اى حد بيشترى عربيه
شئ اساسى انك تاخد بيان مخالفات طبعا
بس اسمحلى اوضحلك شوية حاجات مهمه انت ذكرتها
اولا المفروض طالما انك مالكش خبره فى البيتلز
لازم تفرج اى عربيه تعجبك لميكانيكى بيتلز هو اللى يشوفها
مش مجرد صديق مهما كانت مهنته مع احترامى لصديقك
كمان موضوع العداد بتاع البنزين ده مش سبب تسيب عربيه علشانه
وتقوس العجل الخلفى فى البيتلز شئ عادى مش عيب فى العربيه
كل البيتلز لازم يكون كده
الا اذا كانت العربيه متوطيه وده غلط مش صح
حتى موضوع فرامل اليد مش مهم ممكن تتعمل وبسيطه
اهم شئ الحاله العامه والمهمه فى البيتلز
الرقبه تكون سليمه بدون لحامات
حالة الموتور والعفشه الدونجل والطنابير
الشكل العام السمكره والدوكو
واخيرا ربنا يوفقك

[smsmxxxxxx]

استاذ هاشم

بالنسبة لتقوس العجل الخلفي بيحدث من ايه وعلاجه ايه ويتكلف كام
وفعلا انا مختش كذا عربية بالسبب ده مع ملاحظة ان التقوس واضح جدا مش بسيط
مثل عقرب الساعات بين الساعة 12 والساعة 1 يعنى ميل كبير
حتى ولو فيها ركاب
بس اغلب العربيات بتكون عدلة او تقوس خفيف جدا ولما بيبقي فيها ركاب بتتعدل فدى مش مشكلة

___________________
محمد سالم

[ابوهاشم]

ياباشا تقوس العجل الخلفى هو اصلا مش عيب علشان يكون له علاج
اللى بيحصل انك لو رفعت العربيه على كوريك من الخلف
هتلاقى القوس ده زاد جدا وده طبيعى لان العجلتين الخلفيين دول
متصلين بأكسين جايين من الموتور
ولو العربيه محمله ناس وماشيه على الطريق بتلاقى العجل عدل
والنقطه دى مهمه جدا وبتميز البيتلز كمان دونا عن اى سياره اخرى
قوللى ازاى
اقولك من مميزات البيتلز انها لو محمله عدد كبير تجرى اكتر وتسحب اكتر
لان الحموله بتخلى العجل الخلفى يبقى عدل وبالتالى معامل الاحتكاك
للكاوش يكون اعلى وبالتالى يديلك سرعه واداء افضل
والكلام ده والله عن تجربه
انا ركبت عربيتين بيتلز ولاحظت الموضوع ده بوضوح
كل مايكون معايا ناس كتير العربيه تجرى اكتر من وهى فاضيه
صدقنى ماتشغلش بالك بموضوع التقوس ده لانه طبيعى جدا
واكيد باقى ملاك البيتلز واى ميكانيكى بيتلز هيأكدلك كلامى ده

[smsmxxxxxx]

استاذ هاشم
شكرا على اهتمامك وردك السريع
فعلا البيتلز كل ما عرفنا اكتر عنها كل ما حبناها اكتر
لان مميزاتها اكتر من عيوبها
وربنا يسهل والاقي عربية كويسة والمرة دى هجيب ميكانيكي بيتلز يعاينها

واشكرك مرة اخرى على معلوماتك المفيدة
__________
محمد سالم

[ابوهاشم]

لاشكر على واجب احنا كلنا اخوات
وبنفيد بعض بمعلوماتنا المتواضعه