عداد كيلو متر الرحلات والساعه

[M.Mostafa80]

يا جماعه العربيه بتعمل حاجه غريبه جدا عداد الرحلات والساعه بيعملو ريست لوحدهم وكنت أتكلمت فى الموضوع ده قبل كدا المهم رجعت كل التوصيلات الكهرباء فى العربيه ومفيش حاجه هل كدا المشكله فى الجزئيه دى من العداد ولا الموضوع ليه علاقه بالكنترول بتاع العربيه الله يكرمكو لو حد أتعرض أو يعرف حاجه يقولى لحسن انا خلاص وصلت لمرحله الا

[umoussa]

مش حيبان على فكرة يا محمد إلا لو ركبت عداد تاني وجربت لو حصل تاني يبقى في مشكلة في العربية لو محصلش يبقى العداد كان بيدخل في مرحلة الموت الإكلينيكي

[ahit]

طب يا باشمهندس أسامة عشان أستاذ محمد يجرب عداد تانى لازم يشتريه و ممكن يطلع العيب مش منه زى مابتقول.
مفيش طرقة تانية أضمن و أرخص ؟
شكراً

[umoussa]

عندك حق تماماً يا أبو حميد

بس علشان نقطع الشك باليقين لازم الخطوة دي، ممكن نشوف عن بيومي عداد ناخده تجربة وأنا حقول لمدحت حنرجعه لو العيب اتكرر

[M.Mostafa80]

أنا عايز أخد رأيك فى حاجه طيب يأسامه قبل ما ناخد الخطوه دى هل لو وديت العداد لواحد متخصص عدادات ديجيتل ممكن يعرف أيه سبب المشكله

[M.Mostafa80]

أنا وديت العربيه لواحد متخصص عددات ديجيتال محترم جدا فى الدقى وفك العداد وكشف عليه وعمله عمليه نظافه وقال أن فى بعض الحامات ضعفت نتيجه السخونيه عاد عليها ونظفه كويس ووضعه على جهاز خاص بالعدادات وقالى أن العداد ماشاء الله عليه زى الفل وقالى تابع وشوف وقالى فى الغالب أنت عامل توصيله حاجه هى الى عملالك المشكله دى فأنا قولتلو أنى لسه مغير أنذار العربيه وأنو فى وظيفه الغلق للسنتر دى متوصله مع الكونتاكت قالى لو حصلت معاك تانى بعد الى أحنا عملناه النهارده يبقى خلى حد يراجع مراجعه محترمه على التوصيلات الى تمت فى العربيه وخصوصا أن الموضوع ده ما ظهرش غير بعد ما ركبت الأنذار الجديد بس الى يجنن بقى أن الكهربائيه يقولو ملوش علاقه بالموضوع ده

[Ahmed Mubarak]

اخى العزيز
حاول ان تذهب الى كهربائى تثق فيه وخليه يراجع على كل الوصلات لانه فى عربيه اخويا (فورد فيستا) كهربائى اشتغل فيها علشان المروحه بتاعه الريداتير ماكنتش مظبوطه المهم فجاه لقينا كل حاجة اتصفرت وعملت ريست وعمل وصله علشان يشغل المروحه ومشيت العربيه من عندة مسافه لا تتعدى ال 1 كم وقطعت خالص وكانت المشكله فى الكنترول يونت وكهربائى تانى قاله ان كان فى تحميل زيادة على الكنترول ودا اللى طيرة وحرقه
اخى العزيز ممكن ان تكون الوصلات سليمه بس ممكن تكون عمله لود زياده على الكنترول ودا السبب فى الريست ودا طبعا على حد علمى والكلام اللى كنت با سمعه من الصنايعيه
وربنا يوفقك وتجد حل هذة المشكله

[M.Mostafa80]

ربنا يبارك فيك بس هل الموضوع ده يبان لو حطيط العربيه على الجهاز يعنى لو فى حمل زايد هيبان

[M.Mostafa80]

أنا كلمت المهندس محمد على الى هو فى أمبابه وقالى على حاجه أن كنت شاكك فيها أن الأنذار فى وصله متوصله على الكونتاكت وقالى أحتمال كبير أن يكون دا هو الى عامل المشكله دى

[Ahmed Mubarak]

والله يا اخى العزيز انا معنديش خلفيه بس ممكن تروح اى مركز خدمه محترم وتسال المهندس الموجود اكيد هيفيدك لان الكشف على العربيه بالجهاز فى حدود 150- 200 ج والله الموفق

[M.Mostafa80]

لا لا لا خالص عندنا الفولكس مش بالمبالغ دى أبدا كبيرها 50 ج

[umoussa]

غالباً لو الإنذار هو السبب وده طبعاً مع الاحترام للراجل الي انت رحتله بتاع العدادات الديجيتال ده لأنه معملش حاجة وأول مرة أشوف عداد بيسخن وده كلام غريب شوية


لو الإنذار هو السبب حتلاقي ده بسبب فردتين

فردة الكونتاكت
وفردة الفلاشر الي بيشغل الانتظار بتاع العربية

[M.Mostafa80]

حبيب قلبى مستنيك من الصبح علشان تقلى رأيك
هو بصراحه الراجل كان قال كده قبل مايفك بس بعد كده قالى أنا نظفت وكشفت ومفيش حاجه هى كانت فرصه بصراحه ان العداد يتنظف لأن كان فى أتربه كتير جواه
عمتا هو أنا فعلا عندى فرده متوصله على الكونتاكت وفرده متوصله على الفلشر ومحمد على قالى الكلام ده هروحلو النهارده وأشوف ونخلى موضوع العداد دا أخر حاجه عشان متسببلكش فى أحراج مع مدحت وربنا يخليك لينا ياباشا وميحرمناش من وقفتك جنبنا بعد ربنا

[ahmed_gman]

السلام عليكم ورحمة الله وبركاته
يا باشا ممكن تكون البطارية بتاعة العربية ضعيفة شويه وبتبان عند بداية تشغيل السيارة وادارة الموتور تحس ان اللمبات بتاعت العداد بتطفى وتقوم تانى فى هذه الحظة يحصل الريستار الى حضرتك بتقول عليه هذه الحالة حصلة معايا فى الجولف 94 مع انى اعلم ان فى حركة معمولة فى العداد بتاعى زى وصلة برضو كان عاملها الى قبلى ولكن هذا العيب اختفى تمامآ عند تركيب بطارية جديدة.
ولكن عندى عيب ثانى يظهر فى المشى فقط كلا من مؤشرى البنزين والحرارة يزدادو ويرتفعو عن القرأة الحقيقية مثلآ الحرارة فجأة اجدها تصل الى 110 واكثر ولكن عند الوقوف ترجع بسرعة عادى وكذالك البنزين .

من كلامى مع الكهربائى عن الحركة الى معمولة فى العداد هى عبارة عن لازم تكون فى لمبة منورة فى العداد عشان يشتغل صح فصلنا المبة لاقينا انك لما تمشى بالعربية و RPM يرتفع معاك الى قرابة 3000 تجد الدنيا كلها وقعت الRPM والساعة وديجيتال الرحلات وكده يعنى فاضطر ان يعمل مثل هذه الحركة على لمبة اضافية خارجية عن لمبات العداد ورمها ورا العداد وقالى لو المبة ديه اتحرقت سيظهر هذا العيب اللعين مرة اخرى انا عارف انى هاغير عداد بردو قريبآ ربنا يسهل ان شاء الله معلش طولت شويه سلام عليكم:k46::k46:

[umoussa]

إحراج إيه بس يا أبو حميد إحنا نتمنى نخدم وبس

لو طلع عداد ملكش دعوة اعتبر الموضوع منتهي