عندي مشكله في سحب العربيه البولو 98

[ahmedbadr_99]

وانا باشتري العربيه محمد سمير كشف عليها وقاللي محتاجه خرطوم السيرفو يتغير واسلاك البوجيهات وطقم الدبرياج
ورحت اكشف علي كبس الموتور في بزينة كالتكس بواسطه الكمبيوتر
راح مطلعلي كبس الموتور 65 % وكل اللي عمله انه وصل اسلاك كهرباء في البوبينه تقريبا والاسبراتير
مع العلم ان اسلاك البوجيهات اصلا كانت عايزه تتغير , قلت يمكن قراءة الكمبوتير غلط علشان كهربه العربيه مش مظبوطه
رحت مغير طقم اسلاك البوجيهات وطقم الدبرياج وكانت اسطوانه الدبرياج اللي موجوده في العربيه بتاعت الفبريكه فكانت تعبانه
جيت اجرب السحب العربيه مكتومه وسحبها مش حلو
كشفت عليها بالكمبيوتر قالو الجهاز مطلع خطا في الموتور بخصوص حرق البنزين ولازم تحط بوستر اوكتين علشان تنضف دوره البنزين
المهم انا حاساس ان العربيه دي سحبها مش حلو زي ما انا كنت فاكر والناس كلها بتقول ان البولو بتاعت جري وشد بس من غير ما تشغل التكيف
وكمان لما بجيب 100 علي الغيار الرابع واوصلها ل 120 بلاقي ال ر بي ام وصل ل5000 !!!!!!!!!!!
وبتجمع ببطيء !!!!!
انا صراحه اتخنقت
وهل في حاجه بتقيس كبس الموتور صح عشان اعرف يمكن الموتور عندي هو اللي تعبان
مع العلم ان الموتور مش بيعرق زيت ولا بتاكل زيت ولا بتدخن دخنه بيضاء وكانت صاحبتها من الزيرو سيده كبيره في السن بتصلح في التوكيل واخرها سرعه كان 60 مش اكتر يعني الموتور ما اتقرصش عليه !!!!
يا خبراء البولو افيدوني عشان انا بجد زهقت

[M.Mostafa80]

لو طقم الدبرياج مش حلو يعمل معاك كده وبعدين بس فى نقطه عايز أوضحهالك أن البولو عربيه سحبها وجريها حلو بس مش معنه كده انك تكون كنت راكب عربيه أعلى منها فى المتور والهورس باور وتركب عربيتك تحس أن سحبها ضعيف فتقول أنها تعبانه لأ العربيه بالنسبه للموتور والحجم مع السحب الطبيعى تعتبر ممتازه ممكن يكون عندك مشاكل فى الكهرباء البنزين لو وحش ومخلوط بمياه أوجاز يعمل كدا الدبرياج حتى لوجديد ووحش يعمل كدا بس ممكن سؤال حضرتك كنت راكب أيه قبلها

[ahmedbadr_99]

طقم الدبرياج فاليو وركبته عند محمد سمير وده الوحيد اللي بتعامل معاه من ساعت ما اشتريت العربيه
كنت راكب فولكس بيتلز مش بحس قوي بفرق جبار في السحب لان البيتلز موتورها حلو وب بوصل الغيار التاني لحد 60
انا بس عايز حد راكب بولو يركب عربيتي واجرب عبيتو جايز انا اللي متخيل انها فيراري وانا مش حاسس

[Ahmad]

وكانت صاحبتها من الزيرو سيده كبيره في السن بتصلح في التوكيل واخرها سرعه كان 60 مش اكتر يعني الموتور ما اتقرصش عليه !!!!

الكلام دة كافي علشان تبقي مكتومة و مش بتسحب كويس.
اللي أعرفه ان لو الموتور مش متعود علي الحرق و الجري من الأول عمرك ما هتعرف تتطلع أقصي طاقته.
العربية محتاجة "تفتيح" زي ما بيقولوا الميكانيكية. يعني تبتدي تقرص شوية بشوية علي كل غيار بس مش للاخر مرة واحدة. شوية بشوية المفروض تحس بسحب أحسن.
بس الكلام دة علي أساس ان معندكش مشاكل ميكانيكية نهائيا تتعلق بالسحب .

بالتوفيق

[M.Mostafa80]

الكلام دة كافي علشان تبقي مكتومة و مش بتسحب كويس.
اللي أعرفه ان لو الموتور مش متعود علي الحرق و الجري من الأول عمرك ما هتعرف تتطلع أقصي طاقته.
العربية محتاجة "تفتيح" زي ما بيقولوا الميكانيكية. يعني تبتدي تقرص شوية بشوية علي كل غيار بس مش للاخر مرة واحدة. شوية بشوية المفروض تحس بسحب أحسن.
بس الكلام دة علي أساس ان معندكش مشاكل ميكانيكية نهائيا تتعلق بالسحب .

بالتوفيق


كلامك سليم يا أستاذ أحمد تمام كده

[ابوهاشم]

الكلام دة كافي علشان تبقي مكتومة و مش بتسحب كويس.
اللي أعرفه ان لو الموتور مش متعود علي الحرق و الجري من الأول عمرك ما هتعرف تتطلع أقصي طاقته.
العربية محتاجة "تفتيح" زي ما بيقولوا الميكانيكية. يعني تبتدي تقرص شوية بشوية علي كل غيار بس مش للاخر مرة واحدة. شوية بشوية المفروض تحس بسحب أحسن.
بس الكلام دة علي أساس ان معندكش مشاكل ميكانيكية نهائيا تتعلق بالسحب .

بالتوفيق

كلام سليم طبعا
ازاى عربيه كان اخر حاجه تجيبها 60ك وعاوزهاتقرص عليها دلوقتى وتساعدك
لازم يتعملها سرفيس كامل وبعدين تحكم
فعلا الموتور بيتاثر بالسرعات اللى انت بتمشى عليها وبيطبع عليها
عربيتى البيتلز 1500 سىسى وانا مش بمشى بيها اكتر من 80ك لو حبيت احيانا اعدى ال100ك بتيجى معايا بصعوبه لانها اتعودت معايا على عدم القرص
لكن لما بروح اعمل سرفيس كامل وانا ماشى يادوب اشعر بنزين الاقى العربيه طارت
وعندها استعداد تعدى ال180ك س

[ahmedbadr_99]

''طيب هو العادي بتاع العربيه انها لما اجيب 120 علي الغيار الرابع الاقي ال ار بي ام علي 5000 معتقدش وكمان لما اجيب ساعات 150 علي االخامس الاقي ال ار بي ام 5000 بس الكمبيوتر لما اتكشف علي العربيه قالو انه مطلع fault في حرق البنزين مش مظبوط رحت مفول التنك وحاطط بوستر اوكتين بس بردو لسه مكتومه طب ازاي انضف دوره البنزين علشان مش حاسس ان الانجكشن اتنضف

[shekoz]

''طيب هو العادي بتاع العربيه انها لما اجيب 120 علي الغيار الرابع الاقي ال ار بي ام علي 5000 معتقدش وكمان لما اجيب ساعات 150 علي االخامس الاقي ال ار بي ام 5000

بص يا باشا انا عندى نفس النظام تقريبا و دى صوره للعداد عندى و كنت جايب حوالى 137 و الار بى ام كان على حوالى 47

دا معناه ان فى حاجه غلط عندى !!؟ لان حضرتك بتقول ان الكمبيوتر لما اتكشف علي العربيه قالو انه مطلع fault في حرق البنزين مش مظبوط

يا ريت اعرف يا جماعه هو كدا فى حاجه غلط عندى و لا دا الطبيعى و لو فى حاجه غلط يبقى من ايه مع العلم انى على قدى جدا فى ميكانيكه العربيه .. و يا ريت اللى يرد يفيدنى انا و الاستاذahmedbadr_99

و اسف للأطاله

[original]

غيرت فلتر البنزين!!!
ممكن الشكمان يكون مكتوم وخصوصا علبة البيئة Catalytic Converter !!
صراحة السرعات اللى حضرتك بتجيبها على الغيارات دى الواحد مايفكرش يعملها فى عربية زى دى!! ده موتور 1000 سى سى وعزم 55 حصان فقط !!
أنا معايا عربيتى مش بتجمع كويس بس أنا مقلل الكهرباء بتاعتها من الاسبراتير..

[snakeson2]

ياباشا اعتقد ان الموضوع سهل وبسيط ومش محتاج لاي تعقيد اولا العربية مكتومة . الحل كالاتي . لما البنزين يقرب يخلص حط صفيحة 95 واطلع طلعة علي طريق العين السخنة وابدا اجري واثبت علي سرعة معينة 100 عالخامس وابدا كرك بنزين بشكل متقطع يعني هات البدال عالاخر . واعلي شوية وهكذا . هتلاقي العربية فتحت معاك من مشوار واحد طبعا متروحش لغاية هناك خد بس 50 كيلو رايح و50 جاي.
عايزك تتأكد من حاجات زي الزيت بتحط نوعة اية وتخليقي ولا لأ؟
فلتر البنزين اتغير ولا لا؟
فلتر الهوا ضروري جدا!
والاهم طبعا االبوجيهات . لو البوجية تعبان العربية مش هتسحب خالص . ونوعة اية؟

[M.Mostafa80]

طبيعى أن عند سرعه 150 الأر بى أم يبقى على 5000
أنصحك تنزل على الشهابى مصر الجديده شارع دمشق قدام بنك عوده
تجيب بوجيهات أن جى كى من عندو ومعاهم فلتر بنزين وغير الحاجات دى وزى ما محمد قالك صفيحه 95 وأطلع على طريق حلو فتح موتور العربيه
لأن واضح من كلامك أن الموتور ده متفتحش

[ahmedbadr_99]

متشكر جدا يا جماعه وربنا يبارك فيكوا

[XLANS]

طبيعى أن عند سرعه 150 الأر بى أم يبقى على 5000
أنصحك تنزل على الشهابى مصر الجديده شارع دمشق قدام بنك عوده
تجيب بوجيهات أن جى كى من عندو ومعاهم فلتر بنزين وغير الحاجات دى وزى ما محمد قالك صفيحه 95 وأطلع على طريق حلو فتح موتور العربيه
لأن واضح من كلامك أن الموتور ده متفتحش

أنا كنت لسة عند رشاد أمبارح وقالى نفس الكلام دة

بس ياريت تقولى ياباشا سعرهم كام عند الشهابى الفلتر والبوجيهات الأصلى ؟

[M.Mostafa80]

بص هو فى نوعين عندو فى نوع ب 55 ودا بيعمل 15000
وفى نوع تانى بيعمل 80 أو 85 بيعمل 35000 ك
أما فلتر البنزين على ما أظن 70 ج