كيف تشترى ميجان 2 مستعملة

[Ahmed Selim]

السلام عليكم....

لاحظت الفترة الأخير أن كثير من الناس بتسأل على عربيات ميجان 2 مستعملة عاوزين يشتروها و عشان كده قررت أنى أكتب الموضوع ده لعل و عسى يفيد الناس اللى بتفكر فى الشراء.

الموضوع طبعاً فيه حاجات بتنطبق على كل العربيات مش الميجان بس.

بسم الله نبدأ

1- أول حاجة تعملها.....تقرأ الموضوع الجامد جداً ده
كــل مــا تريـــد معرفتــــه عــن الميــــجان II
و اللى بيحتوى على العديد من المواضيع المهمة و أسعار قطع الغيار والصيانات فى التوكيل وبرة التوكيل و الأعطال اللى قابلت أصحاب العربية و كيفية حلها.

2- أى عربية طبعاً بيبان من مظهرها العام و حالة الصالون العامة أذا كانت العربية متحافظ عليها ولا لأ.....يعنى بنظرة سريعة على العربية تقدر تقرر أذا كنت تكمل ولا لأ.

3- تتأكد من صاحب العربية أنه مواظب على الصيانات الدورية فى التوكيل أو مراكز الخدمة المعتمدة.

4- لو حالة العربية كويسة و صاحبها محافظ على الصيانات الدورية يبقى تتوكل على الله و تكلم التوكيل على 16202 و تحجز ميعاد للكشف على العربية.....و دى خطوة أساسية لمعرفة حالة العربية.
الكشف نوعين
أ - كشف كٌلى على الميكانيكا والسمكرة والدهان و ده ب 550 جم
ب - كشف جزئى على الميكانيكا والسمكرة بس و ده ب 330 جم
و يُفضل أجراء الكشف فى أحد فرعى التوكيل فى المقطم أو العبور و الكشف بيحتاج تقريباً يوم كامل فى التوكيل.

5- بعد الكشف التوكيل بيديك تقرير تفصيلى عن العربية و كل ما يلزم التغيير فيها.....حضرتك تطلب معرفة أسعار الحاجات الأساسية المفروض تغييرها عشان تبقى على علم بها.

6- بعد أتخاذ قرار الشراء إن شاء الله ( ولا تنسى الأستخارة ) يبقى لازم تعرف العربية بيجى معاها أيه عشان تاخده من المالك:
أ- كتيبات الصيانة والضمان و الكاسيت ( و ساعات بيبقو فى محفظة جلدية )
ب- كوريك و مفتاح عجل و أستبن
ت- مفتاح قفل الجنط لو العربية فيها جنوط فابريكة
ث- عدد 2 كارت تشغيل
ج - أيريال السقف
ح - طفاية سجاير ( بتبقى عاملة زى علبة الكانز )
ج- بعض العربيات كان بيجى معاها قطعة حديدة عشان لو عاوز تقطر العربية.....بس مش بتيجى أساسى مع كل العربيات.

و يفضل أيضاً أن تأخذ جميع فواتير الصيانة و الأصلاح من المالك القديم لو كان محتفظ بها ( أنا عن نفسى بحتفظ بها )

ملحوظة: بعد أستلام العربية و عند سواقتها لأول مرة خلى بالك من الفرامل عشان حساسة شوية.

نيجى بقى للأسعار فى ظل الظروف الحالية
1- موديلات 2005 من 70 الى 78 و أحياناً 80
2- موديلات 2006 من 78 الى 88 و أحياناً 90
3- موديلات 2007 من 88 الى 98 و مشفتش أعلى لأن المعروض منها قليل جداً

موديلات 2008 و 2009 معرفش أسعارها نظراً لأنها تقريباً شبه منعدمة فى سوق السيارات و أن كان فى زميل لينا فى المنتدى كان عارض واحدة 2009 ماشية 8 ألاف كم قريب على المنتدى و كان طالب 110 ألف جم.

ملحوظة تانية : الأسعار من واقع خبرتى الشخصية و لذلك قد تجد أسعار مختلفة عما سبق ( غالباً أقل ) بس فى رأيي الشخصى غالباً مش هتبقى حالتها كويسة.....و لنا فى الموضوع ده عظة
واحد عارض ميجان ٢٠٠٥ ب٥٨ الف ارجو الافاده

ملحوظة تالتة: العربية بقالها فترة عليها طلب أكتر فى سوق المستعمل و عشان كده ممكن بعض الأخوة يشوفو أن الأسعار أعلى من المعروف عنها.....بس هو ده السوق المصرى....و بقالى شخصياً فترة بعدى من عند سوق السيارات يوم الجمعة و بلاقى تجار عاوزين يوقفونى عشان يشترو العربية.....و هو ما لم يكن يحدث من قبل ( مع العلم أنى ساكن جنب السوق و بعدى كل يوم جمعة من هناك بقالى 4 سنين )

و بالنسبة للعربية أنا مش هتكلم عليها لأن سبق الكلام عليها كتير جداً منى و من مُلاكها و بأستفاضة......بس فعلاً أهم ميزة فى أمتلاك العربية دى ( بس مش ميزة فى العربية نفسها ) هو الوحوش الموجودين فى المنتدى اللى لو حصل أى حاجة لا قدر الله مجرد ما تسأل السؤال تلاقى بدل الواحد عشرة يجاوبوك....و دى فعلاً ميزة لا تقدر بتمن.

ملحوظة أخيرة: متسمعش كلام الناس عن العربية....أسمع الكلام من الناس اللى معاها العربية.....و على رأى المثل أسأل مجرب ولا تسأل طبيب

لو فى أى أسئلة تانية أنا فى الخدمة و طبعاً باقى الوحوش موجودين.

[hossam_elwani]

الف شكر على كل المعلومات القيمة ولك جزيل الشكر

[A. Ibrahim]

بفكر اشتري

الف شكر علي الموضوع التفصيلي ده
انا بصراحة معايا من 90 الي 95 و عايز اشتري عربية فكرت في الجديد و احسن ما لقيت فيه كان الجين 2 و لكن بصراحة بعد ما قرات في منتدي الوحوش و خصوصا الموضوع اللي حضرتك كاتبه قلت و ليه لا ما انا ممكن اجيب ميجن مستعمله و اعتقد بعد الخطوات اللي حضرتك قلتها اكيد مش حتبقي مغامرة بالفلوس اللي معايا اقدر اجيب الموديل اللي فيه مثبت السرعة و لو حد عنده سكة يا ريت يدلني انا لقيت اتنين موديل 2008 الموديل ده واحده عاملة 23 ب 110 و التانية عاملة 38 بانوراما ب 85 ايه رايكم و الف شكر :k49:

[Amr_Moh]

جبت من الأخر
مش حنعمل مشوارنا بأه؟

[akmal_hamdi]

الله الله يا أحمد جميل جدا مش لاقى حاجه أقولهالك غير استمر يا أحمد وانا هاجى معاكو فى المشوار

[Ahmed Selim]

هو أنت تعرف مصطفى من زمان يا أكمل ؟؟

[Sharky]

شغل عالى قوى يا بوحميد
مجهود رائع

[عمرو عمارة]

الله يفتح عليك يا كبير

[islamnabil]

ا

و بالنسبة للعربية أنا مش هتكلم عليها لأن سبق الكلام عليها كتير جداً منى و من مُلاكها و بأستفاضة......بس فعلاً أهم ميزة فى أمتلاك العربية دى ( بس مش ميزة فى العربية نفسها ) هو الوحوش الموجودين فى المنتدى اللى لو حصل أى حاجة لا قدر الله مجرد ما تسأل السؤال تلاقى بدل الواحد عشرة يجاوبوك....و دى فعلاً ميزة لا تقدر بتمن.

ملحوظة أخيرة: متسمعش كلام الناس عن العربية....أسمع الكلام من الناس اللى معاها العربية.....و على رأى المثل أسأل مجرب ولا تسأل طبيب

هو ده الكلام اللي من الاخر
فعلا اهم ميزة في العربية الوحوش اللي معانا في المنتدى
لدرجة اني فعلا اتعلقت بالعربية من كلامهم عليها
ربنا يكرمنا بواحدة عشان ندخل في فريق الوحوش

[tamer_samy]

الله ينور عليك يا ابو حميد
شغل عالي و كلام جميل

[akmal_hamdi]

الله يفتح عليك يا كبير

مش معقوله عمرو عماره ظهر حمد الله على السلامه يا حج

[Eslam.Elrefaey]

هو أنا ممكن أكشف على العربية قبل ما أشتريها هوا صاحبها هيوافق ولو موافقش أمل إيه ؟؟؟؟

[أحمد كمال]

هو أنا ممكن أكشف على العربية قبل ما أشتريها هوا صاحبها هيوافق ولو موافقش أمل إيه ؟؟؟؟

لو ما وافقش يبقى العربية معيوبة و هو بيستعبط و ما تشتريش منه

[chato_eg]

هو أنا ممكن أكشف على العربية قبل ما أشتريها هوا صاحبها هيوافق ولو موافقش أعمل إيه ؟؟؟؟

لو ما وافقش يبقى العربية معيوبة و هو بيستعبط و ما تشتريش منه

مادام الشارى هو إللى هيدفع ال 550 جنيه ثمن الكشف...يبقى مافيش سبب منطقى مقبول لرفض الكشف...
من الآخر خليها فى حضنه و شوف لك واحدة تانية......دى عربية بعشرات الآلاف من الجنيهات.....مش موبايل علشان تشتريها و إنت واقف...

[geljam]

انا معاية ميجان 2 2005 و بسراحة مستخسر ابعها حتى ب 80,000 بعد مكنت دافع فيها 145,000 فرق كبير جدا , بس دى مشكلة التكنولوجيا فمصر و قط الغيار الفرنساوى ! , و مفكرتش فبعها بسراحة الا لما ظهر ادامى عربية جيتا فولكس فاجن 2008 ب 120,000 طبعا تحفة , و فيها نفس التكنولوجيا تقريبا ...... على العموم لو حد بيفكر ف الميجان د رقم موبيلى 0100645064 الاسكندرية فضى و حلتها مميزه اوىىىىىىى لانى كنت مئمن عليه الخمس سنين و علطول توكيل معدا حجات بسيطة كنت بجبها مين الوشيحي , لو حد ف اسكندرية هيعرفوة و بركبها عند محمد بيرو (ميكنيكى) و دول نصحتى لاى شخص معاة رينو ف اسكندرية مهما كان فيها من مشاكل