تركيب جهاز إنذار للانسر الرياضيه 2007

[mohey]

يجماعه أنا والحمد لله لسه شارى لانسر رياضيه موديل 2007 بضمان الوكيل مصريه
السياره بها سنتر وريموت وبدون إنذار .
وعايز أركب لها إنذار فهل يلزم أن يتم ذلك من خلال الوكيل على شان الضمان ؟
وهل لوكان كذلك فهل ممكن أشتريه من بره وأخده للتوكيل يركبوه؟
وهل تنصحونى بنوع معين ؟
الأسعار ؟
مع خالص تحياتى

[اسلام المصرى]

ألف مبروك يا أستاذ محى :D ربنا يباركلك فيها ان شاء الله و يبعد عنك شرها ويديلك خيرها أختيار لن تندم عليه ان شاء الله. التوكيل مابيركبش اى حاجة على العربية من الحاجات ديه جهاز انذار زينون فوانيس شبورة........ انا سألت هناك. ممكن المهندس طارق "مصراوى جدا" برده يقول رأيه فى الموضوع ده لأنه طبعا أدرى منى. فى محل اسمه "سبير كار" فى وسط البلد عند وزارة الداخلية ويوجد فرع فى مدينة نصر بس مش عارف فين , ناس محترمة جدا وشغلهم عشرة على عشرة و أسعارهم فى متناول الجميع و هترتاح و تنبسط منهم جدا. ممكن حضرتك فى الانذار تستعين بالاستاذ "اسلام شاهين" - بعد اذنك يا اسلام- لأنه مركب أنذار و مش هيبخل عليك بأى معلومة أو مساعدة يقدر يقدمها لك :) أنا معايا واحدة أخت بتاعتك بس مش مركب أنذار فأسف مش هقدر أفيد حضرتك فى النقطة ديه. تحياتى لحضرتك وبالتوفيق ان شاء الله :)

[mohey]

ألف شكر يأستاذ إسلام على إهتمامك بسرعة الرد
ولكن عندى سؤال هل تركيبه بره يؤثر بالسلب على الضمان

-كذلك فى إنتظار مشاركة كل من
المهندس طارق "مصراوى جداً"
الأستاذ إسلام شاهين

[إسلام شاهين]

صباح الخير محيي باشا

أولا ألف مبروك على العربية

ثانيا موضوع الخروج بره الضمان ده حضرتك أسال فيه التوكيل لأان أنا عربيتي خليجي مش مصري .

ثالثا لو سألت وطلع الموضوع عادي هو الإنذار اسمه صب زيرو بدون ريموت لأنهم بيركبوه على ريموت العربية المفتاح اللي مع حضرتك هو جميل جدا ورخيص ب 175 + 50 تركيب ومفيهوش لعب في أي حاجة وماخدش منهم بالضبط 20 دقيقة تركيب .

تحت أمرك في أي استفسار .

[mohey]

ألف ألف شكر ياإسلام باشا على سرعة الرد وعلى مشاركاتك المتعدده و المفيده لنا جميعاً فى منتدانا الجميل
وأنا هسأل فى التوكيل عن موضوع الضمان ولو طلع مفهوش مشكله هركبه إن شاء الله
بس عندى مشكله وهى أننى مقيم فى الأسكندريه
فهل هناك توصيف أكثر لهذا الجهاز لكى أسأل عنه عندنا فى المحلات المتخصصة بالأسكندرية أم أن إسمه صب زيـرو بدون ريموت يكفى للوصول إليه .

ولك منى كل التقدير

[emadfk]

صباح الخير يا استاذ محى

اولا الف الف مبروك على اللانسر الرياضية رينا يبارك لك فيها ويديك خيرها ويبعد عنك شرها

ثانبا انا عندى اختها توكيل مصرية و لما سالتهم و انا بعمل صيانة الالف كيلو قالوا انهم بيرفضوا اى اضافات كهرباء او الكترونية
زيادة فى العربية و الا تخرج برة الضمان فعلشان كده لم اركب انذار و سوف اكتفى بالكلبش المانويال و ربنا يستر

واى استفسارانا فى الخدمه وعلى فكرة احسن خبير يقدر يفيدك فى الكماليات هو استاذ / اسلام شاهين لانه مركب كل حاجة فى الدنيا فى عربيته ربنا يباركله فيها ويحافظ عليه

وشكرا

[إسلام شاهين]

ههههههههههههههههههه يا عماد أنا مش ركب كل حاجة في الدنيا لسه والله بس أنا بفكر المرة الجاية بقى في وحدات الرفع ووحدة ضم المرايات إن شاء الله .

محي باشا هو الجهاز فعلا يكفيه اسمه صب زيرو بدون ريموت .

[mohey]

متشكر يا عماد باشا وهحاول مع التوكيل يمكن ربنا يهديهم ويوافقوا حتى لوالتركيب يتم بمعرفتهم

إسلام باشا فعلاً أنت خبير ودى حقيقه مش مجامله من الأستاذ عماد
وأى حد يتابع مواضيعك على المنتدى يتفق مع الأستاذ عماد فى الرأى

خالص التحيات لكما

[مصراوي جدا]

اهلا يا استاذ محيي ومبروك العربية الجديدة

بخصوص التوكيل والضمان
فاحنا مش بنركب عندنا في مراكز الخدمة اي اضافات زي ما الاستاذ اسلام المصري ما وضح

انما بخصوص موضوع الخروج من الضمان

فاحنا مثلا كل عربياتنا الـ 1300 و 1600 العادية بنجيبها بدون كاسيت واحنا مش بنركب كاسيت عندنا فمش معقول نقول للناس امشوا من غير كاسيت والا تخرجوا بره الضمان

الموضوع وما فيه اننا بننصح بتركيب الاجزاء الكهربائية زي الراديو كاسيت او جهاز الانذار في أماكن مختصة وعند فنيين فاهمين شغلهم مش عند الاسطى بلية الكهربائي يعني لأن الاسطى بلية ممكن يعمل قفلة في العربية وتعطل وحدة الكمبيوتر المتحكمة في كل أعمال العربية ودي غالية جدا

يعني من الآخر تقدر تتوكل على الله وتشتري جهاز الانذار بس تركبه عند مركز كبير متخصص زي ما الاستاذ اسلام شاهين كده بينصح بمركز سبير كار مثلا

ودي صيغة كانت على استيكر كنا بنضعه على دفتر الضمان للسيارات عام 2001 وقتها كانت العربيات بتيجي من غير سنترلوك :

ملاحظة هامة :إن سيارات ميتسوبيشي الجديدة تحتوي على دوائر إلكترونية متطورة ، لذا فإن شركة مصرية ترجو من السادة عملاءها الكرام ضرورة توخي الحرص عند إضافة أي توصيلات كهربائية مثل ( تركيب راديو كاسيت / جهاز إنذار / سنتر لوك / … الخ ) وضرورة التعامل مع فنيين متخصصين ، حتى لا يتم تركيب التوصيلات الإضافية بشكل خاطئ مما قد يؤثر بالسلب على الدوائر الإلكترونية بالسيارة ويتلفها.

[اسلام المصرى]

شكرا جزيلا على ردك و توضيحك للنقطة الهامة ديه يا مهندس طارق جزاك الله خيرا ربنا يخليك لينا :) كلام سليم و منطقى جدا. نحب نشوف حضرتك برده فى الأجتماعات القادمة ان شاء الله.

[mohey]

ألف شكر لكل من المهندس طارق والأستاذ إسلام على التوضيح
وإن شاء الله يوم السبت القادم وبعد توضيح م /طارق هأخذ خطوة إجابيه فى هذا الموضوع
ولو حد عارف إسم شركة محترمه متخصصة فى أجهزة الإنذار بالأسكندريه يتكرم ويقول لى إسمها وعنونها

[mohey]

م/ طارق "مصراوى جداً"

إتصلت اليوم بمركذ الصفوه للصيانه بالأسكندريه
وأستفسرت منه عن الموضوع فكان رده أنه لاينصحنى بتركيب أى أجهزه إضافيه "ماعدى الكاسيت" ذى الإنظار لأن ده بيحمل على وحدة إسمها حسب قوله "E-TAK" وممكن تتحرق بعد 6 شهور أو سنه وثمنها 6000 جنيه

[mohey]

م/ طارق"مصراوى جداً"
أرجوا الإفاده عن صحة أو عدم صحة المعلومه الصادرة من مركذ الصفوة
ولك جزيل الشكر

[إسلام شاهين]

كلام أول مرة أسمعه ولا يعقل على كده أنا قدامي شهرين والوحدة ديه تتحرق عندي لأن أنا عندي إنذار وسنتر وحساس ركن ونازل أجيب الزينون وبفكر فب الدي في دي وعندي سي دي بلاير وووووووووووووووووو ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟

وبعدين هوة معقولة عربية زي الانسر ماتستحملش جهاز إنذار ؟؟؟؟

[محمد عبد المجيد]

والله العظيم حاجة غريبة - يعنى التوكيل لا يرحم ولا يسيب رحمة ربنا تنزل؟؟؟
يعنى مستعد يعوضنى اذا العربية اتسرقت مثلا لاقدر الله ؟؟؟
شىء غريب - ارجو التوضيح من الوكيل مصرية لانى ناوى اشترى قريب جدا انشاء الله
وحاجة زى دى بصراحة تنرفز