المصرية للسيارات...وسيارات موديل فوق سنة 2000 بالتقسيط

**ahmed000** · 18-06-2009 11:20 PM

[justify]
بسم الله الرحمن الرحيم
الاخوة الاعضاء الكرام
غدا اول ايام عمل سوق المستعمل الخاص بالمصرية للسيارات على طريق مصر الاسماعلية بعد مدخل مدينة العبور
انا شخصيا مستني حاجة زي كده من زمان خصوصا انه ممكن يرحمنا من سوق العاشر بكل مشاكله ده غير ميزة التقسيط
وحسب مااعلنت الشركة في ملحق السيارات بتاع الاهرام ان البيع هيكون للسيارات المستعمله بدون وساطة بين البائع والمشتري واول يوم الجمعه 19-6-2009
يتم تسجيل السيارات المراد بيعها اسبوعيا من يوم الاحد الى الاربعاء
عرض السيارات في السوق يكون يومي السبت والجمعه
الاعلان عن السيارات يكون في الصحف والمجلات والموقع الالكتروني للشركة (انا دخلت على الموقع لقيته تحت الانشاء)
السيارات المعروضة يجب ان تكون بالشروط التالية:
اولا موديل فوق 2000
ثانيا ماتكونش عاملة حوادث
تقرير فحص فني من التوكيل الخاص بالسيارة(يارب يطلع الكلام ده بجد)
يوجد خبراء بالمركز لمساعده المشتري في فحص السيارة وتثمينها
يوجد خبراء بالمركز للكشف عن اوراق السيارة
يوجد مندوبين من شركات التأمين للتأمين على السيارات
ويوجد ايضا مندوبين من التوكيلات لمد الضمان على السيارات المستعملة
اجمل حاجة في الموضوع:
تقسيط المستعمل عن طريق مندوبي البنوك المتواجدين بالموقع ويوجد تقسيط مباشر
استبدال المستعمل بزيرو وتقسيط الفرق
استبدال السيارات المقسطة بسيارات مقسطة اعلى عن طريق البنك
بيقولوا كمان في صالة مزادات للسيارات النادرة
ده غير خمس صالات عرض للسيارات المستعملة والجديدة واحده اوروبي وواحده للصيني وواحده للكوري وواحده للياباني والاخيرة للاميركي
يارب يطلع الكلام ده كله بجد
انا شخصيا اتمنى انه يطلع بجد
وياريت لو حد راح بكره يبلغنا بالتفاصيل
تحياتي لكم
[/justify]

**ehabomar1987** · 18-06-2009 11:55 PM

يارب يكون الكلام ده صح و لو كده ان شاء الله يرحمنا من سوق العاشر بتجارو بسماسرو بسلاطاته ببابا غانوجو
لا و لو كده كمان الواحد ممكن يجيب مستعمل جديد قسط بعيد عن ال 70 و ال 80 و ال 90
و اخيراا ربنا يتوب علبنا من المواصلات و كلو يركب عربيات

**أحمد سالم** · 19-06-2009 12:12 AM

انا مش بصدق كلام المصريه للسيارات
لانهم اكثر ناس بيقولو كلام فى الهوا ولما تروح عندهم تلاقى كلام مختلف ويقولك دى عروض علشان نشد الزبون بس

**otefa** · 19-06-2009 12:15 AM

والله تبقي خطوة جريئة في عالم العربيات قال ياخبر بفلوس بكرة ببلاش والمية تكدب الغطاس
وشكرا علي الخبر

**ahmed000** · 19-06-2009 02:19 AM

هو للأسف تقريبا كل معارض السيارات بتعمل اعلانات وعروض وهمية وتروح تلاقي كلام مختلف خالص
يقولك قسط 500 جنيه تروح تتفاجيء بمقدم 50 الف جنيه
ده غير الرخامة بتاعة اجراءات التقسيط والتأمين الاجباري اللي بيوصل ساعات ل 3.5% سنويا من قيمة العربية
غير الفايدة المرتفعه بتاعة البنوك
لكن المرة دي المصرية للسيارات الجديد في الموضوع انه تقسيط المستعمل
واعلانات جامده جدا وكلام كبير اوي
وبيقولك السوق الاكبر من نوعه في الشرق الاوسط ومش عارف ايه
يارب يطلع الكلام جد المرة دي
انا شخصيا اعتقد ان مكسبهم هايكون من رسم دخول على العربيات وممكن الافراد لو كان في رسوم
ده غير الزيرو اللي هايتحرك كويس معاهم من ورا بيع المستعمل لأن الزيرو والمستعمل مرتبطين ببعض
ده غير العمولات اللي هياخدوها من البنوك من ورا كل عربية تتباع بالقسط
في الحالة دي لو عملوا اللي بيقولوا عليه فعلا انا شايف ان مكسبهم هايكون احسن من بيع العربيات الزيرو
بكرة نشوف

**ahmedhilmy** · 19-06-2009 02:38 PM

خليك ورا المصرية لغاية باب الدار لما نشوف

**NaviGator_13** · 19-06-2009 02:45 PM

طيب حد جرب وراح يحكى لينا ايه اللى حصل ؟؟؟

**Ahmad Allawy** · 19-06-2009 03:03 PM

طيب حد راح شاف حاجة ولا لسة..؟؟
عموما ناس كتير جدا في انتظار الموضوع ده بشدة..
ربنا ييسر الامور..
و الف شكر لصاحب الموضوع علي المعلومة المفيدة.. و يارب المصرية تصدق في حاجة..