جدول صيانة بولو 2001

[أبو_حمزة]

السلام عليكم جميعا اخوانى الاعزاء
كما تعلمون فقد من الله علينا و اشترينا بولو 2001
انا متعود يكون لى جدول صيانة امشى العربية عليه (من ايام ال127 التوب) و عشان كده عايز اعمل الجدول الخاص للبولو مع اختها الانسر
دورت فى المنتدى فلم اعثر على موضوع فيه قائمة الصيانات و الكيلومتر بتاعها
فا ارجو من الاخوة ممن سبقونا بامتلاك بولو 2001 ذكر الصيانات الدورية و الكيلومتر الخاص بها و يا سلام لو كمان الاسعار
مثلا : فلتر هواء 20 ألف كم و السعر 10 جنيه (ده مثال لا اكثر و الارقام فبركة)
و هكذا
الرجاء ان تكون الكلام عن قطع الغيار الاصلية فقط. دى مسألة مبدأ

[أبو_حمزة]

ايه يا اخوانا محدش هنا بيعمل صيانة دورية و اللا محدش معاه بولو
ده الموضوع ده لما اتفتح فى صفحة متسوبيشى عن لانسر فى يوم كانت الردود بالعشرات
مستنى مشاركاتكم

[M.Mostafa80]

كل 40000 سير كاتينه ودينمو والكشف على بليه الكاتينه
كل 10000فلتر زيت وبنزين وبوجيهات وطبعا معاهم زيت ماتور
كل 20000فلتر هواء
كل بدايه صيف وشتاء تغيير فلتر تكييف وزيت فتيس ويفضل زيت أسو
أماكن الصيانه
فولس سنتر الهرم أمام مدرسه حفر الباطن ش المجزر الألى
أو م محمد على أمبابه طريق بشتيل
أو هانى ومحمد سمير جسر السويس خلف حديقه بدر
أفضل أماكن الشراء أشرف الشهابى شارع دمشق مصر الجديده
أشرف سمير محلات الصفوه ش رمسيس
واى خدمه تحت أمرك

[أبو_حمزة]

كل 40000 سير كاتينه ودينمو والكشف على بليه الكاتينه
كل 10000فلتر زيت وبنزين وبوجيهات وطبعا معاهم زيت ماتور
كل 20000فلتر هواء
كل بدايه صيف وشتاء تغيير فلتر تكييف وزيت فتيس ويفضل زيت أسو
أماكن الصيانه
فولس سنتر الهرم أمام مدرسه حفر الباطن ش المجزر الألى
أو م محمد على أمبابه طريق بشتيل
أو هانى ومحمد سمير جسر السويس خلف حديقه بدر
أفضل أماكن الشراء أشرف الشهابى شارع دمشق مصر الجديده
أشرف سمير محلات الصفوه ش رمسيس
واى خدمه تحت أمرك

1000 شكر يا فندم
بس 10ألف لفلتر الزيت و البوجيهات مش قليل؟
انا بغير الاتنين على 40 فى لانسر و بيبقوا سلام 100% كمان و البوجيهات ممكن تستمر بس انا بمشى على الجدول

و فولكس سنتر الهرم ايه اخبارهم انا روحت لهم امبارح قبل الظهر بس طلعوا بيشتغلوا سهارى (بعد الساعة 2 و لحد نص الليل)
مفيش حد كويس و بيشتغل بدرى عشان يوم الاجازة ما يضيعش؟

[M.Mostafa80]

بص يافندم أغلب البوجيهات ال ان جى كى اللى موجوده فى السوق بتعمل 10000 مفيش غير أشرف الشهابى اللى بيجيب اللى بتعمل 35000 ك
وانا بعمل كدا فى عربيتى لسبب جميل جدا أن البنزين عندنا سورى أعفن بنزين فى العالم وماليان شوائب والعربيه دى انجيكشن يعنى رشاشات يعنى لو واحد أتسد أو حصلو حاجه هتدوخ فعشان كده بغير فلتر كل عشره والبوجيهات بعمل كده عشان دايما ببقى محتاج أفضل حرق ممكن عشان أنا سواقتى رياضيه شويه
اما المكان اللى ممكن يعملك الشغل بتاعها فكدا أقرب واحد ليك هو المهندس محمد على هتطلع كوبرى عرابى بالمهندسين وتاخد النزله اللى على اليمين وهتنزل تفضل ماشى على طول هايقابلك ميدان هتلف منو وتدخل أول يمين فى الميدان أسمو طريق بشتيل هتمشى شويه صغيرين هتلاقى جامع على أيدك الشمال الورشه فى الشارع اللى على الشمال بعد الجامع على طول

[أبو_حمزة]

شكرا يا استاذى
على فكرة انا ساكن حاليا فى حدائق الاهرام. يعنى ماستر فولكس هما اقرب ناس ليا بس مشكلتهم انهم بيشتغلوا من بعد الساعة 2 الظهر يعنى عشان اروح لهم ممكن اقعد لبعد العصر و بكده يبقى اليوم راح ده لو يوم اجازة (طبعا يوم الاجازة لازم زيارات عائلية).
بيعجبنى توكيل ميتسوبيشى انه بيبدأ شغل من 8 و عشان كده لما بروح هناك العربية بتكون خلصانه و رجعت بيتنا على الساعة 11 أو 12 بالكتير ويبقى لسه باقى اليوم معايا. كان نفسى يكون حد فولكساوى كده بس معلهش بقى
أصل أخوك كائن نهارى بينام الساعة 10:30 و يومى بيبتدى من بعد الفجر

الحل التانى انى اروح للناس دى من الشغل بس اخلص يوم بدرى عشان مش اروح انام عندهم

[M.Mostafa80]

مهو أنا قلت لحضرتك على الناس دى بعد ما حضرتك قلت أن فولكس سنتر مش مناسب بالنسبالك ولا حظت ان محل السكن الهرم ومصر الجديده فعشان كده كتبت لحضرتك عنوان محمد على أمبابه ومحمد سمير فى جسر السويس والناس دى زيها زى باقى الورش بتبداء الساعه 10 صباحا

[أبو_حمزة]

اّه فهمت قصدك يا أستاذى
جزاك الله خيرا
بس السؤال مين فيهم أفضل فى مستوى الشغل؟

[M.Mostafa80]

والله هو محمد سمير أفضل بس يعيبو مشواره الكبير بس دا ميمنعش أن محمد على كويس وبعدين دايما يعمل تست للعربيه بعد ما يخلصو الشغل بنفسو

[أبو_حمزة]

يعنى محمد سمير أفضل من ماستر فولكس ؟؟

[أبو_حمزة]

بالنسبة للسيور بتتغير كل كام كيلومتر. 40 ألف واللا اكتر؟

وسير الكاتينة بيتغير على كام (فى لانسر من 80 ل 100 قهو كده و اللا أقل؟). و هل بيتغير لوحده واللا لازم معاه البليه بالشداد

و هل السيور bosch بنفس كفاءة الاصلى. أو بمعنى اخر هل السيور الاصلى هى bosch بس واخده علامة فولكس

[M.Mostafa80]

يفضل كل 40000كم انت عارف الكاتينه دى بالذات مصدر قلق كبير قوى وربنا يسترها معانا

[umoussa]

ده جدول صيانات البولو 2001

- طقم دبرياج كل 80 ألف كم
- طقم سيور وبلي كامل كل 50 ألف كم (لابد من تغيير السيور والبلي مفيش حاجة اسمها كشف ولو وكويس يكمل)
- تيل فرامل أمامي كل 20 ألف كم أو حسب استخدامك
- تيل فرامل خلفي كل 100 ألف كم
- بوجيهات ليزر بلاتينيوم أصلية كل 50 ألف كم (دي شمعة واحدة) ومينفعش تحط أي نوع تاني. وال ngk بتاعها برضو غالي ويوصل 200 جنيه
- زيت تخليقي (شل بلاش موبيل 1 لأنه بيتبخر) + فلتر كل 10000 كم
- فلتر هواء وبنزين كل 20 ألف كم
- فلتر تكييف كل نهاية صيف وشتاء
- سلوك بوجيهات كل 100 ألف كم
- زيت فتيس كل 20 ألف كم (زيت إسو 80w90)
- زيت باكم (ate dot 4) كل 20 ألف كم مش تزويد لأ تغيير
- زيت باور أصلي أخضر أو أمريكي أبيض كل 20 ألف كم (وإوعى تحط زيت باور أحمر)
- حساس الحرارة بيتغير أول لما تحس إن العربية مخنوقة وبتاكل بنزين

يعني دي الحاجات الأساسية

[umoussa]

بالنسبة للسيور بتتغير كل كام كيلومتر. 40 ألف واللا اكتر؟

وسير الكاتينة بيتغير على كام (فى لانسر من 80 ل 100 قهو كده و اللا أقل؟). و هل بيتغير لوحده واللا لازم معاه البليه بالشداد

و هل السيور bosch بنفس كفاءة الاصلى. أو بمعنى اخر هل السيور الاصلى هى bosch بس واخده علامة فولكس

السير الأصلي مش بوش ولما تجيب السيور ومش عايز تجيب أصلي هاتها من أشرف الشهابي أرجوك لأنه الوحيد المضمون مع كامل احترامي للباقي

[umoussa]

يفضل كل 40000كم انت عارف الكاتينه دى بالذات مصدر قلق كبير قوى وربنا يسترها معانا

بمناسبة الصورة دي بقى مش ناوي تيجي الساحل؟؟؟

الجو هنا حرررررررررررررررررررررررررررررررر ورطوبة بشعة