لانسر بصدر جديد

[Dr_Ahmed_Abdelghany]

عربية صديقى موديل 2008 تعرضت لحادث نتج عنه تغيير لصدر السيارة مع استعدال للجزء الأمامى من الشاسيه وتغيير للرفرفرين والكبوت والاكصدام وطاقم التبريد بقطع أصلية
الرد والدهان كان على درجة عالية من الكفاءة بحيث يكاد يكون من المستحيل معرفتهم لكنه بكل تأكيد سيخبر المشترى بهذه التفاصيل عند النية للشراء
فى رأيكم وبعد استبدال هذه القطع كم يقل سعر السيارة عن مثيلتها الفابريكة؟

[zoro007]

ربنا يكون فى عونه

بما ان العربيه مش بتعتك اقولك على الحقيقه المره لان للاسف فى الحالات دى العربيه مبتتباعش محدش بيرضى يشتريها لما بتكون مغيره ربع او نص

وان حد اشتراها بتقل سعر خيالى ممكن يصل لاكتر من 15 الف عن مثيلتها الفبريكه :(

ودايما اللى بيشتروا الحالات دى ناس تجار علشان يخسفوا بسعرها الارض ويلزقوها لاى حد مش فاهم فى العربيات

والله قبل مشترى عربيتى شوفت امور عجيبه فى موضوع العربيات دا

وأنصحك ان انته متقولوش على الحوار دا علشان ميتعقدش من العربيه

[Dr_Ahmed_Abdelghany]

هو تغيير صدر العربية هيأثر عليها فى إيه؟
أعتقد ولا حاجة
لا مأثر فى الشكل ولا القيادة ولا المتانة واللى ركب زى القديم بالضبط
يبقى إزاى يقلل من تمنها 15 ألف؟

[zoro007]

هو تغيير صدر العربية هيأثر عليها فى إيه؟
أعتقد ولا حاجة
لا مأثر فى الشكل ولا القيادة ولا المتانة واللى ركب زى القديم بالضبط
يبقى إزاى يقلل من تمنها 15 ألف؟

صراحه عن نفسى مجربتش ايه عيوبه

لكن دا اللى انا شفته من الناس بتبعد عن اى عربيه مغيره ربع او نص حتى العربيات اللى بتبقى واخده خبطات جامده فى القوايم للعربيه فقط الناس بتبعد عنها وان اشترتها بنقص من تمن العربيه كتير

جو السوق والشراء والبيع بيحكم وبيتحكم فى الناس برضه
زى مثلا العربيه الاوبل عربيه محترمه جدا المانى وممتازه شوف سعر الاوبل استرا 2000 بكام دلوقتى من 45 ل 50 الف بالكتير وحالتها محترمه وممتازه ليه بقى السعر دا حكم السوق عليها وفى الحقيقه العربيه تسوى اكتر من كدا كتييير

خليه ميفكرش يبيعها العربيه أنا شايف انها موديل حديث ومفيش اى لازمه من انه يبعها نهائى يكمل بيها ويمشى بيها حاله مادام هوه مستريح ليها.

[أحمد كمال]

المشكلة مش في الصدر المشكلة في عدلة الشاسيه لانه عمره ما بيرجع لاصله

[Dr_Ahmed_Abdelghany]

المشكلة مش في الصدر المشكلة في عدلة الشاسيه لانه عمره ما بيرجع لاصله

لا يافندم الشاسيه مسطرة تماما حتى قبل الرش لأن الخبطة مكانش فيها أى "قصعة"
عموما زى مانتم بتقولوا هى دى قواعد السوق

لكن لو حصل مع أى واحد كده وصرف عليها بسخاء علشان ترجع على أفضل صورة ... لما يحب يبيعها يقول تاريخها للمشترى وللا ميقولش؟ على افتراض أن جميع آثار الحادثة تم علاجها دون أى أثر أو تأثير على أداء وعمر السيارة

إيه رأيكم؟

[AHMEDCAR]

انا عن نفسى بسيبه يقلب فيها براحته و يكشف عليها و لو اكتشفها كان بها و لو ما اكتشفهاش خلاص

بس برضو فى اوقات كتير بلاقى نفسى بقوله من غير ما يسال

[أحمد كمال]

لا يافندم الشاسيه مسطرة تماما حتى قبل الرش لأن الخبطة مكانش فيها أى "قصعة"
عموما زى مانتم بتقولوا هى دى قواعد السوق

لكن لو حصل مع أى واحد كده وصرف عليها بسخاء علشان ترجع على أفضل صورة ... لما يحب يبيعها يقول تاريخها للمشترى وللا ميقولش؟ على افتراض أن جميع آثار الحادثة تم علاجها دون أى أثر أو تأثير على أداء وعمر السيارة

إيه رأيكم؟

لا طبعا لازم يقول و الا تبقى البيعة حرام

و ما ننساش واقعة الرسول مع البائع اللي كان مخبي الفاكهة البايظة تحت

و قبل ما يبيع يحط نفسه مكان المشتري

و ما ينساش انه ممكن ياخد الفلوس يجيب بيها العربية و مافيهاش بركة العربية الجديدة هي كمان تتبهدل

[أحمد كمال]

انا عن نفسى بسيبه يقلب فيها براحته و يكشف عليها و لو اكتشفها كان بها و لو ما اكتشفهاش خلاص

بس برضو فى اوقات كتير بلاقى نفسى بقوله من غير ما يسال

لو ما اكتشفهاش خلاص دي مع احترامي مش صح لانه ممكن نفس الشئ يحصل فيك و اكيد مش هتبقى مبسوط

[zoro007]

لكن لو حصل مع أى واحد كده وصرف عليها بسخاء علشان ترجع على أفضل صورة ... لما يحب يبيعها يقول تاريخها للمشترى وللا ميقولش؟ على افتراض أن جميع آثار الحادثة تم علاجها دون أى أثر أو تأثير على أداء وعمر السيارة

إيه رأيكم؟

انا عن نفسى بسيبه يقلب فيها براحته و يكشف عليها و لو اكتشفها كان بها و لو ما اكتشفهاش خلاص

بس برضو فى اوقات كتير بلاقى نفسى بقوله من غير ما يسال

نصيحه من اخ لكم لا أحد يستخدم اسلوب الغش اطلاقا فى البيع (من غشنا فليس منا)

وايضا الفلوس بتعتبر فلوس حرام طبعا وربنا مش هيبارك فيها وهتلاقيها طارت والشىء اللى هتشتريه بيه ربنا مش هيبارك فيه اطلاقا

وللعلم اعرف تجار كتير بتعمل الموضوع دا وبتبيع بنظام الغش وبتعطى العربيه للناس اللى مش فاهمه على انها فبريكه بره وجوه وفى الحقيقه بتكون مغيره نص ورشه اماكن كتير ومفكرها فهلوه وشطاره.

وبيحصلهم مصايب سودا انتقام من ربنا ودا انا شوفته فى شخص تاجر شغال بنفس النظام كدا

فعامل ربنا اولا فى اى شىء حتى يبارك لك وييسر لك امورك

[Dr_Ahmed_Abdelghany]

السؤال هو هل هذا إخفاء عيوب أم لا؟
هل تغيير أى شئ فى العربية بشئ آخر مثيل وجديد يعتبر عيبا؟
أم فقط لأنه من قواعد السوق؟

إخفاء عيب شئ غير مستحب قطعا
لكن إخفاء تفاصيل التصليح هل يعد إخفاء عيوب باعتبار أن أداء السيارة لم يتأثر على الاطلاق؟

يعنى لو العربية بتاكل زيت وولا بتحدف زوايا وللا بتفصل وللا وللا ... دى عيوب
لكن العربية اتخبطت واتصلحت زى أصلها بأفضل الخامات والصنايعية دا إخفاء عيب وللا لأ؟

بصراحة الموضوع محير ومش بالبساطة اللى متخيلينها وجايز نحتاج فتوى فعلا

[NaderNabil]

انا شخصياً هاقول علي اللي كان فيها...و ممكن أوريله صوره كمان للحادث عشان يكون فاهم حجم الدمار كان قد إيه...لأن ده هايثبت فعلاً إذا كانت تأثرت بشدة أم لا

صدقوني... راحة نفسية ما بعدها راحة لما تقول علي كل حاجة في العربية...يكفي انه مش هايدعي عليك أو يشتمك لو إكتشف حاجة كده ولا كده في المستقبل...بالعكس...هايفتكرك بكل خير

و في الأخر دائماً بأحط نفسي مكان الشخص ده...هل أرضي بالأمر ده أم لا؟

[zoro007]

السؤال هو هل هذا إخفاء عيوب أم لا؟
هل تغيير أى شئ فى العربية بشئ آخر مثيل وجديد يعتبر عيبا؟
أم فقط لأنه من قواعد السوق؟

أعتقد ان قواعد السوق مجتش من فراغ لان مستحيل الناس هتبعد عن الاشياء دى بدون اسباب مقنعه برضه

اكيد بياثر على شىء فى العربيه وممكن لو زى مبتقول اتصلحت بشكل احترافى ممكن يظهر فيها عيوب مستقبلا وممكن بالفعل يبقى فيها عيوب وانته مش حاسس بيها دلوقتى وهتظهر قدام

ممكن تسأل ناس خبيره بالمجال دا (صنايعيه) طبعا باستثناء اللى صلحها :]

وفى الاول والاخر ان كان ليها عيوب او لا لازم تبقى كل حاجه على ميه بيضه زى مبيقولوا

وممكن ربنا يرزقه باللى يشتريها عادى على عيوبها علشان صراحته .. كل شىء جايز

[nabaster]

عربية صديقى موديل 2008 تعرضت لحادث نتج عنه تغيير لصدر السيارة مع استعدال للجزء الأمامى من الشاسيه وتغيير للرفرفرين والكبوت والاكصدام وطاقم التبريد بقطع أصلية
الرد والدهان كان على درجة عالية من الكفاءة بحيث يكاد يكون من المستحيل معرفتهم لكنه بكل تأكيد سيخبر المشترى بهذه التفاصيل عند النية للشراء
فى رأيكم وبعد استبدال هذه القطع كم يقل سعر السيارة عن مثيلتها الفابريكة؟

معلش يا دكتور انا اول مره اقرا الموضوع

دلوقت العربيه علي وصفك اسمها مغيره طقم قدام مش مغيره صدر لان موضوع مغيره صدر ده حوار تاني

ومن وصفك برضه العربيه كده بنسية 98% سليمه لان تغيير الطقم الي بره ميعبش العربيه نيجي بقي لموضوع عدل الشاسيه وده مينفعش فيه وصف (ياريت صور)

بس عموما معظم الي بيتخبط دلوقت ولو حتي خبط قالب طوب في الارض انه مثلا يتكسر عند مقص وتروح كمان الخبطه مسمعه في مكان المقص مع الشاسيه

او يروح كاسر كمرة الموتور ويسمع مكان ربط الكمره في الشاسيه ودي بتكون كلها حاجات بسيطه لو اتعملت عند واحد اسطي وبيشتغل صح

ومفيش حاجه اسمها لو اتخبط مش هيرجع طول ما معاك فلوس هتقدر تعمل اي حاجه لان ده في الاول وفي الاخر حديد وبتشكله علي كيف كيفك بشرط يكون الي بيشتغل عارف هوا بيعمل ايه

A.Yakout

[Dr_Ahmed_Abdelghany]

معلش يا دكتور انا اول مره اقرا الموضوع

دلوقت العربيه علي وصفك اسمها مغيره طقم قدام مش مغيره صدر لان موضوع مغيره صدر ده حوار تاني

ومن وصفك برضه العربيه كده بنسية 98% سليمه لان تغيير الطقم الي بره ميعبش العربيه نيجي بقي لموضوع عدل الشاسيه وده مينفعش فيه وصف (ياريت صور)

بس عموما معظم الي بيتخبط دلوقت ولو حتي خبط قالب طوب في الارض انه مثلا يتكسر عند مقص وتروح كمان الخبطه مسمعه في مكان المقص مع الشاسيه

او يروح كاسر كمرة الموتور ويسمع مكان ربط الكمره في الشاسيه ودي بتكون كلها حاجات بسيطه لو اتعملت عند واحد اسطي وبيشتغل صح

ومفيش حاجه اسمها لو اتخبط مش هيرجع طول ما معاك فلوس هتقدر تعمل اي حاجه لان ده في الاول وفي الاخر حديد وبتشكله علي كيف كيفك بشرط يكون الي بيشتغل عارف هوا بيعمل ايه

a.yakout

شكرا لردك أخى العزيز
أنا استخدمت نفس المصطلحات اللى كان بيستخدمها الصنايعية وهم بيشتغلوا فى العربية
الجزء اللى اتعوج فى الشاسيه هو ال حديدتين اللى ورا الصدر على طول بطول 25 سم تقريبا ، كانو معووجين بزاوية حوالى 30 درجة عن وضعهم للأمام وما ورائهم من علب وقوايم وغيره سليم وللأسف مافيش صور

أنا باتناقش معاكموطالب رأيكم لأنى عارف إن مجرد فتح الموضوع ده أمام أى مشترى هينزل السعر فعايزين نعرف الحدود المعقولة بعيد عن حرق تمن عربية فى الحقيقة جيدة جدا