ماهو بيض الدركسيون وبيض المقصات

**samirayad** · 14-08-2009 08:52 PM

الأسمى العلمى لبيض العربيات عامة يطلق عليه ball joints
أى الوصلات الكرويه ....وده باين من الترجمه للمعنى بال e
ولكن جرت العاده لدى الصنايعيه على تشبيه أى مكون من مكونات السياره بالأشياء المتعارف عليها لديهم
ونظرا لأن هذه الوصلات الكرويه تشبه الى حد كبير البيضه المتعارف عليها
أطلق عليها هذا الأسم
- حنخللى كلامنا دايما بصوره التشبيهات بالبيضه ....لسهولة التخيل
طيب الأول .......أيه وظيفة الوصلات دى أو البيض بالعربيه
1- لازم يكون فيه بيض على نهاية أتياش الدركسيون ومتصله بالركب الأماميه
لأستكمال عملية التوجيه
والتوجيه أساسا هو أحداث حركه زاويه للعجل الأمامى أثناء السير
هو ده دور بيض الدركسيون .....أى السماح بحركه زاويه منقوله من أتياش الدركسيون الى الركب الأماميه .....لأحداث حركه زاويه ....عند الرغبه فى التحويد والدوران بالسياره ..................
2- لازم يكون فيه بيض على نهاية المقصات للسماح بحركه زاويه بين الشاسيه وشمعدان العجل الأمامى ....
لأن المقصات هى وسيلة ربط الركب الأماميه بالشاسيه
العجل ماشى طوالى .....وبالتالى الشاسيه بوزن السياره ماشى معاه طوالى
يبقى لما يجى العجل يحود ....محتاجين بيض المقصات معانا ...لأن العجل أتحرك حركه زاويه بسيطه بسبب دفع بيض أتياش الدركسيون للركب الأماميه
عاوز بالمره أشبه .....البيض ده بيشتغل أزاى ....الحركه الزاويه اللى بيعملها
هنا بأه حطلب منكم التخيل للتشبيه ده ...اللى قدرت أعمله ....أسوه بالبيض اللى بنسلقه
تخيل أننا جبنا بيضه مسلوقه كويس .......وكان صفار البيضه عنده حرية الحركه داخل بياض البيضه ...................
جينا بعد كده وعملنا خرم فى البياض بفتحه معينه ( بس الصفار سليم ومجناش جنبه )
حنيجى بقه ...ونجيب مسمار صغير بقطر أأقل من الفتحه اللى عملناها فى البياض
ووصلنا المسمار بالصفار ........
تعالى بقه ....وحرك المسمار اللى ماسك فى الصفار يمين وشمال
حيتحرك معاك حركه زاويه ....لحد مايصد فى جنب الفتحه اللى عملناها فى البياض
هو ده بالضبط طريقة شغل بيض العربيه (سواء بتاع الدركسيون أو بتاع المقصات )
قلب البيضه للوصله الكرويه ( المسمار بصفار البيضه ) ......جراب أو قميص البيضه للوصله الكرويه ( هو البياض بتاع البيضه ).........
طيب قلب البيضه ده حديد .....والجراب حديد .....ومينفعش يتحركوا كده بدون وسيلة تزليق أو تليين
بيجى مصنعى البيض ....ويضعوا كميه من الشحم بين قلب البيضه وجرابها
بغرض تسهيل الحركه الزاويه للقلب داخل الجراب ....
وطبعا بيغطى ذلك بحافظه من الكاوتش ...للحمايه من الأتربه والرمال
اللى بنقول عليها ( كاوتشة الطعميه ) لأنها شبه الطعميه فعلا ......
أما أحنا علينا تشبيهات .........................!!!!!!!!!!!
فى جزئيه بسيطه كده عاوز أشير اليه بناء عن تخيلى وسؤال سألته لنفسى
ليه بيض الدركسيون أصغر أو أقل حجما من بيض المقصات ....؟
قى الحقيقه قدرت أصل الى النتيجه التاليه
أثناء عملية التوجيه .....أتياش الدركسيون هى اللى بتحرك العجل حركه زاويه ....علشان ححود بالعربيه ....يعنى حمل خفيف ....والركب حتلف على قوة أحتكاك الأرض وبلى البطاحات فوق .....وبكده حركت الركب حركه زاويه
أما بيض المقصات بياخد حركه زاويه من شمعدان العجل لتوجيه الشاسيه والعربيه كلها يعنى حمل كبير مطلوب من بيض المقصات
لأن مما لاشك فيه ....أن حجم البيضه مرتبط بالحمل المطلوب منها تحمله
أعتقد ده السبب فى كون بيض المقصات أكبر من بيض الدركسيون

دى صوره بسيطه كده لموقع بيض الدركسيون الصغير على نهاية الأتياش بتاعة الأسكترا

ودى صوره لموقع بيض المقصات على المقصات ....وباين مسمار البيضه اللى حنركبه فى شمعدان الركبه
طبعا الموضوع أعمق من هذا .....وقلت أبدأ معاكم بالجزئيه دى ....وطبعا الموضوع مطروح للجميع من أجل التحاور والأضافه ...................
وبالفعل هذا ماوفقتنى الله لجمعه حاليا من معلومات

**كابوس الليل** · 14-08-2009 09:46 PM

لسة مقريتش حاجة بس عايز اقولك يا دكتور الف شكر
انا بس حبيت اكون اول واحد يرد على حضرتك عشان انا الى كنت سائل (او صلب او غاز)
والف شكر

**samirayad** · 14-08-2009 09:50 PM

عشان انا الى كنت سائل (او صلب او غاز)

هههههههههههه والله العظيم ....دا أنت حكايه

**كابوس الليل** · 14-08-2009 10:25 PM

حضرتك شايف صورة توقيعى؟؟

**samirayad** · 14-08-2009 10:29 PM

نعم

**ainshouka** · 15-08-2009 02:41 AM

متشكرين جدا يا بشمهندس سمير على التوضيح الجميل دا ولكبوس الليل انه فتح الموضوع دا لانى كنت برضه عاوز اعرف اكتر عن موضوع بيض العجل بس فيه كذا نقطة كانت عاوزة شوية توضيح

معلش حتعبك شوية......

ياريت توضحلنا اللى بتشير اليه الارقام فى الرسم
نظام حركة الدورانية دى فهمتها لانى شفت زيها فى المروحة لما جيت افكها بس كانت عبارة عن بلية وبرضه عشان تعمل الحركة الدورانية

ايه المشاكل اللى ممكن تحصل مع بيض العجل ودى بحسها ازاى

فى محطات الغسيل فى عربيات بيشحمولها البيض بتاعها لكن لما جينا نشحم العربية الراجل قال انها مبتتشحمش وهى بقفلتها كده وبشحمها كده فهل معنى كده انه فيه انواع بتتشحم وانواع لا

وشكرا

**samirayad** · 15-08-2009 08:47 PM

ياريت توضحلنا اللى بتشير اليه الارقام فى الرسم

طيب أكتب الأرقام اللى أنت عاوزها .
وعلى أى رسمه ....الأولى ولا التانيه

ايه المشاكل اللى ممكن تحصل مع بيض العجل ودى بحسها ازاى

لما البيضه حتخف وتبوش ....القلب حيلق جوه قميص البيضه
ودى حتحسها كالآتى
حنحس أن البيض حيلق معاك ويعمل زى نقره كده وأنت ماشى
زى دقه شاكوش خفيفه ....وبالذات بيض الدركسيون

فى محطات الغسيل فى عربيات بيشحمولها البيض بتاعها لكن لما جينا نشحم العربية الراجل قال انها مبتتشحمش وهى بقفلتها كده وبشحمها كده فهل معنى كده انه فيه انواع بتتشحم وانواع لا

طالما الكوتشه بتاعة الوقايه سليمه ....هى بيبقى فيها شحم بلادها
وملناش دعوه بيها
أما لو الكاوتشه باظت وأنقطعت ....فطبعا بتتغسل البيضه
ويتغير الشحم والكاوتشه ....وتركيب سلكه على الكاوتشه من أجل الغلق

**mohamed777** · 15-08-2009 08:47 PM

100 100 ياباشمهندس

**samirayad** · 15-08-2009 08:48 PM

الله يخليك يا أبو حميد

**SHNORY** · 15-08-2009 09:19 PM

الله ينور علي شرحك الجميل يا باشمهندس سمير
مع انك جوعتني بالبيض والطعميه
بس فعلا شرح مبسط وجميل من حضرتك
وبالنسبه لتوقيع كابوس فهو قصده ان لما عزم الموتور يوصل عنده 75%
حينام وحيلم بكبوس في الليل
والعربيه حتبقي حتت زي ماهو موضح في الصوره وحيغير تلت قدام وجنب كامل وحيركب فوجات علشان يشوف البلاعه المره الجايه
يلا ..ربنا كريم وكله باوانه

الموضوع: ماهو بيض الدركسيون وبيض المقصات

LinkBack

أدوات الموضوع

عرض

-

-

-

-

المواضيع المتشابهه

مشكلة في قواتيش علبة الدركسيون و بارات الدركسيون

صوت تكتة في الدركسيون فضلا علي اهتزاز الدركسيون

ما وظائف كل من ((الإسكاترا-علبة الدركسيون-المقصات)) وما المقصود بتربيط العفشة؟

الكشف على بيض الطرف وبيض المقص بعد تفوير العفشة فى اللانوس

طيور وبيض (أحمر-أبيض) أرجانك وأفخر انواع الجمبري بسعر رائع

الكلمات الدلالية لهذا الموضوع

المفضلات

المفضلات

ضوابط المشاركة