تمت بحمد الله صيانة ال 20 ألف و اليكم التفاصيل

[اسلام المصرى]

السلام عليكم و رحمة الله و بركاته يا أهل المنتدى الكرام :-)

ذى ما وعدتكم اليكم تفاصيل مشوارى الى مركز الصيانة بجسر السويس أمام سوق القنال الدولى لعمل صيانة ال 20ألف لسيارتى لانسر 2007 سبورت أتوماتيك:
تم حجز ميعاد من يوم 8 أكتوبر تليفونيا لليوم 27 أكتوبر الساعة التاسعة صباحا. بدأت رحلتى فى السابعة و نصف و وصلت الحمد لله الساعة 8:20 و وجدت 6 سيارات 5 لانسر و واحدة باجيرو , أخدت الدور بتاعى و فى تمام التاسعة سجلت بياناتى بداخل المركز و طلبوا منى الأنتظار عند السيارة حتى يأتى المهندس و يستلمها منى , مفيش 5 دقائق وجدت مهندس الصيانة جاى صباح الخير صباح الخير و قولتله على طلباتى و ملاحاظاتى: زيت موبيل وان و تغيير فلتر الزيت و تربيط العفشة و الكشف على تيل الفرامل و تغييره اذا لزم الامر تنظيف فلتر التكييف و زجاجة FUEL SYSTEM CLEANER - و بس. تمام تمام أستلم العربية منى و طلب منى الأنتظار فى الأستراحة فى الدور التانى حتى تنتهى عملية الصيانة , المهم بدأت الزحمة و الضغط زاد عليهم فدخلت العربية الصيانة الساعة 9:30 قولت عادى مفيش مشاكل انا شايف هجوم الانسر بعينى :D حوالى 15 أو أكثر و المركز مش كبير قوى من جوه.
المهم حتى لا أطيل عليكم: الساعة العاشرة و نصف العربية خلصت - أنا كنت مراقبها معظم الوقت لحسن أنا موسوس ولازم أشوف بعينى - الناس هناك أمينة محترمة جدا شغلهم نضيف و مواعيدهم مظبوطة دى تالت مرة أروح و مفيش مشاكل الحمد لله حتى الأن.
روح يا بيه أدفع فى الخزنة الحساب: 453.75 جنيه :-) التيل لم يتم تغييره لأنه على حسب كلامهم لسه كويس نضفوه و صنفروه , قولت ماشى الراجل قالى أحمد ربنا يا بيه التيل تمنه 350 جنيه و أنت شكلك سواقتك كويسة :D قولتله الحمد لله , قولتله عادى يعنى التيل الفابريكة يقعد 20 ألف و العربية أتوماتيك؟ قالى أه , و أول ماتسمعه بيصفر تعالى و نغيره.
تفاصيل الحساب:
42.50 فلتر زيت
200 زيت موبيل وان
50 FUEL SYSTEM CLEANER (مستنى التنك يفضى و أستخدمه)
120 مصنعية
41.25 ضريبة مبيعات! !

الحمد لله كفاية قوى كده :-) ملاحاظاتى: الحمد لله كله تمام "حبيبه" كويسة التكييف هواه بقى أسقع الفرامل تمام مفيهاش مشاكل العفشة تمام و ان شاء الله هما مشوارين على المحور و تتفكفك تانى :D لو حد عنده أى أستفسار أو سؤال أنا تحت أمركم و يارب أكون أفدتكم شوية , و الى اللقاء يا أحبائى فى الحلقة القادمة ان عشنا و كان لينا عمر مع صيانة ال 30 ألف :-)
أخوكم اسلام المصرى

[Heshaam]

ربنا يبارك لحضرتك في حبيبة يا أ. إسلام وعقبال صيانة ال 200000ألف إن شاء الله

وعقبال ما تخاويها بباجيروهاية كده ولا حاجة :-)

[atolba]

قالى أحمد ربنا يا بيه التيل تمنه 350 جنيه و أنت شكلك

i bought the brake pads for 315LE

[M_Abdallah]

مبروك وعقبال ماتعمل صيانة 100000.
كنت عايز أعرف العفشة دايما بتحتاج صيانة
وتربيط كل أد أيه.









________________
محمد عبدالله

[AlmAhAtmA]

الف مبروك يا اسلام علي ال 20 الف عقبال ال 20 الف في اللامبورجيني
تيل الفرامل ما تستعجلش عليه ده نسبي من سواق للتاني و حسب طبيعه السواقه
انا غيرته علي 35 الف و كان فاضل فيه 5 الاف بس انا قلت كده كفايه
ربنا يبارك لك فيها
ايه رايك يالا سبق زي يوم الافطار

[إسلام شاهين]

يلا يا سمسم شد حيلك عقبال ما توصل لصيانة ال 200 ألف إن شاء الله بس أنا كان ليا استفسار :-

إنت ليه لما بتروح التوكيل ما بتخدش الحاجات ديه معاك ؟ يعني ال FUEL SYSTEM CLEANER أنا جايبه من بنزينه شل ب 25 جنيه مثلا والفلتر ب 30 جنيه ؟ ولا هل هما مش هيرضوا ؟ ولا إنت اللي بتحب تجيب حاجتك من هناك ؟ وإذا كنت كده طيب ليه وإنت عارف إن هي هي بره وأرخص ؟

[اسلام المصرى]

ربنا يبارك لحضرتك في حبيبة يا أ. إسلام وعقبال صيانة ال 200000ألف إن شاء الله

وعقبال ما تخاويها بباجيروهاية كده ولا حاجة

الله يخليك يا أ. هشام فى حياتك ان شاء الله :mrgreen: الحمد لله على كل شىء. وحشتنا :-)

i bought the brake pads for 315LE

أعتقد المهندس كان يقصد السعر الأجمالى بعد أضافة ال10% ضريبة المبيعات , أو يمكن هو قال 315 و أنا سمعتها غلط , الله أعلم.

مبروك وعقبال ماتعمل صيانة 100000.
كنت عايز أعرف العفشة دايما بتحتاج صيانة
وتربيط كل أد أيه

الله يبارك فى حضرتك يا أستاذ محمد :-) شكرا جزيلا ربنا يخليك. تربيط العفشة يتم كل 10 ألاف مع الصيانة , و طبعا ممكن تعملها فى أى وقت عند أى عفشجى و تديه اللى فيه النصيب موضوع سهل و مابيخدش وقت وهتحس بفرق , فى شوارعنا الجميلة ممكن تعملها كل 1000 كم :mrgreen: :mrgreen:

شكرا يا هانى يا حبيبى الله يبارك فيك , يا باشا العين ماتعلاش عن الحاجب :D أنا تلميذك :Dالتيل أنا سايبه براحته خالص لما يصفر هغيره ان شاء الله.

[Nader]

حمد الله على السالمة يا اسلام :D .....اصل انا بعتبر اليوم اللي بعمل فية الصيانة دة يوم جهاد او سفر .... بس واضح ان ربنا كان مسهلهالك :twisted: ....ربنا يباركلك انا مش بحسدك ولا حاجة :mrgreen:

يعني ال FUEL SYSTEM CLEANER أنا جايبه من بنزينه شل ب

في انواع مختلفة يا اسلام يعني في انواع بتقعد 4000 كيلو بس وفي 10000 كيلو وكلة بتمنة.... بس برضة هيبقى ارخص في البنزينة من التوكيل علشان الضريبة والذي منة :shock:

[اسلام المصرى]

إنت ليه لما بتروح التوكيل ما بتخدش الحاجات ديه معاك ؟ يعني ال FUEL SYSTEM CLEANER أنا جايبه من بنزينه شل ب 25 جنيه مثلا والفلتر ب 30 جنيه ؟ ولا هل هما مش هيرضوا ؟ ولا إنت اللي بتحب تجيب حاجتك من هناك ؟ وإذا كنت كده طيب ليه وإنت عارف إن هي هي بره وأرخص

-أنا لسه شايف مشاركتك حالا بعد ما رديت على أخوتى فمعلش هرد عليك لوحدك -
شكرا جزيلا يا سمسم :-) بالنسبة لل FUEL SYSTEM CLEANER و على حسب كلام مهندس الصيانة النوع ده متوفر فقط فى مراكز الخدمة المعتمدة بتاعت "مصرية" مكتوب عليه حتى من بره ميتسوبيشى - لو كان معايا الكاميرا :mrgreen: كنت صورته و رفعت الصور - يعنى من أنتاج ميتسوبيشى اليابان و هى بتوصى بأستخدامه كل 10 أو 15 ألف كم غير كده أنا ماكنتش جبته. أنا لم أسألهم هل ممكن الواحد يجيب الحاجات ديه معاه و لا لأ ممكن المهندس طارق يفيدنا فى النقطة ديه. أنا الصراحة بحب أجيب الحاجة من عندهم كله من مكان واحد علشان أنجز و ماعنديش وقت.... و لو حصلت أى مشكلة أقدر أتكلم بالفم المليان و ماحدش يقولى أصلك جبت الحاجة الفلانيه ديه من بره مش من عندنا و ديه سببت مشكلة أو أى تلاكيك من أى نوع أخر...... بعد الضمان مايخلص ممكن أفكر....... فرق التمن يا سمسم لما تدفع 420 ولا 450 مش هتفرق كتير و فى المقابل هريح نفسى و أكسب وقتى. اللى أنا مسغربله أن موبيل وان ب 200 جنيه و فى الخارج 225 !! مش فاهم ليه. شكرا جزيلا على أهتمامك يا اسلام يا حبيبى 8)

الله يسلمك يا نادر شكرا جزيلا :D الحمد لله رب العالمين ربنا كان مسهلا جدا , أنا فعلا بشيل هم اليوم ده جدا لدرجة أنى بالبسله هدوم مخصوصة :D أقصد هدوم تستحمل البهدله ذى مشاوير المرور :D يا باشا أحسد براحتك مفيش حسد بين الأخوة و الأحباء :-)

[Nader]

يا باشا أحسد براحتك مفيش حسد بين الأخوة و الأحباء

;) ربنا يكرمك

[boody2]

استاذ اسلام
مبروك علي الصيانة و ربنا يباركلك فيها

ممكن اعرف ايه فائدة ال FUEL SYSTEM CLEANER و ليه ما يطحتش الا لما التنك ما يكون فاضي

و لكم جزيل الشكر

[elpasha009]

يلا يا سمسم شد حيلك عقبال ما توصل لصيانة ال 200 ألف إن شاء الله بس أنا كان ليا استفسار :-

إنت ليه لما بتروح التوكيل ما بتخدش الحاجات ديه معاك ؟ يعني ال FUEL SYSTEM CLEANER أنا جايبه من بنزينه شل ب 25 جنيه مثلا والفلتر ب 30 جنيه ؟ ولا هل هما مش هيرضوا ؟ ولا إنت اللي بتحب تجيب حاجتك من هناك ؟ وإذا كنت كده طيب ليه وإنت عارف إن هي هي بره وأرخص ؟

استاذ اسلام أنا قولت في مشاركتي قبل كده في موضوع الصيانه ده أن الفلتر هناك مختلف عن الي بيتباع برة.أنا فعلا كنت بغير برة قبل كده بس الاصلي مختلف جدا

http://www.nilemotors.net/Forum/viewtopic.php?t=8980&highlight=

[Karim_Monir]

تمام يا سالام عقبال صيانة ال 500 الف بستكون مش بتاعتك عشان تكون جبت الجالانت بقى
الانجكشن كلينر في منه انواع كتير تبدا من 22 لغاية 57 اغلى نوع جبتة
في الغالب عمرك ما هاتحس باداء الا لو كانت الرشاشات عندك اتسدت تماما ولازم ةقتها تحط 3 او 4
هو وقائي اكتر منه تاثير وقتي وانا عن نفسي بستعملة كل من 8 الى 10 الالاف كيلو وكان في نوع قالي علية خالد ممتاز فعلا
وفيه النوعين دول وكل واحد احسن من التاني
البريستون تمنة 38 تقريبا وال اس تي بي 57







الا صحيح هو انت لسه ماخدتش كاميرتك :D :D :D :| :| :|

[noon_eg]

اللى أنا مسغربله أن موبيل وان ب 200 جنيه و فى الخارج 225 !! مش فاهم ليه.

غالبا والله اعلم كل التوكيلات باتخد زيوت فى تانكات كبيره زيت سايب يعنى بالبرميل مش جراكن زى اللى بره وده بيعمل فرق فى السعر

بس انا عايز انصحك نصيحه جرب زيت شل 10000 كم حتلاقى فرق شاسع

[modux]

الف مبروك و عقبال الصيانة الي جاية

فعلا عايز اجرب المنظف ده