اشتريت مازدا 323 موديل 1983 هاتش باك وعايز مساعدتكم

اعضاء المنتدى الكرام أولا كل سنة وانتم طيبين

ثانيا باركولي أنا جبت أول عربية في حياتي ولسة بتعلم السواقة عليها هية مازدا 323 موديل 1983 هاتش باك
أهوه بس عايز أعمل فيها شوية حاجات كده

أولا عايز اغير كوالين البيبان والشنطة علشان بيعلقو عشان العربية كانت مركونة وال كوالين بتاعتها مصدية وكمان برده أمان ليَّ فيما بعد عشان أصلا صاحبها ساكن جمبي بشارعين وأنا مش مطمن بصراحة

ثانيا زجاج الباب بتاع السواق بينزل باليد مش امان مش عارف اغير اية

ثالثا عايز اغير التابلوة لحسن قديم اوى ومتبهدل ولو حد يعرف سعرة اد اية يبقي خدمني ولا التابلوة مايتغيرش بس ممكن يتعملة صيانة ازاى علي الرغم انة مشقوق والزرارير اللي فية قديمة وتقيلة في استخدامها

رابعا عايز اغير إزاز الفوانيس بتاعها عشان متكسر وكده - الباغة يعني

يا ريت تقوللي أجيب الحاجات دي منين واركبها فين وطبعا أنا لسة باداورلاها على ميكانيكي كويس وكهربائي كمان
ياريت اللي يعرف ميكانيكي أو كهربائي مازدة 323 كويس يقولي بس يكون آمين وبيفهم فيها
وياسلام لو كان في مدينة نصر

ألف ألف مبروك على العربية وربنا يأتيك خيرها ويكفيك شرها.
انا زيك بالظبط اشتريت المازدا من 5 شهور وأول مرة أسوق.
أتمنى أن أفيدك بخبرتي الضئيلة طوال 5 شهور:
أولا - الميكانيكي والكهربائي:
- بالنسبة للميكانيكي عندك واحد أكتر من ممتاز عند القلعة في السيدة عائشة مشهور باسم "بلبل مازدا"
وده رقمه 0129278896. بالنسبة للكهربائي فيه واحد تبع عم بلبل كويس (بس خلي بالك وهو بيحطلك قطع غيار جديدة علشان ساعات بياخد القديمة - قبل كده غيرت نور التابلوه بواحد شكلة جميل جدا بس خد بتاعي الفابريكة وأنا ماخدتش بالي ونسيت)

- بالنسبة لبتاع قطع الغيار فيه واحد اسمه مجدي مازدا وهو كويس في شارع ترعة الجبل حلمية الزيتون وده رقمه 22828513

ثانيا نصائح:
1. كل يوم الصبح تبص على المياه والزيت. لازم الزيت ماينقصش منك ولو لقيت المياه نقصت زودها.
2. عينك دائما على مؤشر الحرارة. حذاري إن يوصل لل c فلو وصل لل c وقف العربية فورا وشوف المياه بتسرب منين.
3. حافظ على الموتور وماتجريش وتشد مع العربيات التانية.
4. غير الزيت دائما في ميعاده. وبالنسبة لنوع الزيت انت ممكن تسأل صاحب العربية اللي فات كان بيحط زيت ايه في العربية.
5. اعمل حسابك على ميزانية للبنزين وصيانة العربية.
6. اوعى تصرف فلوس كتير على الحاجات التافهة اللي مش محتاجها العربية قوي ، علشان وارد جدا العربية تفتح بقها معاك وساعتها ممكن مايكونش معاك فلوس. وماتسمعش كلام أي حد يعرض منتجاته عليك وكده (أنا وقعت في المقلب ده كتيييير صرفت بتاع 200 جنيه على العربية في حاجات مالهاش ربع لزمة زي مثلا:
1. اشتريت نور للتابلوه ب 30 جنيه مع إن القديم كان شغال كويس.
2. كان غطاء لمبة السقف مش موجود وجبت واحد ب 25 جنيه مستعمل (وياريته عدل).
3. أنا سألت الميكانيكي المياه عندي بتنقص كتير علشان بتنزل من خرطوم الفايظ قلتله ينفع اركب قربة للرادياتير ، قال لي ينفع وفي الآخر مانفعتش. صرفت عليها 40 جنيه.
4.اشتريت بوجيهات 3 شمعة لأن سمعت إنها بتحسن السحب ولا حسيت بأي فرق بعدها.)

المهم صرفت فلوس من غير داعي على حاجات مالهاش لزمة بجنيه وفي حلال ال 5 شهور العربية عماله تفتح بقها معايا في حاجات كبيرة زي مساعدين ورا ب 500 جنيه ، بطارية ب 220 جنيه، بارات علبة دركسيون ب 110 جنيه وجلب مقصات ب 50 جنيه ، بوبينا جديدة ب 50 جنيه وداخل دلوقتي في نص عمرة موتور.

خلي بالك أنا مش قصدي من الكلام ده إن لما تشوف عيب تسكت عليه، لأ لو العيب ده ماينفعش يستني الحق اعمله وحاول بقدر الإمكان تجيب قطع غيار ياباني أو أصلية.

أرجو أن أكون أفدتك وربنا يباركلك فيها. وألف مبروك مرة أخرى.

فيه حاجة نسيت أقولها - اوعى تزود مياه والعربية مطفية وهيه سخنه.
بمعني: هتزود مياه امتى:
1. لو هيه مطفية وباردة خالص (مفيش مشكلة)
2. لو هيه دايرة سواء سخنة أو باردة (بس ماتكونش الحرارة وصلت لل c)
لو لا قدر الله الحرارة وصلت لل c اركن العربية واستنى لحد ما تبرد (لحد مايوصل المؤشر للربع) ، وبعد كده دور العربية وزودها مياه عادي.

شكراعلى المعلومات القيمه ياباشا بس انا ملاحظ انك صرفت كام الف جنيه فى خلال كام شهر من شراءك العربيه غير تمنها الاصلى ربنا يطمن قلبك