مرة أخرى : احذروا ناشيونال موتورز النصابين

**aymamgad** · 11-10-2009 06:52 PM

اشتريت لانسر شارك الكاملة من ناشيونال موتورز اسيوط اول الشهر و طبعا يادوب مشيت بيها حاجة بسيطة لغاية ورقها ما خلص ... وفجاة قفلت العربية بالريموت عادى خالص و نزلت اشترى حاجة ... رجعت لقيت العربية مش راضية تفتح خالص !!!
قعدت ادوس بالريموت اكتر من مرة فى كل حتة مافيش فايدة !!!
قلت خلاص افتح بالمفتاح ... وكانت الصدمة ان المفتاح مش راضى يفتح !!!!
كلمت التوكيل و كان الرد : هات سمكرى يفكلك الشبكة اللى قدام و يكشف على البطارية اكيد ضعيفة (مع انى كنت ماشى بالعربية!!)
انا كنت هاتجنن لسة شارى العربية و افك الشبكة ؟
لا و كمان سالت ايه دخل البطارية بالباب اللى مش بيفتح بمفتاحه ؟؟؟؟
وكان الرد : ؟؟؟؟ لا احد يعرف !!!
المهم انا كنت ع الطريق و ما فيش حد ... تطوع واحد كهربائى طيب ييجى معايا و لما شاف العربية جديدة صعب عليه و قال لى : لو فكيتلك الشبكة الدنيا قدام هتبوظ !!
وسالنى : مفيش مفتاح تانى ؟ وافتكرت انى سالت نفس السؤال وقالولى لا هوا واحد بس !!
المهم قدر عن طريق الرفرف يفتح الكبوت و يوصل للبطارية و لقيها سليمة خالص !!
طبعا حصلت بهدلة علشان يوصل للبطارية دا غير الحاجات اللى قعد يجربها و كنت واقف جنبه حاسس انى هاعيط من المهزلة اللى عايشها مع عربية المفروض انى جايبها جديدة و دافع فيها تحويشة عمرى ودلوقتى بقها مفتوح و بيتلعب فيها !!!
خدت تاكس ودخت على بتاع ساعات علشان اغير حجر الريموت (يمكن ؟) وقالولى الحجر سليم خالص .. مع كدة حطيت واحد جديد !
المهم جربنا كل حاجة و مفيش فايدة ... اتصلت بمهندس الشركة و كان رده انى اجيبله العربية القاهرة (طبعا كوميديا لو عرفتوا ان العربية واقفة فى طريق اسيوط - سوهاج و مش بتتحرك !!! دا غير انها اتوماتيك ما بتتزقش)
دا غير الوقت اللى ضاع و البهدلة اللى خدتها و انا دلوقتى سايب العربية على الطريق و مشيت اشوف شغلى
لو برمجة المفتاح طارت المفتاح هيفتح الكالون بتاع الباب عادي
انا قلت نفس الكلام بالحرف لبتاع التوكيل .. وكانت الردود :
-العربية دى جاية بمفتاح واحد !!!
-موضوع ان المفتاح ما بيفتحش دى غريبة و عمرها ما حصلت !!
اللي انا باقوله

فيه حاجة ملعوب فيها مش تمام
انا سألت مدير الصيانة على الموضوع ده قال لي
فيه مفتاح طوارئ حديد داخل الريموت (يتم سحبه من مكانه فيظهر مفتاح كامل عادي جدا حديد) بحيث ان المفروض يتم الفتح به في حالة ما اذا الريموت لم يعمل فأنا مستغرب جدا ان المفتاح الحديد لم يفتح الباب حيث ان فتح الباب في الحالة دي ليس له اي علاقة بالدوائر الكهربية

, شنطه العربيه مش راضية تفتح بالريموت و مافيش مكان لمفتاح !!

انا اعصابى اتحرقت .... كل يوم يقولولى هانبعت لك حد ... و العربية واقفة على الطريق
حضر احد الفنيين بعد ان قام احد العاملين بالتوكيل بالاتصال به .. و الرجل فنى تويوتا اصلا ... لما شاف العربية قال لى :
يا باشا ايه البهدلة دى !!!
طبعا صعب عليه منظرها و طبعا هوا عارف انها عربية جديدة
المهم باستخدام عتلة حديد عرف يفتح الباب ولقى كالون الباب بايظ خالص و قال بالحرف :
انا عمرى ما شفت حاجة زى كدة فى عربية جديدة فى حياتى !!!
وسالنى - كالعادة - على المفتاح التانى !! و كالعادة برضه استغرب خالص لما سمع موضوع انى استلمت واحد
و لقى الريموت بايظ خالص و قاللى تشغلها بالمفتاح و انا هاظبطلك الكالون
وطبعا انا دلوقتى كل حاجة باعملها بالمفتاح

اتصلت بالتوكيل "ناشيونال موتورز" وكان كلامهم معناه "بالذوق" = اخبط راسك فى الحيط !!
ولكن علشان يثبتوا انهم لسه بنى ادمين دلونى على ورشة فى القاهرة اعمل مفتاح و اصلح الحاجات اللى باظت على حسابى !!!!!!!!!!!!!!!!!!

واليكم المفاجات الجديدة :
قبل ذهابى لعمل المحضر فكرت اتمم على كل حاجة فى العربية ووجدت التى :
- كهرباء تحريك المرايا تعمل كلها فى اتجاة واحد !!! (زر الاتجاة الاخر لايعمل مطلقا)
- الجزء المعدنى الذى ينزلق عليه مقعد السائق مكسور من الخلف (والجزء البلاستيك المرتبط به ملزوق بحاجة زى الامير كدة!!)
- لا يوجد غطاء محرك والمواسير الخارجة منه مغطاة بلحام زى بتاع الكهربا (معرفش دا عادى ولا ايه)
- ززر تحريك الرشاش يعمل ولكن لا يخرج ماء (برضه معرفش دا عادى ولا ايه)
- جزع من الشبكة الخارجية مكسور على الجنب
- و اخيرا و من ساعة فتح العربية يظهر انذار afs off ولما رجعت للكتالوج وجدت ان دا معناه "خلل فى النظام" (متهيألى كمبيوتر العربية شخص مشاكل بلدنا كلها بالكلمة دى )
وبالضغط على زر ال afs وجدت انه لا يعمل

ارجوكم دلونى على خطوات "عملية" اعملها علشان اخد حقى (غير انى البس حزام ناسف وادخل فى توكيل ناشيونال موتورز المشمحترم)

**ahmad--ezzat** · 11-10-2009 06:57 PM

مش المفروض تفحص العربيه كويس قبل ما تستلم

**tata12001** · 11-10-2009 08:03 PM

روح اعمال محضر با الواقعة دي واسأل الكهربائي ايلي جالك دة العربية دي مفتوحة أبل كدة ولا لأ ولو ألك اه خدو معاك كشاهد. بس في جميع الأحوال لزم تعمل محضر ، وكلم جهاز حماية المستهلك وكلم الدليل علشان تجيب نمرتو

**ahmad alshaaer** · 12-10-2009 06:08 AM

فعلا خليك مع حماية المستهلك
وربنا معاك وماتقلقش ولكن خليك محترم لو واجهت احد من المعرض ولاتفقد اعصابك

تحياتي

**m_o_sakr** · 12-10-2009 07:08 AM

السلام عليكم ورحمة الله وبركاته
لا حول و لا قوة إلا بالله, الناس معدش عندها ضمير, يعنى مش كفايه المكاسب البيكسبوعا فلعادى, كمان ينصبو, شوف جهاز حمايه المستهلك و ربنا معاك و يعينك

سبحانك اللهم وبحمدك ، أشهد أن لا إله إلا أنت أستغفرك وأتوب إليك

**Hisham1** · 12-10-2009 07:52 AM

ايه ده كله ربنا يعوضك
ده الموقع بتاع حماية المستهلك
جهاز حمايه المستهلك

**M.Moustafa** · 12-10-2009 05:30 PM

يا باشا الف سلامة عليك اولا بس ازيدك من الشعر بيت ان السواقين بتوعهم بهايم برضه وممكن يخبط العربية ويروح يرشها في الحرفيين وعادي جدا

**معتز** · 13-10-2009 11:57 AM

الفاتورة والذهاب مباشرة الى جهاز حماية المستهلك....وان شاء الله هتاخد حقك....

**merosss** · 13-10-2009 03:25 PM

ربنا يكون فى عون حضرتك وتقدر تاخذ حقك منهم وممكن اسأل حضرتك سؤال انتا مجربتش لية تفتح بالمفتاح من الباب التانى الى قدام ولا الشارك مفيهاش مكان تانى للمفتاح فى الباب القدام جنب باب السواق