14. كتالوج الكاسيت, تعليمات الضمان, كتالوج الصيانة, كتالوج العربية.
العربية من جوا كان فيها شوية تراب عشان باتت في المعرض من امبارح والناس كانت بتتفرج عليها وتركبها أول ما وصلت لقيت بنت راكباها, كنت حضرب واتنرفز بس معلهش بنت مع لوجي مش مشكلة, لو كان راجل كنت حنتقم, قالولي انهم حطينها في اول المعرض عشان تبقى تحت العين لحسن تتجرح لو اتسابت بره, وفعلا هي كانت بتبرق
لاحظت ان فيه نقطة حجمها 1 ملليمتر مربع (نقرة) بس هما في ثواني عملوها بالبولش
كنت عامل زي حلقات CSI وانا عمال اجمع الادلة من العربية اني الاقي عيب مش لاقي كنت بدخل وبخرج ميت مره افتح الكبوت والشنطة احط ايدي على البودي اعاين الكاوتش ازمر الكلاكس اشغل الكاسيت
للاسف من لهوجتي نسيت اعمل لها سي دي قرآن سورة البقرة عشان اشغله فيها
فاول ما شغلته في العربية كانت اول حاجه اشتغلت فيها ترابتاتيت بس بسرعة جبت اذاعة القرآن, عايزين ربنا يسترها معانا.
دخلت بكل جسمي جوا الشنطة لاحظت فيها تسييله من اليمين للشمال تقريبا مكان لحام الصاج , طبعا اصلا هي مش باينه لانها تحت الموكيت.
ا
لعدة موزرعة بعناية على يمين وشمال الشنطة منها الدايرة القلاووظ اللي العربية بتتجر منها, خصوصا ان في العربية مكان في الرفرقين ادام وورا عشان العربية تجر او تتجر منها, حبقى اشيلها لما اجيب اللنش بتاعي اجره بيه واطلع على عين الصيرة اعمل cruise
.
الكاوتش من دهشتي كان مش ميشلان زي كل اللوجان اللي شفتهم قبل كده, كان حاجه روماني برضه بس اسمها Kormoran نفس المقاس طبعا جنط 15 دورت عليه على النت لقيته ارخص من ميشلان
الغريبة ان كل العربيات الفيراني في التوكيل كاوتش ميشلان
كل العربيات الفضي كاوتش زعبله ده اللي هما حاطينه
على النت قايلين انه رخيص وجيد وبيتسوق في انجلترا في توكيل ميشلان وتحت علامة ميشلان مش عارف الكلام ده ايه نظامه.
.
الكرسي حركة انه بيعلى ويوطي دي رائعة مش زي اللانسر مجرد علو بسيط لا عالي فعلا اداني احساس لاول مرة اني راكب 4*4 لاني حاسس اني عالي على الارض والازاز كاشف كل حاجه ادامي وعلى الجناب.
بعد كل اللي عملته ده وبرضه ملقتش حاجه اخليهم يغيروا العربية
جه مدير الفرع عشان يسلم عليا وفعلا يا جماعة أستاذ هشام الدجوي ده كان السبب في اني استنى على التوكيل خمس شهور ومستلمش من اي موزع
بيقولي وهو بيضحك ادامي وانا موطي على الكنبة الورانية زي شرلوك هولمز يمكن الاقي حاجه تقفيلها وحش ولا حاجه : انتا ليه ليه يا دكتور احمد محسسني انك في سوق السيارات؟؟؟؟؟
العربية جديدة ومفيهاش شعره وعلى مسئوليتي وده في كل اللوجان مش عربيتك بس
خرجت من العربية وبصيت له ورفعت رأسي في إباء وقلت له : الحقيقة اللي خبيتها عليك من 5 شهور :
أنا من نايل موتورز..........................أن أن آآآآآآآآآآآآن
بييجي سواق يسلمك العربية كل ما يقولي حاجه اقوله انا عارف كل حاجه اقوله انا عارف
قعد جنبي وآل بيعملها لي مفاجأة ان زرار الكلاكس على دراع النور قلت له يابني انا من نايل موتورز
بس فعلا استفدت منه طريقة تشغيل دراع النور خصوصا بتاع الفوج لايت لانها مش عندي في الانسر.
الحقيقة يا جماعة يوميها كنت فخور فعلا
بنايل موتورز عشان حسيت اني مالك موضوع الاستلام وعامل عليه كنترول.
حسيت اني استلمتها قبل كده ربنا يبارك في كل اللي ساعدوني
العربية كانت عامله حوالي 9 كيلو (كتير اوي
) وعلى هذا الاساس مكانش فيها نقطة بنزين
يوميها أخدت بنزين بتسعين جنيه عشان التنك فاضي.
والدي وانا طالع بالعربية بيقولي ايه ده اخيرا لقينا حاجه غلط لمبة واحدة بس مارشدي
ر....ابتسمت في حكمة الحكماء ايه يا بابا انت متعرفشي المواصفات الاوربي ولا ايه............................................ ..... الله يمسيك بخير ياللي في بالي
وطلعت الزفة انا في المقدمة ووالدي سايق اللانسر اللي انا رايح بيها ورايا
بجد حسبي الله ونعم الوكيل
حسبي الله ونعم الوكيل في كل اللي ذم العربية بس بغرض ان الناس تروح لماركة ثانية عشان له عمولة
حسبي الله ونعم الوكيل لان دي ساعتها تبقى شهادة زور تتحاسب يوم القيامة.
وفعلا الوحوش يخلي الواحد يتخنق يا جماعة بلاش الضمير الزيادة عن اللزوم ده
مفيش واحد معاه العربية الا ويقولك صوتها عالي
انا كان ناقص اجيب معايا سدادات ودان تحسبا للموقف
هو ده الصوت العالي اللي كل الناس قالت عليه, هما كانوا حاطين سماعة كشف دكتور وموصلينها للكبوت
العربية فعلا سمعت صوتها اعلى من اللانسر بس امتى لما وصلت الرحاب ونزلنا انا وبابا ركنا العربيتين جنب بعض وهما الاثنين دايرين
فعلا ساعتها بس تميز صوت محرك اللوجان (مع انه لسه بيلين)
فعلا الناس معادن لما تخلي الوحوش ناس عندها ذمة تقول على سنة صوت اعلى فعلا من صوت اللانسر انما وانت ماشي ولا حاجه
التابلوه اضائته بالليل روعة
الالوان الفضي في الابواب والتابلوه عامله لمعة بالليل تحفه
الفوج لايت اختراع هايل مبيضربش النور في عين اللي ادامك وآمن على الطريق تحكمه سهل .
الشنطة اللي كنت خايف منها انها بتتفتح مع السنتر, خفت لما اسوقها واقف في بنزينه مثلا او انزل اشتري حاجه من كشك حد يفتحها ويحط لي نص طن حشيش
لقيتها بتتفتح مع السنتر انما اول ما بتبطل العربية الشنطة بتقفل ثاني.
صوت الكاسيت مريح وعالي بس حكاية انه audio عيبه الوحيد عشان كان نفسي اعمل سي دي سورة البقرة كاملة لو اوديو حتكون اكتر من 120 دقيقة ومش حعرف احطها على السي دي وبتخنق من ال fm modulator.
فرامل اليد في متناول ايدك
صباعك وايدك على الفتيس يقدر لو فردته تفتح وتقفل بيه الازاز والسنتر اللي في نص التابلوه
أجمل ما في الموضوع
وانا بركن تحت البيت والركنة في الرحاب العربيات عمودي على الرصيف في الباركنج , لقيت جوز اختي عمال يشاور لي ويقول لي ارجع ارجع ارجع
وانا ارجع ازاي بس انا مقدمة العربية بقت راجعة جامد
نزلت فوجئت ان اللوجان دونا عن اللانسر او النيسان عربية جوز اختي هي الوحيد اللي قدرت ترجع لورا حتى يلامس الكاوتش الخلفي الرصيف.
ده اداني امان اني لما اجي اركن في اي حته لما اخش عمودي على الرصيف مش حخاف ان الاكصدام يحك في الرصيف ويتشوه زي اللانسر.
جوز اختي لما ركبها وهو كان الاسبوع اللي فات بيقولي النيسان النيسان أو الموت الزؤام
انا اركب عربية نيسان 90 ومركبش عربية 2010 لوجان
قرر بأمانة يا جماعة انه يبيع النيسان ويجيب لوجان
سبحان الله
الحاجه الاخيرة
رحت مرور الجيزة عشان استمارة البيانات لقيتهم بيقولوا على يوم الثلاثاء.
واضح كده يا جماعة ان الدخلة اتأجلت مش عارف اطلع بيها بره
ادعوا بقى للعريس بالصبر
فعلا كل ده يا جماعة انا حاولت اني اقول الحاجات اللي متقالتش عليها قبل كده
انما كل اللي انا قايله دلوقتي يتحط جنب كل الحاجات الحلوة اللي اتقالت على العربية
ربنا يسترها معانا كلنا ويبارك لي فيها ويبارك في كل واحد في عربيته
د. أحمد طبيب أعصاب.
المفضلات