بدل فاقد لرخصة القيادة ورخصة السيارة

**aliabutaleb** · 11-10-2009 10:53 PM

السلام عليكم ورحمة الله وبركاته
الموضوع باختصار هو إني ضاعت أو اتسرقت مني محفظتي وفيها كل الكارنيهات بتاعتي بما فيها بطاقة الرقم القومي ورخص القيادة والسيارة.
يا ترى ايه هي اجراءات استخراج بدل فاقد من الاتنين، وهل هي اجراءات ميسرة وهاقدر اخدها في نفس اليوم ولا ايه النظام؟
وهل هاينفع اعمل الطلبات دي وانا مش معايا بطاقة الرقم القومي بتاعتي؟

جزاكم الله خيراً مقدماً

**بحري** · 12-10-2009 12:15 AM

قدر الله وما شاء فعل، ربنا يخلف عليك بالخير
لازم الأول حضرتك تعمل محضر وبعد كده
تعمل بدل فاقد للرقم القومي
وبعد كده الرخصتين
الرخصتين بيطلعوا في نفس اليوم لو لحقت تتنقل من الشباك ده لده لده قبل اليوم ما يخلص
الرقم القومي أظن بتاخد وقت شوية بس ما أظنش زيادة عن أسبوع، هنا في إسكندرية كده، مش عارف القاهرة إيه النظام
وأعرف إن في المركز الرئيسي في العباسية ممكن تطلعها في نفس اليوم بتكاليف أزيد شوية تقريبا بتتعمل بـ ٧٥ جنيه
بالتوفيق

**MoToRiZeR** · 12-10-2009 04:00 AM

انا حصلي نفس الموقف يا علي و كان لازم أطلع الرقم القومي الأول و قالولي هياخد من 10 ل 14 يوم .. بعد كدة الرخص .

بس الحمد لله الحرامي كان لف الكارنيهات كلها في ورقة و رماها في الشارع و واحد لقاها و وداها النادي اما شاف الكارنيه بتاعه و كلموني جيت خدتها .. معظم الحرامية بيعملوا كدة أصله هيعمل إيه بالكارنيهات و الرخص .. فا بيرميها .. لنأمل إن ده يحصل .

**ows212** · 12-10-2009 04:30 AM

ربنا ييسرلك يا على وتخلص الموضوع ده بسرعة

**Dr_Smart** · 12-10-2009 05:06 AM

قدر الله وماشاء فعل

بس يا ريت حضرتك لو ماعملتش محضر انك تعمله بسرعه خوفا من ان البطاقه تقع في ايد حد وتحصل مشكله

**aliabutaleb** · 12-10-2009 08:05 AM

جزاكم الله خيراً جميعاً يا جماعة

انا أولاً بفضل الله لقيت الحاجة اللي ضايعة بعد بحث مُضني ولله الحمد

بس قبلها كنت سالت حد بيشتغل في المرور وأفاد بنفس اللي اتفضل بذكره الأخ الفاضل الأستاذ/ بحري

لازم الأول حضرتك تعمل محضر وبعد كده
تعمل بدل فاقد للرقم القومي
وبعد كده الرخصتين
الرخصتين بيطلعوا في نفس اليوم لو لحقت تتنقل من الشباك ده لده لده قبل اليوم ما يخلص
الرقم القومي أظن بتاخد وقت شوية بس ما أظنش زيادة عن أسبوع، هنا في إسكندرية كده، مش عارف القاهرة إيه النظام
وأعرف إن في المركز الرئيسي في العباسية ممكن تطلعها في نفس اليوم بتكاليف أزيد شوية تقريبا بتتعمل بـ ٧٥ جنيه
بالتوفيق

بس المشكلة لازم أسافر إسكندرية ولازم أعمل مذكرتين فقد لكل واحدة من الرخصتين، مش الاتنين في مذكرة واحدة.
وبالنسبة لي هاضطر أروح مرور محرم بك في اسكندرية بالرغم من إني تابع لمرور المنتزة طوسون في أبو قير.
وفي محرم بك هاخد تأشيرة عليهم إن الرخصتين لم تردا إليهم هناك ولم يتم سحبهم.
بعد كدة لاااااازم أستنى أسبوع كامل قبل ما آخد المذكرتين بالتأشيرة اللي عليهم وأروح لمرور طوسون عشان يطلعوا.
وهما فعلاً يطلعوا في نفس اليوم بس زي ما قال الأستاذ بحري لو الواحد لحق يخلص في الشباكين في نفس الوقت.
بالنسبة بقى لبطاقة الرقم القومي، أنا كنت باحاول أعدل بيانات الحالة الاجتماعية فيها من السجل المدني في 6 أكتوبر هنا وأفادوا إن مينفعش يتعاملوا غير مع سكان المحافظة فقط.
عشان كدة برضة الرقم القومي كانت هاتبقى معاناة في الاحتياج لمشوارين لإسكندرية.

الحمد لله رب العالمين هو أغناني عن وجع الدماغ ده كله بإنه وفقني لإني ألاقي الحاجات اللي ضايعة.

يارب كل واحد مننا يخللي باله من اوراقه حتى لا يضطر لتجرع كأس الذل زي ما بيقولوا في مصالحنا الحكومية الجميلة.

**أحمد كمال** · 12-10-2009 01:08 PM

معاك باسبور؟ ممكن بالباسبور تطلع بدل فافد الرخص على ما تطلع بدل فاقد البطاقة

على فكرة اول امبارح محفظة صغير باشيل فيها مفتاح العربية + الرخصتين ضاعت مني في كارفور (بس كان المفتاح في العربية) و طلع عيني على ما لقيتها و كنت مرعوب من الكابوس الحكومي ده

الحمد لله !

**بحري** · 12-10-2009 04:03 PM

الحمد لله بشرك الله بالخير يا أستاذ أبوحمزة وربنا ييسرلك أمرك
وفعلا كل رخصة لازم يتعمل لها مذكرة لوحدها

المشاركة الأصلية كتبت بواسطة motorizer

بس الحمد لله الحرامي كان لف الكارنيهات كلها في ورقة و رماها في الشارع و واحد لقاها و وداها النادي اما شاف الكارنيه بتاعه و كلموني جيت خدتها .. معظم الحرامية بيعملوا كدة أصله هيعمل إيه بالكارنيهات و الرخص .. فا بيرميها .. لنأمل إن ده يحصل .

أنا حصل معايا نفس الموقف بس الحرامي رمى المحفظة كلها باستثناء الفلوس وواحد ابن حلال جابلي المحفظة وفيها الكارنيهات كلها لغاية البيت بعدما كنت عملت المحاضر وابتديت في طريق الآلام
وعلى فكرة الحركة دي تعكس رقة قلب وإنسانية مبالغ فيها من إخوانا الحرامية..

**aliabutaleb** · 12-10-2009 04:10 PM

المشاركة الأصلية كتبت بواسطة ba7ary

الحمد لله بشرك الله بالخير يا أستاذ أبوحمزة وربنا ييسرلك أمرك
وفعلا كل رخصة لازم يتعمل لها مذكرة لوحدها

وإياك يا أستاذ بحري
ربنا يكرمك يارب ويجزيك خير على الإفادة

-

الموضوع: بدل فاقد لرخصة القيادة ورخصة السيارة

LinkBack

أدوات الموضوع

عرض

بدل فاقد لرخصة القيادة ورخصة السيارة - انشر الموضوع فى :

-

-

-

-

-

-

-

المواضيع المتشابهه

فى حالة بدل فاقد رخصة القيادة هل لابد من شهادة نظر و باطنة؟

مشكلة وقعت فبها لرخصة القيادة

عندي تجديد لرخصة القيادة

سؤال بالنسبة لرخصة السيارة

ازاى اطلع بدل فاقد لرخصة العربية

الكلمات الدلالية لهذا الموضوع

المفضلات

المفضلات

ضوابط المشاركة