بركاتك يا غبور و قطة فوق الموتور

**gbeshay** · 12-10-2009 01:31 PM

متستغربوش ده بجد كان بقالي ٤ أيام راكن النيو اكسنت ال ٢٠١٠ تحت البيت و جيت امبارح هطلع بيها بقي بعد شوقه بقالي اربع ايام سائق ال ١٢٨ علشان كان فيه مشاوير كتير اليومين دول المهم قولت افتح الكبوت اشوف السوائل عمله ايه لقيت ايه بقي؟؟ قطه مش كبيره قوي و برضو مش صغيره حلوه كده قد ٢٢ سنه نائمه في سلام تام فوق الموتور و اول ما شافيتني قليتلي نوو نوو يعني متصحنيش دلوقتي ده بلغه القطط طبعا والمصيبه بقي انها نزلت بكل سهوله تاني من تحت الموتور هي الدنيا سايبه قوي كده من تحت الموتور ؟؟؟؟ لقيت فعلا الدنيا مفتوحه خالص من تحت ده طبيعي ؟
يعني غبور مش هاين عليه يقفلها شويه و لا ده زي زمته الي علاطول مخرومه؟؟

المهم قلت معلش اديني كسبت في القطه ثواب و باتيت جو العربيه بدل بهدلت الشوارع
قلت اركب بقي العربيه و بدور و اشغل الكاسيت الاقي مفيش صوت خالص طالع منه
الكاسيت شغال تمام و تراكات و راديو و فلاشه بس مفيش صوت خالص

قعدت اكلم غبور بيه محدش بيرود من الارقام المختصره خالص كان الي شارين منهم دول ملهمش لازمه في الحياه
المهم لقيت فواتير الصيانه بتاعت الالف فيها نمره الارضي بتاع ابو رواش اتصلت بيهم قالولي هتلينا العربيه
اقوله يا عم انا لسه فضلي ١٢٠٠ كيلو علي الصيانه اجيلك من مصر الجديده لحد ابو رواش علشان الكاسيت؟ يقولي ملهاش حل طب يا عم قولي اي حاجه اجربها انا يقولي لا مفيش لازم تجيبهلنا قولتيلو طيب اولاد عشم الي في شارع دمشق دول اروحلوهم قالي بقي حاجه غريبه
قالي دول للموديلات القديمه بس هل ده صح
انا مقدرش استغني عن الكاسين خالص انتو عارفين احنا بنقضي الوقت كله واقفين علي اكتوبر و الاشارات لازم اشغل الكاسيت لو حد عنده حل يقولي لو سمحت انا حاسيس بالوحده جوه العربيه من غير الكاسيت و هتجنين انه مره واحده كده يفصل انا اخير مره كان شغال عادي جداً و قفلتو عادي برضو و العربيه متغطيه طول الاربع ايام الركنه دول و تحت عيني في البيت يعني محدش فتح ولا قطع سلك ولا نيله انا مش فاهم بجد

ممكن حد يكون عنده حل للموضوع ده؟؟؟؟

**Hosam_Optrawy** · 12-10-2009 01:50 PM

جامد موضوع القطه دا :)

بس الموضوع دا غبور مالوش ذنب فيه

لان العربيه تقفيل كورى

اللى ليه فيه ذنب هو الكاسيت والانذار اللى بيركبهم هنا

بجد حاجه مستفزه وربنا يكون فى عونك

ونصيحه ماتحاولش تصلحه برا عشان ميتلككوش ويقولولك خرجت برا الضمان

**gbeshay** · 12-10-2009 02:39 PM

يا استاذ ظاظا مش دي المشكله لان اول ما هيبتدي يدور هي هتنزل لوحدها بس تصور فعلا مشكله بجد يعني لما نزلت عندي نزلت من نحيه الدينامو يعني سير وكده مش عارف بقي ربنا يستر

ويا استاذ حسام المشكله مش من كوريا هو لو كان قلهم يعملو حتي شبك من تحت كانوا عمله مهو زي ما بيشيل اوبشنز بالهبل من العربيه الاصليه كان زود دي يعني ماهو بيشيل اير باجز و ايه بي اس علشان يرخص السعر كان يزود دي الناس دي مش بتيشتغل بمزجها هي بتشوف الزبون عايز ايه و بتعمله الي هو عايزه

**basemzaki** · 12-10-2009 02:44 PM

موضوع ان عشم دا للموديلات القديمة فقط، دا صحيح

**gbeshay** · 12-10-2009 03:12 PM

basemzaki:
موضوع ان عشم دا للموديلات القديمة فقط، دا صحيح

يعني لو رحتلو فعلا مش هيعرف يعملو ولا اشوف يمكن تطلع مشكله بسيطه؟

طيب لو اضطر انه يفك العربيه تطلع من الضمان ولا الكاسيت بس ولا ايه انا بجد مش عارف

**gbeshay** · 12-10-2009 06:23 PM

يا جماعه بجد محدش يعرف حاجه عن موضوع الكاسيت ده ؟

**SAMER_ENGINES** · 12-10-2009 08:13 PM

مجرد رأي شخصي بلاش لعب في العربية برة الضمان لأني الناس دي بتتلكك زي بتوع hp لأني شاري منهم برينتر و كنت بتصل بالصيانة و أول ما البنت اللي ردت عليا في الصيانة سمعت كلمة أني حطيت حبر من برة hp زي ما تكون صدقت ما لقت و قالت لي كدة الطابعة دي خرجت برة الضمان أحنا آسفين مش حنقدر نعمل حاجة.
و طبعا في فرق بين العربية و البرينتر بس فعلا التوكيلات دي بتتلكك و بيستغل أي حاجة عشان يطلعك برة الضمان و عامة اللي أعرفه و علي حد علمي أني عشم ده أو أي حد تاني لو وكيل معتمد يبقي مفيش مشكلة لكن لو واحد بتاع هيونداي و بس ممكن يعمل مشكلة.
و ده طبعا مجرد رأي شخصي و أنتظر رأي بقية الزملاء.