غيرت فرش السقف

**asbeats** · 12-10-2009 05:31 PM

بسم الله

كان عندي في السقف جزء صغير من الفرش اتفك فوق راسي بالظبط...ومع الوقت خلال كام شهر بدأ ينتشر في السقف كله...لغاية ما بقت القماشة اللي مبطنة السقف مدلدلة من المنتصف وشكلها مقرف ومبهدل جدا...

طبعا انا فضلت برضه مكبر دماغي وعامل نفسي مش واخد بالي منها خاصة انها مكنتش بتعوق الرؤية على الإطلاق وكمان مكنتش بتخبط في راس اللي قاعدين في اي مكان في العربية

المهم جيت في يوم سألت على سروجي يكون كويس وفاهم عند العيلة في الشرقية...دلوني على واحد...رحتله...بص للسقف وقاللي تجيلي يوم من اوله عشان ننزل السقف ونلزقلك القماشة دي في مكانها...المهم انا حسيت انه مش فاهم قوي...مشيت و مرحتش عنده تاني...

عرفت بالصدفة البحتة واحد تاني اسمه عم احمد...في الشرقية برضه...اول ما شاف السقف...قاللي قماش السقف لازم يتغير كله...لأن فيه طبقه سفنج بين القماش والكرتون دي باظت ومينفعش نلزق من غيرها عشان الغراء هيبوظ منظر القماش لو اتحط عليه مباشرة...والقماشة دي بتيجي متبطنه بسفنج وهو اللي بتحط عليه اللزق...قلت وماله على بركة الله...اجيلك امتى يا عم احمد عشان العربية هتتعطل عندك...قاللي لو دلوقت لو حبيت...وايه الل هيعطلك,انا هفك السقف وحضرتك تتكل على الله تمشي وتيجيلي بعد يومين...انا هخلص شغل فيه النهارده...بس مش هركب السقف غير لما اللزق ينشف كويس...

قاللي انه هياخد 250 جنيه...قلت ماشي...بصراحة مفاصلتش معاه نهائي مش عارف ليه...وحتى ماحاولتش اسأل هو غالي ولا رخيص؟

هوب...نزلنا السقف وبصراحة منتهى الأمانة والدقة في الفك...مفيش ولا مسمار ضاع ولا حاجة اتجرحت...

بعد يومين رحتله...كان خلص شغل في السقف وحطلي قماش نظيف جدا متعرفش تفرقه عن الأصلي...حرص شديد جدا على انهم ميوسخوش حاجة وهما بيشتغلوا...القماش لونه فاتح ولازم ينضفوا كل حاجة يتحط عليها عشان يفضل نضيف...والصنايعي اللي عنده ممسكش القماش بايده خالص...يمسك من الفتحات والإجناب بس...

الحمد لله ركب السقف تاني...شغل في منتهى الإتقان والنظافة...

لما سألته ايه اللي خلى السقف يهبط...قاللي ان السقف كان بيتغسل بميه وده بيبوظ اللزق ومع الحركة والهوا اللي بيدخل من الشبابيك السقف بيهبط

قلتله طيب انظفه ازاي...قاللي حتت سفنج مبلولة بنزين خفيف اوي وتمسح بيها براحة هتلاقيه نضف

والله المستعان

**فادى محمد** · 12-10-2009 06:30 PM

ع البركه ان شاء الله

**فادى محمد** · 12-10-2009 06:56 PM

بص يا باشا .. السعر ده بالنسبالي لو عاوز اعمل اللي انت عملته غالي لانها شغله مصنعيات والخامات اللي بتتحط مش بفلوس . انما بدام الشغل طالع حلو وعاجبك يبقي رزق الراجل ده وحلال عليك

**AhmedBahgat** · 12-10-2009 08:04 PM

أنا عملت نفس الموضوع ده بالضبط في طنطا
رجع زي الأصلي بالضبط
اتكلف 220 جنيه

**N.a.j.d** · 12-10-2009 08:54 PM

مبروك يا باشا

**KSA2011** · 12-10-2009 08:58 PM

ربنا يبارك ليك يا باشا

**tamertamer** · 12-10-2009 09:18 PM

مبروك ياباشا على السقف
بص الحكاية دية انا عيشها دلوقتى
بص فى خمتين خامة مصرى المتر يساوى 30 جنية والثانى خامة تيوانى بيقولو عليها المانى بس هى مممتازة جدا المتر بيساوى 39 جنية
يعنى الخمات بتساوى ما بين 60 الى 80 جنية طيب كويس
وكمان هتحتاج 2 علبة لزق ب6 جنية او 10 جنية
بس كدة الباقى فك وحل وتظبيط على العموم انا قلى موقفنى مش عايز اعملة انى هجيبة استيراد 250 جنية واريح دماغى من يومين وكدة