ازيكم جميعا كنا عايزين نعرف كل واحد معاه جين 2 قبلها كان راكب ايه وايه الفرق بينها وبين الجين 2 وكانت احسن ولا الجين احسن ولو اول عربيه يركبها الجين 2انطباعه عنها ايه :S_thum1[1]:
عرض للطباعة
ازيكم جميعا كنا عايزين نعرف كل واحد معاه جين 2 قبلها كان راكب ايه وايه الفرق بينها وبين الجين 2 وكانت احسن ولا الجين احسن ولو اول عربيه يركبها الجين 2انطباعه عنها ايه :S_thum1[1]:
موضوع ممتاز...انا عاوز اسمع الاجابات
شكرا ياخالد وياريت كل الاعضاء تشارك
فعلا موضوع ممتاز...انا حاليا لانسر2007 وفى استقبال الجين2قريبا ان شاء الله:ask:
كان معايا فيات ريجاتا 1990 و كانت جميلة و لغاية دلوقتي لما بشوفها ماشية في الشارع بتوحشني
بس طبعا الجين احلى بكتيير
ايه ياجماعه مفيش حد معاه جين 2 ولا ايه
هيونداي اكسنت 99 - الفرق بينها و بين الجين ثبات و شكل و سرعة للجين طبعا و توفير و قطع غيار " عند بتاع الزبادي " للاكسنت
افيو 2008 مانيوال
لايوجد مقارنه
الا ان الافيو كانت بتاكل بنزين اقل لان الموتور صغير
تحياتي
يعني كل اللي معاهم الجين 2 3 فقط ولا محدش كان معاه عربيه قبلها ولا مفيش مقارنات ولا ايه ياوحوش مفيش مشاركات ليه عايزين نعرف الفرق بين العربيات
انا كان معايا قبلها شاهين وريتمو و128 ودايو لانوس (بتاعت الوالد) وكلهم قعدو معايا كتير
موضوع احسن واحدة دى مسألة نسبية يعنى تعتمد على انك محتاج ايه من العربية لكن ممكن نقول شوية فروقات بينهم
الشاهين
قطع غيار رخيصة ومتوفرة وكل الميكانيكية بيشتغلو فيها وجامده وبتستحمل البهدلة جامد
وفى المقابل تقيلة وناشفة ومفيش اوبشنز بالاضافة الى نقض عوامل الامان
128
برده قطع غيار رخيصة ومتوفرة بس الاعتمادية والامان والراحة والاوبشنز غير موجودين
الدايو لانوس
عربية كويسة ومحترمة وقطع غيارها اصبحت منتشرة ولكن مش معمرة برده فيها اوبشنز بس يادوبك ثباتها وجريها معقول بس مش للدرجة
انا معايا دلوقتى بردة تويوتا ياريس وده موضوع كنت كتبنه فى سؤال عن الفرق بينهم من وجهة نظرى
------------
العربيتين دول انا بحبهم جدا وبحمد ربنا انه وفقنى ليهم , وبصراحة الياريس كانت أختيار زوجتى والجين تو اختيارى انا...وعلى الرغم من انى مش أنا اللى أخترت الياريس لكنى بعد ماسوقتها غيرت رأى نهائى فيها ومن غير ماطول عليك ..الجين تو تختلف عن الياريس بالكامل
الياريس سيارة مريحة وسهلة القيادة ومخصصة للمدينة بمعنى ان قيادتها ناعمة جدا وسهلة التحكم والمناورة على سرعات منخفضة ونصف قطر الدوران بتاعها صغير جدا يمكنك من الركن او الدوران فى الاماكن والشوارع الضيقة , واسعة من جوة وشنطتها واسعة برده
العفشة بتاعتها ناعمة جدا ومريحة
هى طبعا موفرة فى البنزين جدا وفى نفس الوقت الموتور ال 1300 مايضايقش فى حاجة فى السحب والمشى والتسارع بتاعها ممتاز
صوت موتورها ناعم جدا
أما الجين تو... طبعا موتور أقوى ةتسارع أعلى وخصوصا على السرعات العالية وطابعها رياضى أكتر وفى المقابل سحب بنزين أكتر ...تصميم الجين تو من وجهة نظرى أفضل ( الياريس مش وحشة) بس كشكل رياضى الجين تو أحلى ....بالنسبة للوسع من جوة...الياريس اوسع ....
الياريس لو محملها ركاب وشايل شنط ومولع التكييف ....سحبها بيقل ....الجين تو لا
شنطة الجين تو مش وحشة بس شنطة الياريس اوسع
بالنسبة لقطع الغيار ....هما الاتنين فى نفس المستوى تقريبا
التقفيل وجودة الخامات....الياريس أفضل
كانت الناس بتقول على ثبات الياريس بعد 100 بس انا شايفه عادى لغاية 140 ...هى خفيفة شوية ...لكن مش للدرجة..ولو شايل فيها ناس ....بتبقى عادى وثابتة...والموضوع ده على السرعات العالية وانا محستش بيه بصراحة...بس بالمقارنة بالجين تو .....الجين تو أكثر ثباتا وبتديك ثقة واحساس بالامان
أنا طولت عليك
الخلاصة ان الياريس سيارة عائلية تنفع للمدينة أكتر موفرة فى البنزين ومريحة ...الجين تو سيارة رياضية أقوى واكثر ثباتا لو انت بتحب الجرى والسرعات..وأعتقد هما قريبين من بعض من ناحية السعر وقطع الغيار
ونسيت حاجة كمان
الاوبشنز فى الجين تو تتفوق بمراحل...MP3 ABS EBD Parcking Sensors والصاج انشف كتير
الباور فى الياريس أنعم كتير
موضوع التابلوه اللى فى النص فى ناس مش بتستريح فيه....انا كنت منهم...بس أخدت عليه وحاسس انه عادى وظريف
التكييف تقريبا زى بعض....فى الياريس صوته اوطى
توكيل الياريس أفضل من الجين تو
الياريس عاملة معايا 30000 كم أما الجين تو 9000 كم.....بالتأكيد انا ثقتى فى الياريس أكبر بحكم المعرفة والخبرة والوقت ....ان شاء الله الجين تو برده تبقى كويسة مع مرور والوقت واثق فيها
نيجى للسؤال
بصراحة لما باجى مسافر العائلة بترتاح فى الياريس لانها اوسع وشنطتها أكبر بس انا لو لوحدى بفضل الجين تو
معذرة لعدم الترتيب ....وارجو انى اكون أفدتك
----------------
كل العربييات دى لما كانت معايا كنت معجب بيهم جدا وراضى تمام الرضا ، فرحان بمميزاتهم ومتكيف مع عيوبهم
أما بالنسبة للجين 2 فأنا بعتبرها مغامرة عاطفية ، لأن معظم ملاكها بيحبوها جدا بطريقة غريبة وده بيخليها خارج المنافسة مع اى عربية تانية حتى لو اغلى منها بكتير ، يمكن شكلها احلى من كل العربيات اللى فاتت ، او فيها اوبشنز اكتر بكتير أو بتجرى احلى ، او ثابتة اكتر، ممكن تصميمها مختلف من برة ومن جوة، هى تركيبة غريبة بيقع كتير من الناس فى غرامها والبعض مبيقدرش يقاوم ولازم يشتريها.........وانا منهم