سيارات المعاقين وحكايتي معاها وسيارتي الـ BMW 1997

**GalaxyMan** · 11-11-2007 06:15 PM

انا خرجت من جمرك بورسعيد يوم 24/10/2007 العربية بتاعتي بعد ما طلع عيني

مواصفات العربية
أي بي اس
أير باج
فتحة سقف
باور
تكييف تاتش
ماشية 130 ألف
اسبويلر على الشنطة
شاكمان ديفل
حالة الموتور كأنة لسة راكب في العربية الصبح :)

الثمن هيقف بعد الأسترداد بحوالي 105 ألف جنية

القصة جت بعد ما سمعت عن حوار المعوقين بس إلي بيتحكي حاجة والواقع حاجة

انا دورت في اسكندرية في المنطقة الحرة وشوفت كذا عربية بس مكنش في موديل 97 كان أخرة 95

ودورت في بورسعيد لقيت عربيتين موديل 97 بس الحالة مش أوي والسعر حوالي 85 ألف

بالنسبة للموديل 97 لأن دا أخر موديل نزل المفروض فيه الموتور 1600 زي ما أتقالي

لكن أنا روحت في بورسعيد عن تاجر بعد ما اشتريت عربيتي خلاص ولقيت عندة موديل 98 أوتوماتك كاملة وعاملة 105 زي ما قالي والحالة قريبة من حالة عربيتي

أما عربيتي بقى فأنا جبتها من سوق الأردن مش من مصر على اساس ارخص
بس للأسف تكلفة إلي جابهالي من الأردن لمصر اتكلفت حوالي 8000 العربية(أصل أنا وأخويا جبنا عربيتين bmw)

أما موضوع المعاقين فكالتالي
انت بتتفق على العربية في السوق الحرة وبعدين تبقى كدة اشتريت العربية

التكاليف بقى كالتالي

1- ثمن السيارة ودا بتتفق علية في السوق الحرة
2- فلوس المعوق وهوبياخد في اسكندرية 5000
3- السمسار إلي بيجيب المعوق وبياخد 500 : 1000
4- مصاريف فك الحظر 12000

دي أجمالي المصاريف
وانا حاليا فاضلي الخطوة الأخيرة وهي فك الحظر وفي انتظار الورق يوصل اسكندرية

لو في أي استفسار أنا في الخدمة

أيمن

**Some_One99** · 11-11-2007 06:31 PM

بصراحة الكلام ده مش اخلاقي لو حضرتك مش معوق
ده تحايل

**Adham** · 11-11-2007 06:54 PM

و حضرتك مش بتدفع في المرور علشان ورقك يمشي؟

ومش بتدفع لمهندس الفحص 10 جنية و إلا حايطلعلك القطط الفطسا في عربيتك و يتلكك لك علشان ياخد البريزة التانية يا اما مانتاش مرخص؟

و مش بتدفع لعسكري المرور جوز جنيهات و انت راكن صف تاني علشان ما ياخدكش مخالفة؟؟

و مش بتدفع اكرامية في اي إجراء في اي مصلحه حكومية علشان ورقك يمشي و إلا مافيش حاجة حاتمشي؟؟؟

ولو انت تاجر مش لازم تهادي و تراضي و إلا حايخرب بيتك من التقديرات الجزافية للضرايب و غيرها؟؟

و لو انت مستورد مش حاترش في الجمارك علشان ماتلاقيش الكونينر اترفض و قالولك إعاده تصدير؟؟ او يتقدر علية جمارك بأرقام فلكية؟؟

و غيرة و غيرة و غيرة ......

و هل دة مش تحايل

هي دي مصر يا عبلة

**Some_One99** · 11-11-2007 07:09 PM

لو فضلنا نقول كده مافيش حاجة حتتصلح وحنفضل نتنقل من سئ لاسوأ

**Adham** · 11-11-2007 07:12 PM

هههههههههههههه و هوة مش دة اللي حاصل من 30 سنة للنهاردة !!!!

**Some_One99** · 11-11-2007 07:18 PM

وبعدين؟
تفتكر حضرتك اننا نستسلم وننتظر لما نبقي اسوأ دولة في العالم؟
نبتدي وربنا يسهل

**Adham** · 11-11-2007 07:24 PM

المشاركة الأصلية كتبت بواسطة Some_One99

وبعدين؟
نستسلم وننتظر لما نبقي اسوأ دولة في العالم؟

وهو احنا لسة مابقيناش اسوأ دولة في العالم :D

عالعموم لو لسة يبقى قربنا قوي نوصل للمرتبة دي عن قريب ياباشا :D

**gade2** · 11-11-2007 08:01 PM

مفيش داعى للكلام ده

**Dr Ahmed** · 11-11-2007 08:12 PM

إللى يقبلها لا يمكن يقتنع بالعكس وهيلاقى 1000 مبرر، ولا أظن أن المقاييس اللى حضرتك ذكرتها تصلح قواعد للتعامل ، وعمر ما كان الغلط يبرر الغلط...

(وإن تطع أكثر من فى الأرض يضلوك)
وما حدش هيتحاسب مكان التانى يوم القيامة

**ahmed1981** · 11-11-2007 08:15 PM

ألف شكر يا أستاذ جلاكسي على توضيحك المفيد

وأنا أعرف واحد برضه ماشي في إجراءات عربيتين ليه ولوالدته

وبالنسبة للأخ اللي بيقول إنه ده تحايل أحب أقوله الحكومة حاطة القانون ده عشان التحايل وطبعاً هو مصدر دخل لإخوانا المعاقين بديل عن إهمال الحكومة لهم
المعاق من حقه يشتري ويبيع ولو المعاق هيستثمر الموضوع ده إيه يمنعه طالما الحكومة سامحاله ؟؟ ؟؟ ؟ ؟؟ ؟
بل قد يرى البعض أن شراءه لسيارة عن طريق المعاق ودفع مبلغ متفق عليه للمعاق هو أحد الأساليب لمساعدة المعاق

وهذه وجهة نظر موجودة وجديرة
وأيضا وجهة النظر الأخرى التي تكره هذا الأمر لها إحترامها
وإن كنت عن نفسي لا أحب موضوع سيارات المعاقين وأتورع من التعامل فيه