بسم الله يا اخوانا .... روحت ركبت العربية امبارح في مشوار من الحلمية-زهراء ابو غزالة- لحد اخر جسر السويس كدة في جمال عبد الناصر عند الحرفيين ..... و العربية كالاتي :-
اداء الموتور
انا ماعدتش rpm3 و العربية سحبها رائع و مش محتاج اضغط علي البنزين حتي مع early shift كانت بتجمع كويس جدا ... و جابت ال100 علي الرابع قبل ما المؤشر يجيب 3 علي rpm....وانا رايح مشغلتش تكييف .... بس وانا راجع شغلته.... و ولا كانه اشتغل ... التكييف مابيأسرش علي الموتور تقريبا خالص... انا فاكر الكيا الاسبكترا كانت بتتقل مع التكييف كأنك محمل انما دي والله ماحسيييت بيه علي الموتور خالص مع مراعاه ان انا برضو معدتش 3 rpm
العفشة يا معلم .... و سمعني الكلام بقي
العربة في وصفها سهل ممتنع .... هيه مش ناشفي بس برضه مش طريه .... يعني شارع جمال عبد الناصر للي مايعرفوش مدغدغ زي ما الكتاب بيقول و العربية كانت بتهاند المطباط و الحفر زي الفل ... في الشوارع المسفلتة مش هاتحس بأي كسور صغيرة لأن مقاس الكاوتش ماشاء الله مع العفشة الماكفرسون مظبطين الاداء 10 علي 10 .... وانا في طريق السندباد و الشارع فاضي عملت كأني باخد غرزة علي 100 -110 و العربية ماشاء الله عادي خالص ولا كانك بتركن ....
الحاجة الوحيدة اللي حسيت بيها طول الطريق الملف اللي تحت كوبري طريق الاسماعلية و انت رايح من طريق القاهرة لطريق الاسماعلية ... الملف دة الاسفلت فيه عامل عقد في الارض من المياه و التريلات اللي بتاخد الملف .... كنت ايام ال 128 لو دخلته اسمع صوت المارش بيخبط في مكانه انما امبارح حسيت بس كدة برجة في الملف دة علشان كدة بقول انها مش طريه اخر حاجة يعني بس بصراحة اللي عمل العفشة عايز سقفة جامدة ....
العزل ....
لراغبي الهدوء لا تنازل عن العربية دي ... لما قفلت الازاز بقيت بسمع الكلاكسات بالعافية والله .... عدت من جنبي فيزبا بسوط شكمانها المميز و برضه مسمعتلهاش صوت .. مع مراعاه عدم تشغيل التكيف للحكم علي قوة العزل .... و علي فكرة ده بيخلي العربية تتلج في ثواني ... مستحملتش 3 دقائق تكييف اساسا و فتحت الازاز تاني و رجعت للأرض
اخر حاجة بقي .....العين يا اخوانا
كل واحد يقرا المعوذتين في باله علشان امبارح انا راكب و بادئ المشوار زي الفل بس في وسط المشوار لقيت خربوش في المرايه الشمال .... و الحمد لله انها علي قد كدة ...خربوش كان واحد جاب مسطره و في جنب المراية البراني علي الازازه مشي بسن مسمار ... حاولت انشف عليها ماتكسرتش بس الخربوش شكله رخم .... بس برضه الحمد لله
تم دمج المشاركات الخمس الأولى
مشرف عام.4
المفضلات