الموضوع: افكار لرفع سوق السيارة الفورد و التحكم باسعارها

حلنى وفيييين وفييييييييييييييين لما تلاقى العربية نزل فيها نظام الثبات الإلكترونى ده ، العربيات اللى أمريكا أغلبها فيه النظام ده وغيره كمان الإيرباج الكتير ، ستة إيرباج وتخيل فى ماركة إيه تخيل كده ( هيونداى إلنتراً ) تخيل إن العربية دى فى أمريكا فيها esp وفيها ستة إيرباج .

وهى هنا فيها abs بالعافية وفى أعلى فئة كمان

علشان تعرف إن المستورد هنا لا يهمه شئ سوى الربح ثم الربح ثم الربح ثم الربح ثم الربح

يبقى لازم يكون فيه مواصفات قياسية للسيارات اللى بتدخل مصر واللى بتتجمع فيها كمان علشان العربية يبقى فيها على الأقل abs وأربعة إيرباج ، مش إيرباج واحد فقط للسائق

وشكراً

وأنا عندى اقتراح عاوز أقوله هنا فى المنتدى ولو فيه حاجة غلط ابقوا صلحوه

بما إن سعر الإيرباج غالى ، ليه ميكونش فى جمعيات أو منظمة أهلية تلم فلوس وتبرعات لدعم أجهزة السلامة وبذات

الاكياس الهوائية اللى هو الإيرباج والعربيات كلها تنزل فيها 4 إيرباج على الأقل .

أو فيه فكرة تانية أحسن من الأولانية

ليه ميبقاش عندنا هنا مصر عدة شركات بتنتج أجهزة الإيرباج ويكون صناعة محلية 100% بكده سعره يكون رخيص جداً

وفى نفس الوقت لو حصل إن الإيرباج اشتغل متقباش صيانته غالية وخاصة إنى قريت أرقام خيالية بسبب الإيرباج

أنا عارف إنها فكرة صعبة قوى

لكن هى حل كويس

قطع الغيار موش غاليه لانها اصليه والحمد لله انك لما تنزل تشترى اى قطعه غيارلاى عربيه فورد امامك خياران اما ديده او استيراد وفى كلتا الحالتين قطعه الغيار اصليه يعنى موش صينى ولا كورى ولا تايوان
وانا اعتبرها ميزه كبيره اوى ان مفيش قطع غيار تقليد - لانك بتغير قطعه الغيار وتنساها
وعلى النقيض الاخر تلاقى مثلا اسعار متفاوته لقطع الغيار لسيارت التانيه وهتلاقى معظم قطع الغيار دى بتتوزع تحت السلم

ولازم ننتبه لشىء مهم ان اسعار قطع الغيار قل سعرها عن الاول فى ظل فكرى جروب
مع ان برضه المستفيد الاكبر من سيارت فورد التوكيل فكرى جروب وهو لازم يهتم شويه اكتر ويزداد حماسه لفتح مراكز صيانه عديده
هو لما بدء فى الاول كان حماسه كبير انما انا ملاحظ ان حماسه قل اوى
طولت عليكم معلش

اوكد شىء مهم ال بيركب الفورد ميعرفش يركب الدايو ولا الهونداى ولا المتسوبشى

انا كنت عايز اتكلم في جزء معين وهو ان سعر العربية اقل كتير من امكانياتها بيتهيئلي ان دا بسبب ملاك الفورد نفسهم يعني لو انا مثلا عندي فورد عارف طبعا ان سوقها مش عالي اروح طالب مبلغ قليل واهو اي مبلغ وخلاص المهم تتباع وهكذا غيري وغيري لكن لو كل واحد ادي لعربيته التمن اللي تستاهله يبقي علي الاقل نبقي احنا قدرنا عربياتنا صح