محمود سعد قال بلاش تدفعوا الخمسة جنيه بتاعة الزباله

**maged** · 15-10-2009 02:19 AM

[overline]اللى شاف مننا البيت بيتك سمع محمود سعد وهو بيقول كذا مره لازم محدش يدفع الخمسة جنيه يعنى ميدفعش ايصال النور خالص ويعمل محضر بكدا فى القسم عشان يثبت حقه طالما الزباله مش بتتشال من الشوارع ولا من البيوت
هنفضل لامتى كده سلبيين مهما يتعمل فينا انا مش عارف لو ممكن المواطنين كلهم يبقو متحدين على راى واحد ونقول للسرقه لأ كانت احوالنا تبقى افضل من كده
ممكن على مستوى المنتدى و قرايبنا وجيرانا نتفق على تغيير الوضع الغلط مش عارف ايه رأيكم [/overline]

**semsem_uno** · 15-10-2009 02:32 AM

انا اول واحد موافق و يا سلام لو محدش يدفع الكهرباء كلها اصلا اللي غليت فجأة ديه من غير اعلان و قال و يقولك اللي اوفر فيه انا اولي بيه
هو انتو خليتو فيها توفير
حسبي الله ونعم الوكيل فيهم و انا اولهم و ياريت الكل يتشجع بقييييييي علشان لو كلنا بجد محدش هيقدر يبفتح بقه انا بجد زهقت و غش و بقت حاجة تقرف
و ايه الضرايب العقارية ديه حتي الشقق كمان يا رب ريحنا و ياريت كلنا نتكلم في الكلااااام ده و الردود تبقي اكتر من المشاهدااااات

**semsem_uno** · 15-10-2009 03:01 AM

13 مشاهدة و ولا حد عبر مع ان موضوع فعلا مهم حاجة تحزن بجد للأسف :(

**maged** · 15-10-2009 03:09 AM

انا شاكر ليكم اهتمامكم بالموضوع وانا حاسس ان بعد وقت مش طويل الناس هتفوق وتصحى واكيد هتعمل حاجه مش بس موضوع الكهرباء لكن فى كل البلاوى اللى عايشينها

**enas75** · 15-10-2009 10:56 AM

والله بقالي اكتر من 3 شهور عايزه اعمل الحركه دي وفكرت اتفق مع سكان العماره علي اننا ندفع قيمه فاتوره الكهرباء بس من غير الزباله وارفق معها صوره للزباله اللي في الشارع ........بس بصراحه خفت ابقي عامله زي محمد صبحي في مسلسل سنبل ...لما راح ياخد حقه ومالقاش غير نفسه بس واقف في وش الظالم لوحده
وفي الاخر تفتري شركه الكهرباء عليا
بس لو اتفقنا فعلا كذا حد في كذا منطقه جايز يفرق مع الناس دي

**مؤمنة** · 15-10-2009 11:56 AM

بجد لو كلنا نتفق ونعمل الموضوع ده من الشهر الجاى هتبقى فعلا واقفه صح انا معاكم بس اعمل محضر ازاى واقول فيه ايه
و عدد الاعضاء فى نايل موتورز بسم الله ما شاء الله دا لو نايل موتورز بس قام بالحمله دى اكيد حيكون لها اثر كبير جدا على شركه الكهرباء واكيد حنقدر نغير حاجه سلبيه من ضمن سلبيات كتيره قوى مش عارفين نعمل فيها حاجه

**مؤمنة** · 15-10-2009 12:09 PM

يااااا سبعين مشاهده وخمس ردود بس راحت فين الناس ال بتحب مصر ونفسها تغير حاجه فيها
فين الناس ال مش عجباها مصر وكل ال بتعمله انها تشتم وتلعن فى البلد ال اتولدوا فيها وعيشين فيها ومش عايزين حتى يغيروا اى حاجه فيها
يا جماعه بجد لازم كلنا نقف يد واحده ضد الايتاوى ال مفروضه علينا ويا ريت بناخد فى المقابل اى حاجه
بناخد زباله فى كل حته بنروحها وامراض ملهاش اخر