أسئله بخصوص تعديل شاهين... معلش اعذروا جهلي

**a_shanawany** · 15-10-2009 03:20 AM

السلام عليكم ورحمه الله وبركاته

اعذروني بقه يا رجاله عشان انا مليش اي خبره في التعديل
انا معايا شاهين 96
عايز اعمل فيها خمس حاجات من اللي هتشوفوهم في الصور اللي جايه

ها، شفتوا الصور؟؟

أنا عايز اعمل الاكصدامين القدماني والخلفي
وعايز اكبر عتب الابواب زي اللي معمول دا
وعايز اعمل الجزء اللي اللي مغير شكل الفوانيس بالشبكه
واخر حاجه الحتت اللي على الكبوت دي "وياريت تعرفوني اسمها ايه"

افيدوني بقه
الاول الكلام دا يتعمل فين؟

وبالنسبه للاكصدامات
اعملها فاير جلاس ولا فاير كاربون
انا سمعت ان الفاير كاربون أغلى
الاكصدامين دول كل واحد يعمله كام لو فايبر كاربون ولو فايبر جلاس -تقريبا يعني-؟
طيب لو ينفع تتعمل فايبر جلاس، هل الفايبر جلاس بيترش علشان يبقى زي لون العربيه؟
طيب والفوانيس اللي متركبه في الاكصدام اللي في الصو، فوانيس إيه؟

بالنسبه للشبكه والعتب، برضه فايبر جلاس ولا كاربون والتكلفه تقريبيه

آخر حاجه الكبوت
الحاجات اللي عليه تستلزم تنفيخ في الكبوت
ولا ممكن تتعمل فايبر جلاس وتتركب وتترش
ياريت كله بالاسعار التقريبيه بعد اذنكم

معلش عارف اني تقلت عليكو
بس متتأخروش عليا

السلام عليكم ورحمه الله وبركاته

**magyver** · 15-10-2009 04:23 AM

منور ياشنوااني
لو عايز تعمل عربيتك زي دة انزل الحرفيين وخد الصور دة معاااك
وهما يملوهاالك بالظبط
انما الاسعار بقي ماقدرشي افييدك

**a_shanawany** · 15-10-2009 04:33 AM

دا نورك ربنا يخليك
طيب على الاقل لو محدش عنده اسعار الناس تقوللي ايه اللي بيتعمل في الحاله دي
فايبر جلاس ولا كاربون ولا ايه بالظبط

**a_shanawany** · 15-10-2009 04:38 AM

وكمان موضوع الدهان
هل الفايبر جلاس ممكن يتدهن بلون العربيه
العربيه دلوقتي لونها اسود
بس انا عايز اغيره مع التعديلات دي
عايز اعمله الدرجه اللي على الدودج دي

وهيكون طبعا ميتاليك
فهل هينفع إني ادهن الاكصدام؟

**HRH_Sameh** · 15-10-2009 11:41 AM

بص انا مش هافيدك في الاسعار
بس هديك افكار جامدة جدا
ادخل ع الموضوع اللي توقيعي بتاع (( شاهين متعدلة ))
واتفرج عليه صفحة صفحة لآخره
وقولي وصلت لايه؟ :)

**a_shanawany** · 15-10-2009 01:18 PM

طيب مش مهم الاسعار قد ما مهم تجاوبوني على النقط الفنيه اللي في الموضوع

**kasten** · 15-10-2009 02:21 PM

ياباشا ايوا الفايبر جلاس بيترش بلون العربيه
واللى فى الصور ده كله فايبر جلاس حتى بالرمش اللى على الكشاف للى قدام
السعر بيختلف من واحد للتانى وحسب النضافه طبعا
لان الناس دى هتفصل الكلام اللى فى الصور ده وهتختلف مصنعية كل واحد عن التانى
انت تاخد الصور وتنزل الحرفيين وشوف بتوع الفايبر جلاس اللى هناك وريهم الصور وقول ليهم انا عايز اعمل عربيتى زى اللى فى الصور بالظبط تتكلف كام
وربنا يوفقك
وبأكدلك ان الفايبر بيترش بلون العربيه اى لون وبتحس انه نازل مع العربيه عادى

**a_shanawany** · 15-10-2009 02:57 PM

ايوه كدا
افادك الله، ربنا يكرمك
طيب اللي على الكبوت دا تنفيخ ولا فايبر؟

**Hossam.Hamdy** · 15-10-2009 04:42 PM

كله فايبر و اللى على الكبوت اجزاء فايبر....روح لبسام فى الحرفيين شغله نضيف و جامد جدا...
0105284741
شوف هيقولك ايه بس خد الصور

**a_shanawany** · 15-10-2009 08:36 PM

تمام قوي
هاخد النمره وهروح قريب جدا ان شاء الله
معلش تعتبك معايا يا باشا
ربنا يخليك

سؤال أخير بقه بخصوص الموتور
دلوقتي موتور العربيه 1300 سي سي
عايز اركب تكيف محترم
طبعا مع الموتور دا العربيه هتتخنق قوي
بالذات اني انا كل مشاويري سفر، يعني هشغله علطول
انا مش بشد جامد قوي، بس بشد شويه، وانا برضه مبحبش احس ان العربيه مبتجيبش
قدلوقتي ايه الحل
تربوا ولا تسقيط موتور؟
طيب لو تسقيط موتور
إيه المواتير الكويسه اللي شاسيه الشاهين يستحملها
وهل لو هسقط، هحتاج حاجات اضافيه معاه زي فلتر أو شدادات للشاسيه وكده؟ ولا هوا الموتور بس؟
ومتوسط الأسعار بقه بعد اذنكم