الموضوع: القوة الحصانية للسيارات و كيفية حسابها

السلام عليكم

مقدمة صغيرة
سبب أني فتحت الموضوع ده و هاتكلم عليه هو أن بعض الناس بتقول أن الياباني مثلا بيحسب القوة الحصانية كصافي خرج من عند العجل و بعض الناس تقولك لاءة الياباني بيحسب من عند الحدافة قبل التوصيل لألات الجر و الألمان هما اللي بيحسبوا من عند العجل .... و البعض الآخر يشكك في قدرة السيارات الكوري و يقولك أصلهم كذابين و بيحسبوا من عند الموتور او حتى ناس تقولك دول أصلا بيكدبوا في القوة الحصانية علشان يبيع .......


طبعا كل الكلام اللي فوق ده ...... عار تمام من الصحة

كل شركات العالم ............. كل شركات العالم بما فيها مرسيدس و بي أم دبليو أكبر شركتين في المانيا في السمعة

الجميع بيعلن عن قوة المحرك من عند الحدافة flying wheel

مفيش و لا شركة في العالم بتعلن عن حاجة أسمها قوة حصانية للسيارة
كل شركات العالم بتعلن عن قوة حصانية للمحرك و ليس للسيارة

تعالوا نتناقش في الموضوع بموضوعية

لو جربت عربيتين واحدة مانوال وواحدة أوتوماتيك من نفس الماركة و الموديل
هانلاقي أن المانوال سحبها أحسن بكتير و سرعته القصوى الرسمية المعلنة من الشركة الصانعة أكبر من السرعة القصوى للسيارة الآخرى الأخت و لكن بصندوق سرعات أوتوماتيك .
يعني مثلا نلاقي أن عربية سرعتها القصوى هي 190 كم للمانوال و لكن الأوتوماتيك 185 فقط لا غير
مع أن الرقم المعلن للقوة الحصانية و العزم واحد في الأثنين في الكتالوج
ده دليل على فقد العزم و الحصان مع أختلاف نوع من الات الجر و هو صندوق السرعات أو التروس .

تعالوا لدليل تاني :
السرعة من صفر لمائة
هانلاقي أن فيه فرق حوالي ثانية أو 2 ثانية بين سرعة وصول نفس العربية المانوال و الأوتوماتيك عند التسارع من صفر لمائة كم - س .



طيب ييجي واحد يقولك تعالى نجيب عربية 120 حصان مثلا و عربية تانية 100 حصان و نعمل تسارع لغاية 100 كم و نشوف أي واحدة هاتوصل قبل التانية ؟

أنا هارد عليه و أقوله لو الأثنين 1600 سي سي و الأثنين مانوال الفروق في قوة العربية مش هاتبان تحت 100 قوي
لما تتطلع من 100 و نثبت على غيار .......... الفرق هايبان و علشان كدا بنلاقي أن القوة الحصانية و الأرقام الخاصة بالتسارع من 0 إلى 100 ........... مش فرقها كبير في حالة المواتير اللي متساوية في حجم المحرك و قرب القوة الحصانية لأن فيه وقت ضايع في تغيير النقلات بالاضافة لعوامل تانية زي مقاس الكاوتش و أحتكاك العربية بالأرض و مقاومة الهوا و تصميم العربية نفسه و وزن العربية .


طيب ليه ممكن نلاقي فرق بين عربيتين بنفس القوة الحصانية
للأسباب الآتي ذكرها :
1 وزن العربية مهم جدا .
2 نوعية صندوق السرعات و كفاءة النقل و تقليل الفاقد في العزم .
3 تصميم السيارة نفسه و مدى أنسيابيتها لمقاومة الهوا المقابل .
4 نوعية الزيوت المستخدمة في السيارة و نوعية البنزين الصحيحة الموصى بها من الصانع .
5 كفاءة قائد السيارة أيضا لها عامل مهم .
6 حجم و مقاس الكاوتش اللي بيأثر على زيادة الأحتكاك في الأرض مما يقلل السحب والقوة الحصانية الخارجة للعجل .


يعني مثلا لو عندنا عربية 100 حصان
ووزنها 1200 كجم و عربية تانية بنفس القوة و لكن وزنها 1000 كجم فقط
طبعا و بدون أي شك هانلاقي أن العربية أم 1000 كجم ........... هاتسحب أحسن و بالبلدي هاتقطع العربية الأثقل وزنا في السحب .

زي الموتوسيكل بالظبط
موتوسيكل نلاقي مثلا 400 سي سي و 40 حصان مثلا
و لكن بيقطع عربيات 120 حصان
ليه ؟

علشان الوزن أقل بكتير .
مقاومة الهوا أقل بكتير .
الأحتكاك بالأرض أقل بكتير ( عجلتين بس و رفيعين مش عُراض كمان )


و الخلاصة أن كل شركات العالم بتعلن قوة محرك فقط لا غير و محدش بيعلن قوة سيارة من عند العجل .

و إلا كان الفتيس الأوتوماتيك له رقم ........ و المانوال له رقم على أساس أن فرق الهالك أعلى في الأوتوماتيك و تبان لو عايز تشد بعربيتين من نفس الماركة بفتيس مختلف و الغلبة هاتكون للمانوال طبعا ( في أي ماركة عربيات )


أي قوىة معلنة في أي كتالوج
تنقص منها من 5 إلى 15 % هالك الات جر ( ينطبق على كل الماركات بما فيهم مرسيدس و بي ام دبليو )
الهالك بيختلف حسب كفاءة تصميم الات الجر و صندوق السرعات .

مصادري :
بعض الحقائق تأكدت منها من الصانعين ( بي أم دبليو و مرسيدس و تويوتا و هوندا و بروتون ماليزيا و ميتسوبيشي )
و الأمثلة كلها أجتهادات شخصية و تحقيق شخصي من العبد لله وقراءة لبعض مواقع الأنترنت و مجلات ا لسيارت البريطانية )

اللي عايز يتأكد ....... يتفضل يتصل بأي شركة تعجبه من الموقع الرسمي لأي شركة و هما يأكدولك أي معلومة عايز تتأكد منها .

أتمنى أن الموضوع يعجبكم و يفيدكم
أخوكم توت عنخ أمون