الموضوع: نصيحة لوجه الله بلاش عند مع اى موتسيكل او فسبا

هو يعني الموتسيكل قد ايه
دا حاجة صغيرة وبيعدي من خرم ابرة
وبعدين اللي بيسوقه ده متمكن جدا ومش عيل فافي طبعا
دا غير انه ممكن شغال عليه دليفري وشقيان ومش امه اللي جايباهوله زي العربيات اللي احنا بنركبها


للأسف دا اللي بيدور في دماغ معظم طائفة مستخدمي الموتسيكل

برة مصر بسبب رخص العربيات اللي بيركب موتوسيكل بيكون غاويه وبيركبه نزاهة
انما في مصر غالبا اللي راكبه (إلا من رحم ربي) بيبقى جايبه من الموتسيكلات الصيني الرخيصة يعني لظروف اقتصادية، فلازم يثبت تفوق على ولاد التيت اللي بيركبوا عربيات غالية دول ويعرفهم مقامهم ويسبقهم طبعا

ربنا يهدي والف سلامة عليك

بص انا مش هقولك انت غلطان , بس للأسف فى ناس بتعند ( قصدى على بتاع الفسبه ) وقد يكون زى الاطفال مش عارف مصلحته فين

صدقنى هيجى عليه يوم وربنا هيعلمه الدرس بالطريقه القاسيه لكن انت علشان تطلع نفسك من متاهه انك تتسأل عنه فى الدنيا او الاخره حاول تهدى اعصابك وبلاش العند , لما تلاقى واحد زى ده جاى عايز يعدى خف رجلك من البنزين وخليه يعدى وخلاص لأن الفسبه والموتسيكل بالذات وقعتهم اقرب للموت من خبطه العربيه وانت اكيد وراك مسؤوليات ومش عايز تدخل نفسك فى حاجه زى كدا

وربنا يريحنا من الاشكال اللى ما يعلم بيها الا ربنا دى

طب دا موقف عند انا بقى حصل معايا موقف غريب الشكل
ماشى فى التحرير وهكسر يمين عشان اروح فى اتجاه كوبرى قصر النيل وقادم من ناحيه كوبرى أكتوبر المهم جيت بدخل يمين علشان أروح الكوبرى وانا باخد اليمين لمحت فى المرايا موتسيكل جاى طاير من يمينى وانا واخد
سرعتى المهم قررت أنى هروح شمال وخصوصا أنو كان يسمح
بصيت فى المرايا لقيتو مصرانو يدخل فيا من ورا فضلت أروح شمال لحد ما وصلت للرصيف اللى فى النص مفيش شمال تانى خلاص ودا بردو ورايا لحد ماخبط فى جنب الأكصدام من ورا ووقع اتكحول والمتوسيكل اتكحول راخر كان ممكن أمشى لأنى مليش فيه زى ما بيقولو
ولكن وقفت ونزلت وطبعا المصريين الجمال اتلمو وواحد لزيز لقيتو بيبصلى والكلمه الشهيره بتاعتهم هو انتو عشان معاكو
عربيات مسيبتوش يكمل الكلمه وقلتلو أنت تقفل بقك خالص ومتتكلمش قلبى جامد شويه مابتخدش فى المواقف اللى زى دى
المهم بقى بطمن على أخينه لقيتو بيقولى أيه
حرام عليك
خبطنى من ورى وحرام عليك
بصراحه خرجت عن شعورى وكنت هلوشه
واللى ذاد وغطى جاى مندوب يتفرد ويتنى ولسه هيتكلم ويقولى رخصك (طبعا انا كنت وصلت لقمه غضبى من التعليقات اللى عمال بسمعها وماسك نفسى )لسه هطلع كل اللى فيا على المندوب لقيت واحد طلع من وسط الناس وبيقول الراجل مغلطش انا واقف وشايف المنظر من بدرى عمال يفاديه وبتاع الموتسيكل هو اللى غبى لحد ما الراجل وصل للرصيف كان فاضل يطلع الرصيف ويعدى الناحيه التانيه عشان يفاديه طبعا سياده المندوب اتكتم غيظا كانت غنيمه وجياله خلاص مابقاش ينفع يعمل حاجه الراجل خلص كلامه قمت سايب الدنيا كلها وماشى من غير ما أقول أى كلمه لحد غير للراجل اللى شهد بالحصل قلتلو شكرا وسلامو عليكم بتوع الديلفرى دول عايزين الحرق فى ميدان عام الديلافرى بالذات ويوم محس ان فى حد بيعند معايا بفتح الأزاز وبقولهالو بصوت عالى ملكش ديه عندى وهشيلك على الكبوت

بأضم صوتي لصوتك........و بأقول.........و أعرض عن الجاهلين.....بس كده

أنا برضه زمان سنة 99 يمكن كان قريب ليا وجاري جاي من جدة بعربية كرولا 94 اجازة المهم خدتها منه و كنت رايح أجيب حاجات و مكنش معايا رخصة ساعتها و طلعت عالهرم و رايح العريش المهم عند التعاون كده الطريق كان واقف شوية (بس مش زي دلوقتي طبعا الله يرحم أيام التسعينات قبل ما اللانسر البومة تنزل والبلد تبئى زحمة) المهم موتسكل جاوا ده شرطه مستجدع نفسه و مقضيها غرز بين العربيات و هوه غشيم جدا و بيطلع مني في غرزة و انا واقف اصلا ففيه حديدة طالعة من المتوسكل تقريبا اللي بيحط عليها رجله بس كانت مش متغطيه كاوتش ولا حاجة المهم دخلت في الفبر بتاع الأكصدام عندي و خلعته و لقيت الواد بالموتسكل خالع الأكصدام من الناحية الشمال و واقع بالموتسكل عالأرض

طبعا اتمسكن لأنه كان فاكرني خليج ما العربية جمرك بئى و كنت مربي دقن خفيفة كده كمان و عمل انه خلاص هيموت ساعتها جه الأمن بتوع فندق بيراميزا باين ولا مش فاكر أسمه ايه اللي مقفول دلوقت على ناصية شارع التعاون و بمنتهى الأدب قالولي مش تاخد بالك و سألوا الواد حصلك حاجة فخاف من الظابط (مع انه الموتسكل شرطه) و قاله لا يا باشا فقالولي حصل خير (ولا حتى هات رخصك ما هي العربية جمرك بئى) و شبطت الأكصدام أي كلام كده لأنه اتخلع من عالشمال و اتخرم و مشيت روحت وخلاص و سويت الموضوع مع قريبي..........

و من ساعتها و انا بأبعد عن الموتسكلات و أدعي انهم يبعدوا عني لأن فيه منهم بيرموا بلاهم عليك و يتبلى عليك و معتبرينها سبوبة زي (نور الشريف كده في فيلم دم الغزال لما كان بيرمي نفسه قدام العربيات).......

ربنا يكفينا شرهم اللهم أمين و يسلم طريقنا و طريقكم.......