التكييف باظ رابع مره

**samhmakram** · 15-10-2009 04:52 PM

الاعزاء اعضاء المنتدى

انا عندى لانوس موديل 2000 - كل ما اصلح التكييف يبوظ - أول مره الراجل قالى الابره بايظه - فغيرها وشحن ب 300 جنيه - بعد 5 ايام عطل تانى - تانى مره رحت لواحد غيره - فك السربنتينه من عند التابلوه - وقالى اويل سيل الكويل بايظ - شحن التكييف وغير الاويل سيل واخد منى 350 جنيه - بعد الشحن ب 10 ايام التكييف عطل تانى - رحت لنفس الورشه - عمل ضغط لكل حاجه بالهواء - السربنينه والكمبيرسور - كل واحد لوحده فى حوض مليان مياه - قالى الاثنين مفيهمش حاجه - فقالى يبقى الاكسبندشن عطلان - وخلانى اشترى واحد استعمال خارج ب 200 جنيه وركبه وشحن فريون واخد منى 200 جنيه - مفيش 3 ايام ولقيت الفريون طار ثالث مره

صراحه مش عارف اعمل ايه - كرهت العربيه - كل يوم وانا نازل الصبح فى عز الحر - ابقى كاره العربيه - مش طايقها -

حد من الاعضاء الكرام يقولى اعمل ايه تانى - يا ريت المهندس ممدوح يفيدنى
اروح لمين - علشان يصلحه وما يبعطلش تانى
انا صراحه بفكر ابيعها بسبب التكييف
انا احيانا بأركب مواصلات واركنها من سخونه العربيه - طبعا لانها سودا

افيدونى او انقذونكى بمعنى اصح - افادكم الله و شكرا

**samirayad** · 16-10-2009 10:35 AM

عمل ضغط لكل حاجه بالهواء - السربنينه والكمبيرسور - كل واحد لوحده فى حوض مليان مياه - قالى الاثنين مفيهمش حاجه

بنسبه كبيره العيب عندك
فى أويل سيل الكمبروسور اللى وراء الكلاتش
بيهرب فريون لما بتشغل التكييف
وكل اللى أتعمل كان نظام خرط
والكمبروسور ليه طريقة أختبار تانيه غير كده فى الكتالوج
علشان نشوفه بيهرب من حوالين الأويل سيل ولا لا مع تعشيق الكمبروسور
وأسمه أختبار فاكيوم على ما أتذكر من أطلاعى السابق

**samirayad** · 16-10-2009 10:48 AM

ده أختبار الكمبروسور الصح
لا بيتحط فى ميه ولا غيره

**samhmakram** · 16-10-2009 03:32 PM

اشكرك يا بشمهندس سمير

طيب حضرتك تنصحنى اصلحه فين ؟
وممكن يكلف كام ؟ تقريبا

**samirayad** · 16-10-2009 03:42 PM

للأسف أنا مقيم بالأسماعيليه
بس لازم تشوف فنى تكييف محنك
للكشف على الكمبروسور زى الكتاب مابيقول
وأن شاء الله الأخوه يدلوك على فنى تكييف كويس
يكون بيشتغل بطريقه علميه

والتكلفه حتكون أقل بكتير من اللى فات

قول 100 شحن تانى و50 أو أكثر قليلا تكاليف تغيير السيل
المهم الصنايعى يبقى أبن حلال

ياريت برضه تذكر محل أقامتك

**bondjames** · 16-10-2009 06:13 PM

لو جاى من ميدان إبن سندر بعد محطة موبيل محل الششنجى للزى العسكرى بعد منه شارع على ناصيته محطة تموين غاز خش فيه يمين تلاقى على إيدك الشمال أول ما تدخل ديافيا مصر بس أسعارهم غريبة شوية - بس بالضمان - أو لو وصلت مصر و السودان بعد محطو ينزين التعاون مباشرة إسأل عن محمد (تقريبا 4 محل) كويس و أسعاره حنينة نوعا ما وهناك هتلاقى ناس كتير واقفة عنده

**bolbol2005** · 17-12-2009 10:13 AM

باشمهندس / سمير
فيه حد ممكن يعمل الموضوع ده في الإسماعيلية
يا ريت تقولنا مين

**hossfo** · 17-12-2009 02:05 PM

[overline] السلام عليكم

نفس الكلام حصل معايا لحد ما زهقت تركت التكييف واعتبرت العربية من غير تكييف
وكنت اخر مرة فى التوكيل وقلت اقولهم عليه كشفوا عليه وقالوا ان السربنتينه مخرومه وعاوزة تتغير وتتكلف الف جنيه بالمصنعية طبعا المبلغ كتير فكبرت دماغى بس الاخ صاحب المشكله قلب عليا المواجع وفكرنى بالتكييف
انا ناوى اعملها برة التوكيل يا ترى تتكلف كام العربيه لانوس 2004
[/overline]