الموضوع: ستر ربنا و خرطوم البنزين

السلام عليكم يا اصدقائى الأعزاء
النهارده نازل من البيت فى امان الله و توكلت عليه و جى اركب العربية اللى هى بالمناسبة شامم ريحة بنزين بقالى 3 ايام بس بعد ما حط بنزين و الموضوع مش فى بالى خالص - جاى اركب العربية لقيت اخويا زقها لازقها فى الحيطه و مش هينفع اركب - فتحت الباب اليمين و دورت و انا واقف بره على اساس اكسر العجل و اركب من مكانى عادى
سمعت صوت فسسسسسسسسسسسسسسسسسسسسسسسس سسسسسسسسسسسس بس جامد قوى ببص تحت العربية لقيت بركة بنزين محترمه فى اقل من 10 ثوانى - 30 ثانية و الريحة بقت ايه ماليه الدنيا و البركه بقت على ما بصيت و طلعت طفيت العربية حوالى 3 او 4 لتر
بطلت العربية و جيت خرطوم الماية من الحوش و غرقت الأرض بدل ما حد غبى يرمى سيجارة و لا طافيه و الدنيا تولع و اتصلت بالميكانيكى بتاعى جالى على طول
ندور مفيش صوت - نبص تحت العربية مفيش بنزين - الواد هيتجنن قلتله بص انا عارف اللى انا شفته عشان انا كنت شايل الكنبة و البلاستكه السودا عشان اشوف البنزين منين و لقيت التنك بحر بنزين من عند خرطوم الطرمبة
قلتله فك قالى فكه مقرف لأنه واخد الكنبه كلها و لازم حد يفك الشكمان اتكلت على الله - ربنا يصبر مراتى لأن القميص ابيض و البنطلون بيج - و رحت نايم تحت العربية اشوف الموضوع فضلت متابع بعينى الخرطوم لغاية ما وصلت انى افك الأفيز اليمين و اسقط الجنب بتاع التانك و اسلك الخرطوم و اشده من فوق
ربنا سهلها و الميكانيكى معايا و يا لهول تلك الصاعقة الخرطوم مفيهوش حتة سليمه كله مشقق و مخرم و حالته زى الزفت
رحت جبت خرطوم عادى بالأفايز ب 13 جنيه و ركبته و الحمد لله و الميكانيكى عشان حبيبى اديته 15 جنيه و جبت 10 لتر بنزين لأن العربية كانت فى الهوا ب 38 جنيه
و الحمد لله رب العالمين
و دى حكايتى مع الخرطوم