حيرة في وظيفة معروضة عليا-ياريت اعرف رأيكوا

**El.Hossieny** · 16-10-2009 05:47 PM

طبعا تروح و تجتهد و تاخد خبرة ... صدقني .. الخبرة بعد الجامعة
هي مستقبلك الحقيقي

**M.Elwan** · 16-10-2009 05:57 PM

المشاركة الأصلية كتبت بواسطة mina87

مساء الخير
انا مهندس كهرباء قسم قوي كهربية دفعة 2009 ولسه ماشتغلتش ويوم الاربعاء اللي فات عملت مقابلة في شركة ساراتوجا بتاعت البطاطين في العاشر من رمضان وقبلوني في الوظيفة بس المشكلة ان المرتب محبط اوي 550 جنيه خلال فترة التدريب اللي مدتها 3 شهور وقالولي بعد فترة التدريب المرتب حايزيد ولما حاولت اعرف منهم حاتبقي الزيادة كام قالولي علي حسب انتاج الشركة وادائك في الشغل بس انا اتوقع ان المرتب يوم مايزيد حايوصل حوالي 700 او 750 جنيه
وبالنسبة لمواعيد الشغل من الساعة 8 الي 4 والاجازة يومين في الاسبوع السبت والاحد بس علشان احنا داخلين علي الشتاء وفي ضغط علي المصنع فبيشتغلوا السبت كمان يعني الاحد بس هو اللي حايبقي اجازة
ايه رأيكوا اقبل بالوظيفة دي ولا المرتب قليل مع ان في ناس زمايلي راحوا شركات وكان الكلام في المرتب علي 1000 جنيه
فبصراحة انا حيران وفي البيت عندي بيقولولي ممكن تعتبرها كأنك بتاخد كورسات بس المرة دي عملي وكمان بتاخد فلوس لغاية لما ربنا يكرم يحاجة كويسة بدل قعدة البيت وبالنسبة لي انا مش ساكت وببعت سيفيهات لأي شركة تنزل اعلان في الوسيط او الاهرام
تفتكروا اعمل ايه ؟؟؟؟؟؟

ده اسمه استغلال فى مهندس بيشتغل ب500 جنيه ده فنى الكهربا مبياخدش اقل من 700 جنيه دلوقتى
المشكله انك ممكن تكون وصلتلهم وانتا بتعمل انترفيو انك محتاج الشغل وعشان كده هما استغلو ظروفك ولو كنت ضغطت وطلبت مرتب اكتبر كانو حيوافقو
وبعدين هما دايما بيقول انك حتدرب والخبره والكلام ده طبعا عشان يبرروا المرتب المستفز اللى بيعرضوه عليك لانك حتبذل مجهود قد المرتب ده 3 مرات
وخد بالك لو قررت تشتغل معاهم انك حتنزل من بيتكو على 6 الصبح عشان تركب اتوبيس المصنع 7 الصبح وانتا راجع حتركب الاتوبيس بتاع المصنع وعالبال ما يتحرك وترجع بيتكو حتلاقى الساعه 6 بعد الظهر
واجازتك لو يومين من حقك تتمسك بيهم لان انتا حسب كلامهم بتدرب عندهم يعنى ملكش علاقة بكتر الشغل او قلته لحد ما التدريب يخلص ولو اتنازلت عن اجازتك يبقى لازم تاخد بالك ان اليوم ده بيتحسب بيومين مش يوم واحد يعنى اضافى ده معناه انك لو اشتغلت اربع ايام اجازة يتحسبو ب8 ايام وفى مصانع بتحسب اليوم بيوم ونص يعنى الاربع ايام ب6
والساعه الاضافى بساعه ونص
ركز فى حقوقك قوى قبل ما تشتغل عشان بعد ما تشتغل حتلاقى الموضوع اختلف خالص
وانا انصحك انك تركز فى الفنادق بتطلب مهندسين كتير فى شرم الشيخ والغردقة وتابع صفحة السياحه فى اهرام الخميس حتلاقى فرص ان شاء الله ومتستعجلش خالص والافضل انك لحد ما تلاقى وظيفه محترمة تاخد كورسات ولازم تاخد تويفل برده عشان اللغه بتساعد فى الفنادق والشركات الاجنبية

**Eng_Mostafa_89** · 16-10-2009 06:43 PM

روح لغاية لما بنا يكرمك بغيرها

**Eng.Mina** · 16-10-2009 07:39 PM

صدقوني يا جماعة انا حيران ومش عارف اخد قرار ولسه بفكر في الموضوع في الكام يوم دول علشان انا لو اشتغلت معاهم حايبقي من يوم الاتنين وعموما ربنا يعمل اللي فيه الخير وعلي فكرة موضوع ال 550 جنيه دول انا ماعرفتوش في المقابلة لان اللي عمل المقابلة معايا قاللي انه مايقدرش يحدد معايا الموضوع ده وقاللي لما رئيس مجلس الادارة ييجي وهو اللي يحدد وانا كنت عايز اقابله بس لقيته بعتلي الموظف اللي كنت مليت الapplication عنده وقاللي ان التعيينات الجديدة بتاخد 550 جنيه والموضوع خلص عل كده وحاولت اقابل رئيس مجلس الادارة علشان اتناقش معاه بس مانفعش

**mahmoud_magdy** · 16-10-2009 10:07 PM

مادام ادامك فرصة شغل انزل اشتغل
هو حد لاقي شغل اصلا
انزل انزل خليك ايجابي

**ams** · 16-10-2009 10:54 PM

ما تروحش
الا فى حالة فى حالة واحده انك هتكتسب خبرة و من كلامك مفيش خبره يبقى ما تروحش

متستعجلش
واستغل وقتك فى تعلية قدراتك انت بقالك حوالى 13 سنة بتتعلم ابدء بقى اتعلم اللى انت عاوزه او محتاجه و خطط حياتك و اعرف ان رزقك هيجيلك هيجيلك

الحكاية مش حكاية رضا ، 550 دى قلة أدب

**A.Saad** · 16-10-2009 11:17 PM

اى يوم تشتغل فيه فى الاول افضل
لانك
هتتعلم
هتحط اسم فى الCVبتاعك
لو ال cv فيها gap
يعنى فترات زمنية بين الوظيفة والتانية او انك قعدت كتير بعد التخرج على ما تشتغل بيكون مش حلو
فى الاولانية الناس بتقلق وفى التانية هيفضلوا الاجدد منك لانه بيكون عنده معلومة احدث
وفى الاخر بقولك
you have nothing to loseدى حكمتى الشهيرة

**ENG\AHMED** · 17-10-2009 12:37 AM

المشاركة الأصلية كتبت بواسطة mina87

مساء الخير
انا مهندس كهرباء قسم قوي كهربية دفعة 2009 ولسه ماشتغلتش ويوم الاربعاء اللي فات عملت مقابلة في شركة ساراتوجا بتاعت البطاطين في العاشر من رمضان وقبلوني في الوظيفة بس المشكلة ان المرتب محبط اوي 550 جنيه خلال فترة التدريب اللي مدتها 3 شهور وقالولي بعد فترة التدريب المرتب حايزيد ولما حاولت اعرف منهم حاتبقي الزيادة كام قالولي علي حسب انتاج الشركة وادائك في الشغل بس انا اتوقع ان المرتب يوم مايزيد حايوصل حوالي 700 او 750 جنيه
وبالنسبة لمواعيد الشغل من الساعة 8 الي 4 والاجازة يومين في الاسبوع السبت والاحد بس علشان احنا داخلين علي الشتاء وفي ضغط علي المصنع فبيشتغلوا السبت كمان يعني الاحد بس هو اللي حايبقي اجازة
ايه رأيكوا اقبل بالوظيفة دي ولا المرتب قليل مع ان في ناس زمايلي راحوا شركات وكان الكلام في المرتب علي 1000 جنيه
فبصراحة انا حيران وفي البيت عندي بيقولولي ممكن تعتبرها كأنك بتاخد كورسات بس المرة دي عملي وكمان بتاخد فلوس لغاية لما ربنا يكرم يحاجة كويسة بدل قعدة البيت وبالنسبة لي انا مش ساكت وببعت سيفيهات لأي شركة تنزل اعلان في الوسيط او الاهرام
تفتكروا اعمل ايه ؟؟؟؟؟؟

بغض النظر عن المرتب لأنة قليل الادب شوية بس هيبقى احسن من قعدة البيت .. انت ممكن تشتغل وتدور على شغل تانى فى نفس الوقت واهو منها تضيع وقت وبتتعلم
انت متعرفش هتلاقى الشغل اللى انت عايزة امتى ولا فين فالحاجة اللى قدامك اتمسك بيها لغاية لما تلاقى الاحسن , كدة او كدة انت مش خسران وجايز الشغل دة يفتح قدامك مجال لشغل تانى احسن.
نصيحة اهم من المرتب انك اول لما تدخل المكان تعرف هتوصل لأية وهل دة اللى انت عايزة ولا لأ .. يعنى بص لنفسك قدام بعد 10 سنين مثلا هتبقى اية وهتوصل لاية فى المكان دة , هل دة اللى انت عايزة فعلا ولا لأ
الشغل يعنى خبرة + مرتب .. متمسكش حاجة منهم على حساب التانية لأ،ك مش هتشتغل ببلاش فى سبيل الخبرة وفى نفس الوقت متفرحش بالمرتب العالى بدون خبرة لأن ممكن فى اى وقت مش تلاقية لأى سبب وساعتها هتضر تدور على شغل فى مكان تانى وهتبقى من غير خبرة فا نصيحة اعمل اتزان بين الاتنين

**medo_2060** · 17-10-2009 01:15 AM

انا رأى ليك انك تتوكل على الله وتستلم الشغل دا ويا جماعه يالى بتقولوا راتب قليل الادب هو فى شغل اساسا عشان تختار الراتب الاعلى وبعدين الراجل لسه متخرج يعنى له مخدش خبره شغل عشان يطلب مبالغ كبيره (انا هتخرج السنه دى ان شاء الله هندسه برضه ولو اتعرض عليا الوظيفه دى هقبلها مؤقتا وعلى الاقل بتاخد خبره)

-

الموضوع: حيرة في وظيفة معروضة عليا-ياريت اعرف رأيكوا

LinkBack

أدوات الموضوع

عرض

-

-

-

-

-

-

-

المواضيع المتشابهه

معروضة عليا 128 ممكن اخد رايكم فيها

عاوز رأيكم في عربية معروضة عليا

معروضة عليا بى إم 316 ... أتمنى المشاركة

ميجان معروضة عليا و محتار ... الحقونـــــــــــــى

معروضة عليا لانسر 98 وعايز رأيكوا لو سمحتم

الكلمات الدلالية لهذا الموضوع

المفضلات

المفضلات

ضوابط المشاركة