حيرة في وظيفة معروضة عليا-ياريت اعرف رأيكوا

**Eng.Mina** · 16-10-2009 03:31 PM

مساء الخير
انا مهندس كهرباء قسم قوي كهربية دفعة 2009 ولسه ماشتغلتش ويوم الاربعاء اللي فات عملت مقابلة في شركة ساراتوجا بتاعت البطاطين في العاشر من رمضان وقبلوني في الوظيفة بس المشكلة ان المرتب محبط اوي 550 جنيه خلال فترة التدريب اللي مدتها 3 شهور وقالولي بعد فترة التدريب المرتب حايزيد ولما حاولت اعرف منهم حاتبقي الزيادة كام قالولي علي حسب انتاج الشركة وادائك في الشغل بس انا اتوقع ان المرتب يوم مايزيد حايوصل حوالي 700 او 750 جنيه
وبالنسبة لمواعيد الشغل من الساعة 8 الي 4 والاجازة يومين في الاسبوع السبت والاحد بس علشان احنا داخلين علي الشتاء وفي ضغط علي المصنع فبيشتغلوا السبت كمان يعني الاحد بس هو اللي حايبقي اجازة
ايه رأيكوا اقبل بالوظيفة دي ولا المرتب قليل مع ان في ناس زمايلي راحوا شركات وكان الكلام في المرتب علي 1000 جنيه
فبصراحة انا حيران وفي البيت عندي بيقولولي ممكن تعتبرها كأنك بتاخد كورسات بس المرة دي عملي وكمان بتاخد فلوس لغاية لما ربنا يكرم يحاجة كويسة بدل قعدة البيت وبالنسبة لي انا مش ساكت وببعت سيفيهات لأي شركة تنزل اعلان في الوسيط او الاهرام
تفتكروا اعمل ايه ؟؟؟؟؟؟

**Terrible_DaRsH** · 16-10-2009 03:37 PM

روح طبعاً ...!!

**نور القمر** · 16-10-2009 03:39 PM

روح لحد ما تلاقي الافضل
وكل يوم بتشتغل بتاخد خبرة
واي مرتب افضل من قعدة البيت في انتظار شغل بمرتب اكبر

**Eslam.Elrefaey** · 16-10-2009 03:43 PM

روح أحسن ويمكن المرتب يبقى أعلى من750 زى منت بتقول وبعدين الشركات العالية عايز شهادات خبرة 5 سنين وكده فأشتغل شوية وقولهم عايز شهادة خبرة وأكيد إن شاء الله هتلاقى شغل تانى وربنا يوفقك

**Eng.Mina** · 16-10-2009 03:49 PM

شكرا يا جماعة علي الردود السريعة دي
وياريت كمان اعرف منكوا لوعايز اسيب الشركة خلال فترة ال 3 شهور بتوع التدريب هل بيدوني شهادة خبرة ولا بيكون ايه النظام؟؟؟
وهل حايسيبوني بالساهل كده ولا بيبقي فيه مماطلة وحاجات من دي

**MTAK** · 16-10-2009 04:56 PM

اولا
طبعا لازم تروح
و تحط فى دماغك
انت فى مرحلة التعليم بعد الجامعى
يعنى انت فى فترة بتجمع فيها خبرة
و على قد ما هاتجمع هايكون مرتبك المستقبلى
--
حكاية شهادة الخبرة دى بتفرق من شركة الى شركة
بس بصراحه ماسمعتش عن شركة بتدى شهادة بعد 3 شهور و لا حتى سنه
---
لما تعوز فى اى مكان انك تمشى امشى
مالهمش عندك حاجه الا اوراقك الرسميه و نصيحه طلع منها شوية مستخرجات هتحتاجهم فيما بعد
و نصيحه خلى مشيانك من اى مكان بهدوء و بدون مشاكل
حتى لو عملوا معاك مشاكل ركبهم الغلط حتى لو قالوا احنا صح
مانتش عارف مديرك ده ممكن تقابله فى شركة تانيه
او هو ممكن يحتاجك لما يروح مكان احلى
الايام دوارة و السوق له ابعاد

**الغزالى** · 16-10-2009 05:23 PM

بص حضرتك لازم تروح واعتبرها تدريب ليك يعنى مثلا حضرتك لما بتروح تشترى عربية جديدة لازم تجربها الاول وبعد كدة انت حر تاخدها متخدهاش دى حاجة بتاعتك والشغل كدة برضو روح وشوف الدنيا عاملة ازاى لو عجبك كمل معجبكش ساعتها تفكر بئى وتشوف هاتعمل اية