الموضوع: تقييم اللوجان بعد 200 كيلو و اول مشوار على السريع

انهاردة كان اول مشوار كبير للولي انهاردة (لولي ده اسم الدلع بتاع لوجانتي ) كان من مدينة نصر للهرم من خلال الدائري و وصلة المريوطية الجديدة
نبدأ الرحلة بعد التسخين و الذي منه قلنا بسم الله و اتحركنا الى الدائري الطريق ضلمة كحل من عندنا لحد الدائري بس النور الواطي مع الفوجات اللي قدام كانو قايمين بالواجب و زيادة مسكنا الدائري و بدأنا نزود السرعة شوية و نقللها شوية علشان التليين منبقاش ماشيين على سرعة واحدة و قلت لزوم الروقان شغلت التكييف و CD لفيروز و ماشيين على اققل من مهلنا 70 80 100 75 كدة يعني احلى حاجة بقى ان اللي كان يجي ورايا و يقلب العالي في المرايا ولا اكنو موجود علو الشنطة مخليني شايف اللي ورايا لكن النور العالي ولا واصل للمرايا خالص و عزل الصوت بتاع العربية فوق الممتاز
نتكلم على ثبات العربية العربية بسم الله ما شاء الله مكلبشة في الارض و الدركسيون مفيهوش الهوا و التحكم في العربية في السرعات العالية تحفة انا كنت متفاجئ بالنتيجة دي لان الفورد اللي كانت معايا كانت بنفس مستوى الثبات تقريبا لكن كانت واطية جدااااااااااااااا مكنتش بعرف امشي بيها في الشوارع اللي فيها مطبات نرجع تاني للولي اتفاجئت اكثر من الثبات ده لان الكاوتش اللي راكب فيها الكورموران مش الميشلان و ده كان مخليني مقلق لكن الحمد لله اثبتت كفائة وصلنا ميدان الرماية و طريق الفيوم بنقله بميكروباساته بسلاطاته ببابا غنوجو و الجال ... اصدي المطبات محمل 4 في العربية و ماشي و الحمد لله اجعصها مطب بخدو بكل حرية و بدون ماسمع الهوا و دخلنا حدايق الاهرام اللي هيا للي ميعرفش مش متسفلتة كويس علشان العمارات اللي تحت الانشاء لسة حيث النقر الجميلة و المطبات الرائعة و المطالع التي لا توصف و برده ما شاء الله عليها.
العربية لو مقعدش تبص كل شوية على العداد بتاعها هتلاقي نفسك جبت ال 120 و انت مش حاسس موتور ما شاء الله و ثبات ما شاء الله متحسش انا فوجئت اني ماشي 120 و صوت الموتور مش عالي ولا حاجة و العربية مستعدة تجيب اكثر بس هديتها علشان التليين و الرادار ربنا يكفينا شره و الناس اللي بتعدي الدائري على رجليها.
كل اللي بقوله على العربية دي كل ماركبها هو الحمد لله ان ربنا هداني للعربية دي بدل ما كنت هجيب لانوس مش بعيب في اللانوس لكن بجد اللوجان تتفوق عليها في حاجات كثير.
بس كدة انا مرضيتش انام من غير معملكم التقييم ده و خصوصا ان العربية عملت 200 كيلو بحالهم من ساعة ماشتريتها و تصبحو على خير علشان عندي كلية الصبح
بس هختم بالجملة الشهيرة
I LOVE RENAULT LOGAN