الموضوع: كل شيء عن الكلاب ( انواعها - مواصفاتها - اسعارها - اماكن تدريبها )

9- تدريب الكلب على التعامل مع الأطفال

في الجزء ده يا شباب هناقش معاكم اهم النقاط في تعامل الكلب مع الاطفال و العكس. والموضوع ده بالذات حساس جدا ولازم يتخذ الحذر فيه تماما علشان نمنع اي حوادث قبل وقوعها. وأقصد بكلمة طفل المرحلة العمريه من سنتين الى 8 سنوات، لأن قبل كده الطفل بيكون رضيع وأكيد لازم نبعد الكلب عنه أو يكون الكلب تحت المراقبه مهما كان منعا لحدوث اي حوادث خطيرة. وبعد سن 8 سنوات الطفل بيكون كبر ونوعا ما اتكون لديه نوع من الوعي و الادراك وممكن يتعامل مع الكلب بصورة شبه سليمه مع بعض توجيهات الآباء طبعا.

ولسهولة مناقشة الموضوع هناقشه من محورين اساسيين، الاول لو انت جايب الكلب جرو صغير زي ما سبق و اتكلمنا، والتاني لو الكلب كبير (طبعا دي مهمة في حالة ان عندك كلب اساسا وربنا رزقك بأول طفل).

1- اقتناء جرو صغير في وجود أطفال:

طبعا دي أفضل حالة ممكن نقتني فيها جرو وهي وجود أطفال صغيرين، وذلك لسهولة تعريف الأطفال على الجرو، وفي نفس الوقت الجرو هينشأ مع الأطفال في بيئة واحدة وهيعتبرهم أصحابه، ده غير استمتاعه باللعب معاهم وكمان الجرو بكل سهولة هيتعود على ماهو صواب وما هو خطأ في علاقته بالأطفال.

ونيجي بقى لأول حاجة وهي بداية تعارف الطفل و الجرو. في البداية لازم يكون في مراقبة صارمه من الآباء للأطفال اثناء تعاملهم مع الجرو، لأن الطفل بطبعه فضولي وبيبني بالفضول ده قاعدة بيانات لكل ما هو محيط بيه، وكذلك الجرو. وعلشان كده في الشهور الأولى لازم نفهم الأطفال انهم يتعاملوا مع الجرو بحنان و هدوء، وعدم ايذاء الجرو بأي شكل من الأشكال، زي مثلا شد ذيل الجرو أو ضربه بعنف، لان الأمور دي خطيرة. هي مش هتعمل اي سوء في العلاقة بين الاتنين لكن هتخلي الجرو غبي في التعامل مع الأطفال لأنه بالتأكيد هيتخيل ان دي طريقة التعامل الطبيعية، وطبعا هيكبر الجرو وقوته هتزيد وهيفضل فاهم ان اللعب و الهزار يكون بالعنف وده بالتأكيد هيأذي الأطفال.

فأهم حاجة ننبه عليها هي عدم ايذاء الجرو، ودايما نشجع الألعاب اللطيفه مع الجراء، زي مثلا لعبة retrieve ودي من أفضل الألعاب وبتنمي قدرات الجرو بسرعة، كمان بتعمق العلاقة بين الجرو و الطفل وطبعا مفيدة جدا لصحة الجرو و الطفل معا.

كمان مهم جدا اننا نشرك الكلب في اللعب مع الأطفال أطول فترة ممكنة، لأن الجرو بيعتبر نفسه أحد أفراد الأسرة ولما بيشوف الأطفال بتلعب بيكون نفسه هو كمان يلعب معاهم، وحرمانه من اللعب بيولد جواه كره للطفل ممكن ينقلب لغيرة شديده مدمرة لما يكبر وده طبعا غير مطلوب بالمرة.

يفضل كمان ان مواعيد أكل الجرو تكون في وقت أكل الأطفال، وده علشان الجرو يتعود ان الكل بياكل في وقت واحد، وكمان دي بتبني حاجز الاحترام بينه وبين الآباء، يعني الجرو حيفهم انه زي الأطفال، بياكل في وقتهم وبيلعب معاهم، وبالتالي الآباء ليهم وضع خاص وده هينمي احترامه ليهم وكمان هيقرب بينه وبين الأطفال جدا.

طبعا لازم ننبه على الأطفال عدم شد ذيل الكلب، وعدم اللعب في الأذن، ولازم ننتبه للسقوط، لان ممكن أثناء اللعب الطفل يقع على الجرو وده أكيد هيسبب أذى كبير ليه خصوصا ان عظامه بتكون لينة جدا. ومن الأمور المهمة كمان اثناء فترات اللعب اننا نلاحظ نوعية الألعاب اللي الأطفال بتلعب بيها علشان ميكونش فيها اي قطع صغيرة ممكن الكلب يبلعها وتسبب له مشاكل.

ولما الكلب يوصل عمره لسنتين هنا بقى لازم نعمل فرق بين الكلب وبين الطفل، لأن الكلب بيكون وصل لمرحلة الشباب، ولازم يشعر بشخصيته الجديدة.

وهنا بنبدأ نبعد الأطفال عن الكلب في فترات التمرين بتاعته، والنزهات المقصود منها التدريب بتتم بعيد عن الأطفال علشان الكلب يشعر بالمسؤولية وبأن ده شغل مش لعب، وكمان لو الكلب عمل اي حاجة خطأ لازم العقاب يكون بعيد عن الأطفال، ونفس الموضوع للأطفال، لو طفل أخطأ نراعي اثناء عقاب الطفل ان الكلب يحس العقاب ده مش ليه انما هو للطفل فقط علشان الكلب يحس بشخصيته وبأنه خلاص تجاوز مرحلة الطفوله وانه مسؤول عن الأطفال.

2- اقتناء كلب كبير مع وجود طفل:

تاني محور وهو لو جالك كلب كبير وانت عندك أطفال. هنا بقى هنواجه مشكلة اساسية وهي تعريف الكلب على الطفل في البداية، وطبعا دي بتاخد وقت شويه. ولحل المشلكة دي بنتبع اسلوب جميل جدا وهو توليد الرغبة المعاكسة في الكلب. بمعنى تاني اننا نخلي الكلب هو اللي نفسه يتعرف على الطفل وهو اللي يسعى لكسب وده، وهي طريقة طويله شويه في تنفيذها بس نتيجتها ممتازة.

بنبدأ في الأول نخلي الكلب يشوف الأطفال وهم بيلعبوا بدون ما نسمح له باللعب معاهم لمدة اسبوع مثلا، وخلال الوقت ده هتبدأ الرغبة تتولد داخل الكلب لحبه في اللعب، وهيكون عايز يلعب معاهم بأي شكل. وأول ما نلاقي الكلب بينبح ويهز ديله وهو شايف الأطفال بتلعب نخلي الطفل يقرب من الكلب بهدوء وهو مبتسم طبعا، ويحط في ايده اي حاجة بيحبها الكلب زي قطعة لانشون مثلا، ويقرب بهدوء من فم الكلب من تحت ويخلي الكلب ياخدها منه. دي أول مكافئه من الطفل للكلب وصدقوني ليها تأثير رهيب على الكلب أكتر من ان الطفل يحاول يتودد للكلب بأنه يمسح على راسه أو ضهره. وكمان بلاش ابدا تكون بداية العلاقة ان الطفل يحاول يحط ايده على راس الكلب لأن الحركة دي بتستفز المشاعر العدوانيه عند الكلب.

أول ما الكلب ياخد المكافئه من ايد الطفل نخلي الطفل يداعب المنطقة تحت ذقن الكلب و عند الرقبة من تحت وهو بيقول للكلب كلام مشجع، وهنا هتبتدي الثقه تتولد بين الاتنين، وساعتها نسمح للكلب باللعب مع الأطفال، طبعا تحت المراقبه ولفتره مش طويله يعني بالكتير ربع ساعه، وأهم حاجة ان الأطفال تحسس الكلب السعادة للعبه معاهم وانهم مش خايفين منه ابدا، وبعدين ناخد الكلب بعيد عنهم ونكافئه بوجبة طعام شهية ويفضل تكون مختلفه عن الوجبة المعتادة علشان يحس انها مكافئه.

بكده نكون حفزنا الكلب للعب مع الأطفال، وهنلاقيه اول ما يسمع صوتهم وهم بيلعبوا بيكون عايز بلعب معاهم باي شكل، وتدريجيا هنلاقي الثقه اتولدت تماما بين الكلب و الطفل بدون مشاكل.

واهم حاجة في اول اسبوعين، اننا نلاحظ تصرفات الكلب مع الأطفال، ونقوم اي سلوك فيه خطورة على الطفل. يعني مثلا لو الكلب حاول يعض طفل على طول نديله أمر التوقف وناخده ونمنعه من اللعب فتره لا تزيد عن 10 دقائق ويكون في نفس الوقت شايف الأطفال بتلعب علشان الحافز يكون موجود. بكده حيفهم ان اي سلوك خاطئ معناه الحرمان من اللعب.ومع الوقت كل العادات الغير مرغوب فيها حتنتهي والكلب حيحب الاطفال جدا وهيشعر بالمسؤولية تجاههم وهيكون أفضل رفيق ليهم.

وعامة كل الكلاب عندها حس رعاية الأطفال، لكن في أنواع مميزة بتهتم جدا بالأطفال زي الجولدن ريتريفر و الجيرمن شيبرد، النوعين دول بالذات بيهتموا جدا بالأطفال بصورة فطرية وفيهم حاجة غريبه وهي انهم بدون تدريب بيقدروا يحددوا ايه الحاجات اللي بتأذي الطفل ويتفادوها، يعني صعب جدا تلاقي كلب جيرمن شيبرد بيلعب مع طفل بعنف، العكس هو الصحيح تلاقي الجيرمن بيلعب من الطفل بكل حنان وهدوء وكمان بيحافظ عليه من اي أخطار

وطبعا الناس اللي ربت عارفه الكلام ده كويس ومتأكده منه تماما، وزمان وانا طفل كان عندنا كلب جيرمن شيبرد ماما مكانتش بتآمن عليا غير وهو جنبي والكلب كان دايما واقف جنبي وهمه كله اني ماتخبطش في حاجة مثلا وانا ماشي ويفضل متابع حركاتي بكل هدوء وهمه كله هو سلامتي.

10- التنزه بالكلب و التمارين الرياضيه المختلفة

في الجزء العاشر يا شبابا هتكلم عن أكتر حاجة بتسعد الكلاب وهي التنزه و التمارين الرياضيه. وقبل ما ندخل في الموضوع عايز أوضح حاجة مهمة جدا وهي الفرق بين التنزه و الرياضة.

في ناس كتير أوي متخيلة أن الرياضة للكلب هي مجرد تمشيه نص ساعة في اليوم وخلاص، وناس تانيه فاهمة الرياضه على انها حاجة زي تمارين كمال الأجسام كده كلها عنف وجدية. لكن الواقع مختلف عن كده بكتير. والكلام في الموضوع ده هيكون مخصص للكلاب اللي عايشه في شقق، يعني مش بيت بحديقة مثلا أو فوق سطح لأن الوضع بالنسبه ليهم هيكون مختلف.

الكلاب حيوانات نشيطة بطبعها وربنا خلقها وهيأ جسمها للنشاط ده، والعيشة في شقق بتأذي الكلب نفسيا قبل ما تأذيه صحيا. وممارسة التمارين الرياضية والتنزه بتقلل من الضغط النفسي عند الكلب، وكمان بتبدد اي نشاط زايد ممكن يكون مدمر في البيت، لان الكلب لما بيزهق بيبتدي يطلع نشاطه الزايد في شكل عنف في التعامل أو شراسه أو اعمال تخريبيه في المنزل زي تقطيع الفراش أو الأثاث أو عض الأشياء الخشبية، وفي حالات متقدمه بتوصل لتبول أو تبرز متعمد في أماكن خاطئه. علشان كده الكلب محتاج نوعين من الترويح عن نفسه:

1- التنزه

التنزه مقصود بيه المشي مع الكلب بسرعة الانسان العادي، وغالبا بيكون الكلب مربوط بالليش علشان ميجريش بعيد أو يأذي حد أو تحصل له حاجة. والتنزه مهم جدا للكلب لأنه بيرفع من معنوياته وبيساعد على تحريكه لكل عضلات جسمه وبيزود من طاقة الرئتين وبينشط الدورة الدموية، وكمان بيساعد الكلب على التعرف على المجتمع وبينمي حواسه المختلفه، من ادراك و شم وتقدير الابعاد و المسافات، وأهم حاجة انه بيزود من ارتباطه بصاحبه.

وبما ان التنزه مهم للكلب بالصورة دي فلازم الكلب يوميا يخرج على الاقل نص ساعة في نزهة، ويفضل تكون النزهة في مكان هادي خصوصا في شهور عمره الأولى علشان الكلب ميخافش من المجتمع ويتعود عليه تدريجيا. وطبعا لازم مع التنزه نبدأ تدريبات الطاعة المختلفة الخاصة بالتنزه زي المشي بالليش و طاعة الأوامر خارج مكان المعيشة و خلافه.

ويفضل في اوقات التنزه يكون الكلب مع صاحبه بس، وميكونش معاهم حد تاني، يعني مثلا مش تروح تقابل واحد صاحبك كل يوم وانت بتنزه كلبك لأنه كده هيحس انك بتخرج مش علشان تسعده انما بتاخده معاك وخلاص وده هيضعف الروابط بينكم. انما ممكن تخرج مثلا بيه وانت رايج تشتري اي طلب، كده الكلب حيفهم انك عايزه معاك حتى وانت بتجيب حاجة، ويفضل انك تاخد معاك اي حاجة هو بيحبها وتديها له بعد ما تشتري طلبك علشان يحس انه عمل حاجة كويسه لما خرج معاك في طلبك. وبعد ما الكلب يتم سنه ونص، ممكن النزهة تكون مع اصحابك او اي حاجة، لانك هتكون بنيت شخصية الكلب خلاص ومعادش في اي مشاكل بالنسبه له انك تخرج تقابل حد وهو معاك، لانه حيفهم انك بتحب يكون معاك حتى وانت بتعمل حاجة تخصك انت.

2- التمارين الرياضية

المقصود بالتمارين الرياضية هي ممارسة تدريبات معينة لتحسين صحة الكلب والارتقاء بمستواه البدني، والتمارين دي لازم تكون بنظام معين، وجدول تدريبات مظبوط، وأهم التمارين الواجب اتباعها مع كل الكلاب هي:

أ- المشي الحر: المشي الحر هو انك تاخد كلبك لمكان هادي ومفيهوش اي عربيات أو اي حد ممكن يضايقه وتسيبه يجري ويلعب او يمشي جنبك بدون ما يكون مربوط. والمشي الحر مهم جدا جدا لتحسين سلوك الكلب والارتقاء بحالته النفسيه، ويفضل يكون المشي الحر 3 مرات في الأسبوع لمده ساعة في كل مره.

وياريت اننا نلعب مع الكلب في فترة المشي الحر ألعاب زي الجري أو retrieve لأن الالعاب دي بتنمي قدرات الكلب بصورة كبيره وبتبني شخصيته بسرعة كبيرة. والمشي الحر يفضل يكون في مكان فيه نجيل، يعني مش على الاسفلت علشان يكون مناسب لأقدام الكلب (المخدات).

ب- الركض: الكلب من سن 8 شهور محتاج أنه يركض ركض متواصل لمدة نصف ساعة مرتين في الأسبوع وده لتنشيط الدورة الدموية و الرئتين وتحسين قدرة العضلات عامة، وكمان الركض بيساعد بصورة كبيرة على بناء جسم الكلب بشكل سليم ومتناسق.

والركض أسهل حاجة ليه انك تركض بجانب كلبك، طبعا مش ركض سباق انما ركض رياضي عادي، أو انك تخلي الكلب يجري جنبك وانت راكب دراجة مثلا مع مراعاة ان سرعتك تكون مناسبة للكلب.

جـ - القفز: كل كلب محتاج انه يدرب على القفز، وتمارين القفز مهمة للكلب من سن 6 شهور علشان عضلات الفخذين و الظهر. وتمارين القفز هتكون مره واحده اسبوعيا ونبدأ بارتفاع بسيط يعني ممكن 30 سم كويس أوي وكل مره نزود الارتفاع.

11- تدريبات الطاعة المختلفة في المنزل

في الجزء ده يا شباب هتكلم عن التدريبات العامة اللي ممكن ندرب الكلب عليها في المنزل وغالبا بنكون محتاجينها، زي مثلا تدريب الثبات وتلبية النداء و دخول الكلب لمنزله أو مكان نومه. وطبعا في تدريبات كتير جدا ممكن ندرب الكلب عليها، لكن انا هنا هناقش أهم تدريبات محتاجينها علشان نقلل أو نمنع المشاكل تماما في المنزل.

1- تدريب الثبات:

تدريب الثبات من أهم التدريبات في المنزل وصدقوني هتحسوا بقيمته جدا اثناء عمليات التنظيف أو اي حاجة الكلب ممكن يتخيل انها لعب، وبيفيد جدا لو جالك ضيف مثلا أو عامل من عمال توصيل الطعام وانت مش عايز الكلب يقرب منه.

وتدريب الثبات بيبدأ بعد اتقان الكلب لأمر الجلوس وبيكون في سن 4 شهور الى 6 كحد أقصى، وطريقة التنفيذ بتكون كالآتي:

1- نبدأ باننا ندي الكلب أمر الجلوس وننتظر لما الكلب يجلس تماما.

2- نمسك مكافئه الكلب في الايد اليمين، وندي الكلب أمر الثبات (اثبت) او (stay)

3- طبعا الكلب مش حيفهم الامر في الأول و هيحاول يقرب منك علشان ياخد المكافئه، اول ما يعمل كده تديله أمر الجلوس تاني وتبعد عنه المكافئه، واول ما ينفذ الأمر تماما تديله أمر الثبات تاني.

4- بعد تكرار الأمر كذا مره الكلب حيفهم انه مطلوب منه انه ميتحركش علشان ياخد المكافئه، وبعد كده ننتقل للمرحلة التانية.

5- بعد ما ندي الكلب أمر الجلوس و الثبات نبتدي نتحرك للخلف خطوة، وهنلاقي الكلب عايز يتحرك هو كمان علشان يكون معاك، هنا تقف تماما وتدي الكلب أمر الجلوس و الثبات ولما يجلس تبتدي تتحرك للخلف خطوة.

6- بتكرار الامر الكلب حيفهم ان مطلوب منه الثبات، واول مره الكلب ينفذ فيها الامر ويسيبك تتحرك خطوة و هو ثابت تقوم رايح عليه ومديله المكافئه.

7- نفضل نكرر الأمر ده كذا مره، وكل مره نزود عدد الخطوات.

8- بعد اتقان الكلب للأمر بالشكل ده، نبتدي نغير التدريب بحيث انه ياخد أمر الثبات ونتحرك احنا لاي مكان، مش للخلف، في الغالب الكلب هيخالف الامر و يتحرك معاك، وهنا ترجع تقف و تديله أمر الجلوس و الثبات.

9- وهكذا تفضل تغير كل مره شكل حركاتك، وكل ما الكلب ينفذ تديله المكافئه، وبعد فتره هتلاقي الكلب اول ما ياخد أمر الثبات مش بيتحرك مهما انت عملت.

2- تدريب تلبية النداء:

التدريب ده تدريب مهم وغالبا بيجي لوحده، يعني مش محتاج بذل مجهود، خصوصا لما بيكون الكلب متربي في البيت، واهميته بتبان لما بنخرج بالكلب، والمطلوب من التدريب ده ان الكلب يقطع اي نشاط بيمارسه و يلبي النداء على طول، علشان نقدر نسيطر على الكلب في حالة اي نشاط غير مرغوب فيه، والتدريب ده بيبدأ من اول يوم نجيب فيه الجرو للبيت. وخطوات التدريب كالآتي:

1- في البداية لازم نعود الكلب على اسمه، يعني كل شويه نقول له اسمه واحنا بنبص لعنيه مباشره و بنبتسم، علشان الكلب يدرك ان ده اسمه.

2- بعد ما الكلب يتعود على اسمه، وده بنلاحظة باننا اول ما نقول اسم الكلب تلاقيه بينتبه ويبص لك على طول، نبتدي نعوده على امر النداء زي مثلا تعال أو come او get here، وده عن طريق اننا نقول اسم الكلب وبعد كده نديله امر النداء.

3- في البداية الكلب مش حيفهم ايه المطلوب منه، وعلشان نوصل له المعلومة نجيب اي مكافئه، ونبينها للكلب في ايدنا ونديله امر النداء، واول ما الكلب يجيلك تديله المكافئه وطبعا تقول له برافو او اي كلمة تشجيع.

4- بتكرار الامر الكلب حيفهم ايه المطلوب منه، بس المهم في الموضوع انك تكرر الامر في كذا حالة، يعني مره و الكلب بياكل و مره وهو بيلعب ومره وهو نايم، بحيث انك توصل لمرحلة متقدمه جدا من الطاعة، وهي دي الهدف من الأمر.

5- من الأفضل اننا نضيف على الامر ده ان لما الكلب يجيلك يقعد وياخد وضع الثبات، بحيث نضمن تماما ثباته.

3- تدريب الكلب على الذهاب لمكان نومه:

التدريب ده من اهم التدريبات، وعامة تنفيذه بسيط جدا، وهو اننا نقول للكلب روح البيت، ونكون رابطين الكلب بالليش وناخده على مكان بيته، واول ما نوصل نديله امر الجلوس، ومع تكرار الامر هتلاقي الكلب فهم لوحده، وطبعا ده يختلف تماما عن تدريب الكلب على الذهاب لبيته لو الكلب عايش في حديقه مثلا او فوق سطح.

12- تدريب الكلب على الحراسة الأولية للمنازل


أخيرا وصلنا للجزء الثاني عشر وهو تدريب الكلب على الحراسة الأولية للمنازل، وقبل ما أبدأ في الموضوع عايزين نتكلم باختصار عن الفرق بين أنواع الحراسة.






الحراسة بتنقسم لثلاثة أنواع:

1- حراسة أولية: و المقصود بيها ان الكلب بيكون زي جهاز الانذار، بينبح على الغرباء أو عند حدوث اي اختراق لمحيط سكنه في محاولة لتنبية أصحاب المكان.

2- حراسة متقدمة: وهي تحميل الكلب كافة مسؤوليات الدفاع عن المكان في غياب اصحابه عنه، من هجوم على الغرباء وتفقد المكان باستمرار وتحذير الحراس عن طريق النباح عند حدوث اي اختراق للمكان اللي مطلوب منه يحرسه، وده اللي كلنا بنحتاجه في الفيلل أو المزارع و المخازن و غيرها. وعامة الحراسة المتقدمة موضوع كبير جدا وفن راقي في التدريب.

3- الحراسة الشخصية: وهي ان الكلب يكون زي البودي جارد، يمشي مع شخص معين بغرض حمايته من اي اعتداء بدني عليه، ومنع اي احتكاك مباشر بيه، ودي عملية خطيره في التدريب لأن اخطر نقطة فيها ازاي توصل بالكلب للمرحلة اللي يقدر يقيم فيها الخطر، ويتعامل ازاي مع كل نوع من أنواع الخطر.

وعامة انا باحضر موضوع متكامل عن الحراسة بأنواعها و طرقها وان شاء الله هناقش فيه كل الانواع دي باستفاضه تامة.






دلوقتي نتكلم عن الحراسة الأولية، وهي المطلوبة في المنازل وممكن أي مبتدئ يدرب كلبه عليها. وخطوات التدريب كالآتي:

1- بنبدأ نعزل الكلب عن أي غرباء من سن 8 شهور، و الخروج بالكلب هيكون في وقت متأخر جدا بالليل وفي أماكن هادية، بحيث ان الكلب ميشوفش اي حد خالص لمدة شهر ونص أو شهرين، وهي مدة التدريب.

2- لازم الكلب يدرك ان الغرباء خطر، وده بيتم باننا نحضر اي شخص غريب، ولكن موثوق فيه، ونخليه يقف على باب المنزل، بدون ما يدخل، ولو الكلب جري عليه علشان يلعب معاه نديله أمر التوقف وبعده أمر الثبات، وبعدين أمر النباح، واول ما الكلب ينبح لازم الشخص يعمل نفسه خايف ويرجع لورا ويخرج من المنزل.

3- نكرر التدريب كذا مره، لغاية ما الكلب يبتدي ينبح لوحده بدون الامر أول ما يشوف حد غريب على الباب.

4- بعد كده نطور الامر باننا نطلب من الشخص الدخول للمنزل، طبعا الكلب هينبح عليه، وكل ما ينبح أكتر لازم الشخص يعمل نفسه خايف اكتر و يبتدي يرجع لورا تاني.

5- ونستمر على التدريب ده فتره، بحيث الكلب يفهم تماما ان البيت ده منطقته وممنوع على اي شخص غريب يدخل المنطقة دي.

6- بعد ما الكلب يتقن الموضوع تماما، نطور التدريب اكتر، باننا نربط الكلب بالليش ونخلي شخص يدخل، طبعا الكلب هيبتدي ينبح و يتجنن، هنا نخلي الشخص يقرب من الكلب أكتر بس وهو بيمثل انه خايف ويحاول يضرب الكلب.
7- نتيجة لان الكلب في البداية اخد ثقه في نفسه هنلاقي عنده استعداد انه يهجم على الشخص ده، واول ما يهجم عليه نحمسه و نشجعه، وفي نفس الوقت اول ما الكلب يبتدي الهجوم الشخص لازم يهرب على طول من باب البيت.

8- بعد ما نكرر التدريب ده كذا مره، نخلي الشخص يدخل بس المره دي وهو واثق من نفسه، ويقرب من الكلب بثقه و يحاول يضربه وهو مش خايف، واول ما الكلب يحاول يهجم عليه نحمسه و نشجعه جدا، بس المره دي الشخص ميجريش، انما يرجع خطوتين لورا ويفضل ساكت شويه وبعدين يقرب تاني من الكلب، وكل ما الكلب يحاول يهجم عليه نحمسه أكتر، ومنطولش الامر، يعني كلها 3 دقائق بالكتير و بعدين الشخص يمثل الخوف و يخرج من الباب.

9- بعد ما الكلب يتقن التمرين اللي فات، ننتقل للمرحلة اللي بعدها وهي نخلي شخص غريب يدخل البيت، الكلب هينبح عليه، نسيبه ينبح و الشخص يتجاهل الكلب تماما وياخد اي حاجة من البيت و يحاول يخرج بيها، هنا نبتدي نقرب الكلب من الشخص ونخليه يبتدي يهجم عليه، واول ما يهجم عليه نخلي الشخص يسيب الحاجة اللي اخدها ويجري.

10- ونكرر التمرين كذا مره لغاية ما الكلب يتقنه تماما.

11- بعد كده نخلي الشخص يتمسك بالحاجة اللي اخدها وهو بيهرب، وهنا نبتدي نجري وراه بالكلب، طبعا كل الكلام ده و الكلب مربوط، و ولما يوصل لباب المنزل نخليه يرمي الحاجة اللي اخدها و يهرب، ونكرر التمرين ده كتير علشان الكلب يفهم ان المطلوب منه ان الشخص او المتسلل يسيب اي حاجة اخدها من البيت.



بكده ينتهي التدريب، وهو تدريب مفيد للحراسة الاولية، يعني الكلب مش هيخلي حد غريب يدخل من غير ما ينبح وينبه كل اللي في البيت، وكمان بنديله مبادئ الحراسة.

هنا بقى لازم نسأل سؤال، ازاي اي لو جالي ضيف ادخله البيت. وللاجابة راجعوا الكلام اللي كتبته في الجزء الثامن هتلاقوا جزء بيتكلم عن كيفية التحكم في النباح على الغرباء والسماح للضيوف بالدخول.

حاجة تانيه مهمة احب انوه عنها وهي ان التدريب ده معمول للكلاب اللي معندهاش حس امني عالي وغير شرسه بالمره. لكن في كلاب عندها حس امني عالي ومش محتاجه اي تدريب على الحراسة، يعني مش شرط تكون محتاج التدريب ده لكلبك.

و الان مع الاسعار

فصيلة german shepherd

وهو ما يسمى بال wolf وهو في لغة الكلاب يسمى بالبلدي ده بيبدا سعره من 50 ج م حتي 800 ج م حسب حجمه

اما النوع الثاني وهو الفصيلة النقية مواصفاته التي تميزه عن انوع المخلط هو

الميل الواضح جدا في اخر فقرات الظهر و هو ما يسمي بالكسحة في الظهر والعيون اللوزية الشكل كما هو موضح في الصور المرفقة وده سعره بيبدا من 1800 ج م للجراء اي الصغار حتي 10000 ج م حسب درجة النقاء

و دى اسعار داخل مصر اما الكلب الشامبيون من هذه الفصيلة وصل سعره ل 2 مليون يورو

فصيلة sant bernard اضخم فصائل الكلاب

بالنسبة لفصيلة sant bernard تبدا الأسعار من 2000 ج م حتي 8000 ج م حسب مواصفاته

فصيلة boxer والشراسة

بالنسبة لفصيلة ال boxer يبدا سعره من 800 ج م حتي 4000 ج م حسب مواصفاته

فصيلة great dan اعلى فصيلة كلب

فصيلة great dan اي الدنواه يبدا من 1500 ج م حتي 7000 ج م

الشرس الذكي rotwieler

فصيلة road wiler تبدا من 1800 ج م حتي 10000 ج م حسب المواصفات

لهواة الضخامة و الرعب nipolitan mastif

فصيلة nipolitan mastif تبدا من 2000 ج م حتي 8000 ج م حسب المواصفات

فصيلة doberman

كلاب شرسة جدا و ميتتفهمش واسعارها بتبتدي من 250 ج م حتى 1500ج م حسب المواصفات

فصيلة bulldog

الشرس صغير الحجم قوي البنيان و اسعاره تبدا من 2000 ج م حتي 8000 ج

فصيلة old english masttif

من اضخم الكلاب في العالم الذي يصل وزنه حتى 180 كجم

وتبدا اسعاره من 4000 ج م 8000 ج م

فصيلة frensh masttif





شكله قريب شوية من old english masttif بس الحجم اصغر شوية و اسعاره بتبدا من 3000 ج م حتي 7000 ج م

فصيلة Dalmatian

Dalmatian المرقش وهو يتراوح سعره من 1200 ج م حتي 3000 ج م حسب المواصفات

فصيلة Labrador Retriever

Labrador Retriever و ما يطلق عليه في مصر ابلادور و هو صديق البصير اي فاقد البصر و يتراوح سعره من 750 ج م حتي 1800 ج م حسب المواصفات

فصيلة American Pit Bull Terrier

وده غني عن التعريف بشراسته و غبوته و يتراوح سعره من 1500 جم 4000ج م

فصيلة Bull Terrier

Bull Terrier من الكلب صغيرة الحجم قوية البنيان شرسة وقد اقيمت ابحاث حول عضة هذا الكلب والنتيجة كانت ان هذه العضة تزن حوالي 2 طن وده بجد مش هزار و هي موجودة في مصر بس نادرة وسعرها من 4000 ج م 8000 ح م

اسعار التدريبات الاساسية في معظم مراكز التدريب المحترمة


اولا كورس طاعة اساسية بمبلغ 750 جنيه يشمل التدريبات الاتية ( الجلوس _ النوم - الثبات - السلام - المشى - الاستعداد - النهى )

ثانيا كورس طاعة ثانوية بمبلغ ( حسب نوع الامر ) ( الزحف _ التظاهر بالموت - قفز الحواجز _ الخ )

كورس تدريبات هجوم بمبلغ 750 جنيه ( يشمل تدريبات العض _ و تدريب الكلب على الهجوم بعد سماء نداء الامر مباشرة )

كورس ترويض الشراسة بمبلغ 750 جنيه ( يتم تدريب الكلب عن الامتناع عن الهجوم بمجرد سماع نداء الامر )

اعداد نفسى للكلاب السعر حسب الحالة ( و ذلك لعلاج الخوف الذائد عند الكلاب - الشراسة الزائدة - حالات التشنج و التبولااللارادى من الخوف )

شكر خاص لكل من

1.موقع نينجاوي

2.موقع رابطة محبي الكلاب

3.بعض مربي الكلاب صحابي