تجربتى مع بنزين 80

**AHMEDCAR** · 18-10-2009 02:05 PM

فى البدايه دى تجربه شخصيه و لو حد جربها لنفسه انا مش متحمل اى عواقب

طبعا زى ما كلنا عارفين ان غلو اسعار البنزين خلت الناس تتجنن و انا منهم

بس اعمل ايه معروف ان الفيرنا ضغط الموتور بتعها بيوصى ببنزين 91 على الاقل

انا معايا واحد صحبى فى الشغل معاه شاهين و دى عادى لما تحطلها 80 مابتقولش لا و كذا مره اكون معاه و هو بيحط بنزين و الاقى فيرنا و لانسر و لانوس و تويتا و حاجات حديثه كتير بتحط 80

فى مره سالت واحد من ملاك الفيرنا اخباره معاك ايه قالى زى الفل العربيه ممتازه و مافيهاش اى مشاكل خالص و من هنا ابتدت الفكره تلعب فى دماغى

و بصراحه حسبتها لقيت فرق فى التفويله الواحده حوالى 35 جنيه برضو مبلغ بدل 70 بدفع 35 فرق كبير

توكلت على الله و روحت حطيت 80 و كانت العربيه فاضيه خالص فولتها ب 37 جنيه

و مشيت طول الطريق من الرحاب الى مدينه نصر الحب كويس و العربيه ماشيه تمام مافيش مشاكل خالص

جيت اول ماركنت العربيه و بطلتها لقيتها تمام برضو مافيش مشاكل

جالى مشوار بليل دورت العربيه حسيت برعشه خفيفه جدا تكاد تكون غير محسوسه قولت عادى و لسه بقول بسم الله

و بكبس بنزين سمعت صوت تصقيف المحرك قولت برضو عادى اظبط رجلى شويه و هايروح و فعلا ظبط رجلى و الصوت راح

بس برضو مارحش قوى مع اى كبسه او مطلع جامد ماتكونش كابس فيه العربيه بتكركر معاك

و شائت الصدفه انى تانى يوم اروح احمل العربيه حاجات كتير من البيت لمصر الجديده و جيت طالع طلعتى العاديه سمعت برضو صوت الكركره المحترم

و بما ان الكهرباء فى العربيه الكترونى فامينفعش انى ااخر الشراره او اقدمها خالص

المهم قولت اتعايش مع الصوت شويه و اعلى الكاست و مش هاسمعه

جيت فى يوم بعديها ابويا خرج بالعربيه و لقيته راجع من الشغل بيقولى العربيه دى مش عربيتى انت عملت فيها ايه لا انا متعود ادوس العربيه تجرى معايا و لما اكبس تستجيب انت موتها

انا لما قولت ان السحب و الكبس كان عادى معايا لانى بحسب الكبس بعد 3 ار بى ام لكن والد لما بيكبس بيكبس على 2 ار بى ام و دلا كفيله انها تبينله جميع الاصوات و تحسسه ان العربيه بطه بلدى

من الاخر عمليه الكركره دى مالهاش حل خالض و و كترها بيودى الى انهيار البيلات و الصباب فنصيحه محدش يحط ال80 فى العبيه دى خالص اخرك 92 كمان

من الاخر هتلاقوا مركز شباب الشيشه فى الموتور قاعد بيكركر

**M.Osman** · 18-10-2009 02:32 PM

شكراً يا كبير على نقل التجربة ...

**MMamdouh** · 18-10-2009 03:55 PM

thanks for the feedback

عشان تحط 80 لازم تعدل توقيت الشرارة و دة غير ممكن فى كتير من العربيات

فى الاوبل و الشيفرولية و الدايو بيبقى فيه فيشة من 3 PIN بتحدد من خلالها اوكتين البنزين اللى بتحطة و على اساس الفيشة دى الكونترول بيحدد زمن الاشعال الصح المناسب لدرجة اوكتين البنزين المستعمل

MMamdouh

**Karim_Monir** · 18-10-2009 04:02 PM

ده انا على 92 وكتير بتسقف
مش عايز اقولك لما مرة حطيت 90 العربية عملت ازاي
مش ماتت
اتقتلت
اتضربت بالنار
90 مش 80
اعتقد انك ممكن تحط 80 لوانت مسافر مثلا 500 كم لمطروح
وناوي تكون لوحدك او انت وواحجد بالكتير
ودنجة دنجة مع نفسك وتغنيلك انا والعذاب وهواك
غير كدة التسقيف فعلا هايبهدل موتور العربيةويجيب اجلة

ممدوح:
مفيش طريقة ناخر بيها وقت الاشعل في العربيات اللي ظبطها الكتروني

**MMamdouh** · 18-10-2009 04:24 PM

طريقة مباشرة كدة و انت معندكش فيشة اوكتين... لا

فيه ناس اقترحت تغيير مكن حساس الكرنك بس العملية مش بالسهولة دى... على لفات عالية الشرارة بتتقدم كتير و مدى التقديم و التاخير حيختلف باختلاف لبنزين و بالتالى الطريقة دى غير عملية خالص

ممكن لو مركب SMT7 او كدة ممكن تعمل ماب لبنزين 80 يكون فيها كل حاجة زى الطبيعى بس توقيت الاشعال فقط هو اللى متغير

MMamdouh